Sozcu.az

Yeni araşdırmanın nəticələrinə görə, elektrikli skuterlərdən istifadə edən insanlar velosipedçilər və ya motosikletçilərlə müqayisədə beyin və daxili orqan xəsarətləri almaq baxımından daha yüksək risklə üzləşirlər.

Məlumata görə, elektrikli skuter sürən qadınlarda kişilərlə müqayisədə ağır xəsarətlər riski daha yüksəkdir.

Məlumatlar göstərib ki, motosikletçilərlə müqayisədə elektrikli skuter istifadəçilərinin kəllə-beyin travması alma ehtimalı 3,5 dəfə, daxili orqanlarının zədələnməsi 1,5 dəfə, arteriya və ya venalarının zədələnməsi isə 3,2 dəfə yüksəkdir. Velosipedçilərlə müqayisədə isə bu risklər müvafiq olaraq 1,7, 1,4 və 1,7 dəfə yüksək olub.

Cərrah Devid Bodanskinin rəhbərlik etdiyi britaniyalı ekspertlər qrupu Milli Ağır Xəsarətlər Reyestrindən 15 247 pasiyent haqqında məlumatları təhlil etdikdən sonra bu nəticəyə gəlib. Təhlil edilən məlumatlar arasında 580 elektrikli skuter istifadəçisi, 7 mindən çox motosikletçi və 7 740 velosipedçi haqqında məlumatlar olub.

Araşdırma həmçinin göstərib ki, elektrikli skuter istifadəçilərinin hər on nəfərindən birindən çoxu xəsarət alma riski daha yüksək olan uşaqlardır.

Elektrikli skuter istifadəçilərinin yalnız 5,9 faizinin dəbilqə taxdığı müəyyən edilib. Motosikletçilər arasında bu göstərici təxminən 75 faiz, velosipedçilər arasında isə 45 faiz təşkil edib. Bununla belə, elektrikli skuter istifadəçilərində sınıq riski motosikletçilərlə müqayisədə 20 faiz, velosipedçilərlə müqayisədə isə 10 faiz aşağı olub.

Elektrikli skuterlər Liverpul, Bristol, Birmingem kimi şəhərlərdə, eləcə də Londonun bir sıra rayonlarında dövlətin pilot proqramları çərçivəsində icarəyə götürülə bilər. Lakin hazırda şəxsi elektrikli skuterlərdən ictimai yerlərdə istifadə qanunsuzdur.

Bununla belə, tədqiqatçıların sözlərinə görə, elektrikli skuterlərdən Böyük Britaniyanın bütün ərazisində getdikcə daha çox istifadə olunur, lakin xəsarətlərin xarakteri, ağırlıq dərəcəsi və məruzqalma səviyyəsi nəzərə alınmaqla, risk barədə məlumatlar hələ də kifayət deyil. AZƏRTAC)