Arif Hacılı ittihamlara cavab verdi: “Müsavatın hər hansı öhdəliyi yoxdur”

“Müsavat Partiyasının heç bir beynəlxalq qurum, beynəlxalq təşkilat, xarici dövlət qarşısında hər hansı öhdəliyi yoxdur. Müsavat Partiyası Azərbaycanın Konstitusiyası, qanunları, beynəlxalq hüquq normaları və öz nizamnaməsinə əsasən fəaliyyət göstərir”.

Sozcu.az xəbər verir ki, bu fikirləri Müsavat Partiyasının başqanı Arif Hacılı bildirib.

Partiya sədri deyib ki, Müsavat Azərbaycanın ərazi bütövlüyü, dövlət suverenliyimizin bütün ərazilərimizdə təmin edilməsi, ölkədə hüquqi dövlət, demokratık cəmiyyət qurulmsı uğrunda mübarizə aparır:

“Azərbaycan xalqı, eyni zamanda son 100 ildən çox dövrdə xalqın iradəsinin əsas ifadəçisi olan Müsavat Partiyası Azərbaycan ərazilərində daha bir erməni dövlətinin yaranması ilə heç vaxt barışmayacaq.

Dağlıq Qarabağ problemi ərazilərin toxunulmazlığına dair beynəlxalq hüquq normasına, BMT-nin bu məsələyə dair 4 qətnaməsinə uyğun olaraq həll edilməli, BMT tərəfindən qəbul edilmiş Azərbaycanın 86.6 min kv. km ərazilərimizdə dövlət suverenliyimiz təmin edilməlidir.

Ərazilərini düşmən işğalından azad etmək Azərbaycan xalqının haqqıdır. Ərazilərimiz işğaldan azad ediləcək. Bunun sülh ya müharibə yolu ilə olacağı isə artıq erməni xalqının seçimidir.

Beynəlxalq hüquq normalarına, BMT- nin qəbul etdiyi qətnamələrə əməl edəcəklərsə, Azərbaycanın ərazi bütövlüyünü, Konstitusiyasını, qanunlarını tanıyaraq qeyri- qanuni silahlı dəstələrini ərazilərimizdən geri çəkəcəklərsə müharibə olmayacaq”.

Xatırladaq ki, Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev mətbuata verdiyi açıqlamada Müsavat Partiyasını, ADP və AXCP-ni 2000-ci ildə Qarabağ məsələsini sülh yolu ilə həll edəcəklərinə dair beynəlxalaq təşkilatlar qarşısında öhtəlik götürməkdə ittiham etmişdir.

Bu ittihamdan sonra tanınmış ictimai xadim Aqil Səmədbəyli özünün feysbuk səhifəsində adı çəkilən partiya rəhbərliyindən ittihamla bağlı açıqlama verməyi tələb etmişdir.