Ağdamda minaya düşərək həlak olan Gizir Xanıya şəhidlik statusu verilib. Sozcu.az Teleqraf-a istinadən xəbər verir ki, 23 sentyabr tarixində rayonun Mirəşelli kənd ərazisində minaya düşərək həlak olan Gizir Xanı kimi tanınan Səyyaf Əhmədova mülki şəhid statusu verilib. Bu barədə məlumatı S.Əhmədovun yaxınları təsdiqləyib. Qeyd edək ki, S.Əhmədov uzun müddət Azərbaycan Respublikasının Silahlı Qüvvələri sıralarında xidmət edib. 44 günlük Vətən müharibəsində də könüllü olaraq xidmət edib.

AB iki Azərbaycan vətəndaşına qarşı sanksiyalar tətbiq edib. Sozcu.az xəbər verir ki, bu barədə AB-nin rəsmi jurnalında dərc olunmuş AB Şurasının Qətnaməsində deyilib. Məlumata görə, Tələt Səfərov və Etibar Əyyub sanksiya siyahısına daxil edilib. Qeyd edək ki, Böyük Britaniya da may ayında Tələt Səfərov və Etibar Əyyubu sanksiya siyahısına əlavə etmişdi.

Qazaxıstanda kəskin soyuqlar səbəbindən üç nəfər donaraq ölüb. Sozcu.az xəbər verir ki bu barədə Qazaxıstan mətbuatı məlumat yayıb. Məlumata görə, itkin düşmüş 57, 25 və 35 yaşlı üç kişinin meyiti tapılıb. Onların hamısının hipotermiyadan öldüyü bildirilib.

Bəzi müəssisələrdə əlavə ödənişlərin tələb edilməsi, tibbi sərfin vətəndaşa aldırılması, imtiyazlı xəstələrə dərman təminatının qanunvericiliyə uyğun təşkil edilməməsi və s. kimi hallar yolverilməzdir. Sozcu.az xəbər verir ki, bu fikirlər TƏBİB-in İcraçı direktoru Vüqar Qurbanovun rəhbərliyi ilə "İlin yekunlarına və növbəti il üçün qarşıya qoyulan hədəflərə dair" keçirilən müşavirədə səsləndirilib. Müşavirədə eyni zamanda tibb müəssisələrində tibbi xidmətin təşkilində mövcud çətinliklər, idarəetmə və maliyyə proseslərində rast gəlinən nöqsanlar, həmçinin neqativ hallarla bağlı xəbərdarlıqlar diqqətə çatdırılıb. Bununla yanaşı, aparılan yoxlamalarda ayrı-ayrı tibb müəssisələrində sterilizasiya, infeksiyaya nəzarət və keyfiyyət standartlarının tələblərinə tam əməl olunmaması ilə bağlı müşahidələrin qeydə alındığı bildirilib. Vüqar Qurbanov məsul şəxslərə nəzarətin gücləndirilməsi və aşkarlanan çatışmazlıqların aradan qaldırılması ilə bağlı tapşırıqlar verib.

Milli Şuranın üzvü, sabiq deputat Gültəkin Hacıbəylinin Türkiyədən deportasiya olunmasına qərar verilib. Sozcu.az xəbər verir ki, bu barədə Gültəkin Hacıbəyli özü sosial şəbəkə hesabında məlumat yayıb. O bildirib ki, bu gün ona 5 il müddətinə Türkiyədən deport olunması ilə bağlı rəsmi qərar təqdim olunub. Qeyd edək ki, Gültəkin Hacıbəyli noyabrın 29-da Türkiyədə saxlanılıb.

Sumqayıt şəhərində 19 yaşlı qız dəm qazından boğularaq ölüb. Sozcu.az xəbər verir ki, hadisə şəhərin Xəzri yaşayış massivində yerləşən fərdi evlərin birində baş verib. 2006-cı il təvəllüdlü Züleyxa Niyaz qızı Hüseynova yaşadığı evin hamam otağında dəm qazından boğularaq həyatını itirib. Faktla bağlı Sumqayıt şəhər Prokurorluğunda araşdırma aparılır.

"Kiyev atəşkəs və təhlükəsizlik zəmanətləri tələb edir…" Ukrayna prezidenti Vladimir Zelenski ABŞ və Rusiya tərəfindən irəli sürülən bəzi tələbləri ədalətsiz hesab etdiyini açıqlayıb. Sozcu.az xəbər verir ki, bu barədə "The Telegraph" nəşri  yazıb. "Harada dayanmışıqsa, orada qalmalıyıq" Məlumatda deyilir ki, Zelenski bu fikirləri "WhatsApp" üzərindən keçirilən onlayn brifinqdə səsləndirib. Onun sözlərinə görə, atəşkəs üçün ən ədalətli variant döyüşlərin hazırkı cəbhə xətti üzrə dondurulmasıdır. Prezident bildirib ki, "harada dayanmışıqsa, orada qalmaq" prinsipi real atəşkəs deməkdir və yalnız bundan sonra diplomatik danışıqlara keçmək olar. Lakin Rusiya bu yanaşmanı qəbul etmir və Donbasdan Ukrayna qoşunlarının çıxarılmasını tələb edir. Zelenski qeyd edib ki, bu mövzuda ABŞ nümayəndələri ilə açıq danışıb və rus tərəfinin tez-tez dezinformasiya yaydığını izah etməyə çalışıb. O, Kupyansk nümunəsini xatırladaraq, Rusiyanın şəhərin guya işğal edildiyi barədə iddialarının reallığa uyğun olmadığını vurğulayıb. Bufer zona və simmetriya məsələsi Prezidentin sözlərinə görə, ABŞ tərəfi müəyyən mərhələdə Ukrayna qoşunlarının nəzarət etdiyi ərazilərdən geri çəkilməsi variantını təklif edib. Zelenski bu yanaşmanı ədalətsiz adlandıraraq bildirib ki, əgər cəbhə xətti boyunca bufer və ya iqtisadi zona yaradılacaqsa, geri çəkilmə simmetrik olmalıdır. "Əgər Ukrayna qoşunları 5-10 kilometr geri çəkilirsə, niyə Rusiya qüvvələri də işğal olunmuş ərazilərin dərinliyinə eyni məsafədə çəkilmir?" - Zelenski sual edib. "The Telegraph" yazır ki, ABŞ-ın Donbasda "azad iqtisadi zona" ideyasına cavab olaraq Kiyev Rusiyanın da bu bölgədən qoşunlarını çıxarmasını təklif edib. Ukraynalı ekspertlər isə bildirir ki, Moskva Donetsk və Luqansk vilayətlərinin tam boşaldılmasını tələb etməklə gələcək ərazi iddialarına zəmin yaratmağa çalışır. "Zaman gücə hörmət tələb edir" Zelenski vurğulayıb ki, hazırkı mərhələdə sülh danışıqları dəyərlərdən çox güc amili üzərində qurulub. Onun sözlərinə görə, Ukrayna atəşkəsdən sonra müharibənin yenidən başlanmasını istəmir və buna görə də Kiyev üçün əsas şərt hüquqi cəhətdən məcburi təhlükəsizlik zəmanətləridir. Prezident Budapeşt Memorandumunun uğursuz təcrübəsini xatırladaraq, ABŞ-la NATO-nun 5-ci maddəsinə bənzər mexanizmlərin müzakirə edildiyini bildirib. O, sülh planına dair son təkliflərə ABŞ-dan hələ rəsmi cavab alınmadığını, lakin Kiyevin dialoqa hazır olduğunu vurğulayıb. Zelenskinin sözlərinə görə, yekun sülh planı hamını qane etməyə bilər, lakin əsas məsələ onun Ukrayna üçün ədalətli, real və effektiv olmasıdır: :Bu plan Rusiyanın gələcəkdə yeni təcavüzə başlamasına imkan verməməlidir".

"Dünya səhnələrinə baxsaq, oturaraq ifa edən bir çox müğənni var. Bu həm də mahnılara düşünülmüş səhnə idi". Sozcu.az xəbər verir ki, bu sözləri müğənni Roza Zərgərli "Afaqla onlar" verilişində deyib.  O, səhhətində yaranmış problemdən danışıb:  "Mənim bu hərəkətimi səhhətimdə problem var kimi göstərən sosial şəbəkədəki hər kəsə çox əsəbiləşdim. Bu, çox böyük tərbiyəsizlikdir. Mənim ayağımda olan problemi illərdir hər kəs bilir. Vəziyyətim ağırlaşmışdı. Yayda əməliyyat olundum və şükürlər olsun ki, hər şey yaxşıdır. Əməliyyatdan sonra baş tutan konsertimi təxirə sala bilmədiyim üçün orada axsamağım hiss olunurdu".

İşə gecikməyə görə işçinin maaşından vəsait tutulmasının qanunvericiliyə uyğun olub-olmaması məsələsi tez-tez müzakirə edilir. Maraqlıdır, işə gecikməyə görə işçinin maaşından tutula bilərmi? Mövzu ilə bağlı Konkret.az-a açıqlama verən hüquqşünas Ramil Süleymanov bildirib ki, işçinin işə gecikməsi halında ilk növbədə ona xəbərdarlıq edilməlidir. Onun sözlərinə görə, növbəti mərhələdə işçiyə töhmət verilə bilər. Hüquqşünas qeyd edib ki, işçiyə gecikməyə görə hər hansı cərimənin tətbiq edilməsi və ya maaşından tutulma yalnız müəyyən şərtlər daxilində mümkündür: “Əgər işçiyə gecikməyə görə cərimə verilməsi və ya hər hansı formada cərimə ödənişinin tələb olunması müəssisə rəhbərliyi ilə həmkarlar ittifaqı arasında bağlanmış kollektiv sazişdə öz əksini tapıbsa, bu halda cərimənin tətbiqi mümkündür”. Ramil Süleymanov vurğulayıb ki, belə bir kollektiv saziş mövcud olmadığı təqdirdə işçiyə cərimə yazılması qanunsuzdur: “Bu məsələ ilə bağlı yalnız daxili əmr verilməsi əsassız hesab olunur və hüquqi qüvvəyə malik deyil”. Qeyd edək ki, mövcud qanunvericiliyə əsasən işçilərin əmək hüquqları qorunur və işəgötürənlər yalnız qanunla müəyyən edilmiş qaydalar çərçivəsində intizam tənbehi tədbirləri görə bilərlər.

Ermənistanın Baş naziri Nikol Paşinyan bütün ermənilərin katalikosu II Qareginlə “müharibəni” davam etdirir. Sozcu.az-ın məlumatına görə, Nikol Paşinyan Facebook-da paylaşdığı videoda bildirib ki, Ermənistandakı adi kilsələrdə mənəvi mövzularda moizələrə çoxdan rast gəlinmir. O keşişləri siyasiləşməkdə ittiham edib. "Onlar siyasi mətnlər yazırlar. Kilsə siyasi partiyaya çevrilib ki, bu da qəbuledilməzdir. Mən bu hadisədən xəbərsiz idim; mənə hazırkı kilsə rəhbərinin (II Qaregin-red.) hava limanında "İnsanlar haradadır?" deyə soruşduğunu göstərdilər. Amma orada heç kim yoxdur. İnsanlar yoxdur, çünki o, xalqla birlikdə deyil, çünki onları kilsədən uzaqlaşdırıb", - deyə Paşinyan qeyd edib.

“Rusiya Azərbaycana qarşı bütün siyasi, diplomatik və mədəni təsir vasitələrini itirib. Azərbaycan özünün müstəqil siyasətini yürüdür. Artıq bölgədə regional gücə çevrilib. Ən əsası, Zəngəzur dəhlizi açılan kimi Azərbaycan ümumiyyətlə Rusiyanı bütün tranzit yollarından məhrum edəcək. Artıq heç kim Avropaya Rusiya vasitəsi ilə yük daşımayacaq”. Bu sözləri “Yeni Sabah”a Azərbaycan Jurnalistlər Birliyinin (AYB) sədri Elçin Şıxlı deyib. O, Rusiyada Azərbaycan diasporuna qarşı növbəti zorakılıq hallarını şərh edib: “Ruslar belə düşünür ki, Azərbaycan diasporunun üzvlərini, Rusiyanın azərbaycanlı vətəndaşlarını sıxışdırmaqla Bakını qorxuda bilərlər. BUndan bir qədər əvvəl münasibətlərədə guya yumşalma olmuşdu. Əslində, heç bir yumşalma yoxdur. Dekabrın 24-də "Ural Azərbaycan" Cəmiyyətinin sədri Şahin Şıxlinskinin məhkəməsi keçriləcək. Əsası olmayan ittihamlara görə, ona ən azı 25-30 il iş kəsilə bilər. Bu, onun üçün ömürlük həbs kimi bir şeydir. Şahinə, oğlu Mutvalıya və digər həbs edilmiş şəxslərlə bağlı əsas ittiham 2001-2002 və 2011-2012-ci illərdə guya baş verən cinayət və qətl hadisələridir. Həmin illərdə Mutvalının 1 yaşı olub. Təsəvvür edin, bu ittihamların sırasında uşağı da günahlandırırlar. Şahin Şıxlinskini həbs etdikdən sonra Mustafayev soyadlı birini Sverdolvsk vilayətində onun yerinə diaspor rəhbəri təyin etdilər. Həmin adam Şahinin əleyhinə saxta ittihamlar irəli sürürdü. Sonra ruslar gördü ki, həmin adamın heç bir nüfuzu yoxdur və əsl kriminal elə özüdür, onu da həbs etdilər”. E. Şıxlı vurğulayıb ki, Voronejdə Azərbaycan disaspor nümayəndələrinə qarşı keçirilən əməliyyat Aktauda baş verən təyyarə qəzasına dair yekun istintaq nəticəsi ilə əlaqədardır: “Rusiya qəza ilə bağlı yekun istintaq nəticəsini bu ayın sonu elan edəcək. Nəticənin elan olunmasından sonra Azərbaycanın özünü necə aparmasından xeyli mətləb asılı olacaq. Lakin Azərbaycan belə addımlardan qorxmur. Ruslar hesab edir ki, azərbaycanlılar Rusiyada çalışıb, öz ölkələrinə külli miqdarda pul vəsaiti köçürür. Orada çalışan azərbaycanlı öz ailəsinə 100 dollar göndərirsə, ən az 300 dollar Rusiyada qalmağına xərcləyir. Soydaşlarımız o pulu oturduqları yerdə qazanmır. İşləyir, əziyyət çəkir. Rusiyanın işçi resursuna ciddi ehtiyacı var. Ona görə də Moskvanın hay-küy salması əsassızdır”. Xatırladaq ki, dekabrın 14-də Rusiya xüsusi təyinatlı polis dəstəsi (SOBR) Voronej vilayətində Azərbaycan diasporunun nümayəndələrinə qarşı əməliyyat keçirib. Əməliyyat nəticəsində bir neçə soydaşımız saxlanılıb.

Əli Mahmudov bir müddət əvvəl Nizami Tibb Mərkəzinin təsərrüfat işləri üzrə direktor müavini təyin edilib.  Sozcu.az Unikal.az-a istinadən xəbər verir ki, bununla bağlı Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanov əmr imzalayıb. Qeyd edək ki, Əli Mahmudov sabiq milli təhlükəsizlik naziri Eldar Mahmudovun əmisi oğludur.

Prezident İlham Əliyev İdxal-ixrac, tranzit, nəqliyyat və logistika üzrə fəaliyyətin rəqəmsallaşdırılması ilə bağlı əlavə tədbirlər haqqında fərman imzalayıb. Sozcu.az fərmanın mətnini təqdim edir: 1. “Bir pəncərə” informasiya sistemi (bundan sonra – Sistem) yaradılsın. 2. Müəyyən edilsin ki: 2.1. xarici ticarət fəaliyyətinin həyata keçirilməsi ilə bağlı Sistem vasitəsilə aşağıdakılar təmin edilir: 2.1.1. tələb olunan sənədlərin, o cümlədən kommersiya və nəqliyyat sənədlərinin təqdim edilməsi; 2.1.2. nəqliyyat vasitələrinə və daşınan mallara dair tələb olunan sənədlərin və məlumatların elektron qaydada tərtib edilməsi; 2.1.3. sərhədkeçmə prosedurları, daşıma qaydaları və şərtləri ilə bağlı məlumat verilməsi, eləcə də istifadəçilərin müraciətlərinin qəbulu və cavablandırılması; 2.1.4. yükdaşıma müqavilələrinin elektron qaydada bağlanılması, eləcə də bağlanılmış müqavilələrin təqdim olunması; 2.1.5. daşınan yüklərin bütün hərəkət marşrutu boyunca izlənilməsi; 2.1.6. ödənişlər aparılması, eləcə də həmin fəaliyyətlə bağlı statistik məlumatların əldə edilməsi; 2.2. Sistemin sahibi funksiyalarını Azərbaycan Respublikasının Nazirlər Kabineti, operatoru funksiyalarını isə Azərbaycan Respublikasının Rəqəmsal İnkişaf və Nəqliyyat Nazirliyi həyata keçirir; 2.3. Sistemlə lisenziya və icazələr (o cümlədən uyğunluğunun qiymətləndirilməsi ilə bağlı sertifikatlar və şəhadətnamələr), gömrük, vergi, qida təhlükəsizliyi, kənd təsərrüfatı, avtomobil nəqliyyatı sahələrində dövlət xidmətləri göstərilməsi, vergi ödəyicilərinin dövlət qeydiyyatı və uçotu, fiziki şəxslərin identikləşdirilməsi, ölkəyə gəlməsi, qeydiyyatı və ölkədən getməsi ilə bağlı informasiya sistemləri və ehtiyatları, habelə mülki aviasiya, dəmir yolları və dəniz nəqliyyatı sahələrində fəaliyyət göstərən qurumların, eləcə də ödənişlər aparılması, mülki məsuliyyətin və daşınan yüklərin sığortalanması üzrə ödəniş xidməti təchizatçılarının (kredit təşkilatlarının) və sığorta təşkilatlarının informasiya sistemləri və ehtiyatları arasında Azərbaycan Respublikasının normativ hüquqi aktları (məlumatların tərkibinin və məlumat mübadiləsinin hüquqi əsaslarını tənzimləyən) ilə müəyyən edilmiş hədlərdə məlumat mübadiləsi Elektron Hökumət İnformasiya Sistemi üzərindən aparılır. 3. Azərbaycan Respublikasının Nazirlər Kabineti: 3.1. doqquz ay müddətində: 3.1.1. Sistemin əsasnaməsinin layihəsini hazırlayıb Azərbaycan Respublikasının Prezidentinə təqdim etsin; 3.1.2. beynəlxalq təcrübə nəzərə alınmaqla, idxal-ixrac, tranzit, nəqliyyat və logistika sahələrində fəaliyyətin rəqəmsallaşdırılmasının təmin olunması məqsədilə normativ hüquqi aktların təkmilləşdirilməsinə dair təkliflərini hazırlayıb Azərbaycan Respublikasının Prezidentinə təqdim etsin; 3.2. Azərbaycan Respublikası Rəqəmsal İnkişaf və Nəqliyyat Nazirliyinin və Azərbaycan Respublikası Dövlət Gömrük Komitəsinin təklifləri əsasında Sistemin fəaliyyətinin təmin olunması üçün zəruri tədbirlər görsün; 3.3. bu Fərmandan irəli gələn digər məsələləri həll etsin. 4. Azərbaycan Respublikasının Rəqəmsal İnkişaf və Nəqliyyat Nazirliyi: 4.1. Sistemin aparılması, fəaliyyətinin təşkili və inkişafı üçün zəruri tədbirlər görsün; 4.2. Sistemin Azərbaycan Respublikası Prezidentinin 2019-cu il 3 iyun tarixli 718 nömrəli Fərmanı ilə təsdiq edilmiş “Hökumət buludu” (G-cloud) Konsepsiyası”na uyğun olaraq “Hökumət buludu”nda yerləşdirilməsi, aparılması və təkmilləşdirilməsi, habelə “Dövlət informasiya ehtiyatlarının, sistemlərinin və elektron xidmətlərin vahid reyestri”nə və fərdi məlumatların informasiya sistemlərinin dövlət reyestrinə daxil edilməsi üçün tədbirlər görsün; 4.3. Sistem vasitəsilə aparılan əməliyyatlara dair aylıq hesabatı onunla inteqrasiya olunan informasiya sistemlərinin və ehtiyatlarının mülkiyyətçilərinə (sahiblərinə və ya operatorlarına) təqdim etsin. 5. Azərbaycan Respublikasının Rəqəmsal İnkişaf və Nəqliyyat Nazirliyi və Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti, bu Fərmanın 1-ci hissəsi nəzərə alınmaqla, “Dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi Qaydaları”nın təsdiq edilməsi və elektron hökumətlə bağlı bəzi tədbirlər haqqında” Azərbaycan Respublikası Prezidentinin 2018-ci il 12 sentyabr tarixli 263 nömrəli Fərmanının tələblərindən irəli gələn tədbirlərin həyata keçirilməsini təmin etsinlər.

Bakıda və Abşeron yarımadasında dekabrın 16-da hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi, lakin gecə və axşam bəzi yerlərdə arabir yağış yağacağı gözlənilir. Milli Hidrometeorologiya Xidmətindən Sozcu.az-a verilən məlumata görə, sabah şimal-şərq küləyi əsəcək. Havanın temperaturu gecə 3-5, gündüz 6-9 dərəcə isti olacaq. Atmosfer təzyiqi 766 mm civə sütunundan 771 mm civə sütununa yüksələcək. Nisbi rütubət 70-80% təşkil edəcək. Azərbaycanın rayonlarında bəzi yerlərdə arabir yağıntılı olacağı, dağlıq rayonlarda qar yağacağı gözlənilir. Ayrı-ayrı yerlərdə leysan xarakterli olacağı ehtimalı var. Mülayim şərq küləyi əsəcək. Havanın temperaturu gecə 1 dərəcə şaxtadan 4 dərəcəyədək isti, gündüz 7-10 dərəcə isti, dağlarda gecə 3-8 dərəcə şaxta, yüksək dağlıq ərazilərdə 10-13 dərəcə şaxta, gündüz 2-6 dərəcə şaxta olacaq. Gecə və səhər bəzi dağlıq ərazilərdə yolların buz bağlaması ehtimalı var.

Bu döyüşə girmişiksə, sona qədər mübarizə aparacağıq. Sozcu.az Report-a istinadən xəbər verir ki, bu barədə "Qarabağ"ın baş məşqçisi Qurban Qurbanov jurnalistlərə açıqlamasında deyib. "Məğlub olsaq da şərəflə məğlub olmaq istəyirik. Həqiqətən uğurlu bir yoldur. Məqsədimiz ÇL in qrupuna düşmək idi. Şükürlər olsun ki bunu bacardıq. Bəlkə də hamının düşüncəsi o idi ki bir qələbə olsun. Çox şükür ki artıq iki qələbəmiz var. Azərbaycana belə klubların gəlməsi çox gözəl haldır. Azarkeşlər futbol ictimaiyyəti üçün maraqlıdır. Son vaxtlar bir qədər aqressiv futbol oynayırıq. Son matçda komandamızın fiziki durumu ən yaxşı formada idi. Bu gün 60, 70 dəqiqə tab gətirə biliriksə deməli sabah daha da irəli gedə bilərik. Təəssüf ki Azərbaycan çempionatında bu tempi görmürük. Bununla belə çalışırıq ki rəqiblərə aciz şəkildə məğlub olmayaq", - baş məşqçi əlavə edib. Qeyd edək ki, Q.Qurbanov 63 jurnalistin qatıldığı sorğuda 58 səs toplayaraq bütün rəqiblərini qabaqlayıb. Bununla da o, 15-ci dəfə Azərbaycanın ən yaxşı məşqçisi adını qazanıb.

Binəqədidə 1991-ci il təvəllüd qəsəbə sakini Taleh Şahid oğlu Fehruzlu elektrik cərəyanı vurması nəticəsində ölüb. Sozcu.az Oxu.az-a istinadən xəbər verir ki, araşdırmalar nəticəsində onu dekabrın 14-ü saat 11 radələrində Binəqədi şosesində yerləşən Sərdarov adına zavodun həyətində elektrik cərəyanı vurduğu məlum olub. Qeyd edək ki, faciəli şəkildə ölən şəxs dekabrın 12-si saat 10 radələrində yaşadığı evdən çıxıb və ondan heç bir məlumat alınmayıb.

Azərbaycanın rayonlarında dekabrın 16-dan 17-si gündüzədək hava şəraitinin bəzi yerlərdə arabir yağıntılı olacağı, dağlıq ərazilərdə qar yağacağı gözlənilir. Bu barədə Sozcu.az-a Milli Hidrometeorologiya Xidmətindən məlumat verilib. Bildirilib ki, ayrı-ayrı yerlərdə yağıntının leysan xarakterli olacağı ehtimalı var. Gecə və səhər bəzi dağlıq ərazilərdə yolların buz bağlaması gözlənilir. Çaylarda, xüsusən də Quba-Xaçmaz və Lənkəran-Astara bölgəsi ərazisindən axan bəzi çaylarda sululuğun artacağı ehtimal olunur.

Qış fəsli Azərbaycana dekabrın 21-i saat 19:03:01-də daxil olacaq, bununla da Şimal yarımkürəsində qış, Cənub yarımkürəsində isə yay fəsli başlayacaq. Bu barədə Sozcu.az-a Bakı Dövlət Universitetinin Fizika fakültəsinin Astrofizika kafedrasından məlumat verilib. Bildirlib ki, bu zaman Yerin fırlanma oxu Günəş istiqaməti ilə ən böyük bucaq əmələ gətirir və ya Günəş həmin gün günorta üfüqdən minimum hündürlükdə (26⁰.2) olur. Həmin gün ən qısa gündüz (gündüzün uzunluğu 9 saat 17 dəqiqə 22 saniyə) və ən uzun gecə (gecənin uzunluğu 14 saat 42 dəqiqə 38 saniyə) olur. Qış fəslinin uzunluğu 88 gün 23 saat 42 dəqiqə 52 saniyə təşkil edəcək.

“Şərur MTK”nın sahibi İsfəndiyar Axundovun (Şərurlu İsfəndiyar) barəsində xüsusi ittiham qaydasında verilən şikayət üzrə növbəti məhkəmə prosesi keçirilib. Sozcu.az xəbər verir ki, bu gün Binəqədi Rayon Məhkəməsində hakim Vüsal Tağıyevin sədrliyi ilə keçirilən prosesdə vəkil Asim Abbasov məhkəməyə elektron qaydada təqdim etdiyi vəsatəti səsləndirib. Vəkil bildirib ki, mütəxəssis rəyində yeyinti sözü yazılsa da, cinayət predmeti kimi Cinayət Məcəlləsinin müvafiq maddələrində əks olunsa da, iş üzrə tənqidi hal kimi yanaşılıb. Təqdim edilən rəydə dələduz sözünə toxunulmayıb, təhqiqat aparılmayıb. Videoda müəyyən məbləğlər səsləndirilsə də, bu barədə heç nə yazılmayıb. Həmçinin vəkil əlavə edib ki, AMEA-nın Dilçilik İnstitutunun direktoru hazırda dövlətə xəyanətdə təqsirləndirilən Ramiz Mehdiyevin vəzifədə olan zaman təyin edilib. Həmçinin bəzi media resurslarında Ramiz Mehdiyevlə İsfəndiyar Axundov arasında əlaqənin olması ilə bağlı yazılar dərc edilib. Bu da ona əsas verir ki, rəy qərəzlidir. Rəyin sübutlar siyahısından çıxarılmasını xahiş edirəm. Müdafiə tərəfinin vəkili Ülvi Nəsibli bildirib ki, İsfəndiyar Axundovu Ramiz Mehdiyevlə əlaqələndirmək məsələsinə yumorla yanaşmaq lazımdır. Vəkil Şahbaz Kərimli məhkəməyə bildirib ki, sübut mötəbər olmalıdır. Ramiz Mehdiyev və İsfəndiyar Axundov arasında əlaqə olmayıb. Təqsirləndirilən İsfəndiyar Axundov bildirib ki, Ramiz Mehdiyevlə əlaqəsi yoxdur. Ümumiyyətlə, Ramiz Mehdiyev söhbətinə gəldikdə isə bu işlə DTX məşğuldur. Lazımi şəxslərin qanuni cəzası veriləcək. Biz onlardan çox bilmirik. Vəkil Asim Abbasov bildirib ki, mətbuatda dərc edilən yazılar yeni deyil, 2020-ci ildə dərc edilib və həmin zaman Ramiz Mehdiyev vəzifədə idi. Vəkil əlavə edib ki, məhkəmə istintaqı zamanı həm təqsirləndirilən şəxs özü, həm də övladı bizimlə danışıqlara gedib və razılaşma ilə bağlı zənglər edib. Bununla bağlı qeydlər də var. Bizim tələbimiz sizin etdiyiniz səhvin etiraf edilməsidir. Məhkəmə rəyin sübutlar siyahısından çıxarılması ilə bağlı vəsatəti baxılmamış saxlayıb və vəsatətə yekun məhkəmə aktının çıxarıldığı zaman qiymət veriləcəyini bildirib. Həmçinin məhkəmə əvvəlki prosesdə vəkil Asim Abbasovun rəyi verən mütəxəssisin dindirilməsi ilə bağlı verdiyi və baxılmamış saxlanılan vəsatətə münasibət bildirib. Məhkəmə sözügedən vəsatəti təmin etməyib. Daha sonra sənədlər tədqiq edilib. Sənədlərin tədqiqi bitdikdən sonra məhkəmə istintaqının yekunlaşdığını elan edib. Xüsusi ittiham qaydasında iddia qaldıran Emil Səməndərovun vəkili çıxış üçün vaxt istəyib. Məhkəmənin növbəti prosesi 22 dekabra təyin edilib. Qeyd edək ki, İsfəndiyar Axundov barəsində Cinayət Məcəlləsinin 147.2-ci (böhtan) və 148-ci (təhqir) maddələri üzrə xüsusi ittiham qaydasında şikayət edilib. Xüsusi ittiham qaydasında “Proqress 2016” MTK-nın rəhbəri Emil Səməndərov şikayət edib. İttihama görə, İsfəndiyar Axundov müsahibələrindən birində Emil Səməndərovu dələduz kimi təqdim edib.

Qusar rayonunun Üzdənoba kəndində dəm qazından zəhərlənmə baş verib. Sozcu.az APA-ya istinadən xəbər verir ki, bir ailənin üzvü olan 4 nəfər qaz sobası ilə qızdırılan evdə dəm qazından zəhərlənib. Ev sahibi Faiz Sadikov, onun həyat yoldaşı Zalina Sadikova və iki azyaşlı övladları Qusar Rayon Mərkəzi Xəstəxanasına müraciət ediblər. Onlara müvafiq tibbi yardım göstərilib, evə buraxılıblar. Faktla bağlı araşdırma aparılır.

Ukrayna müharibənin 1390-cı günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 188 490 hərbçi, 11 410 ədəd tank, 23 721 ədəd zirehli döyüş maşını, 35 041 ədəd artilleriya sistemi, 1 567 ədəd RYAS (reaktiv yaylım atəş sistemi), 1 259 hava hücumundan müdafiə sistemi, 432 ədəd hərbi təyyarə, 347 ədəd helikopter, 69 798 ədəd avtomobil texnikası, 90 124 ədəd PUA, 4 073 qanadlı raket, 28 gəmi/kater, 1 sualtı qayıq, 4 026 xüsusi avadanlıq itirib.

Bu gün Azərbaycanın Milli Qəhrəmanı Əliyar Əliyevin doğum günüdür. Sozcu.az xatırladır ki, Əliyar Əliyev 1957-ci il dekabrın 14-də Qubadlı rayonunun Qəzyan kəndində anadan olub. 1979-cu ildə Azərbaycan Dövlət Bədən Tərbiyəsi İnstitutunu fərqlənmə diplomu ilə bitirərək, bir müddət Qubadlı rayonunun Dondarlı kənd orta məktəbində idman müəllimi işləyib. Milli Qəhrəman yunan-Roma güləşi üzrə dəfələrlə respublika çempionu, ümumittifaq və beynəlxalq yarışların qalibi olub. Onun rəhbərliyi ilə yetişmiş səkkiz nəfər respublika və SSRİ çempionu olub. Qarabağ müharibəsi başlayanda Əliyar Əliyev könüllü olaraq Azərbaycan Silahlı Qüvvələrinin sırasına qoşulub. Əvvəlcə taborun kəşfiyyat bölməsinin komandiri, sonra tabor komandirinin təchizat üzrə müavini təyin edilib. 1988-ci ilin fevralında Xankəndidəki ilk erməni mitinqlərindən sonra Ermənistandan azərbaycanlıların deportasiyası başlanıb və ilk qaçqın dalğası Qubadlıdan keçib. Elə bu illərdə Əliyar Əliyev Qubadlıda xalq hərəkatının başçısı, demokratik qüvvələrin rəhbəri kimi tanınır. Onun təşkil etdiyi tabor camaat arasında "Pəhləvanlar taboru" adlanıb. 1992-ci ildə Əliyar Əliyev taborun kəşfiyyat bölməsinin komandiri təyin edilib. Sonradan isə taborun rəhbərliyi ona həvalə olunub. 1992-ci il sentyabrın 30-da Laçın rayonu istiqamətində döyüşə rəhbərlik edib. O, həmin ilin payızında 40 könüllü döyüşçü ilə birlikdə işğal altındakı Laçının 40-a qədər kəndini dörd gün ərzində ermənilərdən azad edib. Milli Qəhrəmanın son döyüşü 1992-ci il oktyabrın 3-də Laçının iki kilometrliyində olub. Tikanlı zəmi yüksəkliyi uğrunda döyüşdə tabor komandiri Əliyar Əliyev və onun sürücüsü Əlisadət Ağayev qəhrəmancasına şəhid olublar. O, Qubadlı rayonunun Qəzyan kəndində dəfn olunub. Qubadlı şəhəri 25 oktyabr 2020-ci il tarixində işğaldan azad olunub. Digər işğal altında olan torpaqlarımızla birlikdə Qubadlı da düşmən tapdağından azad edildikdən sonra Milli Qəhrəmanın qəbri bərpa edilib. Qəbirdaşı hazırlanaraq ətrafı səliqəyə salınıb.

Bu gün Rusiyanın bir neçə regionundakı neft emalı zavoduna PUA hücumu edilib. Sozcu.az xəbər verir ki, bu barədə Rusiya Teleqram kanalları məlumat yayıb. Məlumata görə, Volqoqrad vilayətindəki Uryupinsk şəhərində neft emalı zavoduna zərbələr endirilib. Yerli sakinlər güclü partlayış və yanğınların baş verdiyini bildiriblər. Hücumları Volqoqrad vilayətinin qubernatoru Andrey Boçarov da təsdiqləyib. Bundan başqa, Smolensk vilayətindəki DRES-ə PUA zərbələri endirilib. Yaroslavl şəhərindəki “Slavneft-YANOS” ASC-yə məxsus neft emalı zavodu da vurulub. Rusiya Teleqram kanalları Krasnodar diyarındakı Afipski neft emalı zavodunun da vurulduğunu bildiriblər.

NATO özünün strateji çərçivəsini yenidən gözdən keçirməli, Atlantika uğrunda döyüş və ya Avropadakı quru əməliyyatlarının hüdudlarından kənara çıxacaq Rusiya ilə qarşıdurmaya hazırlaşmalıdır. Sozcu.az xəbər verir ki, bu, NATO Hərbi Kollecinin son icmalında qeyd olunub. Sənədin müəllifi, kollecin elmi əməkdaşı Endryu Monaqan iddia edib ki, dövlətin bütün dəniz qüvvələrinin inkişafı Moskvanın siyasətinin əsas xüsusiyyətidir. Ekspert qeyd edib ki, bu, Rusiyaya geoiqtisadi rəqabət dövründə özünü lider kimi göstərməyə imkan verir. "Bu, NATO-nun oriyentirlərinin çərçivəsini bərpa olunmuş "Atlantika uğrunda döyüş"dən və ya Şimal-Şərqi Avropadakı quru əməliyyatları ssenarilərindən kənara, qlobal üfüqlərə malik, çoxcəbhəli, müxtəlif növlü Rusiya çağırışına doğru yönəldir", - icmalda bildirilib. Alyans analitikləri onu da qeyd ediblər ki, böhran ssenariləri tez-tez Baltik dənizindən Kara dənizinə qədər vahid strateji istiqamətdə gərginliyin artmasına diqqət yetirir.