Qətl işi ilə bağlı Rəşad Dağlının ifadəsi yayıldı – yeni detallar

Tanınmış meyxanaçı Rəşad Dağlı barəsində aparılan cinayət işi ilə bağlı istintaq materiallarında onun verdiyi ifadənin detalları ictimaiyyətə məlum olub.

Sozcu.az xəbər verir ki, ifadədə hadisənin gedişatı, tərəflər arasında yaranan mübahisə və sonradan baş verən ölüm faktı barədə geniş məlumatlar yer alır.

İfadəyə əsasən, mübahisə tanışlar arasında yayılan iddialar və qarşılıqlı ittihamlarla başlayıb. Tərəflər arasında gərginlik telefon danışıqları və SMS yazışmaları fonunda artıb və sonradan görüşə qədər davam edib.

Hadisə nəticəsində həyatını itirən şəxs İsgəndər Mehdiyev olub.

İfadədə qeyd olunan əsas məqamlar

Məlumata görə, tərəflər arasında əvvəlcə söhbət və izahatlar olub, daha sonra isə qarşılıqlı ittihamlar və təhdid xarakterli mesajlar göndərilib. İfadədə qeyd olunur ki, vəziyyət getdikcə gərginləşib və son görüş zamanı qarşıdurma baş verib.

Şəxs bildirib ki, görüş zamanı əvvəlcə sözlü mübahisə yaranıb, daha sonra isə fiziki qarşıdurma baş verib və hadisə ölüm faktı ilə nəticələnib. Hadisədən sonra o, avtomobilini evinin qarşısında saxlayaraq hüquq-mühafizə orqanlarına könüllü müraciət etdiyini deyib.

Məhkəmə qərarı

Hadisə 2022-ci il noyabrın 9-da baş verib. Rəşad Dağlı barəsində Cinayət Məcəlləsinin 120.1 və 228.4-cü maddələri ilə ittiham irəli sürülüb və Bakı Ağır Cinayətlər Məhkəməsinin qərarı ilə 9 il 6 ay azadlıqdan məhrumetmə cəzası təyin olunub.

Məlumatlar istintaq ifadəsi əsasında ümumiləşdirilmiş rəsmi materiallara istinad edir. (Milli.az)