Putin Hindistanla münasibətlərə xüsusi önəm verir – Elxan Şahinoğlu
Hindistanın xarici işlər naziri Subrahmanyam Jaishankarın avqustun 23-24-də Moskvaya səfəri Rusiya-Hindistan münasibətlərinin gələcəyi baxımından diqqət çəkib.
Politoloq Elxan Şahinoğlu bu barədə Sozcu.az-a açıqlamasında bildirib ki, Hindistan hazırda Vaşinqtonla Moskva arasında balansı qorumağa çalışır.
Qeyd edək ki, Jaishankar Moskvada Hindistan-Rusiya Hökumətlərarası Komissiyasının iclasında iştirak edib və Rusiya Prezidenti Vladimir Putin tərəfindən qəbul olunub.
Elxan Şahinoğlunun sözlərinə görə, ABŞ-ın Yeni Dehliyə Moskva ilə münasibətləri məhdudlaşdırmaq istiqamətində təzyiqlərinə baxmayaraq, Hindistan Rusiya ilə əməkdaşlıqdan imtina etmək niyyətində deyil. Əksinə, iki ölkə arasında ticarət və iqtisadi əlaqələr genişlənməkdədir.
Putin Jaishankarla görüşündə ötən il Rusiya-Hindistan ticarətində müəyyən azalma olduğunu, lakin 2026-cı ildə göstəricilərin yenidən artdığını bildirib. Rusiya prezidenti bu prosesdə Hindistanın baş naziri Narendra Modinin şəxsi diqqətini də xüsusi qeyd edib.
Politoloq hesab edir ki, Hindistanın Rusiya ilə enerji əməkdaşlığında da ciddi maraqları qalır. Rusiya neftinin Hindistan üçün münasib qiymətə alınması Yeni Dehlinin enerji təhlükəsizliyinin təmin olunmasında mühüm rol oynayır. Eyni zamanda, Rusiya ilə Hindistan arasında gübrə, nüvə enerjisi, yüksək texnologiyalar və digər sahələrdə əməkdaşlıq genişlənir.
Şahinoğlu qeyd edib ki, Moskva Hindistanla münasibətlərə yalnız ikitərəfli əlaqələr çərçivəsində deyil, Şanxay Əməkdaşlıq Təşkilatı və BRİKS platformaları baxımından da xüsusi əhəmiyyət verir.
Onun sözlərinə görə, qarşıdakı dövrdə Putin-Modi görüşü də Rusiya-Hindistan münasibətlərinin istiqamətini müəyyənləşdirən əsas hadisələrdən biri olacaq. Putin Jaishankarla görüşündə Modi ilə yaxın zamanda görüşəcəyinə işarə edib. Hindistanın xarici işlər naziri də Modi tərəfindən Putinə görüşlə bağlı mesaj çatdırıb.
Beləliklə, Hindistan bir tərəfdən ABŞ-la strateji münasibətlərini qoruyur, digər tərəfdən isə Moskva ilə uzun illər ərzində formalaşmış siyasi, iqtisadi və enerji əlaqələrindən imtina etmir. Bu isə Yeni Dehlinin çoxvektorlu xarici siyasət kursunu davam etdirdiyini göstərir.
