“Torpaqlar işğaldan tam azad edilməmiş dayandı yoxdur”

“Ali Baş Komandan İlham Əliyevin çıxışını diqqətlə izlədim. Anladım ki, torpaqlar işğaldan tam azad edilməmiş dayandı yoxdur”.

Sozcu.az-ın xəbərinə görə, bunu hüquqşünas Aslan İsmayılov deyib.

A.İsmayılov bildirib ki, heç bir qüvvə bu iradənin qarşısında dura bilməz: “Xalqına arxalanıb, ona güvənən və ona tam əmin olan Ali Baş Komandandan başqa addım da gözləmirdim. Ölkə xaricinə ünvanlanmış fikirləri ünvan sahibləri başa düşəcək. Mən qısaca ölkə içinə ünvanlanmış fikrə münasibətimi deyim. Bəli, uğurlarımız var və çox yaxşıdır. Bununla belə nöqsanlar da görünür, dəqiq izlənilir, incələnir və tədbirlər görülür. Ancaq bu nöqsanlar və onun səbəbkarları hər şeyin bu günlər ilə bitəcəyini düşünməsinlər. Nöqsanlara qarşı tədbirlər gələcəkdə də görüləcək. Ona görə də hələ də müharibə getdiyini anlamayanlar təcili götür-qoy edib münasibətlərini köklü şəkildə dəyişməlidirlər. Bu, birinci növbədə bu gün ön cəbhədə döyüşənlər, yaralananlar, həlak olanlara göstərilən münasibət və qayğı ilə bağlı olmalıdır. İkincisi, hər kəs imkanı çatan çərçivədə və sahədə maksimum bacardığını etməlidir. Dövlətimizin bundan da şərəfli və çətin günləri olmayıb və inanmıram ki, bundan sonra da ola. Ən azı yaxın on illiklərdə. Heç kim “başa düşmədim”, “mənə deyən olmadı”, “yadımdan çıxdı”, “ağlıma gəlmədi”, “vaxtım yox idi”, “səhhətim imkan vermədi” və bu kimi bəhanələr haqqında düşünməsin. Bu gün hər şey Cəbhə üçün, hər şey Vətən üçün olmalıdır! Hər şey!”

Facebook Comments