Tibbi yardımın göstərilməməsi İranda həbsdə olan etirazçının ölümünə səbəb olub

Bazar günü insan haqları fəalları 2018-ci ildə dini bir təriqətin etiraz aksiyasında iştirak etdiyinə görə həbs edilən və səhhətindəki problemlərə məhəl qoyulmadığı üçün həbsxanada ölən iranlı məhkumla bağlı narahatlıqlarını dilə gətirib.

“Amerikanın Səsi”nin verdiyi xəbərə görə, Amnesty International tərəfindən vicdan məhbusu kimi xarakterizə edilən sufilərin Qonabadi təşkilatının üzvü Behnam Məhcubi 2018-ci ilin fevralında təşkil olunan nümayişdə iştirak etdikdən sonra həbs olunub və iki illik cəza müddətini keçən iyun ayında çəkməyə başlayıb.

Tərəfdarları və insan haqları qrupları onun panik tutmasından əziyyət çəkdiyini, həbsdə olarkən işgəncəyə məruz qaldığını və ona qəsdən tibbi yardım edilmədiyini iddia edir.

İranın həbsxanalar üzrə təşkilatı onun narkotik maddələrdən zəhərlənərək öldüyünü bildirib. Lakin bu ayın əvvəlində xəstəxanaya yerləşdirildikdən sonra insan haqları fəalları Məhcubinin səhhətinin pisləşməsinə nəyinsə səbəb olduğu barədə həyəcanlarını ifadə edib.

Human Rights Watch təşkilatının İran üzrə tədqiqatçısı Tara Sepehrifər “hökumətin Məhcubinin səhhətindəki problemi uzun müddət görməməzlikdən gəldiyinə dair ciddi iddialar var” deyib.

“Bu iddialar hər hansı cinayət məsuliyyətinə cəlb edilmək də daxil olmaqla, araşdırılmalıdır” – deyə, o bildirib.

BMT-nin İnsan Haqları üzrə Ali Komissarlığı Məhcubinin xəstəxanaya fevralın 12-də, komaya girəndən sonra yerləşdirildiyini bildirib və bununla bağlı “şəffaflığın olmamasından” ciddi şəkildə narahatlığını ifadə edib.

Amnesty International Məhcubiyə əvvəllər də qəsdə tibbi yardım göstərilmədiyi və ona aylarla işgəncə verildiyini bildirib.

“Behnam Məhcubinin ölüm xəbəri lazımi tibbi yardımın inkar edilməsindən sonra meydana gələn bir faciədir” – deyə, New Yorkda yerləşən İran İnsan Haqları Mərkəzinin (CHRI) icraçı direktoru Hadi Qayemi bildirib.

İran xaricindəki medianın yayımladığı xəbərlərdə bildirilir ki, Məhcubi panik tutmaları keçirdikdə əvvəlcə o, Tehranın Evin həbsxanasındakı klinikaya aparılıb. O, huşunu orada ona dərman verildikdən sonra itirib.

Daha sonra o, İranın paytaxtındakı Loğman xəstəxanasına köçürülüb və yaxınlarının onu ziyarət etməsinə icazə verilməyib.

Keçmiş prezident Donald Trampın ABŞ-ı geri çəkdiyi nüvə razılaşmasının yenidən canlandsırılması ilə bağlı danışıqlar getdiyi bir vaxt İranda son zamanlar insan haqlarının pozulması ilə bağlı tənqidlər də artıb.

Facebook Comments