Dövlətdən can əsirgəməyənləri incitmək OLMAZ…

Sahil Babayevdən narazılıq ərşə qalxıb. Bu, ayrı məsələdir. İndi təkcə problem bu nazirlikləmi bağlıdır?

XEYR.

Hər sahədə problem var. Səhiyyə, təhsil, iqtisadiyyat, məhkəmə… Hərəsində özünə məxsus çatışmazlıqlar, haqsızlıqlar mövcuddur. Elə məsələlər var ki, orada “amma” sözü arxa plana keçməlidir. Həssas məqamdan çıxan həssas insanlarla həssas davranmaq lazımdır. Özü də çox şey lazım deyil. Bir az vicdan, bir az şərəf, bir az insaf və bütöv ƏDALƏT…
Sui-istifadə halları var, bu da üzücü məsələdir. Amma ortada ciddi bir problem var. Dövlətin sütunu olan etimad zədələnir. Hər kəs dövlətinin güclü olmasını istəyir. Bir həqiqət var: Dövlət ədalətli olanda güclüdür. Dövlətin ədalətini kim zədələyirsə, ona olan etimada, etibara, inama kölgə salarsa, dərhal, özü də acımasızcasına cəzalandırılmalıdır.
Şəhid ailələri, qazilərin sayı milyonlara deyil ki, onları səbrlə dinləyib, problemlərini öyrənmək, həll eləmək çətin olsun. Toplamda 50-60 min şəhid və qazi var. Onların da bir qismi narazıdır. Həll edin də. Axı, indi 90-cı illər deyil. Milyardlarımız var, bu ölkədə o qədər sərvət var ki, illərdir hərə bir tərəfdən talayır, amma bitib tükənmir. Nə olar ki, bir az da haqqı çatanlara verin. Guya bu məmurlar və yeddi arxadönənləri milyonları basıb yeyəndə ona haqqı çatırdı? Niyə onlara hər şey olar, amma Vətən üçün ən azı bir gün döyüşən, qan tökməsə belə səngərdə tər tökən birinin haqqı o məmur və balalarından on dəfə çoxdur. İndi bu haqsızlığı kimin ayağına yazaq? Düzü, heç bir adamın ayağına yazılacaq şey də deyil. Burda çox böyük ədalətsizlik, günah və ah-nalə var. Olmaz bəylər, müəllimlər, kişilər, vallah belə olmaz.

Bu Vətəndən, Millətdən, Dövlətdən can əsirgəməyənləri incitmək OLMAZ…

jurnalist, Zaur Əhməd

Facebook Comments