Müasir dövrdə tibbi turizmin əhəmiyyəti son dərəcə artıb. Bu gün tibbi turizm sayəsində ölkələr böyük iqtisadi gəlirlər əldə edirlər. Təəssüf ki, biz ölkə olaraq mövcud potensialımızdan hələ də kifayət qədər istifadə edə bilmirik. Halbuki bunun üçün geniş imkanlarımız var. Sozcu.az xəbər verir ki, bunu Milli Məclisin Əmək və sosial siyasət komitəsinin bu gün keçirilən “Azərbaycanda turizmin mövcud vəziyyəti və inkişaf perspektivləri” mövzusunda keçiriləcək ictimai dinləmədə Səhiyyə komitəsinin sədri Əhliman Əmiraslanov bildirib.  “Hesab edirəm ki, bu istiqamətdə Azərbaycan Respublikasının Səhiyyə Nazirliyi, Azərbaycan Respublikasının Dövlət Turizm Agentliyi və Azərbaycan Həmkarlar İttifaqları Konfederasiyası birgə fəaliyyət göstərərək tibbi turizmin inkişafı üçün konkret tədbirlər planı hazırlamalı və onu həyata keçirməlidirlər. Qeyd etmək lazımdır ki, tibbi turizmdən əldə olunan gəlir digər turizm növləri ilə müqayisədə 6–10 dəfə daha yüksək ola bilir. Bu baxımdan ölkəmiz bu sahədən əhəmiyyətli maliyyə vəsaiti əldə edə bilər”. Komitə sədri bildirib ki, klinikalarda çalışan təcrübəli mütəxəssislərin və əməkdar tibb işçilərinin bu sahədə fəal iştirakı son dərəcə mühüm əhəmiyyət daşıyır. Bu baxımdan deputat onların beynəlxalq sertifikasiya keçməli olduğunu qeyd edib: “Bu sertifikasiya bir neçə əsas meyara söykənməlidir: mütəxəssisin hansı ali təhsil müəssisəsini bitirməsi, hansı nüfuzlu tibb mərkəzlərində ixtisasartırma və ya təcrübə keçməsi, çalışdığı sahə üzrə beynəlxalq səviyyədə tanınan elmi nəşrlərdə məqalələrinin dərc olunması, peşəkar fəaliyyətinin beynəlxalq platformalarda və rəsmi tibbi resurslarda tanıdılması. Bundan əlavə, klinikalarda aparılan müalicə və cərrahi əməliyyatların statistik göstəriciləri də açıq şəkildə təqdim olunmalı olduğunu bildirib.  O qeyd edib ki, klinikalarda əməliyyatların uğur faizi, ağırlaşma göstəriciləri, pasiyent məmnunluğu reytinqləri göstərilməlidir.  “Tibbi turizm məqsədilə ölkəyə gəlmək istəyən şəxslər məhz bu məlumatlara əsaslanaraq seçim edirlər. Ölkəyə gələn heç bir turist klinikadakı qiymətə yox, bu göstəricilərə baxır”.   Ə.Əmiraslanov qeyd edib ki, tibbi turizmi inkişaf etdirmək istəyiriksə, ölkəmizdə müasir reabilitasiya mərkəzlərinin yaradılması və bu sahədə işin sistemli şəkildə təşkili vacibdir.

“Zəlzələnin yenidən başvermə ehtimalı yoxdur. Təkrarlanma yalnız xırda təkanlar şəklində ola bilər”. Bunu “Yen Sabah”a açıqlamasında Azərbaycan Milli Elmlər Aakademiyası nəzdində Respublika Seysmoloji Xidmət Mərkəzinin baş direktoru Qurban Yetirmişli deyib. O bildirib ki, 4,7 maqnitudalı zəlzələnin ardınca 3.3 bal gücündə yeni təkan da qeydə alınıb: “Lakin qorxulu heç nə yoxdur. Avterşoklar hesabında enerji boşalması getməlidir ki, tarazlıq bərpa olunsun. Ümumiyyətlə, belə xırda təkanlar tez-tez baş verir. Azərbaycan seysmik zonada yerləşmir. Bizdə yalnız yüngül tərpənişlər baş verə bilər. Narahtlığa əsas yoxdur”. Qeyd edək ki, Şamaxı rayonunda 4,7 maqnitudalı zəlzələ qeydə alınıb. Yerli vaxtla 15:52-də qeydə alınan yeraltı təkanların dərinliyi 12 km olub. Zəlzələ episentrdə 5 bala yaxın, ətraf rayonlarda 3-4 bala yaxın hiss olunub.

Fövqəladə Hallar Nazirliyi Şamaxıdakı güclü zəlzələ ilə bağlı açıqlama yayıb.  Sozcu.az xəbər verir ki, açıqlamada bildirilib:  “Azərbaycan Milli Elmlər Akademiyası nəzdində Respublika Seysmoloji Xidmət Mərkəzindən Fövqəladə Hallar Nazirliyinin Böhran Vəziyyətlərində İdarəetmə Mərkəzinə daxil olmuş məlumata əsasən, 27.02.2026-cı il tarixində yerli vaxtla saat 15:52-də Şamaxı rayonunda 4.7 maqnituda zəlzələ qeydə alınıb.  Zəlzələ episentrdə 5 bala yaxın, ətraf rayonlarda 3-4 bala yaxın hiss olunub. Zəlzələ nəticəsində dağıntı və ya insan xəsarəti barədə bu vaxtadək Fövqəladə Hallar Nazirliyinə məlumat daxil olmayıb”.

Şamaxı rayonunda daha bir zəlzələ qeydə alınıb. Bu barədə Sozcu.az-a Respublika Seysmoloji Xidmət Mərkəzindən bildirilib. 3.3 maqnitudalı zəlzələ yerli vaxtla 16:05-də baş verib. Yeraltı təkanın dərinliyi 10 km-dir.

Şamaxı rayonunda 4,7 maqnitudalı zəlzələ qeydə alınıb. Sozcu.az xəbər verir ki, bu barədə Zəlzələlərin tədqiqatı bürosu məlumat yayıb. Qeyd edilib ki, yerli vaxtla 15:52-də qeydə alınan yeraltı təkanların dərinliyi 12 km olub. Zəlzələ episentrdə 5 bala yaxın, ətraf rayonlarda 3-4 bala yaxın hiss olunub.

Prezident İlham Əliyev Uşaqların rəqəmsal mühitdə zərərli məzmun və təsirlərdən qorunması ilə bağlı tədbirlər haqqında Sərəncam imzalayıb. Sozcu.az xəbər verir ki, Sərəncama əsasən, Azərbaycan Respublikasında informasiya-kommunikasiya texnologiyalarının inkişafı və rəqəmsal texnologiyaların geniş tətbiqi sosial şəbəkələrin ictimai münasibətlər sistemində əhəmiyyətli yer tutmasına səbəb olmuşdur. "Sosial münasibətlərin sürətlə rəqəmsallaşması və sosial şəbəkələrin uşaqların gündəlik həyatına getdikcə daha erkən yaşda daxil olması, həmin şəbəkələr vasitəsilə informasiyanın istehsalı, yayılması və istehlakının miqyasının artması bu sahədə hüquqi tənzimləmənin mövcud vəziyyətinin müasir texnoloji, sosial və təhlükəsizlik çağırışları baxımından təhlilini və təkmilləşdirilməsini zəruri edir. Beynəlxalq təşkilatların və elmi tədqiqat qurumlarının araşdırmaları, digər ölkələrin təcrübəsi göstərir ki, uşaqların rəqəmsal mühitdə qorunmasına diqqət yetirilməsi, onların psixoloji rifahı və təhlükəsizliyi, sağlam inkişafı üçün xüsusi hüquqi müdafiə və texnoloji mühafizə mexanizmlərinin tətbiqi tələb olunur. Bu yanaşmada rəqəmsal mühitdə uşaqların şəxsi həyatının, ləyaqətinin və təhlükəsizliyinin bilavasitə dövlətlər tərəfindən qorunması tövsiyə edilir. Beynəlxalq təcrübədə, ilk növbədə, sosial şəbəkələrin fəaliyyətinin tənzimlənməsi, onlara uşaqlar üçün risklərin azaldılması, məlumatların daha ciddi mühafizəsi və təhlükəsizliyi ilə bağlı öhdəliklər müəyyən edən tələblərin tətbiqinin geniş vüsət alması müşahidə olunur. Bu yeni tələblər sosial şəbəkələrin fəaliyyətinin sistemli hüquqi çərçivədə tənzimlənməsi, valideyn nəzarəti, platformadaxili təhlükəsizlik mexanizmləri və yaşa uyğun məzmun filtrləri vasitəsilə uşaqların və yeniyetmələrin rəqəmsal mühitdə təhlükəsizliyini təmin edir, həmçinin onların kritik informasiyanı təhliletmə, davranış və bilgi mədəniyyətinin inkişafına şərait yaradır", - Sərəncamda vurğulanıb. Sərəncama əsasən, Nazirlər Kabineti: aidiyyəti dövlət orqanlarını (qurumlarını), elmi müəssisə və təşkilatları, mütəxəssisləri və vətəndaş cəmiyyəti institutlarını cəlb etməklə və beynəlxalq təcrübə nəzərə alınmaqla, ölkə ərazisində uşaqların sosial şəbəkələrdəki zərərli məzmun və təsirlərindən qorunmasını, o cümlədən sosial şəbəkələrdə qeydiyyat zamanı yaş məhdudiyyətinin tətbiqini əhatə edən normativ hüquqi aktların layihələrini üç ay müddətində hazırlayıb Azərbaycan Respublikasının Prezidentinə təqdim etsin; 1.2. məktəbəhazırlıq qruplarında və ümumi təhsil müəssisələrində mobil və elektron cihazlardan istifadəyə dair qaydaların müəyyən edilməsi və tətbiqi ilə bağlı tədbirlər görülməsini təmin etməli; məktəbəhazırlıq və ümumi təhsil fənləri üzrə təhsil proqramlarına (kurikulumlara), o cümlədən məzmun standartlarına rəqəmsal savadlılıq, kibertəhlükəsizlik və məsuliyyətli onlayn davranış mövzularının daxil edilməsi, eyni zamanda mediada valideynlər, müəllimlər və uşaqlara yönələn maarifləndirmə proqramlarının hazırlanıb həyata keçirilməsi ilə bağlı tədbirlər görməli; sosial şəbəkələrdən qanunauyğun istifadənin, belə istifadə zamanı uşaq hüquqlarının müdafiəsinin təmin edilməsi ilə bağlı mütəmadi maarifləndirmə işinin həyata keçirilməsi, o cümlədən uşaqların rəqəmsal rifahına dair elmi tədqiqatlar aparılmasının təşviq edilməsi məqsədilə tədbirlər görməli; bu Sərəncamdan irəli gələn digər məsələləri həll etməlidir.

ABŞ-ın vitse-prezidenti Ceyms Devid Vens ABŞ-ın İrana potensial hücumunun Yaxın Şərqdə uzunmüddətli münaqişəyə səbəb olmayacağına əmin olduğunu bildirib. Sozcu.az xəbər verir ki, vitse-prezident bu barədə 26 fevral tarixində “The Washington Post“ qəzetinə müsahibəsi zamanı danışıb. "Yaxın Şərqdə illərlə sonu görünməyən bir müharibə aparacağımız fikri – bunun baş vermə ehtimalı yoxdur", - o deyib. Vansin sözlərinə görə, ABŞ prezidenti Donald Trampın nəzərdən keçirdiyi variantlar arasında İranın nüvə silahı əldə etməsinin qarşısını almaq üçün hərbi əməliyyatlar və diplomatik həll variantları var. "Düşünürəm ki, hamımız diplomatik varianta üstünlük verərdik", - deyən Vens bildirib ki, Vaşinqton administrasiyası İranın nüvə proqramına diplomatik həll yolu tapmağa üstünlük verəcək. Amma bütün bunlara baxmayaraq o, hər şeyin İran hakimiyyətinin nə edəcəyindən və nə deyəcəyindən asılı olduğunu bildirib.

ABŞ Meksikanın "Sinaloa" kartelinin liderləri Rene və Alfonso Arsat Qarsiya qardaşlarının tutulmasına kömək edən məlumatlara görə 10 milyon dollar mükafat təklif edib. Sozcu.az-ın məlumatına görə, bu barədə Dövlət Departamenti açıqlama yayıb. Qeyd olunur ki, "Qurbağa" ləqəbi ilə tanınan Rene Arsat Qarsiya və "Axilles" kimi tanınan qardaşı Alfonso Arzat Qarsiya təxminən 15 ildir ki, kartelin bölmələrindən birinə rəhbərlik edir və ABŞ-yə fentanil də daxil olmaqla narkotik qaçaqmalçılığına nəzarət edir. 2014-cü ildə ABŞ hakimiyyəti onları qiyabi olaraq ittiham edib, 2023-cü ildə isə ABŞ-nin Maliyyə Nazirliyi onları narkotik qaçaqmalçılığına görə sanksiya siyahısına salıb. Rene Arzat Qarsiya həmçinin xarici terror təşkilatının fəaliyyətinə dəstək verməkdə, metamfetamin, kokain, fentanil və marixuana qaçaqmalçılığında və çirkli pulların yuyulmasında ittiham olunur. Qeyd olunur ki, ötən ilin fevral ayında ABŞ administrasiyası "Sinaloa" və "Jalisco Nueva Generacion" da daxil olmaqla səkkiz narkotik kartelini xarici terror təşkilatı kimi tanıyıb.report)

Paytaxtın mərkəzi ərazilərində yaşayırlar, amma mənzillərinin sahəsi kiçik olduğu üçün verilən kompensasiya məbləği ilə yaşadıqları yerin ətrafından mənzil ala bilmirlər. Sozcu.az xəbər verir ki, paytaxtda aparılan söküntü işləri çərçivəsində ev sahiblərinin əsas problemlərindən biri də məhz budur. Məsələn, 30 kvadratmetr sahəsi olan mənzil sökülən zaman kvadratına 2700 manat kompensasiya hesablanarsa, 80 min manatdan bir qədər artıq məbləğ edir ki, bu pulla da ev sahibi yaşadığı əraziyə yaxın yerdən, yəni mərkəz ərazilərdən ev ala bilmir. Millət vəkili Vüqar Bayramovun sözlərinə görə, bu mexanizmin təkmilləşdiriliməsinə ehtiyac var - kompensasiya yerinə kiçiksahəli ev sahiblərinə həmin yerə yaxın ərazidən ev verilsin. Deputat Vüqar Bayramov bildirib ki, dövlət ehtiyacları üçün torpaqların alınması zamanı da mövcud imkanlar çərçivəsində vətəndaşlara əlavə dəstək mexanizmləri nəzərdən keçirilə bilər.(Xəzər TV)

ABŞ-ın vasitəçiliyi ilə Rusiya və Ukrayna arasında keçirilən üçtərəfli sülh danışıqlarının növbəti mərhələsi martın əvvəlində Əbu-Dabidə baş tuta bilər. Sozcu.az xəbər verir ki, bunu Ukrayna Prezidenti Volodimir Zelenski axşam müraciətində bildirib. O qeyd edib ki, bu açıqlamanı Cenevrədə ABŞ və Ukrayna rəsmiləri arasında müharibədən sonrakı bərpa məsələlərinə dair keçirilən görüşdən sonra səsləndirib. (Reuters)

Ukraynaya qarşı genişmiqyaslı müharibədən öncə Avropanın qaz bazarının 40 faizinə nəzarət edən, OPEK+ formatında dünya neft bazarında qaydaları və qiymətləri müəyyən edən Rusiya enerji gücü idi. Neft, qaz və daş kömürün satışından Rusiyaya hər il orta hesabla 500-550 milyard dollar daxil olurdu. Putinin “fateh”lik niyyəti bütün bu uğurları məhv etdi. Sozcu.az xəbər verir ki, bu sözləri politoloq Xaqani Cəfərli bildirib. Onun sözlərinə görə, Rusiya neft, qaz və daş kömürün satışını davam etdirsə də, Avropa bazarlarından qovulduğu üçün Çin, Hindistan və Türkiyə kimi alıcıların mərhəmətinə möhtac vəziyyətə düşüb: “Üstəlik, Avropa və dünya bazarlarında neft və qazın qiyməti də ucuzlaşmaqda davam edir. Niderlandın TTF (Title Transfer Facility) mərkəzində ən yaxın qaz fyuçers müqaviləsi 1000 kubmetr üçün 338 dollara düşüb. Aprel ayı üçün 1000 kubmetr qaz 334 dollardan təklif olunur. Böyük Britaniyada isə qiymətlər daha da ucuzlaşaraq 317 dollara düşüb. Bütün bunların nəticəsində Rusiyanın qaz və daş kömür sənayesi zərərlə işləyir. Neft sənayesinin gəliri 77 faiz azalıb. “Lukoyl” vergi yükünün azaldılması üçün dövlətdən kömək istəyib, “Surqutneftqaz”ın maliyyə vəziyyəti pisləşib, “Rosneft”in mənfəəti kəskin şəkildə azalıb. Hazırda neft sənayesindəki şirkətlərin təxminən yarısı zərərlə işləyir və bəzi kiçik şirkətlər iflas edir. Rusiya Energetika Nazirliyinin hesablamalarına görə, 2030-cu ilə qədər Rusiyada çətinliklə çıxarılan neft hasilatın təxminən 80 faizini təşkil edəcək. Bu isə o deməkdir ki, Rusiyada neftin bir barrelinin hasilatı ən azı 40-45 dollara başa gələcək. Hazırda Rusiyanın “Urals” markalı xam neftinin qiyməti 60 dollar civarında olsa da, Moskva onu Çinə 25 dollar endirimlə satır. Yəni, Rusiya bir daha böyük valyuta axınını hətta yuxuda da görməyəcək. Bu o deməkdir ki, Rusiya hələlik hərbi məğlubiyyətə məruz qalmasa da, iqtisadi məğlubiyyəti artıq gerçəkləşib. Bu məğlubiyyət Rusiyanı hökmən çökdürəcək. Rusiya iqtisadiyyatının aparıcı sahələri çökdüyü halda, “ölüm iqtisadiyyatı” (dəfn xidməti) yüksəliş dövrünü yaşayır. Bu “sənaye” 2024-cü ildə 7,7%, 2025-ci ildə 12,7% böyüyüb. Dəfn xərcləri yüksək olduğu üçün meyitlərin yandırılması da artıb. Bu isə krematoriyalara təlabatı artırıb. Hazırda Rusiyada 38 krematoriya var. Onlardan 27-si özəldir və 8-i son iki ildə açılıb. Halbuki özəl krematoriyaların fəaliyyəti də tamamilə qanunauyğun deyil. Maliyyə çatışmamazlığı səbəbindən dövlətə aid krematoriyaların tikintisi mümkün olmadığı üçün rəsmi orqanlar özəl krematoriyaların fəaliyyətinə göz yumur. Məlumata görə, 30-dan artıq krematoriyanın tikintisi də davam edir. Neft, qaz və daş kömür sənayesinin çöküşü, “ölüm iqtisadiyyatı”nın (dəfn xidməti) yüksəlişi Rusiyanın böyük bir sarsıntı ərəfəsində olduğunu təsdiqləyir. Bu nəhəng dövlət çökür və onu bir daha kimsə xilas edə bilməz. Elə bir vəziyyət yaranıb ki, Federal Təhlükəsizlik Xidmətinə yaxınlığı ilə bilinən “Komsomolskaya Pravda” radiosunda da Rusiyanın süqut edərək parçalanacağı təhlükəsindən danışmaq tabu mövzu olmaqdan çıxıb”.

Fransanın Azərbaycandakı səfirliyi 26 Fevral - Xocalı Soyqırımı Günü ilə bağlı Azərbaycana başsalığı verib. Sozcu.az xəbər verir ki, bu barədə səfirliyin "X" hesabında paylaşım edilib. "Bu gün biz Xocalı qurbanlarının xatirəsini dərin ehtiramla yad edən Azərbaycan xalqına qoşuluruq", - paylaşımda qeyd edilib.

Xərçəng xəstəliklərinin müalicəsinin özəl klinikalarda da aparılmasına başlanılacaq. Sozcu.az xəbər verir ki, bunu Azərbaycanın səhiyyə naziri Teymur Musayev bu gün Xocalı soyqırımının 34-cü ildönümü ilə bağlı "Ana harayı" abidəsini ziyarəti zamanı jurnalistlərə açıqlamasında deyib. Nazir qeyd edib ki, bu, islahatların bir hissəsidir. "İndidən bildirmək istəyirəm ki, özəl sektorda onkoloji xidmət göstərmək üçün və bu icazəni almaq üçün xüsusi qaydalar və tələblər hazırlanıb. Çox ciddi tələblərdir və yalnız ən yüksək tələblərə cavab verən müəssisələrə həmin lisenziya veriləcək", - o əlavə edib.

Azərbaycan Respublikasının Prezidenti İlham Əliyev, birinci xanım Mehriban Əliyeva və ailə üzvləri fevralın 26-da Xocalı şəhərində Xocalı Soyqırımı Memorialının açılışında iştirak ediblər. Sozcu.az xəbər verir ki, bu barədə Prezidentin mətbuat xidməti məlumat yayıb.

Türkiyənin Xarici İşlər Nazirliyi Xocalı faciəsinin 34-cü ildönümü ilə əlaqədar Azərbaycan xalqına başsağlığı verib. Sozcu.az xəbər verir ki, bu barədə nazirlik bəyanat yayıb. “26 fevral 1992-ci ildə Azərbaycanın Qarabağ bölgəsindəki Xocalı şəhərində günahsız mülki şəxslərə qarşı törədilən qırğını qınayırıq. Xocalıdakı vəhşilik vicdanımızda utancverici bir ləkə olaraq qalır. Qətlə yetirilən 613 nəfərin, yaralananların, əsir götürülən və itkin düşmüş bütün azərbaycanlı qardaş və bacılarımızın ağrısını həmişə qəlbimizdə daşıyırıq”, - bəyanatda qeyd olunub.

Səhiyyə sektorunda mərhələli şəkildə islahatlar aparılır. Sozcu.az xəbər verir ki, bunu səhiyyə naziri Teymur Musayev jurnalistlərə açıqlamasında TƏBİB-in Səhiyyə Nazirliyinə birləşdiriləcəyi ilə bağlı iddialara münasibət bildirərkən deyib. T.Musayev qeyd edib ki, bu məsələyə TƏBİB-in Müşahidə Şurasının sədri daha ətraflı və dəqiq cavab verə bilər.

Bakıda başı daşa dəyərək xəsarət alan şəxs həyatını itirib. Sozcu.az xəbər verir ki, 1958-ci il təvəllüdlü Qüdrət İsmət oğlu Hüseynov A.Məlikov küçəsində yıxılaraq baş nahiyəsində xəsarətlə xəstəxanaya yerləşdirilib. O, fevralın 25-i saat 03 radələrində yerləşdirildiyi xəstəxanada ölüb. Rayon prokurorluğu tərəfindən araşdırmalar aparılır.

ABŞ-ın Azərbaycandakı səfirliyi Xocalı soyqırımının 34-cü ildönümü ilə bağlı paylaşım edib. Sozcu.az xəbər verir ki, səfirlik bu barədə rəsmi sosial media hesablarında yazıb. "Bu gün biz 1992-ci ildə Xocalıda həlak olanların xatirəsini dərin ehtiramla yad edən Azərbaycan xalqına qoşuluruq. ABŞ səfirliyi adından həlak olanların ailələrinə və yaxınlarına ən səmimi və dərin hüznlə başsağlığı veririk. Qurbanların xatirəsini anarkən insan ləyaqətinin qorunmasının, mərhəmətin və gələcək nəsillər naminə davamlı sülhün qurulmasının vacibliyini bir daha xatırlayırıq", - paylaşımda qeyd olunub.

Bakıda fəaliyyət göstərən və Prezident Administrasiyasının sabiq rəhbəri Ramiz Mehdiyev ailəsinə məxsus olduğu bildirilən “German Hospital”ın bağlanacağı ilə bağlı yeni xəbərlər yayılıb. İddialara görə, son aylarda tibb müəssisəsinin fəaliyyəti zəifləyib. Qeyd olunur ki, xəstəxana əməkdaşlarına martın 1-dən etibarən klinikanın bağlanacağı deyilib. Modern.az məsələ ilə bağlı "German Hospital"la əlaqə saxlayıb. Klinkadan saytımıza verilən açıqlamada yayılan məlumatların həqiqət olmadığı bildirilib. Qeyd olunub ki, tibb müəssisəsi fəaliyyətini davam etdirir və əməkdaşlar iş başındadır. Xatırladaq ki, ötən il də klinikada bəzi həkim və əməkdaşların işdən çıxarılması, eləcə də bir neçə şöbənin fəaliyyətini dayandırması ilə bağlı xəbərlər yayılmışdı. Bundan əlavə, tibb müəssisəsinin adı istintaq materiallarında da hallanıb. Klinikanın Ramiz Mehdiyevin kürəkəni sabiq deputat İlham Əliyevə məxsus olduğu bildirilir. O, uzun illər səhiyyə və tikinti biznesi ilə məşğul olub. Mehdiyevin kürəkəninin adı həm də bir sıra kommersiya layihələrində, o cümlədən "German Hospital"ın təsis sənədlərində də keçir.

Fevralın 26-da bəzi bölgələrdə gözlənilən küləkli hava şəraiti ilə bağlı sarı və narıncı xəbərdarlıq verilib. Bu barədə Sozcu.az-a Milli Hidrometeorologiya Xidmətindən məlumat verilib. Naxçıvan MR, Zəngilan, Cəbrayıl, Laçın, Kəlbəcər, Gədəbəy, Gəncə, Naftalan, Samux, Göygöl, Şəmkir, İmişli, Beyləqan, Bərdə, Tərtər, Sabirabad, Saatlı, Şirvan, Salyan, Biləsuvar, Neftçala, Hacıqabul, Qobustan, Lənkəran, Lerik, Yardımlı, Masallı, Cəlilabadda sarı xəbərdarlığa uyğun olaraq şimal-şərq küləyi əsəcək, küləyin sürəti 13.9-20.7 m/san təşkil edəcək. Daşkəsən, Goranboy, Mingəçevirdə isə narıncı xəbərdarlığa uyğun olaraq şimal-şərq küləyi əsəcək, küləyin sürəti 20.8-28.4 m/san-dək güclənəcək.

Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Arzu Əliyeva fevralın 25-də Xocalı rayonunun Xanabad kəndində görülmüş işlərlə tanış olublar. Sozcu.az xəbər verir ki, bu barədə Prezidentin Mətbuat Xidməti məlumat yayıb.

“Azərbaycan Xəzər Dəniz Gəmiçiliyi” sədrinin müşaviri vəzifəsindən azad edilib. Sozcu.az xəbər verir ki, “Azərbaycan Xəzər Dəniz Gəmiçiliyi” QSC İdarə Heyətinin sədri Əfqan Cəlilovun müvafiq Əmri ilə Məhəmməd Paşazadə sədrin müşaviri vəzifəsindən azad olunub. Onunla bağlı qərar bir neçə gün əvvəl verilib. Qeyd edək ki, Məhəmməd Paşazadə Qafqaz Müsəlmanları İdarəsinin sədri, Şeyxülislam Allahşükür Paşazadənin oğludur.(Manset.az)

Ermənistan Polisinin Baş Cinayət Axtarışı İdarəsinin rəis müavini polkovnik Ovanes Tamamyan həbs edilib. Sozcu.az xəbər verir ki, bu barədə Ermənistan İstintaq Komitəsi məlumat yayıb. İlkin istintaq zamanı əldə edilən faktiki məlumatlara əsasən, Ovanes Tamamyan 2008-ci il martın 1-də heç bir əsas olmadan polis əməkdaşlarına İrəvanın Azadlıq Meydanında etirazçı E.A.-nı döyməyi və onu Baş Mütəşəkkil Cinayətkarlığa Qarşı Mübarizə İdarəsinə aparmağı tapşırıb. Bu tapşırıq əsasında E.A.-ya qarşı zorakılıq tətbiq edilib: onun bədəninin müxtəlif yerlərinə dəfələrlə yumruq və təpik vurulub, nəticədə ağır, həyati təhlükə yaradan xəsarətlər alıb. Ovanes Tamamyan Cinayət Məcəlləsinin 38-309-cu maddəsinin 3-cü hissəsi (vəzifə səlahiyyətlərindən sui-istifadəyə təhrik etmə) ilə ictimai cinayət işi açılıb. 25 fevral 2026-cı il tarixində Ovanes Tamamyan məhkəməyə verilmək üçün həbs edilib. İlkin istintaq davam edir.

İcra hakimiyyəti orqanlarında aparılan struktur dəyişikliyi ilə əlaqədar Cəlilabad Rayon İcra Hakimiyyətində də ixtisarlar aparılıb. Sozcu.az xəbər verir ki, aparılan struktur dəyişikliyi ilə əlaqədar icra hakimiyyətinin 28 əməkdaşı vəzifəsindən azad edilib. Dəyişikliklə əlaqədar Cəlilabad Rayon İcra Hakimiyyətində 38 vəzifə ləğv edilib və nəticədə həmin şəxslər işini itiriblər. Onlardan 10 nəfəri müxtəlif qurumlarda müəyyən vəzifəyə təyin edilsə də, 28 nəfər yeni işlə təmin edilməyib. İcra başçısı Rafiq Cəlilovun sərəncamı ilə 28 əməkdaşının dövlət qulluğuna xitam verilib. Məlumata görə, vəzifəsini itirənlərdən 35 nəfər kənd inzibati ərazi dairəsi üzrə nümayəndəsinin müavini, nümayəndəliyinin baş məsləhətçi - baş mühasibi və sürücü vəzifələrində çalışanlar olublar. Həmin şəxslərin 7 nəfər başqa vəzifəyə təyin olunsa da, hazırda 28 nəfər işsiz qalıb. (oxu.az)