1 ildir ki, Trampın "Qrenlandiya isterikası"nı müşahidə edirik. Tramp dəfələrlə, o cümlədən Davosda bəyan etmişdi ki, yalnız Qrenlandiyanın ABŞ-ın tamamilə nəzarətinə keçəcəyi ilə qane olacaq. Buna cavab olaraq Avropa müttəfiqləri Trampın bu isterikasına vahid və qətiyyətli mövqe sərgilədilər. Sozcu.az xəbər verir ki, bunu politoloq Kamran Cəfərov deyib. “Dünən Tramp və NATO-nun baş katibi Mark Rutte arasında bir neçə saat davam edən görüş keçirildi və görüş nəticəsində Tramp bəyan etdi ki, "bizə lazım olan hər şeyi nəzərdə tutan" razılaşma olacaq. Tramp əlavə etdi ki, Qrenlandiya ilə bağlı iddialarına qarşı çıxdıqlarına görə 8 Avropa müttəfiqinə qarşı fevralın 1-dən rüsum tətbiq etmək hədəsini həyata keçirməyəcək. Jurnalistlərin Qrenlandiyanın ABŞ-ın bir hissəsinə çevrilib-çevrilməyəcəyi sualına Tramp açıq cavab verməkdən yayındı və dedi: "Bu, yekun uzunmüddətli razılaşmadır. Bu, müddətsiz razılaşmadır. Bu, əbədi razılaşmadır". Bu təklif Qrenlandiya üzərində suverenliyin Danimarkadan ABŞ-a verilməsini nəzərdə tutmur. Plan ABŞ və Danimarka arasında 1951-ci il tarixli "Qrenlandiyanın Müdafiəsi üzrə Saziş"in yenilənməsini nəzərdə tutur. Həmin saziş ABŞ-a adada hərbi bazalar tikməyə və NATO bunu zəruri hesab edərsə, "müdafiə zonaları" yaratmağa imkan verirdi. Eyni zamanda, təklif Qrenlandiyada təhlükəsizliyin artırılması, NATO-nun Arktikadakı fəaliyyəti və faydalı qazıntılar sahəsində əlavə işlərə dair bölmələri də əhatə edir. Razılaşmaya Qrenlandiyada "Qızıl Qübbə"nin yerləşdirilməsi və Rusiya ilə Çinin zərərli xarici təsirinə qarşı mübarizə ilə bağlı müddəalar da daxildir. Ruttenin səsləndirdiyi ideyalar Danimarkanın artıq uzun müddətdir nəzərdən keçirdiyi təkliflərlə üst-üstə düşür: Danimarka suverenliyi qoruyur, lakin ABŞ hərbi mövcudluğunu artıra bilər. Yaxın həftələrdə ABŞ potensial razılaşma ilə bağlı Danimarka və Qrenlandiya ilə yüksək səviyyəli danışıqlara başlayacaq. Tramp danışıqlarda özünün sınaqdan çıxmış taktikasından istifadə etdi, maksimum təzyiq göstərmək, əgər alınmazsa, geri çəkilib öz qələbəsini elan etmək (6 ay əvvəl Avropa və Çinlə tariflər üzrə danışıqlarda olduğu kimi). Tramp Avropanın çox sərt və həmrəy mövqeyi ilə üzləşdi və gördü ki, Qrenlandiyanın suverenliyi müzakirə mövzusu deyil. Avropa ABŞ-la ticarət müharibəsinə hazır olduğunu bildirdi və geri çəkilməyəcəyini vurğuladı. Bundan əlavə, Konqresin sərt mövqeyi və fond bazarının çöküşü də rol oynadı. Nəticədə Tramp geri çəkildi və bunu öz qələbəsi kimi təqdim etdi”, - politoloq bildirib.

Dekabr ayı ərzində Rusiya Ukraynadakı müharibədə hər gün orta hesabla min nəfər itirib. Sozcu.az xəbər verir ki, bunu NATO-nun Baş katibi Mark Rutte deyib. “Bəli, dekabr ayında rusların hər gün min nəfər itirdiyi doğrudur. Bu, dekabr ayında 30 mindən çox adam edir”, - o bildirib. Rutte əlavə edib ki, ağır itkilərə baxmayaraq, Rusiya Ukraynadakı hücumlarını davam etdirir.

Bakıda və Abşeron yarımadasında yanvarın 23-də gecə və səhər bəzi şəhərətrafı ərazilərdə yolların buz bağlama ehtimalı var. Sozcu.az xəbər verir ki, bu barədə Milli Hidrometeorologiya Xidməti məlumat yayıb. Bildirilib ki, sabah hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Şimal-qərb küləyi əsəcək. Havanın temperaturu gecə 2 dərəcə şaxtadan 1 dərəcəyədək isti, gündüz 4-8 dərəcə isti olacaq. Atmosfer təzyiqi 761 mm civə sütunundan 758 mm civə sütununa enəcək. Nisbi rütubət gecə 75-80 %, gündüz 65-70 % təşkil edəcək. Gecə və səhər bəzi şəhərətrafı ərazilərdə yolların buz bağlama ehtimalı var. Azərbaycanın rayonlarında havanın əsasən yağmursuz keçəcəyi, lakin gündüz bəzi dağlıq ərazilərdə qısamüddətli yağıntılı olacağı, qar yağacağı gözlənilir. Bəzi yerlərdə arabir duman olacaq. Mülayim qərb küləyi əsəcək. Havanın temperaturu gecə 1-6 dərəcə şaxta, gündüz 5-9 dərəcə isti, dağlarda gecə 7-12, yüksək dağlıq ərazilərdə 12-16 dərəcə şaxta, gündüz 0-5 dərəcə şaxta olacaq. Gecə və səhər bəzi dağlıq və dağətəyi rayonlarda yollar buz bağlayacaq.

Paytaxtın Nərimanov rayonu, Ziya Bünyadov prospektində baş verən yanğın zamanı iki mağaza və bir anbar tam, yaxınlıqda olan daha bir obyekt isə qismən yanıb. Sozcu.az Oxu.az-a istinadən xəbər verir ki, yanğına səbəb mağazalardan birinin anbarında olan elektrik naqilindəki qısaqapanma olub. Qısaqapanma nəticəsində anbarda yanğın başlayıb. Anbardakı məhsullar tezalışan maddə olduğundan yanğın qısa müddətdə güclənib və ətrafdakı mağazalara keçib. Anbar və mağazalarda əsasən tikinti materialları olub. Hazırda Fövqəladə Hallar Nazirliyi ərazidə qərargah yaradıb. Yanğın nəticəsində sahibkarlara dəymiş ziyan müəyyənləşdirilir.

Diyet proqramları son illərdə Azərbaycanda geniş yayılıb və xüsusilə, sosial şəbəkələr, fitnes mərkəzləri, eləcə də onlayn platformalar vasitəsilə populyarlıq qazanıb. Sozcu.az Report-a istinadla xəbər verir ki, bu sözləri Səhiyyə Nazirliyinin mütəxəssis-eksperti, qastroenteroloq Emin Məmmədov deyib. Onun sözlərinə görə, motivasiya və nəzarət hissi bəzi insanlar üçün müsbət təsir göstərsə də, elmi baxımdan bu cür standartlaşdırılmış yanaşmalar hər bir fərd üçün təhlükəsiz və uyğun hesab edilə bilməz: "İnsan orqanizmi fərdi xüsusiyyətlərə malik mürəkkəb bir sistemdir. Yaş, cins, genetik faktorlar, maddələr mübadiləsinin sürəti, fiziki aktivlik səviyyəsi, hormonal vəziyyət və mövcud xroniki xəstəliklər gündəlik qida ehtiyacını müəyyən edən əsas amillərdir. Qrup diyet proqramlarında isə adətən bu fərdi fərqlər nəzərə alınmır və hamı üçün eyni kalorili, eyni tərkibli qida planı tətbiq olunur". Mütəxəssis-ekspert bildirib ki, nəticədə bəzi insanlarda enerji çatışmazlığı, protein defisiti, eləcə də vitamin və mineral yetərsizliyi ortaya çıxır.

Ötən gün Azərbaycan Milli Elmlər Akademiyasının (AMEA) prezidenti, akademik İsa Həbibbəyli 20 Yanvar faciəsinin 36-cı ildönümü ilə əlaqədar Şəhidlər xiyabanını ziyarət edib. Ziyarət zamanı AMEA əməkdaşlarından birinin İsa Həbibbəyliyə çətir tutması sosial şəbəkələrdə müzakirələrə səbəb olub. Sozcu.az CityPost.az -a istinadla xəbər verir ki, həmin şəxs artıq işdən çıxarılıb. “İsa Həbibbəyli ona çətir tutan şəxsi vəzifəsindən azad edərək başqa vəzifəyə keçirib. Səbəb kimi isə göstərilib ki, onun bu davranışı İsa Həbibbəylini ictimaiyyətin qınağına tuş gətirib”,- sayt yazır. Qeyd edək ki,sözügedən şəxs AMEA Rəyasət Heyətinin elmi katibi Coşqun Məmmədovdur.

Ötən il Bakıda 14 104 cinayət hadisəsi törədilib. Sozcu.az xəbər verir ki, bu barədə Bakı Şəhər Prokurorluğunda 2025-ci ildə görülmüş işlərin yekunu ilə bağlı əməliyyat müşavirəsində deyilib. Bildirilib ki, həmin cinayətlərin 93,4 %-nin açılması təmin olunub. Həyata keçirilən tədbirlər nəticəsində 2025-ci ildə törədilən 39 qəsdən adam öldürmə cinayətinin və 19 qəsdən adam öldürməyə cəhdin hamısının, həmçinin ötən illərdən bağlı qalan 2 qəsdən adam öldürmə və 1 qəsdən şəxsin ölümünə səbəb olan ağır xəsarət yetirmə cinayətlərinin açılması təmin edilib.

Ukraynanın Ali Antikorrupsiya Məhkəməsi “Batkivşçina” partiyasının lideri Yuliya Timoşenkonun əmlakının bir hissəsinin həbs edilməsi barədə qərar qəbul edib. Sozcu.az APA-ya istinadən xəbər verir ki, bu barədə “Suspilne” məlumat yayıb. Məlumata görə, Ali Rada çərçivəsində rüşvət almaqda şübhəli bilinən siyasətçi ilə bağlı iş üzrə məhkəmə Yuliya Timoşenkonun həyat yoldaşı Aleksandr Timoşenkoya məxsus əmlaka da, eləcə də axtarışlar zamanı götürülən pul və digər əşyalara həbs qoyub. Timoşenkonun vəkili bildirib ki, müdafiə tərəfi məhkəmənin qərarı ilə razı deyil və onu apellyasiya qaydasında şikayət edəcək.

Gürcüstanda məktəblərdə təkcə şagirdlərə deyil, müəllimlərə də mobil telefonlardan istifadə etmək qadağan olunacaq. Dövlət məktəblərində müəllimlər dərs zamanı mobil telefonlardan istifadə edə bilməyəcəklər. Sozcu.az xəbər verir ki, bu barədə Gürcüstanın Təhsil və Elm Nazirliyi məlumat yayıb. Bildirilib ki, bu qadağa 2026-2027-ci tədris ilində qüvvəyə minəcək ümumi təhsil islahatlarında nəzərdə tutulub. Məlumata görə, müəllimlər dərs zamanı mobil telefonların istifadəsini məhdudlaşdırmaqla şagirdlərinə şəxsi nümunə göstərməlidirlər. Lakin bu, müəllimlər üçün qadağan xarakteri daşımır. Bu, sadəcə şagirdlər üçün şəxsi nümunədir.(Azərtac)

Bizim heç kimin bilmədiyi silahlarımız var. Sozcu.az xəbər verir ki, bunu ABŞ Prezidenti Donald Tramp deyib. “Bu barədə danışmamaq daha yaxşıdır. Amma bizim çox heyrətamiz silahlarımız var”, - Tramp bildirib.

Yanvarın 21-i saat 10:00-a olan faktiki hava açıqlanıb. Milli Hidrometeorologiya Xidmətindən Sozcu.az-a verilən məlumata görə, ölkə ərazisinin əksər yerlərində yağıntılı hava şəraiti davam edir. Sulu qar, qar yağır. Yağan qarın hündürlüyü Lerikdə 116, Astaranın dağlıq ərazilərində 70, Yardımlıda 49, Əlibəy (Zaqatala) və Kəlbəcərdə 42, Şahbuzda 32, Sarıbaşda (Qax) 28, Şuşada 27, Kişçayda (Şəki) 24, Xızıda 22, Xankəndi və Qrızda 20, Xaltanda 18, Cəlilabadda 16, Laçın və Qubadlıda 15, Lazada (Qusar) 15, Şamaxı və Şirvanda 13, İvanovka (İsmayıllı) və Xınalıqda 12, Xocalı, Qobustan və Şərurda 10, Şahdağ və Biləsuvarda 9, Quba və Gədəbəydə 8, Füzuli və Oğuzda 7, İmişli və Naxçıvanda 6, Daşkəsən, Qəbələ və Sədərəkdə 5, Tərtər, Ağdam və Göyçayda 3, Ceyrançöldə 2, Ordubad, Ağsu, Bərdə və Naftalanda 1 sm-dir. Düşən yağıntının miqdarı Beyləqan və Lənkəranda 24, Bakıda və Abşeron yarımadasında 15, Sabirabadda 13, Astarada 12, Kürdəmirdə 9, Tovuz, Zərdab və Mingəçevirdə 6, Balakən və Yevlaxda 5, Gəncə və Şəmkirdə 4, Ağstafa və Neftçalada 3, Şabranda 2, Göygöldə 1 mm-dir. Sumqayıt, Göygöl, Gəncə, Naftalan, Şəmkir, Balakən, Qax, Şəki, Oğuz, Qəbələ, Şamaxı, Qobustan, Qrız, Yardımlı, Lerikdə duman müşahidə olunur, görünüş məsafəsi 500 metrədək məhdudlaşır. Havanın minimal temperaturu Bakıda və Abşeron yarımadasında 1, Aran rayonlarında 2, Naxçıvan MR-da 15, dağlıq rayonlarda 9, yüksək dağlıq ərazilərdə 18 dərəcəyədək şaxta qeydə alınıb. Ölkə ərazisində yanvarın 21-i gündüzdən hava şəraitinin mülayimləşəcəyi, 22-25-də əksər rayonlarda əsasən yağmursuz keçəcəyi, temperaturun tədricən yüksələcəyi, mülayim cənub-qərb küləyinin üstünlük təşkil edəcəyi gözlənilir.

İranda etiraz aksiyalarının səngiməsindən sonra müxtəlif bölgələrdə kütləvi həbslər artıb. Sozcu.az xəbər verir ki, bu barədə İran İnsan Haqları Təşkilatı məlumat yayıb. Məlumata görə, yanvarın 20-də SEPAH-ın təhlükəsizlik bölməsinin əməkdaşları Qəzvin şəhərində 166 nəfəri həbs edib. Bununla yanaşı, Rəzəvi Xorasan əyalətində 192, İsfahan şəhərəində 73 etirazçının saxlanıldığı bildirilib.

İranda 24 gün əvvəl başlayan ümumxlaq etirazlarında öldürülənlərdən 4519 nəfərin kimliyi müəyyənləşdirilib, 9049 nəfərin kimliyinin isə dəqiqləşdirilməsinə çalışılır. Sozcu.az xəbər verir ki, bu barədə İran İnsan Haqları Təşkilatı məlumat yayıb. Öldürülənlərdən 197-si hökumət məmuru, 33-ü azyaşlı, 38-i etiraz aksiyalarında iştirak etməyən mülki şəxsdir. Bununla yanaşı, 26314 nəfər həbs edilərək müxtəlif həbsxanalara köçürülüb. Qeyd olunub ki, internet kəsildiyinə görə öldürülən və həbs olunanların sayı və kimliyinin müəyyənləşdirilməsində gecikmələr olur.

Avropa Komissiyasının sədri Ursula von der Leyen sabah ABŞ prezidenti Donald Trampın Qrenlandiya ilə bağlı təhdidlərinə “qətiyyətli cavab” veriləcəyini vəd edib. Sozcu.az xəbər verir ki, Davosda keçirilən Dünya İqtisadi Forumunda çıxışı zamanı von der Leyen Trampın Danimarka ərazisi olan Qrenlandiya ilə bağlı mövqeyi ABŞ-Avropa İttifaqı münasibətlərini “aşağıya doğru təhlükəli spiral”a sürükləyə biləcəyi ilə bağlı xəbərdarlıq edib. Qeyd edək ki, ABŞ prezidentinin Qrenlandiya ətrafında yaranan münaqişə fonunda səkkiz Avropa ölkəsinə qarşı rüsumlar tətbiq edəcəyi ilə hədələməsindən sonra Avropa mümkün cavab tədbirlərini nəzərdən keçirir. Vaşinqton isə bildirib ki, hər hansı qarşı tədbir “ağılsız addım” olar. “Əlavə tariflərin tətbiqi təklifləri, xüsusilə də uzunmüddətli müttəfiqlər arasında münasibətlər baxımından səhvdir. Əgər biz aşağıya doğru spiral üzrə hərəkət etsək, bu yalnız hər ikimizin strateji məkandan uzaq tutmağa çalışdığı rəqiblərə xidmət edər. Buna görə də cavabımız qətiyyətli, vahid və mütənasib olacaq”, - deyə Leyen deyib. Xatırladaq ki, ABŞ prezidenti Qrenlandiya üzərində Vaşinqtonun nəzarətinin vacibliyini dəfələrlə dilə gətirib. Onun sözlərinə görə, əgər bunu ABŞ etməsə, ada üzərində nəzarəti Çin və ya Rusiya ələ keçirə bilər. Avropa isə Trampın Qrenlandiya ilə bağlı iddialarına qarşı çıxır.

Azərbaycanın əksər yerlərində hazırda yağıntılar intensiv və güclüdür. Sozcu.az xəbər verir ki, bu barədə Milli Hidrometeorologiya Xidmətinin saat 17:00-a olan məlumatında bildirilib. Məlumata görə, Bakıda və Abşeron yarımadasında, Naxçıvan MR, Qazax-Gəncə, Balakən-Şəki, Quba-Qusar, Dağlıq- Şirvan, Mərkəzi Aran, Lənkəran-Astara zonasında sulu qar, qar yağır. Havanın temperaturu isə Bakıda və Abşeron yarımadasında 2, Aran rayonlarında 1 dərəcəyədək isti, Naxçıvan MR-da 6, dağlıq rayonlarda 7, yüksək dağlıq ərazilərdə isə 12 dərəcəyədək şaxta qeydə alınır.

Sumqayıtda qanunsuz ticarətə qarşı keçirilən reyd zamanı Şəhər İcra Hakimiyyəti nümayəndəsinin davranışı sosial şəbəkələrdə tənqidi davam edir. Kobud davranışı ilə tənqidlərə tuş gələn həmin şəxs Sumqayıt Şəhər İcra Hakimiyyətinin İstehsal və xidmət sahələri sektorunda baş məsləhətçi kimi çalışan Samir Bədəlovdur. Ticarətçinin şəxsi mülkünü götürməyi qanunvericiliyə zidd detal kimi daha çox müzakirə olunur. Məsələ ilə bağlı Modern.az-a açıqlama verən hüquqşünas Əkrəm Həsənəv bildirib ki, şəxsin bu əməlində cinayət tərkibi var: “Samir Bədəlovun əməlində ən azı Cinayət Məcəlləsinin 308-ci maddəsi ilə nəzərdə tutulan cinayət tərkibi var – vəzifə səlahiyyətlərindən sui-istifadə edir və vətəndaşın əmlakını ələ keçirir. Buna qarət də demək olar. Burada vətəndaşın əmlakının hansı avtomobilə yüklənməsi - xidməti və ya şəxsi maşın olması heç bir əhəmiyyət daşımır. Vətəndaş onun məmur olduğunu bilir və çəkinir. Dediyini etməyə hazır olur. O da vəzifəsindən sui-istifadə edir”.

Azərbaycan Cənubi Qafqazın enerji ehtiyatlarına məxsus və onları Cənubi Qafqazın digər ölkələrinə ixrac edən yeganə ölkədir. Bölgənin digər ölkələri - uzun illər Gürcüstan, indi isə artıq Ermənistan enerji ehtiyatlarını Azərbaycandan idxal edir. Avropa və Avropa İttifaqı ilə isə bizim enerji əməkdaşlığımız artmaqdadır. Biz artıq 16 ölkəyə təbii qaz ixrac edirik və onların 10-u Avropa İttifaqının üzvüdür. Boru kəməri qazı ilə coğrafi əhatəsinə görə Azərbaycan dünyada birinci yerdədir. Sozcu.az xəbər verir ki, bu sözləri Prezident İlham Əliyev yanvarın 20-də Davosda “Avronyus” (Euronews) televiziyasına müsahibəsində bildirib. Dövlətimizin başçısı qeyd edib ki, Azərbaycan təbii resurslara, nəqliyyat sisteminə və müasir boru kəmərlərinə malikdir: “Bizim bir çox Avropa ölkəsi ilə yaxşı münasibətlərimiz var və bu, onlar üçün öz enerji təhlükəsizliyini gücləndirmək imkanıdır. Bizim üçün isə bu, premium bazarda ehtiyatlarımızı satmaq fürsətidir. Baxmayaraq ki, biz qazı təkcə Avropaya satmırıq, bu yaxınlarda Suriyaya da ixrac etməyə başlamışıq. Ancaq qiymət baxımından ən yaxşı bazar, əlbəttə ki, Avropa bazarıdır”.

Ukrayna müharibənin 1427-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 228 570 hərbçi, 11 579 ədəd tank, 23 928 ədəd zirehli döyüş maşını, 36 393 ədəd artilleriya sistemi, 1 618 ədəd RYAS (reaktiv yaylım atəş sistemi), 1 279 hava hücumundan müdafiə sistemi, 434 ədəd hərbi təyyarə, 347 ədəd helikopter, 75 067 ədəd avtomobil texnikası, 111 140 ədəd PUA, 4 163 qanadlı raket, 28 gəmi/kater, 2 sualtı qayıq, 4 048 xüsusi avadanlıq itirib.

Ermənistan Respublikasının Xarici Kəşfiyyat Xidməti 2026-cı il üçün xarici risklər haqqında illik hesabatını dərc edib. Sozcu.az xəbər verir ki, Xarici Kəşfiyyat Xidmətinin illik hesabatına görə, 2026-cı ildə Ermənistanla Azərbaycan arasında hərbi eskalasiya demək olar ki, gözlənilmir. Qeyd edilib ki, eskalasiya ehtimalı Vaşinqton razılaşmaları və hər iki tərəfin 8 avqust 2025-ci ildə sülh müqaviləsini paraflaması nəticəsində əhəmiyyətli dərəcədə azalıb. Xarici Kəşfiyyat Xidməti həmçinin hərbi-siyasi niyyətlərdən qaynaqlanmayan lokal toqquşmaları qeyri-mümkün hesab edir. Hesabata görə, sərhədlərin delimitasiyası və demarkasiyası, eləcə də ticarət-iqtisadi təşəbbüslərin həyata keçirilməsi, iki cəmiyyət arasında dialoq, humanitar layihələr və s. sahəsində yeni irəliləyiş ehtimalı yüksəkdir. Xarici Kəşfiyyat Xidməti regionda kommunikasiyaların açılmasına da eyni dərəcədə nikbin yanaşır. Buna baxmayaraq, kəşfiyyat xidməti Ermənistan-Azərbaycan münasibətlərində müəyyən risklər də  görür.

Bakıda iki bacı dəm qazından boğularaq ölüb. Sozcu.az-ın xəbərinə görə, hadisə gecə saatlarında Qaradağ rayonunda baş verib. Ələt qəsəbə sakini 1951-ci il təvəllüdlü Minəxanım Qəzənfər qızı Məmmədova və bacısı 1955-ci il təvəllüdlü Almaz Abbasova yaşadıqları evdə dəm qazından zəhərlənərək ölüblər. Faktla bağlı araşdırma aparılır. (APA)

Türkiyənin xarici işlər naziri Hakan Fidan Azərbaycan xarici işlər naziri Ceyhun Bayramov arasında telefon danışığı baş tutub. Sozcu.az xəbər verir ki, bu barədə "Anadolu" agentliyi məlumat yayıb. Bildirilib ki, nazirlər regional məsələləri müzakirə ediblər. Ümumilikdə ikitərəfli gündəlik və regional məsələlər müzakirə olunub.

Milli Hidrometeorologiya Xidmətinin məlumatına əsasən Bakıda və Abşeron yarımadasında hava şəraitinin arabir yağıntılı olacağı, qar yağacağı gözlənilir. Bu barədə Sozcu.az-a Milli Hidrometeorologiya Xidmətindən bildirilib. Gündüz yağıntılar tədricən kəsiləcək.Arabir güclənən şimal-qərb küləyi gündüz zəifləyəcək. Havanın temperaturu gecə 2°şaxtadan 1°-dək isti, gündüz 2-4° isti olacaq. Atmosfer təzyiqi 767 mm civə sütunundan 771 mm civə sütununa yüksələcək. Nisbi rütubət 75-85% təşkil edəcək. Azərbaycanın rayonlarında bəzi yerlərdə arabir yağıntılı olacağı, sulu qar, qar yağacağı gözlənilir. Ayrı-ayrı yerlərdə intensiv ehtimalı var. Gündüz yağıntılar tədricən kəsiləcək. Bəzi yerlərdə arabir duman olacaq. Mülayim qərb küləyi əsəcək. Havanın temperaturu gecə 2-6° şaxta, gündüz 3-6° isti, dağlarda gecə 10-15°, yüksək dağlıq ərazilərdə 17-22° şaxta, gündüz 3-8° şaxta olacaq. Əsasən dağlıq və dağətəyi rayonlarda yollar buz bağlayacaq.

Xankəndi şəhərində, Xocalı və Ağdərə rayonlarında 20 Yanvar faciəsinin 36-cı ildönümü ilə əlaqədar bayraqlar yarıyadək endirilib. Bu barədə Sozcu.az-a Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsindən məlumat verilib. Bundan başqa, Xankəndi, Xocalı və Ağdərədə 20 Yanvar faciəsinin 36-cı ildönümü ilə əlaqədar anım tədbirləri də keçirilib, saat 12:00-da Qara Yanvar şəhidlərinin xatirəsi bir dəqiqəlik sükutla yad olunub.

Ermənistan Baş naziri Nikol Paşinyan ABŞ Prezidenti Donald Trampın Qəzza ilə bağlı yaradılan Sülh Şurasına qoşulmaq təklifini qəbul edib. Sozcu.az xəbər verir ki, bu barədə Ermənistan Baş nazirinin mətbuat katibi Nazeli Baqdasaryan açıqlama yayıb. Onun sözlərinə görə, rəsmi İrəvan regional və beynəlxalq münaqişələrin dinc yolla həllini dəstəkləməkdə davam edir. Qeyd edək ki, Tramp Qəzza ilə bağlı Sülh Şurasına Rusiya və Belarus da daxil olmaqla, çoxlu ölkə dəvət edib.