ABŞ Prezidenti Donald Tramp yanvarın 15-də Ağ Evdə Venesuela müxalifətinin lideri Mariya Korina Maçado ilə görüşə bilər. Sozcu.az xəbər verir ki, bu barədə "CNN" Ağ Evin yüksək vəzifəli nümayəndəsinə istinadən məlumat yayıb. “Venesuela müxalifətinin lideri, 2025-ci il Nobel Sülh Mükafatı laureatı Mariya Korina Maçado cümə axşamı Prezident Donald Trampla görüşəcək”, - qeyd edib.

Osmanlı tarixinin araşdırıcısı Fransevi Efendinin “Mən İranda Qacarlar sülaləsinin bərpasını və 1906-cı il konstitusiyasını dəstəkləyirəm” ifadəsinə beynəlxalq siyasət və Yaxın Şərq üzrə amerikalı analitik, şərhçi və alim Maykl Skott Doran münasibət bildirib. Sozcu.az Globalinfo.az-a istinadən xəbər verir ki, Doran İranda hakimiyyətdə Səfəvilər sülaləsini görmək istədiyini vurğulayıb: “Mən Səfəviləri dəstəkləyirəm. Şah İsmayıl uzaqgörən Azərbaycan monarxı idi,” – Doran vurğulayıb. Qeyd edək ki, Maykl Doran Corc Buş (oğul) administrasiyası dövründə Milli Təhlükəsizlik Şurasında baş direktor və Pentaqonda ictimai diplomatiya üzrə müavin vəzifələrində çalışıb. O, açıq şəkildə İraqın işğalını və Yaxın Şərq ölkələrini hədəf alan “rejim dəyişikliyi” siyasətini dəstəkləyib.

İranda baş verən hadisələr və Bütöv Azərbaycan Yazar: Hakim Sadiqli (Alper Əlincəli) Bu yazını qələmə almaqda məqsədim son günlər İranda baş verən hadisələrə və həmin hadisələrə cəmiyyətin müxtəlif prizmadan yanaşmasına münasibət bildirməkdir. Xüsusilə də İranda son etiraz dalğalarından sonra Pəhləvilərin yenidən gündəmə gətirilməsi və Məsud Pezeşkiyanın sürətlə ideallaşdırılaraq bir növ “bal küpünə” çevrilməsi diqqətimi çəkir. Əvvəlcədən qeyd edim ki, mən nə politoloqam, nə sosioloqam, nə ekspert, nə də hansısa siyasi partiyanın üzvüyəm. Mən sadəcə milləti üçün mübarizə aparan, Bütöv Azərbaycan ideyasına inanmış bir əsgərəm. Paylaşdığım şəkillərə diqqət yetirsəniz, birinci şəkilin yuxarı hissəsində Yürüş Mehrəlibəyli və Abbas Lisani yer alır. Bu iki qardaşımız ömürlərini Güney Azərbaycan türkünün azadlığına həsr ediblər və həyatlarının böyük bir hissəsini İran zindanlarında keçiriblər. Hazırda Abbas Lisani Tehranın məşum Evin həbsxanasında, Yürüş Mehrəlibəyli isə 5 yanvar tarixində saxlanılaraq ehtimallarımıza görə Təbriz Ettelatında ağır işgəncələr altındadır. Şəkildə yer alan digər iki şəxs isə İran prezidenti Məsud Pezeşkiyan və Pəhləvi şahzadəsi Rza Pəhləvidir. Ardınca təqdim olunan şəkil isə bizim idealımız olan Bütöv Azərbaycan xəritəsidir. Pezeşkiyan illüziyası, Pəhləvi xülyası və Güney Azərbaycanın gerçək liderləri Pezeşkiyan fenomeni və gerçək tablo Son günlər sosial şəbəkələrdə Məsud Pezeşkiyanın Nəriman Nərimanovla müqayisə edilməsi, Səttarxan, Pişəvəri və Şəhriyarla eyni sıraya qoyulması, hətta Azərbaycan xalqının xilaskarı kimi təqdim olunması geniş yayılıb. Hər kəsin fikrinə hörmətlə yanaşıram. Amma mənim də bu mövzuda öz baxışım var. Pezeşkiyan ilk baxışda müsbət təəssürat yaradır: ana dilində danışması, şeir söyləməsi, emosional çıxışları insanlarda simpatiya doğurur. Lakin gəlin seçildiyi gündən bu yana öz milləti üçün real olaraq nə etdiyinə baxaq. Cavab sadədir: heç nə. Simvolik jestlərdən və sözlərdən başqa ortada konkret nəticə yoxdur. Nə ana dilində məktəb açılıb, nə hazırlıq kursu yaradılıb, nə də sistemli bir addım atılıb. “Gücü çatmır” arqumentinə gəlincə, burada əsas məsələ güc yox, niyyətdir. Çünki Pezeşkiyan bu missiya üçün bu posta gətirilməyib. Rəisidən sonra İrana sistemin imicini yumşaldacaq bir fiqur lazım idi və Pezeşkiyan bu rol üçün uyğun seçildi. İran dövlətinin strukturunu az-çox tanıyan hər kəs bilir ki, bu ölkədə prezidentlər təsadüfən seçilmir, öncədən planlaşdırılır. Bu şəxs Hatəmi dövründə səhiyyə naziri olub, uzun illər millət vəkili kimi fəaliyyət göstərib. Əgər rejimin süzgəcindən keçməsəydi, bu mövqelərə yüksələ bilməzdi. Əgər doğrudan da bu qədər türkçü və millətsevər idisə, niyə bu səs əvvəl eşidilmirdi? Bu gün Pezeşkiyanın elə bir planlı təbliğatı aparılır ki, insan istər-istəməz emosional təsir altına düşür. Bu mənzərə mənə vaxtilə Naxçıvanda Vasif Talıbovla bağlı hazırlanan verilişləri xatırladır: reallıqda zülm, efirdə isə ideal obraz. Nəticədə Güney Azərbaycan Hərəkatı belə iki yerə bölündü: Pezeşkiyanı xilaskar sayanlar və bu oyunu açıq şəkildə görənlər. Hətta illərdir bu hərəkatın içində olan bəzi şəxslər “özünüzü yormayın, Pezeşkiyan var” deməyə başladılar. Bu isə təhlükəli illüziyadır. Rza Pəhləvi: köhnə radio sindromu Rza Pəhləvini kəndimizdə babamın taxta eyvanına vurduğu köhnə sovet radiosuna bənzədirəm. Hansı xəbər hardan gəlirdisə gəlsin, babam yalnız o radiodan verilənə inanardı. Bu gün Pəhləvi də elə bilir ki, İran taxtına çıxacaq. Halbuki ABŞ və İsrail onu sadəcə keçid dövrü üçün istifadə edilən bir alət kimi görür. Əsl güc haradadır? Gələk əsas məsələyə — Yürüş Mehrəlibəyli və Abbas Lisaniyə. Bu iki şəxs Güney Azərbaycan Milli Hərəkatının canlı simvollarıdır. Abbas Lisani tək başına bir orduya bərabərdir. Evin həbsxanasında aclıq edən milli fəallara dəstək üçün həbsxananın qarşısında aclıq aksiyası keçirdi və bunun müqabilində yenidən həbs olundu. Onun hər sözü xalq üçün yol xəritəsidir. Yürüş Mehrəlibəyli isə mənim 1995-ci ildən yol yoldaşımdır. Onun milləti tanıması, sevməsi və analiz qabiliyyəti nadir səviyyədədir. Tehran Universitetinin idarəetmə fakültəsini yüksək nəticələrlə bitirib. Yəni bu adam dövlətin necə idarə olunmalı olduğunu oxuyub və bilir. Rejim bu iki şəxsdən qorxur. Təsadüfi deyil ki, İranın müxtəlif şəhərlərində etirazlar başlayanda, türk bölgələrində hələ proses aktivləşməmişkən, məhz Yürüş Mehrəlibəyli və Abbas Lisani saxlanıldı. Bu fakt hər şeyi açıq göstərir. Bütöv Azərbaycan xəritəsi və ittihamlara cavab İndi isə Bütöv Azərbaycan xəritəsinə toxunmaq istəyirəm. Bu xəritəni qəbul edənlər də var, etməyənlər də. Etməyənlərin fikrinə hörmətlə yanaşıram. Amma son günlər hörmət etdiyimiz bir dostun bu xəritəni paylaşaraq “Türkiyənin Misak-ı Milli sərhədlərinə girirsiniz, utanmırsınız?” deməsi qəbuledilməzdir. Bildirim ki, Misak-ı Milli sərhədlərini pozan biz yox, TBMM-də oturub Türkiyənin doğusunu “Kuzey Kürdüstan” adlandıranlardır. Bu xəritə Bütöv Azərbaycan Ocaqları tərəfindən təsis olunub. Daha əvvəl bu xəritəni mərhum Əbülfəz Elçibəy hazırlatdırıb və biz onun yolunu davam etdiririk. Bu xəritəni hazırlayan insanların bu günə qədər millət qarşısında heç bir üzqarası işi olmayıb. Əksinə, başları dik, yolları açıqdır. Nəticə Bu milləti nə Pezeşkiyan, nə də Pəhləvi xilas edəcək. Bu milləti yalnız öz içindən çıxan, xalqın içində olan, xalq üçün zindanlara girən insanlar ayağa qaldıra bilər. Bu gün həmin simalar Yürüş Mehrəlibəyli və Abbas Lisanidir. Gəlin onların ətrafında sıx birləşək, səsimiz onların səsi olsun. Əsassız ittihamları, keçmiş intriqaları kənara qoyaq. Bu tarixi fürsət bir daha 50 ildən sonra da verilməyə bilər. Şərəfli Bütöv Azərbaycanın vətəndaşı olmağınızı arzulayıram.

Şirvanda 14 yaşlı qız dəm qazından zəhərlənib. Sozcu.az xəbər verir ki, yeniyetmə şəhər xəstəxanasının reanimasiya şöbəsinə yerləşdirilib.

“Ətin qiyməti 30 manata qalxacaq. Hələ bu qiymət deyilsə, idxalla əlaqəlidir”. Sozcu.az “Sherg.az”a istinadən xəbər verir ki, bu sözləri qida məsələləri üzrə ekspert Ağa Salamov deyib. Mütəxəssis qeyd etdi ki, hazırda quzu ətinin kiloqramı 22-23 manat arasında dəyişir. Proqnoza görə, əgər idxala məhdudiyyət qoyulsa, xaricdən idxal olunmasa, quzu, iri və ya xırda buynuzlu heyvan ətinin qiyməti 30 manata çatacaq. Kiçik təsərrüfatlarda mal-qara saxlayanlar dabaq xəstəliyi səbəbindən ziyana düşdülər. Yerli istehsal ətə olan tələbatı qarşılamaq gücündə deyil. Heyvandarlığın inkişafı çox zəifdir. Ət ehtiyatının azalmasının bu dəqiqə idxal hesabına qarşısı alınır. Monqolustandan, digər ölkələrdən dana, qoyun əti idxal olunur. İdxalda azalma olsa, ətin qiyməti sürətlə qalxacaq.

İranın Sistan və Bəluçistan əyalətində repressiyalar daha da sərtləşib. Sozcu.az Teleqram kanallarına istinadən xəbər verir ki, son iki gün ərzində bölgədə keçirilən etiraz aksiyaları zamanı azı 200 nəfər saxlanılıb. Həbslərin böyük hissəsi Zahidan şəhərində həyata keçirilib. Bununla bağlı, “Halvəş” Teleqram kanalı məlumat yayıb. Məlumatlara görə, təhlükəsizlik qüvvələri etirazların yatırılması zamanı zorakılığa əl atıb. Zahidanda tutulanlar arasında qadınlar, kişilər, uşaqlar və tələbələr də var. Bildirilir ki, saxlanılanların əksəriyyəti etnik bəluçlardır və onların çoxu döyülüb. Repressiv qüvvələrin öz məlumatına əsasən, saxlanılanların təxminən 80 faizi qadınlardır və onlar da fiziki zorakılığa məruz qalıblar. Etirazlar zamanı həbs edilən bəluçların sayının daha çox olduğu, ancaq hamısının kimliyinin hələlik müəyyən edilmədiyi qeyd olunur.BakuPost)

Bakının və Abşeron yarımadasının içməli su problemləri əfsuslar olsun ki, uzun illər ciddi problem kimi qarşımızda durur. Sozcu.az xəbər verir ki, bunu Prezident İlham Əliyev Bakı və Abşeron yarımadasında su təchizatına dair müşavirədə deyib. "Qeyd etdiyim kimi, bu istiqamətdə müəyyən işlər görülüb. Ancaq mən hesab edirəm, vaxt gəlib çatıb ki, genişmiqyaslı və müfəssəl dövlət proqramı qəbul edilsin. Bu proqram Bakı şəhərini, onun qəsəbələrini, Sumqayıt şəhərini və Abşeron rayonunu əhatə edəcək. Bir müddət bundan əvvəl mənim göstərişimlə proqramın hazırlanması prosesi başlamışdır və demək olar ki, proqram hazırdır. Biz bu gün həm bu proqramı müzakirə edəcəyik, eyni zamanda, görülmüş işlərdən danışacağıq və görüləcək işlərlə bağlı müzakirə aparacağıq. Bu proqramın əsas məqsədi, qeyd etdiyim kimi, Bakı və Abşeron yarımadasını dayanıqlı içməli su ilə təmin etməkdir. Proqram 2035-ci ilə qədər icra olunmalıdır. Bu fakt özlüyündə göstərir ki, nə qədər genişmiqyaslı proqramdır, çünki vaxt lazımdır biz bunu tam icra edək. Proqramın icrası üçün maliyyə mənbələri müəyyən edilib. Bu, iki mənbədən maliyyələşəcək, həm dövlət büdcəsi hesabına, həm də xarici kreditlər hesabına. Deyə bilərəm ki, son illər ərzində burada da aparılan islahatlar imkan verdi ki, biz xarici borcumuzu böyük dərəcədə aşağı salaq və salmışıq da. Bu gün dünya miqyasında xarici borcun ümumi daxili məhsula nisbətdə Azərbaycan dünyada aparıcı yerlərdədir, bu, cəmi 6 faizdən bir qədər çox təşkil edir. Yəni bu, deməyə əsas verir ki, bu gün biz daha çox xarici kreditlərə müraciət edə bilərik, xüsusilə nəzərə alsaq ki, dünyanın aparıcı maliyyə təsisatları bizə müraciətlər edirlər", - Prezident qeyd edib.

Yanvarın 13-ü gündüzdən 14-ü axşamadək Bakıda və Abşeron yarımadasında, eyni zamanda əksər bölgələrdə gözlənilən küləkli hava şəraiti ilə bağlı sarı və narıncı xəbərdarlıq verilib. Bu barədə Sozcu.az-a Milli Hidrometeorologiya Xidmətindən məlumat verilib. Bakıda və Abşeron yarımadasında, Kəlbəcər, Zəngilan, Qobustan, Xızı, Qusar, Mingəçevir, Yevlax, Tərtər, Neftçala, Qazax, Ağstafa, Tovuz, Şəmkir, Samux, Gəncə, Naftalan, Goranboy, Daşkəsəndə narıncı xəbərdarlığa uyğun olaraq şimal-qərb küləyi əsəcək, küləyin sürəti 20.8-28.4 m/san-dək güclənəcək. Ölkənin digər bölgələrində isə sarı xəbərdarlığa uyğun olaraq şimal-qərb küləyi əsəcək, küləyin sürəti 13.9–20.7 m/san təşkil edəcək.

Ukrayna Prezidenti Volodimir Zelenski ölkədə hərbi vəziyyətin və ümumi səfərbərliyin müddətinin daha 90 gün uzadılmasını nəzərdə qanun layihələrini Ali Radanın müzakirəsinə verib. Sozcu.az xarici KİV-ə istinadən xəbər verir ki, qanun layihələrinə əsasən, hərbi vəziyyət və səfərbərlik müddəti 90 gün uzadılaraq 3 may tarixinədək qüvvədə qalacaq.

Azərbaycan İsraildə suyun duzsuzlaşdırılması (desalinasiya) layihəsinə 270 milyon ABŞ dollarınadək sərmayə yatıra bilər. Sozcu.az APA-ya istinadən xəbər verir ki, Azərbaycan İnvestisiya Holdinqi (AİH) İsrailin suyun duzsuzlaşdırılması üzrə IDE şirkətində 30%-lik payın planlaşdırılan satın alınması ərəfəsində ətraflı yoxlama (due diligence) aparır. Qeyd edək ki, IDE İsraildə ən böyük desalinasiya şirkətidir. Şirkət İsraildə desalinasiya olunmuş suyun 45%-nə cavabdehdir. Əgər sövdələşmə baş tutarsa, bu, Azərbaycanın İsraildə ikinci böyük dövlət investisiyası olacaq. Birinci belə investisiya 2025-ci ilin yayında SOCAR tərəfindən Tamar qaz yatağının 10%-lik payının 1,25 milyard dollara alınması olub.

Ankara Prokurorluğu Quru Qoşunları Komandanlığında korrupsiya cinayəti faktı üzrə cinayət işi qaldırıb. Sozcu.az Cumhuriyet-ə istinadla xəbər verir ki, Quru Qoşunları Komandanlığına aid hərbi yük və sərnişin daşımaları üzrə tenderlərdə təxminən 23 milyon 578 min TL (təxminən 930 min manat) dövlətə zərər dəydiyi ehtimal olunur. 2019-2024-cü illərdə keçirilmiş 18 tenderin araşdırıldığı istintaqda, rüşvət və tenderdə saxtakarlıq ittihamları ilə 6 hərbçi və 14 mülki şəxs olmaqla, cəmi 20 şübhəli saxlanılıb.

Fələstin Prezidenti Mahmud Abbas təcili olaraq xəstəxanaya yerləşdirilib. Sozcu.az xəbər verir ki, hadisənin səbəbləri və prezidentin vəziyyəti barədə hələlik rəsmi açıqlama verilməyib.

Şamaxıda qeydə alınan zəlzələlər əhali arasında narahatlıq yaradıb. Belə ki, ayın 10-da baş verən 3,8 bal gücündə zəlzələ hiss edilsə də, dağıntı qeydə alınmayıb. Bu gün isə 3 bal gücündə növbəti zəlzələ baş verib, lakin yeraltı təkan hiss olunmayıb. Vətəndaşlar Bakıda və ətraf bölgələrdə təkanların ola biləcəyindən narahtdırlar. Bəs bu tip ardıcıl zəlzələlər daha güclü yeraltı təkanların xəbərçisi sayıla bilərmi? Sozcu.az xəbər verir ki, mövzu ilə bağlı Milli.Az-a açıqlama verən Respublika Seysmoloji Xidmət Mərkəzinin baş direktoru Qurban Yetirmişli bildirib ki, hazırkı vəziyyət narahatlıq doğurmur: "Azərbaycanda hər gün müxtəlif sayda yeraltı təkanlar qeydə alınır. Bu təkanların bəziləri hiss olunsa da, ümumiyyətlə qorxuya əsas yoxdur. Dünən axşamdan bu gün səhər saat 9-a qədər 32 yeraltı təkan baş verib. Onların heç biri hiss olunmayıb. Yaxın günlər üçün də güclü, dağıdıcı zəlzələ ehtimalı gözlənilmir".

11:12 Gəncədə yeniyetmənin meyiti tapılıb. Sozcu.az APA-ya istinadla xəbər verir ki, hadisə şəhərdə yerləşən peşə məktəblərinin birinin həyətində qeydə alınıb. Bu gün səhər saatlarında peşə məktəbinin həyətində 2008-ci il təvəllüdlü R.Bayramovun meyiti aşkarlanıb. Onun peşə məktəbinin tələbəsi olduğu bildirilir. Hadisə yerinə polis və prokurorluq əməkdaşları cəlb edilib. İlkin məlumata görə, 18 yaşlı gənc ürək tutmasından vəfat edib. Faktla bağlı araşdırma aparılır. *** Təhsil müəssisəsində baş verən hadisə ilə bağlı rəsmi araşdırma başlanıb. Bu barədə Peşə Təhsili üzrə Dövlət Agentliyi məlumat yayıb. Bildirilib ki, bu gün Röyal Vüqar oğlu Bayramov səhər saatlarında təhsil aldığı Sənaye və Texnologiyalar üzrə Gəncə Dövlət Peşə Təhsil Mərkəzində olarkən səhhəti qəfil pisləşib və huşunu itirərək yıxılıb: "Hadisə dərhal qeydə alınıb, təcili tibbi yardım briqadası tərəfindən xəstəxanaya çatdırılıb. Lakin göstərilən tibbi müdaxilələrə baxmayaraq, onun həyatını xilas etmək mümkün olmayıb. Faktla bağlı aidiyyəti dövlət qurumları tərəfindən müvafiq araşdırma aparılır. Hadisənin təfərrüatları araşdırmanın nəticələrinə uyğun olaraq ictimaiyyətə açıqlanacaq".

İranda etiraz aksiyalarında ölənlərin sayı 500-ü keçib. Sozcu.az xəbər verir ki, bu barədə İnsan Hüquqları Fəalları Xəbər Agentliyi (HRNA) məlumat yayıb. Bildirilib ki, etirazlar zamanı ən azı 544 nəfər ölüb. Agentlik həmçinin daha 579 ölüm hadisəsi barədə məlumat aldığını və bununla da ölənlərin sayının 1123-ə çatdığını qeyd edib. Qurbanların əksəriyyətinin əsasən yaxın məsafədən aşılan atəşlə öldürüldüyü vurğulanıb. Dövlət televiziyası Tehranın məhkəmə ekspertizası binasının qarşısında yerdə uzanan onlarla cəsəd torbasını göstərərək, qurbanların "silahlı terrorçular" tərəfindən təşkil edilən tədbirlərin qurbanları olduğunu iddia edib, eləcə də paytaxtın Kəhrizak məhkəmə ekspertizası mərkəzinin qarşısında toplaşaraq cəsədlərin şəxsiyyətinin müəyyən edilməsini gözləyən insanların görüntülərini yayımlayıb. BBC-nin məlumatına görə, Rəşt şəhərindəki Pursina Xəstəxanasının morqu öldürülən iranlı etirazçıların cəsədləri ilə doludur. Qurbanların qohumlarına cəsədlərin dəfn edilməsinin təxminən 7000 dollara başa gələcəyi deyilib. CNN Tehranın bir neçə xəstəxanasında "tamamilə xaos" vəziyyətinin yarandığını bildirir. Kanalın məlumatına görə, ölənlərin cəsədləri üst-üstə yığılıb və tibb müəssisələri ölüm axınının öhdəsindən gələ bilmir.

Dünən axşam saatlarında Bakının Nizami küçəsində yerləşən "Bonte" restoranında tavan çöküb. Sozcu.az Gününsəsi.info-ya istinadən xəbər verir ki, hadisə nəticəsində restoranda çalışan işçilər xəsarət alıblar. Yaralanan əməkdaşlar xəstəxanaya çatdırılıblar. Bildirilir ki, həmin işçilərin başına tikiş qoyulub. Faktla bağlı araşdırmalara başlanılıb. Özünü restoranın administratoru kimi təqdim edən Sani Quliyev faktı təsdiq edib. O deyib ki, hadisə zamanı bir nəfər xəsarət alıb və xəstəxanaya çatdırılıb.

Zabitlərin dinc dövrdəki həqiqi hərbi xidmət müddəti 6 ay azaldılıb. Sozcu.az xəbər verir ki, bu, Prezident İlham Əliyevin "Hərbi xidmətkeçmə haqqında" Əsasnamənin təsdiq edilməsi barədə" və "Hərbi vəzifə və hərbi xidmət haqqında" qanunlarında dəyişikliyi təsdiqləməsi ilə mümkün olub. Beləliklə, ehtiyatdan müddətli həqiqi hərbi xidmətə çağırılan və ya bağlaşma əsasında həqiqi hərbi xidmətə könüllü daxil olan zabitlərin dinc dövrdə həqiqi hərbi xidmət müddəti 6 ay azaldılaraq 1 il (hazırda həmin müddət 1 il 6 aydır) müəyyən ediləcək. Eyni zamanda, müddətli həqiqi hərbi xidmət dövründə zabit hazırlığı kursunu müvəffəqiyyətlə bitirərək zabitlərin həqiqi hərbi xidmətinə könüllü daxil olan ali təhsilli müddətli həqiqi hərbi xidmət hərbi qulluqçularına leytenant hərbi rübəsi veriləcək.

"İran hökuməti qanuni etirazlarla iğtişaşları bir-birindən fərqləndirir və bütün zəruri dəyişiklikləri həyata keçirməyə hazırdır". Sozcu.az xəbər verir ki, bu barədə İran Prezidenti Məsud Pezeşkian xalqa televiziya ilə müraciətində bildirib. "Biz xalqın səsini dinləməyə hazırıq və iqtisadi islahatları davam etdirmək əzmindəyik. Biz iranlıları tələblərini aydın şəkildə ifadə etmək üçün küçələrə çıxmağa və iğtişaşların qızışdırıcılarının mövcud etirazların səbəblərini təhrif etməsinə imkan verməməyə çağırırıq", - deyə o bildirib. Pezeşkian etirazçıların pisləşən iqtisadi vəziyyətlə bağlı narazılıqlarını ifadə etdiklərini, lakin bazarları yandırmadıqlarını və ya cinayət əməlləri törətmədiklərini iddia edib: "İrandakı iğtişaşlar Amerika və İsrail tərəfindən təşkil olunur və onlar öz agentlərinə vəziyyəti sabitsizləşdirmək əmri verirlər".

Əgər Donald Tramp Qrenlandiyaya hücum əmri versə, amerikalı hərbçilər onun əmrinə tabe olmamalıdır. Sozcu.az xəbər verir ki, bunu amerikalı demokrat konqresmen Ted Lieu özünün X səhifəsində yazıb. "Hörmətli ABŞ Hərbi Hava Qüvvələri, ABŞ Hərbi Dəniz Qüvvələri, ABŞ ordusu və ABŞ Dəniz Piyadaları Korpusu: Qrenlandiya NATO müttəfiqi olan Danimarkanın bir hissəsidir. Əgər Tramp Konqresin təsdiqi olmadan Qrenlandiyaya hərbi hücum əmri verərsə, bu, qanunsuz bir əmr olardı. Siz bu qanunsuz əmrə tabe olmayacaqsınız. Siz Trampa deyil, Konstitusiyaya and içmisiniz", - konqresmen bildirib. Qeyd edək ki, "Deyli Meyl” qəzeti mənbələrə istinadla Trampın ABŞ ordusuna Qrenlandiyanı işğal etmək planı hazırlamağı tapşırdığını bildirmişdi.

Pakistanın paytaxtı İslamabadda toy şənliyi zamanı qaz balonunun partlaması nəticəsində səkkiz nəfər ölüb, 12 nəfər yaralanıb. Sozcu.az xəbər verir ki, bu barədə Pakistan mətbuatı məlumat yayıb. Məlumata görə, şənlik keçirilən şəxsi evdə baş verən partlayışda bəy və gəlin də ölüb. Yaralılar ağır yanıq xəsarətləri alıb və xəstəxanaya yerləşdiriliblər. Bu hadisə ilə bağlı araşdırma başlanılıb.

Zelenski çox möhkəm insandır. Mən Ukraynaya gedəndə bir dəfə Prezident Trampa "Cənab, o sizə çox oxşayır" dediyimi xatırlayıram. Sozcu.az xəbər verir ki, bunu ABŞ prezidentinin Ukrayna üzrə xüsusi nümayəndəsi Keyt Kelloq deyib. “Mən Zelenskinin cəsarətli bir lider olduğunu dedim. Administrasiyadakı insanlara da dedim ki, Avram Linkolndan bəri ABŞ-da onun kimi bir lider görməmişik. Demək istədiyim budur ki, heç kim öz torpağında onun kimi ekzistensial mübarizə aparmaq məcburiyyətində qalmayıb. Və biz bunu qəbul etməliyik. Onun haradan gəldiyini başa düşməliyik. O, Ukraynanı müdafiə edir. O, fikrini ifadə etməkdən çəkinmir. Mediadan necə istifadə edəcəyini bilir”, - Kelloq bildirib. Kelloqun sözlərinə görə, Zelenski barədə bu açıqlaması Trampın xoşuna gəlməyib: “O bununla razılaşmadı”.

Xaçmaz rayonunun Qaraqurtlu kəndi yaxınlığında piyadanın ölümü ilə nəticələnən yol-nəqliyyat hadisəsi baş verib. Sozcu.az xəbər verir ki, Qaraqurtlu kənd sakini, 1967-ci il təvəllüdlü Tərlan Poladov dəmir yolunu keçmək istəyərkən qatar onu vurub. O, ağır vəziyyətdə Xaçmaz rayon Mərkəzi Xəstəxanasına çatdırılsa da, həyatını xilas etmək mümkün olmayıb. Faktla bağlı araşdırma aparılır.

Kuba uzun illər Venesueladan aldığı külli miqdarda neft və pullarla yaşayıb. Bunun müqabilində Kuba son iki Venesuela diktatoru üçün "təhlükəsizlik xidmətləri" təmin edib, amma artıq yox! Sozcu.az xəbər verir ki, bunu ABŞ Prezidenti Donald Tramp özünün “Truth Social” səhifəsində yazıb. “Bu kubalıların əksəriyyəti ötən həftə ABŞ-ın hücumunda ölüb və Venesuelanın artıq onları illərdir girov saxlayan quldurlardan və şantajçılardan qorunmağa ehtiyacı yoxdur. İndi Venesuelanın onları qorumaq üçün dünyanın ən güclü ordusu olan ABŞ var və biz onları qoruyacağıq”, - Tramp bildirib.

Amerika hərbçiləri Venesuela lideri Nikolas Maduronu ələ keçirmək üçün əməliyyat zamanı naməlum, güclü bir silahdan istifadə ediblər. Sozcu.az xəbər verir ki, bu barədə “Nyu York Post” qəzeti Venesuela liderinin təhlükəsizlik xidmətinin əməkdaşının ifadəsinə istinadla məlumat yayıb. “ABŞ əsgərləri venesuelalıların radar sistemlərini söndürməklə, müqavimət mərkəzlərini basmaqla və dronlarla mövqelərini atəşə tutmaqla onları asanlıqla kor edə biliblər. Birdən bütün radar sistemlərimiz heç bir izahat olmadan qaraldı. Növbəti gördüyümüz şey mövqelərimizin üzərindən uçan çoxsaylı dronlar oldu. Necə reaksiya verəcəyimizi bilmirdik”, - məlumatda qeyd olunub. Onun sözlərinə görə, bundan sonra səmada Amerika xüsusi təyinatlılarını daşıyan helikopterlər peyda olub: “Onlar odlu silahlardan daha güclü silahlarla silahlanıblar. Bir anda onlar güclü səs dalğası yaradaraq nəsə atıblar və başımın içəridən partladığını hiss etdim. Ətrafdakıların burunlarından qan açıldı və qan qusmağa başladılar. Bu, onları heç kimin ayağa qalxa bilməyəcəyi vəziyyətdə qoydu”. Qeyd edək ki, yanvarın 3-ü ABŞ hərbi qüvvələri Venesuelanın paytaxtı Karakasda və ətraf ştatlarda 11 strateji hədəfə genişmiqyaslı zərbələr endirib. Əməliyyat nəticəsində ölkə Prezidenti Nikolas Maduro xanımı Silia Floreslə birlikdə ələ keçirilərək Nyu Yorka aparılıb.