Şərqi Azərbaycan intiharların sayına görə İranda 1-ci yerdədir

Şərqi Azərbaycan əyaləti intiharların sayına görə İran əyalətləri arasında birinci yeri tutur.

Bu barədə, Şərqi Azərbaycan Əyaləti Tibbi Ekspertiza Mərkəzinin rəis Əli Səfayifərd “Nəsr” xəbər agentliyinə verdiyi müsahibədə məlumat verib.

Şərqi Azərbaycan əyalətində intiharların sayı son 8 ildə ciddi şəkildə artıb. Əyalətdə baş verən ölüm hallarının 1.5 faizinin səbəbi intihardır.

“Nəsr” agentliyinin verdiyi məlumata əsasən, intihara təşəbbüs və ölümlə nəticələnən intiharların sayı son 8 il ərzində 100 min nəfərdə 106 nəfərdən 171 nəfərə çatıb.

Raportda həmçinin bildirilib ki, faydalı və sağlam bir ömür sürmə motivasiyasının olmaması üzündən narkotik maddələr və spirtli içkilərə üz gətirmək, yüksək riskli sürücülük, eləcə də tibbi problemlərin vaxtında müalicə edilməməsi nəticəsində baş verən ölüm halları da nəzərdə tutulduqda bu rəqəm iki dəfə artır. Mütəxəssislər bu ölüm hallarını “səssiz intihar” adlandırır.

Şərqi Azərbaycan əyalətinin Səhiyyə Mərkəzinin Ruhi və Sosial Sağlamlıq Departamentinin direktoru Vahab Əsl Rəhiminin verdiyi məlumata əsasən, intihar halları qadınlarda kişilərə nisbətən daha çoxdur.

Onun fikrincə, məcburi nikahlar, ailə daxili münaqişələr, qadınlara qarşı zorakılıq və məişət problemləri bunun əsas səbəbləridir.

Kişilərdə isə intihara təşəbbüsün əsas səbəbi məişət problemləridir.

Bu barədə açıqlama verən Təbriz Tibb Elmləri Universitetinin psixiatriya şöbəsinin müəllimi Sepidə Herisçi bildirib: “Gənclərin böyük bir faizinin işsiz olması, qida, geyim, mənzil və s. kimi ehtiyaclarının ödənilməməsi, cəmiyyətdə yaşamaq ümidinin aşağı olması insanların mənəvi vəziyyətinə və həyatdan zövq almasına ciddi şəkildə mənfi təsir göstərir”.

Raportda Şərqi Azərbaycanda intihar nisbətinin milli ortalama ilə müqayisədə daha yüksək olduğunun narahatlıq yaratdığı vurğulanaraq yerli məsullardan məsələ ilə bağlı ciddi tədbirlər görmələri istənilib.

Facebook Comments