Vaşinqtonda fəaliyyət göstərən Yaxın Şərq İnstitutu İsrail və Azərbaycan əlaqələrinə həsr olunan məqalə dərc edib.
Sozcu.az xəbər verir ki, məqalədə Azərbaycanın İsraildə səfrilik açmasından, İsrailin Azərbaycana silah satmasından bəhs edilir.
Müəllif məqalədə İsrail mediasına istinadən yazır ki, "Meteor Aerospace" və "SpearUAV" müdafiə şirkətlərinin bu ilin əvvəlində və ya 2024-cü ilə kimi Azərbaycanla müqavilələr imzalaması gözlənilir. Qeyd olunur ki, Azərbaycanın İsraildən patrul gəmisi, raketlər və hava hücumundan müdafiə sistemi alacağı gözlənilir.
"SpearUAV" şirkəti İsraildə pilotsuz uçuş aparatlarının (PUA) istehsalı və yaradılması ilə məşğuldur. 30 ildən çox təcrübəyə malik "Meteor Aerospace" şirkəti isə hücum və müdafiə raket sistemləri, peyklər, ballistik raketlərdən müdafiə sistemləri üzrə ixtisaslaşıb.
Qeyd edək ki, Azərbaycanın silah təchizatında İsrailin payı son illərdə artıb. İsrail Azərbaycana PUA-lar, raket sistemləri, hava hücumundan müdafiə sistemləri, zirehli texnikalar tədarük edib.
