Şuşanın inanılmaz sərvəti: deputat bir-bir saydı

Şuşa kifayət qədər iqtisadi potensiala malikdir və Ali Baş Komandanın da qeyd etdiyi kimi, həyat və gülüş çox qısa zamanda Azərbaycanın bu qədim şəhərinə də qayıdacaq.

Sozcu.az xəbər verir ki, bu fikirləri millət vəkili, iqtisadçı-alim Vüqar Bayramov qeyd edib.

O bildirib ki, noyabrın 8-də işğaldan azad olunan Şuşa şəhəri uzun müddət Qarabağın əsas iqtisadi mərkəzlərindən hesab olunub:

“Həm şəhər, həm də eyniadlı rayon sənaye, kənd təsərrüfatı və xüsusən emaledici sektorların inkişafı üzrə fərqlənib. Ötən əsrin əvvəllərində Şuşada 1700-ə yaxın ticarət obyekti qeydə alınıb və bu da şəhərin hələ bir əsr öncə də xüsusi iqtisadi potensiala malik olduğunu göstərir. 20.9 min hektar yararlı torpağı olan Şuşanın kənd təsərrüfatında heyvandarlıq daha çox inkişaf edib.

Azərbaycan Dövlət Statistika Komitəsinin məlumatına görə, 2019-cu ildə Şuşada 14 milyon 88 min manatlıq məhsul istehsal olunub. Bunun əsas hissəsi kənd təsərrüfatı məhsullarının payına düşüb.

1992-ci ildə, Şuşa işğal olunmamışdan öncə şəhərdə şərq musiqi alətləri fabriki, istehsalat kombinatı, Bakı “Radioqurma” istehsalat birliyinin müəssisəsi, Qarabağ ipək kombinatının toxuculuq sexi və digər istehsal müəssisələri var idi. Şuşada eyni zamanda inşaat materialları istehsalı üzrə də müəssisələr fəaliyyət göstərirdi”.

Deputat bildirib ki, Şuşada Turşsu yaylaqları, Səkili bulağı, İsa bulağı, Şəmilin bulağı, Cıdır düzü turizm baxımdan xüsusi üstünlüyə malikdir:

“1992-ci ilədək Turşsu istirahət və müalicə zonası fəaliyyət göstərirdi. Bu zona Laçın yolunun üstündə və Daşaltı çayının yaxınlığında yerləşir. Turşsu müalicəvi vannaları ilə də məşhur idi. Füsunkar gözəlliyi ilə seçilən Cıdır düzündə 1992-ci ilədək hər il may ayında “Xarı-bülbül” mahnı festivalı keçirilirdi.

Qarabağ Azərbaycandır!”

Facebook Comments