Yasamalın icra başçısı ilə deputatlığa namizəd arasında mübahisə – VİDEO

17 saylı Yasamal üçüncü seçki dairəsindən namizədliyini irəli sürmüş vəkil Cavad Cavadovla rayonun icra başçısı arasında “Sovetski” ərazisində mübahisə baş verib.

Sozcu.az xəbər verir ki, bu barədə Cavad Cavadov deyib.

O bildirib ki, bu gün Bakının “Sovetski” ərazisində aparılan söküntüyə baş çəkmək üçün icra başçısı Elşad Həsənov da gəlib: “Yasamal Rayon İcra Hakimiyyətinin başçısı ilə ağır söhbət oldu. Hacı Cavad məscidini xatırlatdım. Dedim ki, harada qanunsuzluq var, orada vəkil Cavad var. İnsanların hüquqları pozurlar, biz də təşviqatımızı saxlayıb məcburuq ki, onların yanında olaq. İmkan vermirlər ki, təşviqata başlayaq”.

Onun sözlərinə görə, əhalini Yasamal Rayon İcra Hakimiyyətinə görüşə dəvət ediblər: “Camaat məndən xahiş edib ki, onlarla görüşə gəlim. Ümid edirəm ki, Hacı Cavad məscidinin ssenarisi təkrarlanmayacaq”.

Yanvarın 17-də “Sovetski” ərazisində köçmək istəməyən 24 ailənin yaşadığı mənzillərin söküntüsünə başlandığı bildirilir.

Vəkil Cavad Cavadov deyir ki, söküntü işləri sakinlərin razılığı və məhkəmənin qərarı olmadan aparılır: “İşlərin çoxusu məhkəmədədir. Kimin şikayəti apellyasiya, kimin də kassasiya mərhələsindədir. Yəni, məhkəmənin qərarı olmadan adamları küçəyə atıb evlərini sökməyə başlayıblar. Bir nəfərin əşyaları evdə qalıb, əşyalarla bir yerdə sökürlər”.

İşə Bakı Şəhər İcra Hakimiyyətinin nəzarət şöbəsinin müdiri Zülfəli İsmayılovun rəhbərlik etdiyi bildirilir.

Vəkil əlavə edib ki, yanvarın 16-da bu ərazidə işıq və su kəsilmişdi, lakin sonra kommunal xətlər bərpa olunub: “Yanvarın 16-da işıq, su kəsilmişdi, söküntüyə hazırlıq başlamışdılar. Sonra Bakı Şəhər İcra Hakimiyyətin nümayəndələri gəlib dedilər ki, sabah, yanvarın 17-də sakinlərlə söhbət edəcəklər, işığın, suyun verilməsini bərpa etdilər. Yanvarın 17-də səhər isə buldozerləri bura töküb, sökürlər” .

C.Cavadov qeyd edib ki, əraziyə polis qüvvələri də cəlb edilib. Məsələ ilə bağlı Bakı Şəhər İcra Hakimiyyəti və Daxili İşlər Nazirliyindən münasibət öyrənmək mümkün olmayıb.

Bakının “Sovetski” deyilən ərazisinin sökülməsinə 2014-cü ildə başlanıb. 26 hektardan çox sahəni əhatə edən ərazidə 4500-ə yaxın yaşayış və qeyri-yaşayış obyektləri sakinlərlə bir çox hallarda əldə edilmiş razılığa əsasən satın alınıb, sökülüb. İkinci mərhələdə isə 1920 evin söküldüyü bildirilir. Bu zaman söküntü işlərinin təqribən 13 hektar ərazini əhatə etdiyi qeyd olunur. Amma hər iki mərhələdə kompensasiyanın məbləği ilə (hər kvadrata 1500 manat ödənilirdi) razılaşmayan, söküntüyə müqavimət göstərən ailələr də olub. Onlar müxtəlif dövrlərdə aksiyalar da keçiriblər. Bununla bağlı bir sıra şikayətlər hətta Avropa İnsan Hüquqları Məhkəməsinə də göndərilib. (Arqument.Az)

Facebook Comments