Pakistanın paytaxtı İslamabadda toy şənliyi zamanı qaz balonunun partlaması nəticəsində səkkiz nəfər ölüb, 12 nəfər yaralanıb. Sozcu.az xəbər verir ki, bu barədə Pakistan mətbuatı məlumat yayıb. Məlumata görə, şənlik keçirilən şəxsi evdə baş verən partlayışda bəy və gəlin də ölüb. Yaralılar ağır yanıq xəsarətləri alıb və xəstəxanaya yerləşdiriliblər. Bu hadisə ilə bağlı araşdırma başlanılıb.

Zelenski çox möhkəm insandır. Mən Ukraynaya gedəndə bir dəfə Prezident Trampa "Cənab, o sizə çox oxşayır" dediyimi xatırlayıram. Sozcu.az xəbər verir ki, bunu ABŞ prezidentinin Ukrayna üzrə xüsusi nümayəndəsi Keyt Kelloq deyib. “Mən Zelenskinin cəsarətli bir lider olduğunu dedim. Administrasiyadakı insanlara da dedim ki, Avram Linkolndan bəri ABŞ-da onun kimi bir lider görməmişik. Demək istədiyim budur ki, heç kim öz torpağında onun kimi ekzistensial mübarizə aparmaq məcburiyyətində qalmayıb. Və biz bunu qəbul etməliyik. Onun haradan gəldiyini başa düşməliyik. O, Ukraynanı müdafiə edir. O, fikrini ifadə etməkdən çəkinmir. Mediadan necə istifadə edəcəyini bilir”, - Kelloq bildirib. Kelloqun sözlərinə görə, Zelenski barədə bu açıqlaması Trampın xoşuna gəlməyib: “O bununla razılaşmadı”.

Xaçmaz rayonunun Qaraqurtlu kəndi yaxınlığında piyadanın ölümü ilə nəticələnən yol-nəqliyyat hadisəsi baş verib. Sozcu.az xəbər verir ki, Qaraqurtlu kənd sakini, 1967-ci il təvəllüdlü Tərlan Poladov dəmir yolunu keçmək istəyərkən qatar onu vurub. O, ağır vəziyyətdə Xaçmaz rayon Mərkəzi Xəstəxanasına çatdırılsa da, həyatını xilas etmək mümkün olmayıb. Faktla bağlı araşdırma aparılır.

Kuba uzun illər Venesueladan aldığı külli miqdarda neft və pullarla yaşayıb. Bunun müqabilində Kuba son iki Venesuela diktatoru üçün "təhlükəsizlik xidmətləri" təmin edib, amma artıq yox! Sozcu.az xəbər verir ki, bunu ABŞ Prezidenti Donald Tramp özünün “Truth Social” səhifəsində yazıb. “Bu kubalıların əksəriyyəti ötən həftə ABŞ-ın hücumunda ölüb və Venesuelanın artıq onları illərdir girov saxlayan quldurlardan və şantajçılardan qorunmağa ehtiyacı yoxdur. İndi Venesuelanın onları qorumaq üçün dünyanın ən güclü ordusu olan ABŞ var və biz onları qoruyacağıq”, - Tramp bildirib.

Amerika hərbçiləri Venesuela lideri Nikolas Maduronu ələ keçirmək üçün əməliyyat zamanı naməlum, güclü bir silahdan istifadə ediblər. Sozcu.az xəbər verir ki, bu barədə “Nyu York Post” qəzeti Venesuela liderinin təhlükəsizlik xidmətinin əməkdaşının ifadəsinə istinadla məlumat yayıb. “ABŞ əsgərləri venesuelalıların radar sistemlərini söndürməklə, müqavimət mərkəzlərini basmaqla və dronlarla mövqelərini atəşə tutmaqla onları asanlıqla kor edə biliblər. Birdən bütün radar sistemlərimiz heç bir izahat olmadan qaraldı. Növbəti gördüyümüz şey mövqelərimizin üzərindən uçan çoxsaylı dronlar oldu. Necə reaksiya verəcəyimizi bilmirdik”, - məlumatda qeyd olunub. Onun sözlərinə görə, bundan sonra səmada Amerika xüsusi təyinatlılarını daşıyan helikopterlər peyda olub: “Onlar odlu silahlardan daha güclü silahlarla silahlanıblar. Bir anda onlar güclü səs dalğası yaradaraq nəsə atıblar və başımın içəridən partladığını hiss etdim. Ətrafdakıların burunlarından qan açıldı və qan qusmağa başladılar. Bu, onları heç kimin ayağa qalxa bilməyəcəyi vəziyyətdə qoydu”. Qeyd edək ki, yanvarın 3-ü ABŞ hərbi qüvvələri Venesuelanın paytaxtı Karakasda və ətraf ştatlarda 11 strateji hədəfə genişmiqyaslı zərbələr endirib. Əməliyyat nəticəsində ölkə Prezidenti Nikolas Maduro xanımı Silia Floreslə birlikdə ələ keçirilərək Nyu Yorka aparılıb.

Uzun kabusunuz tezliklə bitəcək. Sozcu.az xəbər verir ki, bunu ABŞ senatoru Lindsi Qrehem İrandakı etirazlar barədə yazıb. "Zülmə son qoymaq üçün cəsarətiniz və qətiyyətiniz Tramp və azadlığı sevən hər kəs tərəfindən tanınıb", - o bildirib. Qeyd edək ki, İranda inflyasiya və iqtisadi gərginlik səbəbindən kütləvi aksiyalar keçirilir.

Son 48 saat ərzində İranda ən azı 2000 etirazçı öldürülüb. Sozcu.az xəbər verir ki, bu barədə Londonda yayımlanan “İran İnternational” kanalı məlumat yayıb. Qeyd edək ki, iki həftədir İranda etiraz aksiyaları davam edir.

Yanvarın 11-i saat 11:00-a olan faktiki hava açıqlanıb. Milli Hidrometeorologiya Xidmətindən Sozcu.az-a verilən məlumata görə, yanvarın 11-i saat 11:00-a olan məlumatına əsasən ölkə ərazisinin bəzi yerlərində yağıntılı və küləkli hava şəraiti müşahidə olunur, dağlıq ərazilərdə qar yağır. Yağan qarın hündürlüyü Zaqatalada (Əlibəy) 27, Qaxda 15, Qubada 11, Qusarda 8, Gədəbəydə 4, Sədərəkdə 3, Şahdağ, Daşkəsəndə 2, Xaltan, Şəkidə (Kişçay) 1 sm-dir. Bir sıra ərazilərdə şimal-qərb küləyi əsir. Küləyin maksimal sürəti Bakıda və Abşeron yarımadasında 21, Mingəçevirdə 18, Qobustanda 16 m/s-dək güclənir. Naxçıvan, Şərur, Culfa, Daşkəsən, Göygöl, Balakən, Qax, Zaqatala, Qəbələ, Şəki, Şamaxı, Qobustan, Quba, Qusar, Göyçay, Kürdəmir, Sabirabad, Biləsuvar, Lerikdə duman müşahidə olunur, görünüş məsafəsi 500 metrədək məhdudlaşacağı gözlənilir.

ABŞ vətəndaşlarına Venesuelanı dərhal tərk etmələri və ölkəyə səyahət etməmələri tövsiyə olunur. Sozcu.az xəbər verir ki, bu barədə ABŞ Dövlət Departamentinin bəyanatında qeyd olunub. “Venesuelada təhlükəsizlik vəziyyəti qeyri-sabit olaraq qalır. Beynəlxalq uçuşların bərpa olunması ilə əlaqədar olaraq, Venesueladakı ABŞ vətəndaşlarına ölkəni dərhal tərk etmələri tövsiyə olunur”, - bəyanatda bildirilib. Departamentdən vurğulanıb ki, ABŞ vətəndaşları Venesuelanı tərk etməzdən əvvəl ayıq olmalı və ətrafdakılara diqqət yetirməlidirlər.

Naxçıvan şəhərində səhər saatlarından qatı duman müşahidə olunur. Sozcu.az Report-a istinadla xəbər verir ki, duman görmə məsafəsini məhdudlaşdırdığı üçün avtomobil və piyadaların hərəkətində çətinliklər yaradır. Mövcud hava şəraiti yol hərəkəti iştirakçıları üçün gediş-gəliş zamanı nişanlara uyğun daha diqqətli və məsuliyyətli olmağı zəruri edir.

Bəlkə də İran heç vaxt olmadığı qədər azadlığa can atır. Kömək etməyə hazırıq. Sozcu.az xəbər verir ki, bunu ABŞ Prezidenti Donald Tramp sosial şəbəkə hesabında yazıb. Qeyd edək ki, daha öncə Donald Tramp dəfələrlə çıxışında İranda etiraz aksiyalarının iştirakçılarının öldürüləcəyi təqdirdə İrana zərbə endirəcəkləri xəbərdarlığını edib.

Ötən gecə Ukrayna Müdafiə Qüvvələri Rusiyanın Volqoqrad vilayətindəki neft anbarına, eləcə də işğal altında olan ərazilərdəki bir neçə hədəfə zərbə endirib. Sozcu.az xəbər verir ki, bu barədə Ukrayna Silahlı Qüvvələri Baş Qərargahı məlumat yayıb. Bildirilib ki, Rusiya ordusunun hücum imkanlarını azaltmaq tədbirləri çərçivəsində yanvarın 9-dan 10-na keçən gecə Ukrayna Müdafiə Qüvvələrinin bölmələri Volqoqrad vilayətinin “Jutovskaya” neft anbarına zərbə endirib. Baş Qərargah Rusiya ordusunun bölmələrini yanacaqla təmin edən hədəfin vurulduğunu və zərərin miqyasının müəyyən olunduğunu qeyd edib. Həmçinin vurğulanıb ki, Zaporojye bölgəsində Rusiya ordusunun 19-cu motoatıcı diviziyasının bölməsinə məxsus dron anbarına və Donetsk vilayətinin Pokrovsk rayonunun yaxınlığındakı dronları idarəetmə məntəqəsinə zərbələr endirilib.

İranda etirazlar Güney Azərbaycan şəhərlərinə yayılıb: dinc mübarizə üçün real imkanlar yaranır Müsavat Partiyası Məclisinin sədri Arif Hacılı yazır: İranda davam edən etiraz dalğası artıq Güney Azərbaycan şəhərlərinə də çatıb. Təbriz, Ərdəbil, Urmiya, Zəncan, Həmədan və digər Azərbaycan şəhərlərində sosial və siyasi şüarlarla etiraz aksiyaları keçirilir. Mövcud məlumatlara görə, hələlik bu şəhərlərdə yanğınlar, dağıntılar və insan tələfatı qeydə alınmayıb. Bu isə onu deməyə əsas verir ki, hazırkı mərhələdə dinc mübarizə üsulları ilə hədəflərə çatmaq və real nəticələr əldə etmək imkanları daha real görünür. Məhəmməd Əmin Rəsulzadənin “Yalnız insan haqlarını tanıyan və onları müdafiə edən millətlər qalib gələcəkdir” fikri bu gün İranda baş verən proseslər fonunda xüsusi aktuallıq kəsb edir. “İnsanlara hürriyyət, millətlərə istiqlal” prinsipi mövcud şəraitdə ən doğru konseptual yanaşma kimi ön plana çıxır. Hazırkı mərhələdə əsas vəzifə vahid milli iradənin formalaşdırılması üçün ortaq istinad nöqtələrinin müəyyənləşdirilməsidir. Vaxtilə irəli sürülmüş “Azadlıq, Ədalət, Milli hökumət” şüarı və bu əsasda milli hüquq və azadlıqların təminini nəzərdə tutan ümummilli manifest — indiki terminologiya ilə desək, yol xəritəsi — ümummilli hərəkat üçün real baza ola bilər. Eyni zamanda, Abbas Lisani və digər milli fəalların azadlığa buraxılması, mühacirətdə olan siyasi liderlərin ölkəyə qayıtmasına şərait yaradılması kimi ilkin tələblər ümummilli hərəkatın başlanması üçün əsas istinad nöqtələri hesab edilə bilər. İran çoxmillətli ölkə olsa da, azərbaycanlılar bu ölkənin ən böyük və dominant etnik qrupudur. Güney Azərbaycanın hüdudlarından kənarda yaşayan milyonlarla soydaşımız, xüsusilə Tehran və Kərəc şəhərlərində məskunlaşmış 6 milyondan artıq azərbaycanlı ölkənin ictimai-siyasi taleyində həlledici rola malikdir. Bu baxımdan, İranın gələcəyi Azərbaycan türklərinin milli iradəsi, eləcə də Azərbaycan Respublikası və Türkiyə Cümhuriyyətinin regional maraqları nəzərə alınmadan müəyyən edilə bilməz. Bu reallıq ümummilli ideya kimi ictimai şüurda möhkəmlənməli və beynəlxalq ictimaiyyətin diqqətinə çatdırılmalıdır.

İranın Baş prokuroru Məhəmməd Mövəhhedi Azad ölkədə artıq iki həftədir davam edən kütləvi etiraz aksiyalarının iştirakçılarını ölüm cəzası ilə hədələyib. Sozcu.az Bakupost.az-a istinadən xəbər verir ki, baş prokuror etirazçıları “Allahın düşməni” adlandırıb. "Bütün etirazçılar "Allahın düşmənləri" ("mühareb") kimi günahlandırılır. Bu cinayətə görə ölüm cəzası olacaq. Bu, əmlaka ziyan vuran və təhlükəsizliyi pozan üsyançılara, terrorçulara, eləcə də onlara kömək edənlərə tətbiq ediləcək", - o bildirib. Həmçinin əlavə edib ki, prokurorlar məhkəmə proseslərini tez hazırlamalı, mərhəmət və şəfqət göstərməməlidirlər. Tehran prokuroru Əli Salehi də bir gün əvvəl etirazçıların "mühareb" ittihamı ilə üzləşə biləcəyini bildirmişdi.

Tehran küçələrində və dünyanın müxtəlif şəhərlərində iranlı qadın və kişilərin azadlıq tələb edən səsləri eşidilir. Danışmaq, toplaşmaq, səyahət etmək və hər şeydən əvvəl azad yaşamaq azadlığı. Avropa onların yanındadır. Bu qanuni nümayişlərin qəddarcasına yatırılmasını birmənalı şəkildə pisləyirik. Sozcu.az xəbər verir ki, bu sözləri Avropa Komissiyasının sədri Ursula fon der Leyen İrandakı etirazlar və iğtişaşlarla bağlı bəyanatında bildirib. “Məsul şəxslər tarixin səhv tərəfində olanlar kimi xatırlanacaqlar. Biz həbsdə olan bütün etirazçıların dərhal azad edilməsinə çağırırıq. Biz internetə tam çıxışın bərpa olunmasına çağırırıq. Və fundamental hüquqlara hörmət tələb edirik", - deyə o sosial media hesabında yazıb.

Bu gün Şamaxı rayonunda baş verən zəlzələ nəticəsində hər hansı dağıntı və ya digər fəsad qeydə alınmayıb. Sozcu.az xəbər verir ki, bu barədə Azərtac-a Şamaxı Rayon İcra Hakimiyyəti başçısının müavini Mehriban Eyubova məlumat verib. Onun sözlərinə görə, yeraltı təkanlardan dərhal sonra müvafiq yerlərlə əlaqə saxlanılıb, hazırkı vaxta qədər hər hansı fəsad barədə məlumat daxil olmayıb. Qeyd edək ki, Respublika Seysmoloji Xidmət Mərkəzinin məlumatına əsasən, zəlzələ bu gün yerli vaxtla saat 18:55-də qeydə alınıb. 3,8 maqnitudalı zəlzələnin ocağı 8 kilometr dərinlikdə yerləşib.

Güney Azərbaycan milli-siyasi təşkilatlarının dəstək bəyanatı yayıblar. Güney Azərbaycan milli-siyasi təşkilatları hər zaman Güney Azərbaycanda Azərbaycan Türklərinin öz milli şüar və istəkləri əsasında apardıqları milli mübarizəni yüksək qiymətləndirərək dəstəkləyiblər və bu mübarizənin müstəqil, düşünülmüş və millətimizin milli maraqlarına hesablanmış şəkildə aparılmasının tərəfdarı olublar. Biz hesab edirik ki, Güney Azərbaycanın şəhərlərində başladılacaq hər bir kütləvi etirazın və qiyamın əsas məqsədi Vətənimiz Azərbaycanı fars faşizminin fars mərkəzli rejimlərinin sistematik zülmündən qurtarmaq olmalıdır. Çünki, Azərbaycan Milli Hərəkatı dövlətçilik ideyasına söykənən, milli və siyasi iradəyə əsaslanan bir hərəkatıdır. O, öz mübarizəsini bir rejimin başqa bir diktator rejimə dəyişdirilməsinə hesablanan siyasi oyunlardan kənar, bağımsız olaraq aparır. Güney Azərbaycan Milli Hərəkatı özünün müəyyənləşdirdiyi milli–demokratik prinsiplər üzərində hərəkət etməli, qarşılıqlı hörmət əsasında qeyri-fars millətləri ilə həmrəy olmalı, faşizm üzərində qurulan farsçılığa son qoymaq üçün azadlıq mübarizəsini öz milli şüarlarına əsaslanaraq aparmalıdır. Azərbaycan mərkəzli milli-siyasi qurumlar olaraq, biz də millətimizin mübarizəsinin yanındayıq və onu dəstəkləyirik.  Hər bir Azərbaycan Türkü bilməlidir ki, Vətənimiz Azərbaycanın qurtuluşu milli-siyasi iradəmizin təmin olunması deməkdir. Bu isə millətimizi təmsil edən çağdaş-demokratik milli dövlətçiliyin qurulmasından keçir. İnanırıq ki, millətimizin milli iradəsini təmsil edən Güney Azərbaycan Milli Hərəkatı müstəqil mübarizəsi ilə özünü beynəlxalq səviyyədə təsdiqləyəcək və azadlıq uğrunda qələbəsini məhz öz gücü ilə gerçəkləşdirəcəkdir. Yaşasın Azərbaycan! Yaşasın millətimiz! Gümey Azərbaycan Milli Dövlətçilik Şurası (MDŞ) Güney Azərbaycan Milli Azadlıq Cəbhəsi (GAMAC) Güney Azərbaycan Qurtuluş Partiyası (GAQP) Güney Azərbaycan Öyrənci Birliyi

Prezidentlər Volodimir Zelenski və Donald Tramp dünya liderlərinin Davos görüşündə Ukraynanın rifahı və müharibədən sonrakı yenidənqurma ilə bağlı 800 milyard dollarlıq müqavilə imzalamağı planlaşdırırlar. Sozcu.az xəbər verir ki. bu barədə "The Telegraph" qəzetinin məlumatında bildirilib. Nəşrin mənbələrinə görə, Ukrayna prezidenti həm iqtisadi rifah planını, həm də müharibədən sonrakı təhlükəsizlik zəmanətləri ilə bağlı müqaviləni yekunlaşdırmaq üçün gələn həftə Ağ Evə getməyə ümid edirdi."Lakin, "könüllülər koalisiyası"ndan olan avropalı tərəfdarları onu səyahət etməkdən çəkindirdilər və Trampla görüş üçün daha uyğun alternativ kimi Dünya İqtisadi Forumunu təklif etdilər. Rəsmilər bildiriblər ki, plan görüşdən Rusiya ilə müharibəyə son qoymaq təklifinin əsas hissəsi olan iqtisadi müqaviləni yekunlaşdırmaq üçün istifadə etməkdir", - məqalədə deyilir. Məlumata görə, prezidentlər Donald Tramp və Vladimir Zelenski sözügedən sazişi 19-23 yanvar tarixlərində Davosda keçiriləcək Dünya İqtisadi Forumunda imzalaya bilərlər. "Rifah planı" Ukraynanın bərpası və iqtisadi dirçəlişi üçün 10 il ərzində təxminən 800 milyard dollar cəlb etməyi hədəfləyir. Buraya kreditlər, qrantlar və özəl şirkətlərdən investisiyalar daxildir.

Tərtərdə ana və oğlu dəm qazından zəhərlənib. Sozcu.az xəbər verir ki, Tərtər rayon sakinləri 1973-cü il təvəllüdlü Müşfiq Əsəd oğlu Əzimov və anası - 1955-ci il təvəllüdlü Sahibə Salman qızı Əzimova yaşadıqları Famil Qulami küçəsi döngə 1, ev 7 ünvanında sobadan sızan dəm qazından zəhərlənib. Hadisə nəticəsində Müşfiq Əzimov ölüb, Sahibə Əzimova isə xəstəxanaya yerləşdirilib. Faktla bağlı Tərtər rayon prokurorluğunda araşdırma aparılır.

Goranboyun Dəliməmmədli şəhəri, M.Əsədov küçəsi ev 10 ünvanında yaşayan 1970-ci il təvəllüdlü Namiq Nemət oğlu İsmayılzadə hamam otağında dəm qazından zəhərlənərək ölüb. Sozcu.az xəbər verir ki, faktla bağlı Goranboy rayon prokurorluğunda araşdırma aparılır. Qeyd edək ki, mərhum həmin gün Rusiyadan Azərbaycana qayıdıb. Evinə çatdıqdan bir müddət sonra hamam otağına girib və dəm qazından boğularaq ölüb.

Ağdaşda ölümlə nəticələnən avtoqəza baş verib. Sozcu.az xəbər verir ki, Ağdaş rayon sakini 1968-ci il təvəllüdlü Ramis Əsgər oğlu Hacıyev idarə etdiyi VAZ-2101 minik markalı avtomobillə Yuxarı Ləki kəndi ərazisində yolu keçən piyada - 1966-cı il təvəllüdlü Əvəz Hümmət oğlu Şərifovu vurub. Sonuncu aldığı xəsarətlər nəticəsində hadisə yerində ölüb. Faktla bağlı cinayət işi başlanıb.

Ukrayna müharibənin 1417-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 217 810 hərbçi, 11 530 ədəd tank, 23 882 ədəd zirehli döyüş maşını, 35 908 ədəd artilleriya sistemi, 1 597 ədəd RYAS (reaktiv yaylım atəş sistemi), 1 269 hava hücumundan müdafiə sistemi, 434 ədəd hərbi təyyarə, 347 ədəd helikopter, 73 510 ədəd avtomobil texnikası, 103 414 ədəd PUA, 4 155 qanadlı raket, 28 gəmi/kater, 2 sualtı qayıq, 4 039 xüsusi avadanlıq itirib.

İranın İsfahan şəhərində dünən gecə keçirilən nümayişlər zamanı prokuror öldürülüb. Sozcu.az xəbər verir ki, bu barədə xarici KİV yazıb.  Qeyd olunub ki, Esfarayenin Dövlət Prokuroru Əli Əkbər Hüseynzadə iğtişaşçılar tərəfindən yandırılan binada yanaraq ölüb.  Şimali Xorasan Prokurorluğunun açıqlamasına görə, etirazçılar yanğınsöndürənlərin müdaxiləsinə mane olub, buna görə də prokuror və onu müşayiət edən polis əməkdaşları yanğında həlak olublar. Prokurorluq məsələ ilə bağlı araşdırmaların davam etdiyini və şübhəlilərin tutulması üçün səylərin başlandığını bildirib.

Rusiya prezidenti Vladimir Putinin Ukraynaya qarşı müharibəsi tamamilə yalan üzərində qurulub. Sozcu.az xəbər verir ki, bu barədə “The Hill” yazıb: “Rusiyanın qələbəsinə inamını formalaşdıran açıqlamaları yalandır. Rusiya-Ukrayna müharibəsində Putinin irəli sürdüyü bütün iddialar – etnik ruslara təhlükə, Ukraynanın nasistlər tərəfindən idarə olunması və NATO-nun Rusiyaya təhdidi – yalandır. Putinin müharibəni qazanacağına dair inancı da yalan üzərində qurulub, çünki Kremlin kəşfiyyatı və hərbi qurumları ona yanlış məlumatlar ötürür. Ukrayna sürətlə inkişaf edirdi. Bu, korrupsiya dövlətini idarə edən Putinin xoşuna gəlmirdi. Onun məqsədi Ukraynanı məhv etmək və planlarındakı Rusiya imperiyasının tərkibinə qatmaqdır”.