Yekaterinburqun Verx-İsetski Rayon Məhkəməsi bu ilin iyununda saxlanılan Ayaz Səfərov, Bəkir Səfərov və Kamal Səfərovun barəsində dekabrın 29-dək həbs qətimkan tədbiri seçib. Sozcu.az xəbər verir ki, həbs müddətinin uzadılması ilə bağlı qərar oktyabrın 17-də çıxarılıb. Ayaz, Kamal və Bəkir Səfərovun vəkilləri müvəkkilləri barəsində həbs qətimkan tədbirinin daha yüngülləşdirilməsini istəyiblər, lakin Sverdlovsk vilayət məhkəməsi onların şikayətini təmin etməyib və birinci instansiya məhkəməsinin qərarını qüvvədə saxlayıb.

Bakıda SSRİ bayraqları ilə yürüş etməyə çalışan qrup saxlanılıb. Daxili İşlər Nazirliyi bildirib ki, aksiya təşkilatçıları - Abdulla İbrahimli, İbrahim Əsədli və digər şəxslər barəsində cinayət işi açılıb. Artıq onlardan birinə - Abdulla İbrahimliyə Cinayət Məcəlləsinin 233-cü (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) maddəsi üzrə ittiham elan olunub. Lakin bu hadisə heç də qıraqdan baxıldığı qədər sadə görünmür. SSRİ bayrağı qaldıranlara xarici mərkəzlərin dəstəyi istisna edilmir. Hətta onların arxasında daxildəki "5-ci kolon"un dayandığı barədə də iddialar var.  Hadisə ilə bağlı Modern.az-a danışan Azərbaycan Demokrat Partiyasının (ADP) sədri Sərdar Cəlaloğlu da bunu istisna etməyib. O bildirib ki, bu hərəkətlər dövlət çevirilişinə cəhd kimi dəyərləndirilməli və həmin şəxslər daha sərt şəkildə cəzalandırılmalıdır: “Burada söhbət sadəcə SSRİ bayrağı qaldrımaqdan getmir. Onların bir saytı var, orada açıq-aşkar müstəqil Azərbaycan dövlətinin əleyhinə, SSRİ-nin, Rusiyanın isə lehinə silsilə verilişlər yayımlayırlar. Uzun müddətdir onları izləyirəm, planlı şəkildə Azərbayca dövlətçiliyinə qarşı Rusiyanın maraqlarına uyğun ciddi siyasət aparırlar. İndi küçəyə çıxmaları İmişlidə bir müddət əvvəl baş verənlərin davamıdır. İqtidarda kifayət qədər adamlar var ki, onları dəstəkləyir, maliyyələşdirirlər. Siz onların internet televiziya kanalına baxanız, görərsiniz ki, Azərbaycan dövlətinə, müstəqilliyimizə qarşı nə qədər nifrət təbliğ edirlər. Azərbaycanda istənilən zorakılığa çağırmayan ideologiyanı təbliğ etmək qanunidir. Kommunist ideologiyasının əsas tələblərindən biri isə inqilab nəzəriyyəsi və sinfi mübarizədir.  Azərbaycan Konstitusiyasının 1-ci maddəsində göstərilən - Azərbaycanın müstəqil və demokratik respublika olmasını özündə ehtiva edən müddəalar toxunulmazdır. Bunlar isə Sovet Sosialist Respublikalar İttifaqı uğrunda mübarizə aparırlar. Azərbaycan Konstitusiyasının I hissəsində nəzərdə tutulmuş, hətta referendumla belə dəyişdirilməsi mümkün olmayan müddəalara qarşı çıxış edirlər. Bunların demokratik Azərbaycanı yıxıb yerində sosialist respublikası qurmaq şüarı faktiki olaraq, Azərbaycan Konstitusiyasında nəzərdə tutulmuş dövlət çevrilişi hərəkətlərinə uyğundur. İkinci bir məsələ SSRİ-nin təbliğ olunmasıdır. SSRİ formal olaraq respublikaların ittifaqı idi, amma əslində Rusiya müstəmləkəçiliyinin başqa bir formasıydı, hətta "xalqlar həbsxanası" adlandırılırdı. Deməli, burada sosializm ikinci dərəcəlidir, əsas məsələ Azərbaycanı yenidən Rusiyanın təsirinə qaytarmaq cəhdləridir. Bu adamların müstəqilliyimizin əleyhinə, sovet hökumətinin tərifinə həsr olunmuş çıxışları, debatları var. Azərbaycandakı indiki sosial-iqtisadi durumdan istifadə edib saatlarla müstəqilliyin əleyhinə, sovetlərin lehinə çıxışlar edirlər. 1937-ci il repressiyaları, 20 Yanvar hadisələri, kollektivləşmə və "mədəni inqilab" zamanı qırılan azərbaycanıların sayı hardasa indiki Azərbaycan əhalisinin sayına bərabərdir. Belə bir qanlı rejimi müdafiə etmək yolverilməzdir. Onlar çox ağır şəkildə cəzalandırılmalıdırlar. Burada ictimai asayiş pozulmayıb. Ortada Azərbaycan dövlətinin Konstitusiyasının 1-ci bəndindəki müddəaların dəyişdirilməsinə çağırışlar var. Yəni onların hərəkəti dövlət quruluşunun dəyişdirilməsinə çağırış kimi dəyərləndirilməlidir”. Sərdar Cəlaloğlu keçmiş deputat, YAP İdarə Heyətinin üzvü Arif Rəhimzadənin SSRİ bayrağı qaldıran şəxsləri dolayısı ilə müdafiə etməsini də pisləyib: “Arif Rəhimzadə dəfələrlə Rusiyanı açıq-aşkar müdafiə edib. Türkiyə ilə münasibətləri yenidən qurduğumuz bir vaxtda ruslara müraciət etdi ki, "biz türk deyilik, onlarla əlaqəmiz yoxdur". Arif Rəhimzadə indi də bunları müdafiə edib. Bu da onu göstərir ki, məhz bu addım ruspərəst qüvvələrin hərəkətidir, 3-4 gəncin küçəyə çıxması deyil. Onların “Sosialist” adında internet kanalları var, orada Azərbaycan əleyhinə dediklərinə cavab verməkdən yorulmuşam. Mənim deməyimlə deyil ki, onlar verilişlərini davam etdirirlər, özlərinə xeyli tərəfdaş toplayıblar. Bəzi Azərbaycan vətəndaşları sosial-iqtisadi vəziyyətin təsirindən onlara siyasi cəhətdən qoşulmasalar da, ideyalarını tərifləyirlər. Buna ictimai asayişin pozulması kimi baxmaq, əslində hadisənin məğzini başa düşməməkdir”. S.Cəlaloğlu baş verən hadisədə Ramiz Mehdiyev izinin olması ilə bağlı isə bunları deyib: “Mənə elə gəlir ki, Ramiz Mehdiyev o səviyyədə deyil. Tamamilə başqa adamlar Rusiyanın burada maraqlarını müdafiə edir, bunları idarə edirlər. Məgər Rusiyanın Azərbaycandakı tək emissarı Ramiz Mehdiyevdir? Bu dəqiqə hökumət içində Rusiyanın bir neçə ciddi kadrı var. Onların kifayət qədər nüfuzu, dövlət idarəetməsində təsir imkanları mövcuddur. Ramiz Mehdiyev utilizasiya edilmiş adamdır.  Bu gün onların arxasında duranlar Ramiz Mehdiyev kimi vəzifədən getmiş adamlar deyil. Konkret vəzifəsi olan adamlardır. Ona görə də mən bu məsələyə ilk növbədə siyasi qiymət verilməsinin tərəfdarıyam. Bunun bir neçə gəncin küçəyə çıxıb öz ideyalarını yayması yox, dövlət çevrilişinə çağırış olduğu müəyyənləşməli və hüquq -mühafizə orqanları hadisəyə uyğun müəyyən qərarlar qəbul etməlidir. Rusiyalı deputat Zatulin vaxtilə demişdi ki, biz Azərbaycanda öz ocaqlarımızı oyandırmalıyıq. Bu, həmin ocaqlardan biridir. Zatulinin çağırışına cavabdır. Düzdür, indi Azərbaycanda bəzi imkanlı adamlar Rusiyanı açıq-aşkar müdafiə edib küçələrə çıxa bilmir, ziyalılardan, gənclərdən istifadə edirlər. Həmin bu bayraq qaldıranlardan gedib soruşsan, sosializm nədir,  bilməzlər, heç sovet hökumətini də görməyiblər. Amma bəh-bəhlə bu ideyanı müdafiə edirlər”.

63 özəl məktəbəqədər təhsil müəssisəsi Elm və Təhsil Nazirliyi tərəfindən elan olunan özəl məktəbəqədər təhsil müəssisələri üçün qrant müsabiqəsinin qalibi olub və qalib gəlmiş özəl bağçalarla qrant müqavilələri imzalanıb.  Bu barədə “Yeni Sabah”a qurumdan məlumat verilib.  Bildirilib ki, həmin qrant müqavilələrinə görə Azərbaycan bölməsində təhsil alan uşaqların aylıq təhsil haqqı və valideyn tərəfindən ödəniləcək məbləğlə müvafiq link vasitəsilə tanış ola bilərsiniz.  “Nəzərinizə çatdırırıq ki, qrant müqavilələrinin icrası başlandıqdan sonra müvafiq cədvəldə göstərilən ödənişlər elektron portal üzərindən həyata keçiriləcək və valideynlərdən əlavə ödənişlərin tələb olunmasına yol verilməyəcək. Valideynlər müvafiq cədvəldə qeyd edilmiş təhsil haqlarından kənar hər hansı ödəniş tələbi ilə üzləşildiyi halda, Elm və Təhsil Nazirliyinin 146 Çağrı Mərkəzinə məlumat verə bilərlər.  Vurğulayırıq ki, qrant müsabiqəsi üzrə bütün məlumatların tam şəffaflıqla ictimaiyyətə təqdim edilməsi davam etdiriləcək”, - nazirlikdən bildirilib. 

Bakı 40 yaşlı kişinin meyiti küçədə tapılıb. Sozcu.az xəbər verir ki, hadisə paytaxtın Yasamal rayonu ərazisində baş verib. Şuşa rayon sakini, 1985-ci il təvəllüdlü Vüqar Ramiz oğlu Səfərovun üzərində zorakılıq əlamətləri olmayan meyiti aşkar edilib. Əvvəllər məhkumluq həyatı yaşamış V.Səfərovun ürək çatışmazlığından dünyasını dəyişdiyi bildirilib. Faktla bağlı araşdırma aparılır.

Azərbaycanda noyabrın 28-də arabir çiskin olacaq. Bu barədə Sozcu.az-a Milli Hidrometeorologiya Xidmətindən məlumat verilib. Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin səhər bəzi şəhərətrafı ərazilərdə az çiskinli olacağı ehtimalı var. Şimal-qərb küləyi gündüz şimal-şərq küləyi ilə əvəz olunacaq. Havanın temperaturu gecə 7-10, gündüz 14-17 dərəcə isti olacaq. Atmosfer təzyiqi 770 mm civə sütunu, nisbi rütubət gecə 80-85%, gündüz 65-70% təşkil edəcək. Azərbaycanın rayonlarında havanın əsasən yağmursuz keçəcəyi gözlənilir. Lakin gecə və səhər bəzi şərq rayonlarda çiskinli yağış yağacağı, arabir duman olacağı ehtimalı var. Mülayim şərq küləyi əsəcək. Havanın temperaturu gecə 5-9, gündüz 13-16 dərəcə isti, dağlarda gecə 2 dərəcə şaxtadan 3 dərəcəyədək isti, gündüz 7-11 dərəcə isti olacaq.

Müsavat Partiyasının fəalını qətlə yetirməkdə ittiham olunan Elsevər İslamovun cinayət işi üzrə kasasiya şikayətinə baxılıb. Sozcu.az xəbər verir ki, Ali Məhkəmədə hakim Vidadi Cəfərovun sədrliyi ilə keçirilən prosesdə qərar elan olunub. Qərara görə, şikayət təmin olunmayıb. Xatırladaq ki, Bakı Ağır Cinayətlər Məhkəməsinin hökmü ilə Elsevər İslamov 19 il azadlıqdan məhrum edilib. Bakı Apellyasiya Məhkəməsi hökmü qüvvədə saxlayıb. Qeyd edək ki, qətl hadisəsi ötən ilin may ayında, Bakının Xətai rayonu ərazisində, 55 saylı orta məktəbdə baş verib. 1964-cü il təvəllüdlü Natiq Mehdi Məhəmməd oğlunun itkin düşməsi barədə polisə daxil olmuş müraciət üzrə araşdırma aparılıb. Natiq Mehdi Məhəmməd oğlunun iş yoldaşı 1966-cı il təvəllədlü İslamov Elsevər Eldar oğlu tərəfindən şəxsi münasibətlər zəminində qətlə yetirilməsinə əsaslı şübhələr müəyyən edilib. Elsəvər İslamov polis tərəfindən saxlanılaraq istintaqa təhvil verilib. Natiq Mehdi (Ulubəy) Müsavat partiyasının fəallarından olub. O, son qurultaydan əvvəl partiya başqanlığına namizədliyini irəli sürüb. İsa Qəmbər namizədliyini verdikdən sonra namizədliyini geri götürüb. Elsevər İslamov 55 nömrəli orta məktəbdə təsərrüfat işləri üzrə direktor müavini vəzifəsində çalışıb. Ona Cinayət Məcəlləsinin 120.2.4, 245, 309.2 maddələri üzrə ona ittiham elan olunub.

Bakıda avtomobil yanıb.  Bu barədə Sozcu.az-a Daxili İşlər Nazirliyi Nəqliyyatı İntellektual İdarəetmə Mərkəzindən məlumat verilib. Hadisə Nərimanov rayonu, Heydər Əliyev prospektində əsas yolda baş verib. Həm bu, həm də bəzi sürücülərin hadisə yerinə baxması səbəbindən prospektin hər iki istiqamətində nəqliyyat sıxlığı yaranıb. Hazırda polis və digər qurumların əməkdaşları hadisə yerindədir və yaranan nəqliyyat sıxlığının aradan qaldırılması üçün tədbirlər görülür.

Bu gün Kəlbəcər şəhərinə köçürülən sakinlərə mənzillərin açarları təqdim olunub. Sozcu.az xəbər verir ki, Kəlbəcər şəhərinə köçürülən 27 ailəyə (112 nəfər) mənzillərin açarlarının təqdim edilməsi mərasimində Kəlbəcər rayonunda Azərbaycan Respublikası Prezidentinin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin rəsmiləri iştirak ediblər. Kəlbəcər şəhərində daimi yaşayış üçün köçürülən ailələrə yeni tikilmiş binalarda mənzillər verilib.

Qaçqınların və Məcburi Köçkünlərin İşləri üzrə Dövlət Komitəsi azad olunmuş ərazilərə qayıdan məcburi köçkünlərə ikiqat "çörəkpulu" verilməsi barədə xəbərlərə münasibət bildirib. Sozcu.az-ın məlumatına görə, Dövlət Komitəsinin mətbuat xidmətindən verilən açıqlamada deyilir ki, keçmiş məcburi köçkünlərə ödənilən vahid aylıq müavinətin məbləği fərdi qaydada sayğacların quraşdırılması və texniki istismarı mümkün olan və olmayan sıx müvəqqəti məskunlaşma yerlərindən asılı olaraq 33, yaxud 60 manat təşkil edir. "Fərdi qaydada sayğacların quraşdırılması və texniki istismarı mümkün olmayan keçmiş yataqxana, müalicə pansionatları və digər binalarda faktiki yaşayan məcburi köçkünlərin istifadə etdikləri təbii qaz, elektrik enerjisi, su və məişət tullantılarının daşınmasına görə haqlar müəyyən edilmiş normalar həddində dövlət hesabına mərkəzləşmiş qaydada ödənilir. Bu halda keçmiş məcburi köçkünlər üçün vahid aylıq müavinətin məbləği 33 manat təşkil edir. Hazırda fərdi qaydada sayğacların quraşdırılması və texniki istismarı mümkün olan yeni yaşayış sahələrində yaşayan, eləcə də sonradan bu tip yaşayış sahələrinə köçürülənlər (bu köçürülmə işğaldan azad edilmiş ərazilərə olur) üçün bu məbləğ 60 manat təşkil edir. Qeyd edək ki, bu məsələ, "Məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi qaydası" Azərbaycan Respublikası Prezidentinin Fərmanına və ona edilən dəyişikliklər əsasında tənzimlənir", - cavabda bildirilib.modern)

Suriyanın şimal-qərbindəki İdlib şəhərində güclü partlayış baş verib. Sozcu.az xəbər verir ki, bu barədə Suriya mətbuatı məlumat verib. Məlumata görə, partlayış məktəbin yaxınlığında yerləşən silah anbarında meydana gəlib. Partlayış nəticəsində 5 işçi həlak olub, 9 nəfər yaralanıb. Məlumata görə, hadisə yerinə təhlükəsizlik və təcili yardım xidmətləri göndərilib.

Şəki rayonunun Cəyirli kəndi ərazisində yol qəzası baş verib. Sozcu.az APA-ya istinadən xəbər verir ki, Oğuz rayon sakini 36 yaşlı Firqət Haşimovun idarə etdiyi “Toyota” markalı minik avtomobili idarəetmədən çıxaraq aşıb. Qəza nəticəsində F. Haşimov, onun avtomobildə olan qızı - 2024-cü il təvəllüdlü A.Haşimova və 1987-ci il təvəllüdlü Nərmin Rzayeva müxtəlif dərəcəli bədən xəsarətləri alıblar. Onlar Şəki Rayon Mərkəzi Xəstəxanasına (RMX) yerləşdiriliblər. Faktla bağlı Şəki Rayon-Şəhər Polis Şöbəsində araşdırma aparılır.

Rusiya Prezidenti Vladimir Putin Ukrayna müharibəsini uğurla bitirmək imkanına sahib deyil. Sozcu.az xəbər verir ki, bunu Almaniya kansleri Fridrix Merz deyib. Merz bildirib ki, müharibənin tezliklə başa çatması istənilir, lakin Ukraynanın və Avropanın razılığı olmadan əldə olunacaq hər hansı saziş davamlı sülh yaratmayacaq: “Ukrayna fiqur deyil, suveren dövlətdir və qərarlar yalnız qarşılıqlı razılıqla verilə bilər. Almaniya Ukraynaya dəstəyi davam etdirəcək və dondurulmuş Rusiya aktivlərini bu məqsəd üçün istifadə edəcək”.

Bakıdakı bir çox restoran və şadlıq evlərində keçirilən toy mərasimlərində Monqolustandan gətirilən qoyun, Ukraynadan gətirilən mal ətindən istifadəyə edildiyinə dair məlumatlar yayılıb. Qeyd edilir ki, həmin ətlər yerli istehsalla müqayisədə restoranlara xeyli ucuz başa gəlir. İstehlakçılara yerli məhsul kimi təqdim olunan Monqolustan və Ukrayna ətlərindən toy mərasimləri üçün tikəkabab, lüləkabab, basdırma və digər yeməklər hazırlanır. Adi günlərdə də restoranlar müştərilər üçün yemək hazırlanmasında bu ətlərdən istifadə edirlər. Mövzu ilə əlaqədar Modern.az-a danışan Azad İstehlakçılar Birliyinin sədri Eyyub Hüseynov bildirib ki, Ukraynadan və Monqolustandan gətirələn ətlər nəzarət altındadı və normal ətlərdir: “Məsələn, Monqolustan İrana qat-qat çox ət ixrac edir və bunlar əsasən quzu ətləridir. Ukraynada isə bu bizneslə əsasən azərbaycanlılar məşğul olurlar. Azərbaycanda son 8 ayda ət defisitinin qarşısını almaq üçün bu istiqamətdə idxal başlayıb. Lakin birmənalı şəkildə bu ətlər donmuş ətlər olur. Yenə də deyirəm ki, bu ətlər normaldır və Qida Təhlükəsizliyi Agentliyinin nəzarətindədir. Eyni zamanda, yerli ətlərdən xeyli ucuzdur”. E.Hüseynov bu ətlərlə bağlı istehlakçılardan daxil olan zənglər barədə də danışıb: “İstehlakçı zənglərini ümumiləşdirsək, qeyd edilir ki, Monqolustan ətlərinin dadı yerli heyvan ətlərindən xeyli geri qalır. O ətləri insanlar istehlak etdikdə kabab və digər yeməklərdə dərhal hiss edirlər və bu barədə bizə məlumat verirlər”. E.Hüseynov onu da qeyd edib ki, restoran və şadlıq evlərinin sahibləri istehlakçılara, yaxud sifariş verənlərə birmənalı şəkildə ətin mənşəyini bildirməyə borcludur: “Sifariş verən vətəndaş bu barədə məlumat əldə etməkdə haqlıdır. Restoran və şadlıq sarayları tərəfindən bu barədə məlumat verilmir, yaxud yanlış informasiya verilirsə, bu, istehlakçı hüquqlarının pozulmasıdır. Belə hallarda istehlakçıların hüququ var ki, dövlət orqanlarına müraciət edib, aldadıldıqlarını bildirsinlər. Bu, yolverilməzdir”.

ABŞ prezidenti Donald Trampın xüsusi nümayəndəsi Stiv Uitkofun Rusiya rəsmiləri ilə telefon danışığının mətni mediaya ötürülüb. Sozcu.az xəbər verir ki, telefon danışıqlarının detallarını "Bloomberg" agentliyi dərc edib. Telefon danışıqları Uitkof ilə Rusiya prezidentinin xarici siyasət müşaviri Yuri Uşakov, həmçinin Kreml iqtisadi müşaviri Kirill Dmitriyev arasında aparılıb. 14 oktyabr tarixli ilk telefon danışığında Uitkof Uşakova Putinlə Tramp arasında telefon danışığının dərhal təşkil edilməsini məsləhət görür və bunun üçün konkret “dil və davranış strategiyası” təqdim edir. O qeyd edib ki, Putin Trampı Qəzza sülh planına görə təbrik etməli, Trampın “sülh adamı” olduğunu vurğulamalıdır. ABŞ-la birlikdə Ukrayna üzrə eyni formatda “20 maddəlik sülh planı” hazırlaya biləcəklərinə işarə etməlidir. “Biz Qəzza üçün 20 maddəlik Tramp planı hazırladıq. Bəlkə Ukrayna üçün də eyni şeyi edək”, - Uitkof bildirib. “Mən Trampa demişəm ki, Rusiya həmişə sülh istəyib. Mən buna inanıram”, - o əlavə edib. Xüsusi nümayəndə Zelenskinin 17 oktyabrda Ağ Evə səfərindən əvvəl Putinlə Trampın danışığının təşkil edilməsini “çox vacib” adlandırır: “Zelenski cümə günü Ağ Evə gəlir. Mən də o görüşdə olacağam. Amma əgər mümkündürsə, sizin boss (Putin) Trampa bu görüşdən əvvəl zəng etsin.” İki gün sonra Putin Trampa zəng edir. Danışıq 2,5 saat davam edir və Tramp bunu “çox məhsuldar” adlandırır. Ardınca o, Budapeştdə Putinlə görüş planını açıqlayır. "Bloomberg"in analizinədə görə, Uitkof-Uşakov danışığı sonradan formalaşan və ABŞ-ın Ukraynaya qəbul etdirmək istədiyi 28 maddəlik sülh planının başlanğıc nöqtəsi olub. Kremlin də bu plana öz düzəlişlərini göndərdiyi bildirilir. Putin bu ayın əvvəlində 28 maddəlik təklifin “danışıqlar üçün əsas ola biləcəyini” bildirib. 29 oktyabrda Uşakov və Dmitriyev arasında baş tutan ikinci telefon danışığı Moskvanın ABŞ-la koordinasiyanı davam etdirdiyini təsdiqləyir. Bu dəfə Kreml rəsmiləri Vaşinqtona hansı şərtləri maksimum şəkildə təqdim etməli olduqlarını müzakirə edir: Uşakov: “Maksimum istəmək lazımdır. Yoxsa bizdən nə keçirməyin mənası var?” Dmitriyev: “Biz kağızı öz mövqeyimizə uyğun hazırlayırıq. Mən onu qeyri-rəsmi ötürəcəyəm. Amerikalılar tam versiyanı qəbul etməsələr də, çox yaxın sənəd hazırlayacaqlar.” Uşakov Vaşinqtonun planı sonradan “düzgün təqdim etməməsindən” narahat olduğunu deyir. Dmitriyev isə onu arxayın salır: “Mən dediklərinizi sözbəsöz ötürəcəyəm.” Sızmalar yayılarkən Ağ Evdən ilk reaksiya gəlib. Prezident Trampın kommunikasiya direktoru Stiven Çunq deyib: “Bu hekayə yalnız bir həqiqəti sübut edir: Uitkof sülh üçün həm Rusiya, həm də Ukrayna rəsmiləri ilə hər gün danışır. Prezident onu buna görə təyin edib.” Kreml isə "Bloomberg"in sorğusuna cavab verməyib.

Sosial şəbəkələrdə SSRİ bayrağı qaldıraraq yürüşə cəhd etməklə təqsirləndirilən İbrahim Əsədli barədə bəzi faktlar məlum olub. Sozcu.az Oxu.az-a istinadən xəbər verir ki, İ.Əsədli həkim-onkoloqdur və bir müddət əvvəl xoşagəlməz hallarla gündəmə gəlib. Belə ki, İ.Əsədli ötən ilin fevral ayında işlədiyi "Loğmed" klinikasındakı kabinetində sevgilisi ilə birlikdə olarkən həyat yoldaşı onları yaxalamışdı. Həkim-onkoloq həmin vaxt yanında olan Aynur adlı sevgilisi ilə birləşib həyat yoldaşına şiddət göstərmişdi. Hadisə ilə bağlı İ.Əsədlinin zərərçəkmiş həyat yoldaşı polisə müraciət etmişdi.

Fransa kəşfiyyat xidməti Parisdə Rusiyaya casusluq etməkdə şübhəli bilinən “SOS Donbass” qruplaşmasının iki fəalını, o cümlədən bir rus qadını saxlayıb. Sozcu.az xəbər verir ki, bu barədə “Le Parisien” qəzeti mənbələrə istinadən məlumat yayıb. Nəşr qeyd edib ki, “SOS Donbass” üzvləri humanitar fəaliyyət adı altında casusluqla məşğul olublar.

Sumqayıtda 72 yaşlı qadın iynənin təsirindən ölüb. Sozcu.az APA-ya istinadla xəbər verir ki, hadisə Sumqayıt şəhərində noyabrın 25-də baş verib. Şəhərin 45-ci məhəllənin ərazisində yerləşən 3 saylı ailə sağlamlıq klinikasında Sumqayıt şəhər sakini 1953-cü il təvəllüdlü Nigar Babaxanova ona vurulan iynənin təsirindən ölüb.

Rusiyanın Krasnodar diyarının Tuapse şəhərində azərbaycanlı iş adamı Şahlar Novruzovun əmlakı müsadirə edilib. Sozcu.az APA-ya istinadən xəbər verir ki, Kuban Arbitraj Məhkəməsi 900 milyon rubl məbləğində dələduzluğa cəhd ittihamı ilə həbsdə olan Azərbaycan əsilli Şahlar Novruzovun aktivlərini müsadirə edib. Məhkəmənin qərarına əsasən, Novruzovun sahibi olduğu Tuapse Dəniz Limanının və TMKP Müəssisəsinin səhmlərinin 100%-i, Temryuk Yük Terminalı, "Dar Fruit" MMC-nin əmlakı dövlətin mülkiyyətinə keçib. İstintaq hesab edir ki, aktivlər 1994-cü ildən başlayaraq qanunsuz əməliyyatlar yolu ilə dövlət mülkiyyətindən çıxarılıb. Məhkəmə həmin obyektlərin dövlət mülkiyyətindən çıxarılması ilə bağlı bütün əməliyyatları ləğv edib.

Beynəlxalq bazarlarda "Brent" markalı neftin qiyməti kəskin ucuzlaşa bilər. Sozcu.az-ın məlumatına görə, "JP Morgan" analitikləri bildirirlər ki, 2027-ci ilə qədər "Brent" neftin bir barelinin qiyməti 30 dollara qədər enə bilər. Buna səbəb dünya üzrə tələbi üstələyən artıq təklifdir. Hazırda "Brent "ilin əvvəlindən bəri 14% ucuzlaşıb və bazar ertəsi qiymət 62,59 dollar civarında sabit qalıb. Qiymətlərin zəifləməsinə səbəb kimi Ukrayna üzrə sülh danışıqlarının yenidən başlaya biləcəyi barədə gözləntilər göstərilir. Analitiklər qeyd edirlər ki, qlobal bazarda artıqlıq yaransa belə, qiymətlərin 40 dolların altına enməsi real görünmür. Lakin qısamüddətli dövrdə qiymətlərə təzyiq əsasən OPEK+ ölkələrinin və ABŞ istehsalçılarının yüksək hasilatı ilə bağlı olacaq. Eyni zamanda ekspertlər hesab edirlər ki, Ukrayna müharibəsinin sülh yolu ilə həll olunması enerji bazarlarına təsir göstərə bilər. Rusiya neftinə tətbiq edilən bir sıra sanksiyaların yumşaldılması ehtimalı qiymətlərdə əlavə dəyişiklik yarada bilər. Məşhur investisiya bankı "Goldman Sachs" neft kotirovkalarının 2026-cı ildə də aşağı istiqamətdə hərəkət edəcəyini bildirir. Bankın hesablamalarına görə, 2026-cı ildə ABŞ nefti WTI-nin orta qiyməti təxminən 53 dollar olacaq. Bank həmçinin xəbərdarlıq edir ki, 2025-ci ildə gündəlik neft artıqlığı 2 milyon barelə çata bilər. "Goldman Sachs"ın qlobal əmtəə tədqiqatları şöbəsinin həmsədri Daan Strüvenin sözlərinə görə, 2026-cı il böyük təklif dalğasının son ili olacaq, bundan sonra bazar tədricən sabitləşməyə başlayacaq.modern)

Əsrlər boyu bölgənin təbii sərvətlərinin, iqtisadi həyatının və ekoloji tarazlığının əsas dayağı olan Xəzər dənizi bu gün böyük təhlükə ilə üz-üzədir. Son illər müşahidə olunan sürətli səviyyə enməsi təkcə Azərbaycan üçün deyil, bütün Xəzəryanı ölkələr üçün ciddi xəbərdarlıq siqnalına çevrilib. Araşdırmalar göstərir ki, Xəzərin səviyyəsində dəyişikliklər tarix boyu baş verib, lakin indiki geri çəkilmə miqyası və sürəti narahatlıq doğuracaq qədər böyükdür. İqlim dəyişikliyi, yağıntıların azalması, onu qidalandıran çayların qarşısının bəndlərlə kəsilməsi, sənaye məqsədilə nəzarətsiz su götürülməsi və digər amillər Xəzərin taleyini daha da ağırlaşdırır. Artıq bəzi proqnozlarda bildirildiyinə görə, qarşıdakı 20-30-50 il ərzində dənizin əhəmiyyətli hissəsi yox ola, sahil xətti yüzlərlə kilometr geri çəkilə bilər. Modern.az-a açıqlamasında Akademik Həsən Əliyev adına Coğrafiya İnstitutunun Xəzər dənizinin Hidrometeorologiya şöbəsinin müdiri Səid Səfərov qeyd edib ki, hazırkı şəraitdə həm Xəzər dənizinin səviyyə dəyişmələrinin müasir vəziyyəti, eləcə də hidrodinamik iqlim modellərinə əsasən aparılan tədqiqatlar göstərir ki, əsrin sonuna qədər temperaturun artması və antropogen amillərin güclənməsi davam edərsə, Xəzərin səviyyəsinin xeyli aşağı düşməsi gözlənilir. “Müxtəlif ssenarilərə görə, əgər Paris Sazişinə riayət olunarsa, səviyyə 8-9 metr, əgər heç bir məhdudiyyət tətbiq edilməzsə, bəzi proqnozlara əsasən 18 metr, hətta 20-21 metrədək aşağı düşə bilər. Bu isə müxtəlif ərazilərdə fərqli təsirlər yaradacaq. Məsələn, Xəzərin Azərbaycan sahillərində dəniz təxminən 20-30 kilometr geri çəkilə, quruya bilər. Yəni bu gün Bakı bulvarından dənizi gördüyümüz halda, proses bu templə davam edərsə, gələcəkdə bulvardan dənizi görmək üçün çox uzun məsafə qət etmək lazım gələ bilər. Bu isə, təbii ki, ciddi narahatlıq doğurur”. Müsahibimiz bildirib ki, sözügedən vəziyyət yalnız iqlim dəyişmələrinin indiki sürətlə davam etməsi və antropogen təsirlərin artması halında mümkün ola bilər: “Son illər təsərrüfat və suvarma məqsədləri üçün götürülən suyun həcmi artır və bu da Xəzərə tökülən çayların gətirdiyi suyun azalmasına səbəb olur. Digər tərəfdən, temperaturun yüksəlməsi dənizdə buxarlanmanı artırır. Üçüncü bir amil də son tədqiqatlarla müəyyənləşdirilib. Bundan əlavə, külək rejiminin dəyişməsi də Xəzərin səviyyə dəyişmələrinə buxarlanma yolu ilə ciddi təsir göstərir”. O, həmçinin vurğulayıb ki, bu proseslər indiki templə davam edərsə, Xəzəri və sahilyanı ölkələri böyük təhlükə gözləyir: “Əgər Xəzəryanı dövlətlərin və bütövlükdə dünya ölkələrinin birgə səyi ilə qlobal istiləşmənin qarşısı alınarsa və çaylar üzərində antropogen təsirlər azaldılarsa, verilən proqnozlar müəyyən qədər yumşala bilər. Əks halda, bu laqeydlik çox ciddi və mənfi nəticələrə gətirib çıxara bilər”,- deyə S.Səfərov fikrini yekunlaşdırıb.

Növbəti köç karvanının sabah Kəlbəcərə yerləşməsi gözlənilir. Sozcu.az xəbər verir ki, bunu Azərbaycan Prezidentinin xüsusi nümayəndəsi Bəşir Hacıyev Şəhər Günü münasibətilə təşkil olunan konsert proqramı öncəsi çıxışında  deyib. Onun sözlərinə görə, Böyük Qayıdış proqramı əsasında Kəlbəcər rayonunda da yenidənqurma istiqamətində kompleks tədbirlər keçirilir: “Birinci yaşayış məhəlləsində artıq bir neçə mənzil istifadəyə verilib. Hazırda ikinci, üçüncü və dördüncü yaşayış məhəllələrində layihələndirmə işləri aparılır”.

Türkiyə Prezidenti Rəcəb Tayyib Ərdoğan Rusiya–Ukrayna münaqişəsinin həlli üçün bu gün onlayn formatda keçiriləcək “İstəklilər Koalisiyası”nın iclasında iştirak edəcək. Sozcu.az xəbər verir ki, bu barədə hakim Ədalət və İnkişaf Partiyasının (AKP) sözçüsü Ömər Çelik bildirib. Onun sözlərinə görə, onlayn iclas Türkiyə vaxtı ilə saat 18:00-da başlayacaq.

Bakıda 3 gün əvvəl itkin düşən 62 yaşlı Kutais Şəkər oğlu Xəlilov ölü vəziyyətdə tapılıb. Sozcu.az Bakıvaxtı.az-a istinadən xəbər verir ki, o, 21 noyabr 2025-ci il tarixində səhər saat 10 radələrində yaşadığı evdən çıxmış və bir daha geri qayıtmamışdı. Onun Suraxanı, Xətai, NZS, Neftçilər və "Sovetski" adlanan ərazilərdə görüldüyü bildirilmişdi. Ailə üzvlərinin verdiyi məlumata əsasən, itkin düşmüş şəxs bu gün Əmircan qəsəbəsi ərazisində, zibillikdə ölü halda aşkarlanıb. Qeyd edək ki, K.Xəlilov Birinci Qarabağ müharibəsinin iştirakçısı olub və uzun müddət hərbçi kimi xidmət edib. O, son olaraq Suraxanı Su Kanal İdarəsində çalışıb.

Kəlbəcər Şəhəri Günü münasibətilə atəşfəşanlıq olacaq. Sozcu.az xəbər verir ki, gün ərzində kiçik tamaşa parçalarının və müxtəlif səpkili sərgilərin nümayişi də nəzərdə tutulur. Bu gün axşam saatlarında isə incəsənət xadimlərinin iştirakı ilə konsert proqramı və daha sonra atəşfəşanlıq planlaşdırılır.