Azərbaycan səhiyyəsində ciddi struktur dəyişiklikləri aparılsa da, sistemin dayanıqlılığı və gələcəyi ilə bağlı narahatlıqlar qalmaqdadır. Bu narahatlığın əsas səbəblərindən biri həkimlərin yaş bölgüsü, kadr çatışmazlığı və xaricə beyin axınıdır. Rəsmi statistika və ekspert rəyləri göstərir ki, ölkədə tibbi kadr potensialı tədricən yaşlanır, gənc mütəxəssislər isə daha çox xarici ölkələrdə işləməyə üstünlük verirlər. Sozcu.az kaspi-yə istinadla xəbər verir ki, Tibbi Ərazi Bölmələrini İdarəetmə Birliyinin (TƏBİB) məlumatına görə, ölkənin səhiyyə sistemində fəaliyyət göstərən həkim heyətinin yaş strukturunda ortayaşlı kadrlar üstünlük təşkil edirlər. Ümumi heyətin təxminən 76 faizi 35-55 yaş arası mütəxəssislərdən ibarətdir. 35 yaşadək gənc həkimlərin payı isə cəmi 10.3 faiz təşkil edir. Bu rəqəmlər göstərir ki, yaş balansı ciddi şəkildə pozulub.  Dövlət Statistika Komitəsinin 2025-ci ilin əvvəlinə olan məlumatına əsasən, ölkədə ümumilikdə 35.2 min həkim fəaliyyət göstərir. Onların 26.2 mini dövlət, 9 mini isə özəl tibb müəssisələrində çalışır. Qadın həkimlərin sayı 23.2 min nəfərdir. Həkim-anestezioloq Turanə Rəsulova deyir ki, əslində son illər Azərbaycanda gənc həkimlərin səhiyyə sisteminə gəlişində müəyyən dinamika hiss olunur. Amma proses xüsusilə regionlarda zəif gedir: "Gənclərin mühüm hissəsi ölkədən getməyə üstünlük verir. Artıq universitetin ilk illərindən etibarən tələbələr özlərini Almaniya, Türkiyə və ABŞ kimi ölkələrdə ixtisas təhsili almağa hazırlayırlar. Bu, gələcək üçün təhlükəli tendensiyadır". Həkimin sözlərinə görə, Azərbaycanda rezidentura sisteminin tətbiqi çox vacib addım idi. Amma bu sistemin nə dərəcədə səmərəli işlədiyi hələ də sual altındadır: "Rezident həkim-assistentlər 400-500 manat civarında aylıq məvacib alırlar. 24 yaşında, həyatını yeni quran bir gənc üçün bu maaş nə dərəcədə yetərlidir? O, artıq ailə qurmalı, övlad sahibi olmalı, sosial həyatını davam etdirməlidir. Ona görə də gənc həkimlər ən azından qonşu Türkiyəyə, Almaniyaya və ya Avropaya getməyin daha məqsədəuyğun olduğunu düşünürlər". Turanə Rəsulova əlavə edir ki, dövlət xəstəxanalarında həkimin bir müayinə üçün hesabına yatırılan məbləğ cəmi 1 manat 95 qəpikdir: "İcbari Tibbi Sığorta bu qədər vəsait ayırır. Xəstəyə verilən çekdə isə həmin xidmət 25-26 manat kimi göstərilir. Bu, sistemdəki böyük uyğunsuzluq və ədalətsiz bölgü deməkdir". Həmsöhbətimizin qənaətincə, həkimlərin sosial statusu və cəmiyyətdəki nüfuzu da getdikcə zəifləyir: "Həkim olmaq uzun illərin zəhmətidir. Bu peşə sahibləri cəmiyyətin ən ali təbəqəsi sayılmalıdır. Əks halda, yanlış münasibət formalaşır. Türkiyədə həkimlərə qarşı zorakılıq halları artıb. Əgər bu reallıqlardan nəticə çıxarmasaq, eyni aqibət bizi də gözləyə bilər". Azərbaycan Könüllü Həkimlər Assosiasiyasının (AKHA) sədr müavini Hüseyn Hüseynzadə bildirir ki, gənc həkimlərin əsas problemi təcrübə ilə bağlıdır: "Rezidentura və aspiranturaya qəbul ola bilməyən tələbələrin praktik bacarığı aşağı olur. Çünki xəstə üzərində yetərincə işləyə bilmirlər. Dövlət klinikaları bütün məzunları işə qəbul edə bilmir, özəl klinikalar isə yalnız təcrübəli həkimləri işə götürürlər. Bu səbəbdən uyğun iş və ya təcrübə tapa bilməyən tələbələr yaxın ölkələrə, məsələn, Türkiyəyə üz tuturlar. Türkiyədə həkimlər 3-5 il ərzində 100-150 xəstə üzərində praktiki təcrübə qazanırlar ki, bu da Azərbaycanda mümkün deyil. Eyni zamanda Almaniya da həm təhsil, həm də gələcək həyat üçün əlverişli seçim sayılır". Sədr müavini hesab edir ki, xaricdə stabil iş və gəliri olan birinin Azərbaycana qayıtması üçün mütləq ciddi maddi stimul olmalıdır. O, bununla bağlı təşviqedici layihələrin həyata keçirilməsini vacib sayır. Sosial-Strateji Tədqiqatlar və Analitik Araşdırmalar Birliyinin rəhbəri İlqar Hüseynli isə bildirir ki, hazırda bütün rayonlarda həkim çatışmazlığı var: "Məsələn, Gədəbəy Mərkəzi Xəstəxanası vaxtilə tam gücü ilə işləyirdi, indi isə həkim tapılmır. Şirvandan Gəncəyə qədər normal cərrah-travmatoloq tapmaq müşkülə çevrilib. Çünki həkimlər sürətlə ölkəni tərk edirlər. Düzdür, onlarla bağlı konkret statistika yoxdur. Amma müşahidələr göstərir ki, gedənlərin sayı ildən-ilə sürətlənir. Hətta nəinki gənc, bizim yaş qrupundan olan həkimlər də ölkədən gedirlər. Azərbaycandan son 5-7 ildə təkcə Almaniyaya 2 000-2 500 həkim köç edib. Bu il ABŞ-də USMLE (United States Medical Lisensing Examination - Birləşmiş Ştatların Tibb üzrə Lisenziyalaşdırma İmtahanları) prosesindən uğurla keçən 10 azərbaycanlı gənc həkim də bu ölkədə çalışmaq imkanı qazanıb". Ekspertin sözlərinə görə, həkimlərin xaricə getməsinin əsas səbəbi aşağı maaş və qeyri-sabit iş şəraitidir: "Qonşu Türkiyədə rezident 5-7 min manat dəyərində maaş aldığı halda, Azərbaycanda eyni kateqoriyalı həkim 400 manat alır. Bu fərq, təbii ki, seçimdə həlledici rol oynayır". İlqar Hüseynli hesab edir ki, sistemin digər problemi təcrübəli, lakin yaşlı həkimlərin işdən uzaqlaşdırılmasıdır: "65 yaşa çatan həkimlərin avtomatik işdən çıxarılması doğru deyil. İnkişaf etmiş ölkələrdə məşhur həkimlər 70-75 yaşında həm müalicə, həm də tədrislə məşğul olurlar. Biz isə təcrübəni itiririk. Əslində yaşlı həkimlər gənclər üçün mentor və tədrisçi rolunda saxlanılmalı, onların bilik və təcrübəsi yeni nəslə ötürülməlidir. Bu, həm sistemin keyfiyyətinə, həm də tədris prosesinə ciddi təsir göstərə bilər". Almaniyanın Frankfurt Oder xəstəxanasının Qulaq, burun, boğaz xəstəlikləri, üz plastik və rekonstruktiv klinikasının baş həkimi Cavid Hüseynzadə deyir ki, gənclərin xaricə üz tutmasının əsas səbəbi Azərbaycanda diplomdan sonrakı təhsilin zəif təşkil olunmasıdır. "Rezidentura mərhələsində oxuyan həkimlər çox aşağı maaş alır, bunun üçün lazımi baza və imkanlar yoxdur. Məsələn, Almaniyada rezidenturada təhsil alan həkim birinci ildən 3 500-4 000 avro civarında maaş qazanır. Bu gəlir təkcə gündəlik xərcləri deyil, həm də təhsilə sərmayə qoymaq imkanlarını yaradır", - o vurğulayır. Mütəxəssisin sözlərinə görə, Almaniyada həkimlərin peşəkar inkişafı üçün geniş şərait mövcuddur: "Rezidenturada oxuyan hər bir həkimə beynəlxalq tibbi ədəbiyyata pulsuz giriş imkanı verilir. Əgər ölkədaxili kurslara qatılırsa, həmin kursların xərclərinin bir hissəsi xəstəxana tərəfindən qarşılanır. Yəni sistem həkimin həm maddi, həm də elmi inkişafını dəstəkləyir. Bu da təbii olaraq həkimlərin Almaniyaya axınının artmasına səbəb olur". Cavid Hüseynzadənin fikrincə, bütün bu reallıqlara baxmayaraq, Azərbaycan səhiyyəsi hazırda özünün ən parlaq dövrünü yaşayır: "İllər öncə Avropadan ölkəmizə yenilik gətirənlər əsasən xarici həkimlər idi. Amma bu gün fərqli mənzərə formalaşıb, artıq xaricdə təhsil almış, orada təcrübə toplamış, lakin doğma dilimizdə danışan həmkarlarımız Azərbaycana qayıdaraq ən yüksək səviyyədə xidmət göstərirlər".

Ukrayna müharibənin 1341-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 136 890 hərbçi, 11 291 ədəd tank, 23 477 ədəd zirehli döyüş maşını, 34 002 ədəd artilleriya sistemi, 1 526 ədəd RYAS (reaktiv yaylım atəş sistemi), 1 230 hava hücumundan müdafiə sistemi, 428 ədəd hərbi təyyarə, 346 ədəd helikopter, 65 517 ədəd avtomobil texnikası, 74 399 ədəd PUA, 3 880 qanadlı raket, 28 gəmi/kater, 1 sualtı qayıq, 3 981 xüsusi avadanlıq itirib.

Bakı–Qazax avtomagistral yolunun Ağdaş rayonu ərazisindən keçən hissəsində ağır yol-nəqliyyat hadisəsi baş verib. Sozcu.az xəbər verir ki, qəza mişar daşı daşıyan qoşqulu KamAZ markalı yük maşını ilə balıq daşıyan QAZel markalı yük maşınının toqquşması nəticəsində baş verib. Nəticədə QAZel-in sürücüsü, 30 yaşlı Eldar Tağıyev və sərnişini aldıqları xəsarətlərdən hadisə yerində ölüblər. Güclü zərbənin təsirindən balıqlar yola və ətraf əraziyə səpələnib. Faktla bağlı araşdırma aparılır.

PKK terror təşkilatı Türkiyədəki fəaliyyətinə son qoyduğunu və silahlılarını geri çəkdiyini açıqlayıb. Sozcu.az xəbər verir ki, bu barədə terror təşkilatının liderlərindən olan Sabri Okun açıqlamasında qeyd olunub. PKK təşkilatın lideri Abdullah Öcalanın çağırışı ilə 12-ci Qurultayında qəbul etdiyi qərarlar əsasında özünü buraxdığını və Türkiyədən tamamilə çəkildiyini bildirib.

Bərdə rayonunda avtomobil arxa aşıb. Sozcu.az xəbər verir ki,Koroğlu Pirməmməd oğlu Rzayev "Mitsubişi Pajero" markalı avtomobillə Məşədibişli kəndindən Mollalı kəndi istiqamətində gedərkən idarəetməni itirib və avtomobil yolun kənarındakı arxa aşıb. Nəticədə sürücü hadisə yerində ölüb. Faktla bağlı cinayət işi başlanaraq ibtidai istintaq aparılır.

Bakı metrosunda insident olub. Sozcu.az Lent.az-a istinadən xəbər verir ki, metronun "Koroğlu" stansiyasında qeydə alınıb. Platformada bir qrup vətəndaş arasında insident yaranıb və onlar səs-küy salıblar.  Hadisəyə polis əməkdaşları müdaxilə edib. İnsident törədən 4 nəfər saxlanılaraq, polis şöbəsinə aparılıb. Məhkəmənin qərarı ilə, onların hər biri barəsində 30 gün müddətinə inzibati həbs cəzası təyin edilib.

“Məktəbəqədər və Ümumi Təhsil üzrə Dövlət Agentliyinin (MÜTDA) Mətbuat xidməti mənə yazır ki, Eşqi Bağırov işdədir. Əgər belədirsə, yeddi sual göndərdim ki, Eşqi Bağırova çatdırsınlar. Bakı və region məktəblərində dərsliklərin bir hissəsi tam və ya qismən verilməyib, vakant müəllimlər hələ məktəblərə getməyib, bu da tədris təşkil etməyə imkan vermir, 23 oktyabrdır, hələ də tarifikasiyalar təsdiq edilməyib, xüsusi təhsil müəssələrində tədris prosesi səriştəsiz qərarlar ucbatından iflic vəziyyətindədir, rayon təhsil idarələrinin müdirləri fironluq edirlər, kim nə istəyir, necə istəyir, onu da edir, ölkədə hər 6 məktəbdən birində direktor, hər 4 məktəbdən birində müavin əvəzçiliklə, həvalə ilə işləyir... Əgər Eşqi Bağırov işinin başındadırsa, deyin, gizlənməsin”. Sozcu.az xəbər verir ki, bunu təhsil üzrə ekspert Elşən Qafarov bildirib. E.Qafarovun sözlərinə görə, ölkədə ümumi təhsili və məktəbəqədəri idarə etmək üçün normativ aktlar da yoxdur: “Reallıq budur ki, Emin Əmrullayevlə Elnur Əliyev (red. - Təhsil İnstitunun direktoru) ölkə təhsilini xaosa sürükləyiblər. Bir neçə gün öncə Biləsuvar rayonu Amankənd məktəbinin direktoru Anar İmanov baş verən özbaşınalıq, rüşvətxorluq, rotasiya fırıldaqları və digər məsələlərlə bağlı açıq şəkildə ölkə Prezidentinə müraciət etdi ki, təhsil sistemində bu kimi iyrənc məsələlər var. Bəlkə də, Azərbaycan tarixində bir ilkdir, artıq direktorlar da dözə bilmirlər. Nəticədə, elan olundu ki, həmin direktor etik davranış qaydalarını pozduğuna görə işdən çıxarıldı. Sən demə, hər hansı vətəndaşın ölkə rəhbərinə müraciət etməsi etik qaydaların pozulması demək imiş. Hələ ki Emin Əmrullayev və Elnur Əliyev cütlüyü ölkə təhsilində nə istəyirlərsə, onu edirlər, sistemi bazara döndəriblər. Qara dövr davam edir. Düşünürəm ki, hər ikisi layiqli cəzalarını alacaqlar, o gün uzaqda deyil”.pravda.az)

Ağstafa şəhər Musiqi və İncəsənət Mərkəzinin musiqi müəllimi işdə ölüb. Sozcu.az APA-ya istinadla xəbər verir ki, 1984-cü il təvəllüdlü Günel Hüseynova işdə olarkən qəfil səhhəti pisləşib. O, xəstəxanaya çatdırılsa da, həyatını xilas etmək mümkün olmayıb. Faktla bağlı araşdırma aparılır.

Səhiyyə Nazirliyi genetik analizlərin icbari tibbi sığorta üzrə xidmətlər zərfinə salınmasını təklif edir. Sozcu.az Report-a istinadən xəbər verir ki, bunu Orqan Donorluğu və Transplantasiyası üzrə Koordinasiyası Mərkəzinin İdarə Heyətinin sədri, həkim-reanematoloq Yeganə Abbasova Sumqayıtda keçirilən "Regionda ilk: Meyitdən orqan nəqli. Uğurlu təcrübədən gələcəyə doğru" Beynəlxalq Elmi Konfransında deyib. O qeyd edib ki, sümeli və kök hüceyrə transplantasiyası üçün bu analizlər vacibdir: "Xatırlatmaq istəyirəm ki, hazırda ümumilikdə 1021 nəfər müxtəlif orqanların çatışmazlığından əziyyət çəkdiyindən növbədədir".

Müharibə yox, yalnız sülh, əbədi sülh. Lütfən, xahiş edirəm. Sozcu.az xəbər verir ki, bunu Venesuela Prezidenti Nikolas Maduro ABŞ Prezidenti Donald Trampa ingilis dilində müraciətində bildirib. Qeyd edək ki, ötən gün Prezident Donald Tramp ordunun Latın Amerikasında (Venesuela) narkokartellərə qarşı quru əməliyyatına başlaya biləcəyini bəyan edib.

Ukraynanı dəstəkləmək və Rusiyaya təzyiqi saxlamaq üçün səylərimizi davam etdirmək çox vacibdir. Sozcu.az xəbər verir ki, bunu Fransa Prezidenti Emmanuel Makron bildirib. Makron qeyd edib ki, yaxın həftələrdə Ukraynaya əlavə maliyyə dəstəyinin göstərilməsi üçün səylər göstəriləcək. Fransa lideri Ukraynaya “Aster” raketlərinin və “Miraj” təyyarələrinin veriləcəyini təsdiqləyib.

ABŞ “USS Gerald R. Ford” təyyarədaşıyan gəmisinin başçılıq etdiyi zərbə qrupunu Cənub Komandanlığının ərazisinə yerləşdirəcək. Sozcu.az xəbər verir ki, bu barədə ABŞ müdafiə nazirinin ictimaiyyətlə əlaqələr üzrə köməkçisi Şon Parnell məlumat verib. O bildirib ki, bu qüvvələr regionda narkotik qaçaqmalçılığı ilə mübarizə üçün istifadə olunacaq: "Prezidentin transmilli cinayətkar təşkilatları sıradan çıxarmaq və vətəni müdafiə etmək üçün narkotik terrorizmlə mübarizəyə dair direktivinə dəstək olaraq, müdafiə naziri “USS Gerald R. Ford Carrier Strike Group” və onun hava qanadını ABŞ-ın Cənub Komandanlığının məsuliyyət zonasına göndərib”.

ABŞ-ın “Tomahavk” raketlərinin Ukraynaya təhvil verilməsi ilə bağlı danışıqlar davam edir. Sozcu.az xəbər verir ki, bunu Böyük Britaniyanın Baş naziri Keyr Starmer deyib. O, jurnalistin sualına “Biz hamımız bunun üzərində işləyirik” cavabını verib. Starmer həmçinin əlavə edib ki, Böyük Britaniya son günlər və həftələr ərzində Ukraynaya çox sayda raketlər yerləşdirib.

ABŞ ordusu Karib hövzəsində narkotik daşıyan daha bir gəmiyə zərbə endirib. Sozcu.az xəbər verir ki, bu barədə ABŞ-ın müdafiə katibi Pit Heqset açıqlama yayıb. Bildirilir ki, hücum nəticəsində 6 nəfər ölüb. Qeyd olunub ki, müdafiə katibi gəminin Venesuelanın “Tren de Aragua” dəstəsinə məxsus olduğunu bildirib. Bu, son bir neçə ayda ABŞ-ın beynəlxalq sularda narkotik daşıdığı deyilən gəmilərə 10-cu zərbəsidir.

2026-cı ildə veteranlara verilən təqaüdün artırılması nəzərdə tutulmur. Bu sözləri Trend-ə açıqlamasında Azərbaycan Respublikası Milli Məclisin Əmək və sosial siyasət komitəsinin sədri Musa Quliyev deyib. Qeyd edək ki, hazırda Müharibə veteranlarına Azərbaycan Respublikası Prezidentinin təqaüdü 80 manatdır.

Rusiya Prezidenti Vladimir Putin Azərbaycan Prezidenti İlham Əliyevlə telefon danışığı aparıb. Sozcu.az xəbər verir ki, bu barədə Kremlin mətbuat xidməti məlumat yayıb. “Dövlət başçıları ticarət-iqtisadi əlaqələrin daha da inkişaf etdirilməsinə və birgə layihələrin həyata keçirilməsinə qarşılıqlı sadiqliklərini təsdiqləyib. Putin və Əliyev regional əməkdaşlığın və beynəlxalq vəziyyətin bir neçə aspektini müzakirə edib, eləcə də müxtəlif səviyyələrdə təmasları davam etdirmək barədə razılığa gəlib”, - məlumatda qeyd olunub.

Ermənistan və Azərbaycan artıq sülh müqaviləsini paraflayıb. Hər iki ölkə münasibətlərin tam normallaşdırılması üçün ciddi səylər göstərir. Sozcu.az armenpress-ə istinadla xəbər verir ki, bunu Ermənistanın xarici işlər naziri Ararat Mirzoyan Fransada 4-cü Feminist Diplomatiya Konfransı çərçivəsində keçirilən panel müzakirəsində bildirib. “Bəlkə də hamıya məlumdur ki, biz Azərbaycanla sülh bağlamışıq. Hazırda hər iki ölkə münasibətlərin tam normallaşdırılması üçün böyük səylər göstərir. Hökumətin rəsmi sazişlərin imzalanması və konkret həllərin hazırlanması istiqamətində apardığı işlərlə paralel olaraq, cəmiyyətlərin barışması üçün də böyük ehtiyac var”, - nazir qeyd edib.  O vurğulayıb ki, sülh prosesinin uğuru yalnız rəsmi razılaşmalardan deyil, həm də cəmiyyətlərin qarşılıqlı anlaşmasından asılıdır.

Xəbər verdiyimiz kimi, bir neçə gün əvvəl Zaqatalada 41 yaşlı İsgəndər Musayev vəhşicəsinə döyülüb və komaya düşüb. Sozcu.az lent.az-a istinadla xəbər verir ki, onun atası Yusif Musayev buna dözməyib və ötən gecə ürək çatışmazlığından ölüb. Qeyd edək ki, İsgəndər Musayevi döyənlər hələ tutulmayıblar.

Aparılacaq təmir işləri ilə əlaqədar olaraq, oktyabrın 25-də saat 00:00-dan etibarən Bakı şəhəri, Nərimanov rayonu, Ələsgər Qayıbov küçəsində nəqliyyat vasitələrinin hərəkəti işlər tamamlanana qədər tam məhdudlaşdırılacaq. Bu barədə Sozcu.az-a Azərbaycan Avtomobil Yolları Dövlət Agentliyindən məlumat verilib. Bildirilib ki, sürücülər təmir müddətində alternativ olaraq Müzəffər Nərimanov küçəsindən istifadə edə bilərlər.

Gəncədə tanınmış vəkil saxlanılıb. Sozcu.az APA-ya istinadla xəbər verir ki, tanınmış vəkil Zabil Qəhrəmanovun ötən gün saxlanıldığı bildirilir. Məlumata görə, Z.Qəhrəmanov Gəncə şəhər Baş Polis İdarəsinin əməkdaşları tərəfindən saxlanılıb. O, xuliqanlıqda ittiham olunur. Onun avtoyuma məntəsində bir nəfərlə mübahisə edərək, ona xəsarət yetirdiyi iddia olunur. Hazırda Gəncə Şəhər Baş Polis İdarəsində araşdırma aparılır. Qeyd edək ki, bir qədər əvvəl Vəkillər Kollegiyasının Rəyasət Heyətinin qərarına əsasən Zabil Qəhrəmanovun vəkiliyinin 6 ay müddətinə dayandırılması barədə qərar qəbul olunub. Xatırladaq ki, Z.Qəhrəmanov Tovuz rayonunun Dondar Quşçu kəndində 10 yaşlı Nərmin Quliyevanın qətlində təqsirli bilinən İlkin Süleymanovun vəkilidir.

“Sputnik Azərbaycan”ın şef redaktoru Yevgeni Belousov ev dustaqlığına buraxılıb. Sozcu.az xəbər verir ki, bu barədə “Minval” məlumat yayıb. Məlumata görə, Xətai Rayon Məhkəməsi Yevgeni Belousovun işi üzrə vəsatətə baxıb: “Məhkəmə vəsatəti təmin edib və Belousov ev dustaqlığına buraxılıb”. Qeyd edək ki, daha öncə agentliyin icraçı direktoru İqor Kartavıx həbsdən azad edilmiş, bundan sonra isə Azərbaycanı tərk edərək Rusiyaya getmişdi.

Qazaxıstan Ekologiya və Təbii Sərvətlər Nazirliyinin rəsmi saytında “Kazhidromet” dövlət müəssisəsinin Xəzər dənizində suyun səviyyəsi ilə bağlı proqnozu dərc olunub. Sozcu.az Teleqraf-a istinadla xəbər verir ki, burada mövcud iqlim dəyişikliyi və antropogen təsirlərin birgə təsirinin Xəzər dənizinin səviyyəsinin azalmasına təsir etdiyi bildirilib. Qeyd olunub ki, bu proseslərə ən həssas zona Qazaxıstanın dəniz sahəsidir. Qazaxıstan alimlərinin apardığı tədqiqatlar göstərib ki, dəniz səviyyəsinin aşağı düşməsi tendensiyası davam edəcək. Hesablamalara görə, 2050-ci ilə qədər Xəzər dənizinin səviyyəsi Baltik sistemi boyunca -32,4 və -34,0 m səviyyəsinə enə bilər. Baltik dənizi sistemində Xəzər dənizinin hazırkı səviyyəsinin təxminən 28,5 m olduğu təxmin edilir. Bu o deməkdir ki, 2050-ci ilə qədər Xəzər dənizinin səviyyəsi indiki səviyyəsindən 5,5 m aşağı düşə bilər. “Kazhidromet” 1940-cı ildən bəri Xəzərdə dəniz suyunun necə dəyişdiyi barədə də məlumat verib: - 1940–1977-ci illərdə dəniz səviyyəsinin enmə sürəti ildə 4 sm (ümumi azalma 1,2 m) olub; - 1978-1995-ci illərdə ildə 13 sm səviyyə artımı qeydə alınıb (ümumi artım 2,5 m); - 1996–2023-cü illərdə səviyyənin ildə 8 sm eniş dövrü müşahidə edilib (ümumi azalma 1,83 m); - 2006-2024-cü illər arasında səviyyə 2 m aşağı düşüb. Bu ilin avqustunda Aktauda keçirilən elmi konfransda bildirilib ki, son 20 ildə Xəzər dənizinin Qazaxıstana məxsus hissəsi sahildən 18 kilometr uzaqlaşıb. Bu müddət ərzində dəniz səviyyəsi orta hesabla 2 m aşağı düşüb. Bəzi hesablamalar göstərir ki, bu tendensiya əsasında Xəzər dənizinin Qazaxıstan hissəsi 2050-ci ilə qədər sahildən 35 kilometrə qədər uzaqlaşacaq.

Gələn il gənc müəllimlərin kənd məktəblərinə cəlb olunması üçün onların maaşına əlavələrin ödənilməsi üçün 20.1 milyon manat xərclənəcək. Sozcu.az Oxu.az-a istinadla xəbər verir ki, bu, "Azərbaycan Respublikasının 2026-cı il dövlət büdcəsi haqqında" qanun layihəsində öz əksini tapıb. Sənədə əsasən, pedaqoji profilli ali və orta ixtisas təhsil müəssisələrini bitirmiş 9.9 min nəfərdən çox gənc mütəxəssisin kənd rayonlarında yerləşən ümumtəhsil müəssisələrinə işə cəlb olunması planlaşdırılıb. Vəsait onların stimullaşdırılması məqsədilə yol, əmlakın daşınması üçün nəqliyyat, ilkin yaşayış şəraitinin yaradılması, kommunal xidmətləri və kirayə haqqına yönəldiləcək. Hesablamalar göstərir ki, kənd məktəblərindəki vakansiyaları seçəcək hər bir gənc müəllim orta hesabla maaşından əlavə il ərzində təxminən 2 min manat alacaq.

Prezident İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdış davam etdirilir. Qayıdış proqramına uyğun olaraq Xocalı rayonunun Seyidbəyli və Daşbulaq kəndlərinə növbəti köç yola salınıb. Sozcu.az xəbər verir ki, bu mərhələdə Seyidbəyli kəndinə 18 ailə olmaqla 61 nəfər, Daşbulaq kəndinə isə 8 ailə olmaqla 24 nəfər köçürülür. Onlar respublikanın müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdir.