Əkrəm Həsənov: Kart limiti vicdanlı vətəndaşların hüquqlarını məhdudlaşdırır
İqtisadçı ekspert Əkrəm Həsənov Azərbaycanda avqustun 1-dən kartdan-karta (card-to-card) köçürmələrə tətbiq olunan yeni limitləri şərh edib.
Xatırladaq ki, yeni qaydalara əsasən, bir kartdan gün ərzində maksimum 5 köçürmə etmək və eyni sayda vəsait qəbul etmək mümkündür. Bundan başqa, kartdan-karta köçürmələrin aylıq ümumi məbləği 20 min manatla məhdudlaşdırılıb. Rəsmi izaha görə, bu dəyişikliklər maliyyə əməliyyatlarında şəffaflığın artırılması, fırıldaqçılıq, vergidən yayınma və qanunsuz mərc oyunları ilə bağlı risklərin azaldılması məqsədi daşıyır.
Əkrəm Həsənov hesab edir ki, məqsəd başadüşülən olsa da, bu hədəfə inzibati limitlər deyil, gəlirlərin bəyan edilməsi və rəqəmsal monitorinq sistemi vasitəsilə nail olmaq daha səmərəli olardı. Onun sözlərinə görə, inkişaf etmiş ölkələrdə vətəndaşların gəlirləri bəyan olunduğundan, hesablara daxil olan vəsaitlərin qanuniliyini izləmək daha asandır.
Ekspert bildirib ki, tətbiq edilən məhdudiyyətlər xüsusilə bəzi mikrosahibkarlar və iri məbləğli qanuni köçürmələr həyata keçirən vətəndaşlar üçün çətinlik yarada bilər. O, hesab edir ki, bu vəziyyət bəzi hallarda nağd ödənişlərin artmasına səbəb ola bilər və nəticədə dövlətin nağdsız əməliyyatlara nəzarət imkanları zəifləyə bilər.
Əkrəm Həsənov, həmçinin qeyd edib ki, vətəndaşlara tətbiq edilən bu cür məhdudiyyətlərin hüquqi əsaslarının daha aydın müəyyənləşdirilməsi vacibdir.
Qeyd edək ki, iqtisadçının bu fikirləri onun şəxsi ekspert mövqeyini əks etdirir. Yeni limitlərin effektivliyi və iqtisadi təsirləri ilə bağlı müxtəlif ekspertlər fərqli mövqelər səsləndirirlər.
