“Türkiyədə Qarabağda savaşmağa hazır olan 10 minlərlə insan bu günü gözləyir…”

Prezident İlham Əliyevin Türkiyəyə yönəlik dünənki jesti gündəmə damğa vurdu. Ümumiyyətlə, Türkiyənin nüfuzlu CHP, İYİ Parti, MHP kimi partiyaların Qarabağ məsələsində mövqeyi necədir? Onlar da işğalçının burnunu birlikdə ovmağa hazırdırmı? Tutaq ki, sabah TBMM – də Qarabağda savaşa qatılmaqla bağlı təzkərə çıxarılası olsa parlamentdə qərar yekdilliklə qəbul olunacaqmı?

Türkiyə siyasi səhnəsini və cəmiyyətinin ovqatını yaxşı bilən tanınmış siyasi şərhçi Qafar Çaxmaqlı Moderator.az-ın bu suallarına cavabında deyir ki, işğalçını torpaqlarımızdan qovmaq üçün tarixi şans yaranıb və Türkiyə-Azərbaycan qardaşlığı bu işğala son qoyacaq:

“Azərbaycan prezidenti İlham Əliyevin Yunanıstan təmsilçisinə Türkiyəni dəstəkləyəcəyi barədə fikri Türkiyədə əsl sevinc yaradıb və qardaş ölkə insanlarını yaxşı mənada coşdurub. Mən Türkiyə mətbuatında və TV-lərdə bu jestin necə rəğbət yaratdığını müşahidə etməkdəyəm. Bu, həm də Qarabağ məsələsinin Türkiyənin iştirakı ilə həlli prosesini sürətləndirəcək. Dəfələrlə qeyd etmişik, Azərbaycan yalnız Türkiyənin hərbi və siyassi dəstəyinə güvənərək qərarlı addımlar atmalıdır. Çox böyük tarixi fürsət yaranıb. Türkiyəni başqa regionlarda münaqişələrə çəkmək cəhdləri də Azərbaycanda onun hərbi varlığına mane olmaq məqsədi daşıyır. Amma bu artıq mümkün deyil. Türkiyə siyasi fikri də birmənalı şəkildə Azərbaycanın yanındadır.

Hakimiyyətdəki AK parti də, MHP-də, müxalif olan parlamentdə təmsil olunan partiyalar da Azərbaycanla bağlı veriləcək qərarı dəstəkləyəcəklər. Parlamentdə təzkirə çıxarılmasında heç bir problem olmayacaq. Türkiyə cəmiyyəti də bunu tələb edəcək və Qarabağda savaşmağa hazır olan böyük bir əhali kütləsi var. Belə bir hal olarsa on minlərlə insan savaşa girməyə hazırdır. Artıq türk insanı anlayır ki, Qarabağın işğal altında qalması Türkiyənin özünün gələcək təhlükəsizliyinə təhdiddir. İnsanlar səs verdikləri millət vəkillərindən tələb etməkdədirlər ki, Qarabağın azad olunmasına çalışsınlar. Dövlət qarşısına da belə tələblər qoyulmaqdadır. Türk ordusunun Azərbaycandakı varlığı bütünlükdə bölgədəki siyasi və hərbi situasiyanı dəyişib. Hər gün Rusiyanın Ermənistana silah daşınması xəbərlərinə rast gəlirik. Məgər bundan əvvəl bu silahlar daşınmırdı? Bəzən Rusiya və ermənilər bu xəbərləri qəsdən yayırlar. Bizi ciddi addımlardan çəkindirmək məqsədi ilə edilir bu. Demək situasiya dəyişib. Düşmən qorxu içindədir. Deyirlər 100 minlik qeyri-nizami ordu yaradacaqlar. Onlar yüz min yaradırlarsa, biz 200 min könüllü çıxara bilərik. Bunu isə gecikmədən etməliyik.

Güney Azərbaycanda bilrsiniz nə qədər insan var ki, Qarabağ biabırçılığına son vermək istəyir. Milləti Rusiya xofundan xilas etmək lazımdır. Mən bu fikirdəyəm ki, müharibə başlasa, Azərbaycan antiterror əməliyyatlarına başlasa, artıq Rusiya müdaxilə edə bilməz. Çünki artıq qarşısında qüdrətli Türkiyə ordusu var. İkinci tərəfdən Rusiyanın Avropanın qərbində NATO ölkələrinin hərbi varlığı onu qorxudur. Mən bütün bunların xeyrimizə olduğu qənaətindəyəm. Azərbaycan gecikmədən Türkiyə ilə hərbi müttəfiqlik sazişi imzalamalıdır. Bu saziş həm də Azərbaycanın bir neçə yerində hərbi bazaların yaradılmasını qanuniləşdirməlidir. Türkiyə isə inanıram ki, Azərbaycana ordu göndərməsini TBMM-də həll edəcək”.

Facebook Comments