Oğlu xəstə ata prezidentdən kömək istəyir

8 yaşından sonra ayaqları tutulan Elmir Qasımov yerimək, məktəbə getmək arzusundadır

“Oğlum 8 yaşınacan tam sağlam idi. Qaçırdı, tuta bilmirdik. Nə oldu, bilmirəm. 8 yaşdan sonra ayaqları tutuldu. Yavaş-yavaş yerimə qabiliyyətini itirdi. Aparmadığımız həkim qalmayıb, çarəsini tapa bilmirlər”.

Ucarın Qaracallı kəndinin sakini Təbriz Qasımov belə deyir. Bildirir ki, oğlu Elmir Qasımov hazırda yataq xəstəsidir. İndiyə qədər onun yeriməsi üçün çəkdikləri xərc, əziyyət isə boşa gedib. Uşaq yerimir ki, yerimir:

“Deyirlər, Azərbaycanda müalicəsi yoxdur. Xaricə aparmağa da bizim gücümüz çatmır . Kasıb ailəyik, özümüzü güclə dolandırırıq. Xaricdə müalicə ucuz deyil, hardan alaq o qədər pulu?”

Buna baxmayaraq, ailə heç olmazsa övladlarının vəziyyətinin stabil saxlanılması, daha da pisləşməməsi üçün Səhiyyə Nazirliyinə müraciət edib. İstəyiblər ki, nazirlik Elmir Qasımovun ölkə daxilində müalicəsinin həyata keçirilməsinə dəstək olsun:

“Səhiyyə Nazirliyi ərizəmizi Ucar Rayon Mərkəzi Xəstəxanasına göndərib. Xəstəxanadan isə bildirirlər ki, Elmirin müalicəsi rayonda mümkün olan iş deyil. Bəlkə Bakıda mümkün olar. Bizim artıq onun müalicəsinə xərcləməyə bir qəpiyimiz də qalmayıb. Heç onsuz da ölkədə müalicəsi mümkün deyil”, – Elmirin nənəsi Raya Qasımovanın sözləridir.

Raya Qasımova deyir ki, oğlunun ailəsi heç də yağ-bal içində yaşamır. İndiki dövrdə isə müalicəsi olmayan xəstəni saxlamaq ağırdır:

“Camaat özünü güclə dolandırır. Oğlum bir neçə aydanbir gedir Rusiyaya. İşləyir, qayıdır. Bir tikə çörəkdən ötrü dərbədər olub. Elə qazandığının da yarıdan çoxu uşağın iynə-dərmanına, müalicəsinə gedir. O müalicənin də heç bir xeyri yoxdur. Heç kiçik barmağını da tərpədə bilmir”.

“Deyirlər, İsraildə, Türkiyədə Hindistanda və bir neçə başqa ölkələrdə bu xəstəliyi müalicə edir və effektli nəticələr əldə edə bilirlər”

Elmir Qasımov 4-cü ildir ki, yataq xəstəsidir. Raya Qasımova deyir ki, 7 yaşınadək problemsiz yeriyib, yüyürüb, ən nadinc uşaq olub. Bir yerdə oturmurmuş. 7 yaşdan sonra yavaş-yavaş hərəkətində məhdudiyyətlər yaranmağa başlayıb:

“Tez-tez yıxılırdı. Məktəbə gedəndə, gələndə. Anası danlayırdı ki, bala, çolaqsan, niyə hər gün yıxılırsan? Sən demə, xəstəliyin başlanğıcı imiş. Nə bilək? 8 yaşından sonra isə ayaqları tamamilə tutuldu. Son 3 ildə, ümumiyyətlə, ayağını yerə basmayıb. Eləcə bütün günü oturur divanda”.

Elmir Qasımova Bakı xəstəxanalarının birində miopatiya dioqnozu qoyulub (əzələ xəstəliyi, əzələ zəifliyi ilə müşahidə olunur-red). Tam sağalmasının isə mümkün olmadığını deyiblər. Ailə şəxsi araşdırma aparıb. Deyirlər, İsraildə, Türkiyədə Hindistanda və bir neçə başqa ölkələrdə bu xəstəliyi müalicə edir və effektli nəticələr əldə edə bilirlər. Ancaq müalicə həddindən artıq bahadır. Ailənin isə bunu qarşılayacaq imkanı yoxdur:

“Uşaq nə qədər bütün günü oturub televizora baxar? Hər 6 aydanbir xəstəlik daha da ağırlaşır. Əvvəl birtəhər yeriyirdi. Sonra başladı iməkləməyə, daha sonra qolları da gücdən düşdü, indi dizinin üstündə sürünür. Artıq qolları da qüvvəsini itirib. Adi bir stəkan nədir ki, ona da gücü çatmır. Getdikcə geriləyir. Keçən dəfə yıxıldı, qolunu sındırdı. Nə qədər gipsdə qaldı. İştahı da yaxşıdır, inanırsız, bütün günü yemək tələb edir. Yeyir, kökəlir, yazıq anası bir dəri, bir sümükdür, daşıya da bilmir”, – Raya Qasımova bildirir.

Ailə Elmirin müalicəsinə dəstək olması üçün Birinci vitse-prezident Mehriban Əliyevaya, Prezident İlham Əliyevə də məktubla müraciət edib. Hələlik, məktublarına cavab ala bilməyiblər:

“Deyirik bəlkə kömək edələr xaricə apararıq. Maraqlanmışıq, müalicəyə hər 6 aydanbir getməlidir. Hər dəfəsinə 20 minə yaxın pul istəyirlər. Onunla eyni palatada yatan uşağı aparıblar, ona bu qədər pul xərclənib. Həmin uşaq ayağa qalxıb. Bizim o qədər imkanımız yoxdur. Fəhləliklə nəyi çatdırım?” – deyə, Təbriz Qasımov bildirir.

Təbriz Qasımov Prezident İlham Əliyev və onun xanımı Mehriban Əliyevaya müraciət edir. Xahiş edir ki, onlara övladlarını müalicə etdirmək üçün kömək etsinlər:

“Axşamacan televizorun qabağında oturur. Axşamacan da mama, Reyhanə, ata, ata çağırır. Ağlayır özünü öldürür, ayaqqabı aldırır, çanta aldırır. Məktəbə getmək istəyir. Çox pis durumdayıq. Ağırdır, dözmək olmur”.

Elmir son 3 ildir ki, yatağa məhkum olub, ayaqları tamamilə tutulub

Meydan TV məsələ ilə bağlı Səhiyyə Nazirliyinin Baş pediatrı, vətəndaşların respublikadankənar müalicəyə göndərilməsi üzrə Komissiyanın sədri Nəsib Quliyevlə əlaqə saxlayıb. Həkim bildirib ki, miopatiya xəstəliyinin nəinki Azərbaycanda, heç dünyada da radikal müalicəsi mövcud deyil. Ona görə xaricə aparsalar da, bir xeyri olmayacaq:

“Onlar Səhiyyə, Əmək və Əhalinin Sosial Müdafiəsi nazirliklərinin uşaq reablitasiya mərkəzlərinə müraciət etsinlər. Burada o uşağın xəstəliyinin fəsadlarının aradan qaldırılması və vəziyyətinin yüngülləşdirilməsi üçün fizioterapiya, müalicə kursları keçəcəklər. Amma bu xəstəlik irsidir və müalicəsi yoxdur”.

Həkim deyir ki, Elmir doğulanda onda bu xəstəliyin simptomları olub. Və bu, müəyyən vaxtdan sonra özünü göstərib:

“Belə deyək, tutaq ki, mən şəkər xəstəsiyəm. Dünyanın harasına getsəm, mənə dərman içməyi və pəhriz saxlamağı məsləhət görəcəklər. Ancaq konkret bir sağalma ehtimalı yoxdur, eləmi? Bu uşağın xəstəliyi də belə bir şeydir”.

Sozcu.az