Ölkə ərazisində oktyabrın 10-dan açıq elan olunmuş ov mövsümü bu gün başa çatıb. Sozcu.az xəbər verir ki, bu barədə Bioloji Müxtəlifliyin Qorunması Xidmətinin rəsmisi Arzu Babayeva məlumat verib. Onun sözlərinə görə, dekabrın 1-dən etibarən ölkə ərazisində ov edilməsi qadağan olunur: "Alim və mütəxəssislərlə birgə aparılan mütəmadi monitorinqlərin nəticələrinə əsasən, son illər müşahidə edilən qlobal iqlim dəyişiklikləri ölkəmizin faunasına da təsir göstərdiyindən ov mövsümünün məhdudlaşdırılması zərurəti yaranıb. Xəzər dənizində su səviyyəsinin aşağı düşməsi quşların ənənəvi toplaşma, istirahət, qidalanma, qışlama və yuvalama yerlərinin, həmçinin bir sıra növlərin miqrasiya marşrutlarının dəyişməsinə səbəb olub. Qeyd olunanlar nəzərə alınaraq, hazırda təbiətdə gedən proseslər izlənilir və nəticələrdən asılı olaraq, ov mövsümünün yenidən açılıb-açılmaması məsələsinə baxılacaq". Xidmət rəsmisi ov mövsümünün bağlı olduğu müddətdə vətəndaşları qanunvericiliyin tələblərinə əməl etməyə və qanunsuz ovdan çəkinməyə çağırıb.

Göygöldə yanğın hadisəsi baş verib. Sozcu.az-ın məlumatına görə hadisə rayon ərazisində qeydə alınıb. Belə ki rayon ərazisindən yerləşən fərdi yaşayış evlərinin birində anidən yanğın baş verib. Dərhal hadisə yerinə FHN Dövlət Yanğından Mühafizə Xidmətinin Göygöl rayon Dövlət Yanğından Mühafizə Hissəsinin yanğınsöndürmə texnikası və canlı qüvvəsi cəlb edilib. Yanğın nəticəsində rayon sakini 1961-ci il təvəllüdlü İ.Hüseynova məxsus ümumi sahəsi 200kv.m olan 1 mərtəbəli kürsülü 4 otaqlı evin dəhlizində 1 ədəd divan yanıb, yüksək temperaturdan 3 ədəd plastik qapı və 1 ədəd pəncərə çərçivəsi qismən yanıb. Yanğın söndürülüb, ətraf ərazilər yanğından mühafizə olunub. Yanğın nəticəsində 1989-cu il təvəllüdlü A.Huseynova tüstüdən zəhərlənib. Zəhərlənən qadın xəstəxanaya yerləşdirilib. Ona yardım edilib, vəziyyətinin orta ağır olduğu bildirilir. Hadisə yerinə aidiyyəti qurumların əməkdaşları cəlb edilib. Faktla bağlı araşdırma aparılır.

Xəbər verdiyimiz kimi, gələn ildən dövlət büdcəsində ayrılmaların azalması fonunda icbari tibbi sığorta (İTS) sistemi üzrə yeni maliyyələşmə mexanizmi tətbiq ediləcək. "Tibbi sığorta haqqında" Qanuna təklif olunan dəyişikliyə görə, uşaqlar, əlilliyi olan şəxslər, pensiyaçılar istisna olmaqla heç bir yerdə işləməyən, eləcə də sahibkarlıq fəaliyyəti ilə məşğul olmayan şəxslər 2026-cı ildən İTS xidmətlərindən istifadəyə görə hər ay minimum əməkhaqqının 4 faizi həcmində – hazırkı hesablamaya görə 16 manat – icbari tibbi sığorta haqqı ödəyəcəklər. Qanun layihəsində həmçinin qeyd edilir ki, ödəmənin gecikdirilməsi halında əlavə 10% sığorta haqqı tətbiq olunacaq. Bu vaxta qədər həmin şəxslər tibbi sığorta xidmətlərindən dövlət vəsaiti hesabına yararlanırdılar. Bundan başqa, evdar və şəxsi gəliri olmayan qadınların sığortası yenə də dövlət vəsaiti hesabına həyata keçiriləcək. Bu kateqoriyaya aid şəxslərin sığorta məbləğini müvafiq icra hakimiyyəti orqanı müəyyənləşdirəcək. Mövzu ilə bağlı Bakupost.az -a danışan iqtisadçı Natiq Cəfərli bildirib ki, burada qaranlıq məqamlar həddindən artıq çoxdur: “Bu qərarı verənlərin məntiqini anlamağa çalışıram. Məntiqlə demək istəyirlər ki, insanlar var, heç yerdə işçi kimi qeydiyyatda deyillər, amma qeyri-leqal işləyirlər. Əgər onlar tibbi sığortadan istifadə etmək istəyirlərsə, ayda 16 manat ödəniş etməlidirlər. Amma bunun məntiqsizliyi ondan ibarətdir ki, dövlət qurumları bu günə qədər kimin qeyri-leqal işlədiyini aydınlaşdıra bilməyibsə, bəs, bundan sonra necə ayırd edəcəklər? Rəsmən bizdə 300 minə yaxın işləməyən insan var, qeyri-rəsmi rəqəmlərə görə isə bu göstərici 2–3 qat çoxdur. Yaxşı, işləməyən insanlar nə etməlidirlər? Necə 16 manatı ödəməlidirlər ki, icbari tibbi sığortadan istifadə edə bilsinlər? Bu, bir az məntiqsiz yanaşmadır”. N.Cəfərli hesab edir ki, burada kriteriyalar dəyişdirilməlidir: “Heç olmasa, könüllülük prinsipi gətirilməlidir. Yəni kim tibbi sığortadan istifadə etmək istəyirsə, 16 manat ödəsin. Bu prinsip gətirilsə və məsələ ilə bağlı cərimələr, sanksiyalar nəzərdə tutulmasa, razılaşmadığım məqamlar olsa da, bunun nisbətən məntiqli qərar olduğunu düşünmək olar”.

Samuxda ər və arvad dəm qazından boğularaq ölüb. Sozcu.az xəbər verir ki, hadisə rayonun Hacılı kədində qeydə alınıb. Belə ki, 1957-ci il təvəllüdlü Tanrıverdi Musayev və 1957-ci il təvəllüdlü həyat yoldaşı Maya Musayeva yaşadıqları evin hamamında dəm qazından boğularaq ölüb. Faktla bağlı araşdırma aparılır.

Teymur Mehdiyev fövqəladə hallar nazirinin müavini vəzifəsindən azad edilib. Sozcu.az xəbər verir ki, bu barədə Prezident İlham Əliyev sərəncam imzalayıb. Fövqəladə Hallar Nazirliyinin mətbuat xidmətindən general-mayor Teymur Mehdiyevin vəzifəsindən azad olunması təsdiqlənib. Qeyd edək ki, Teymur Mehdiyev Prezident Administrasiyasının sabiq rəhbəri Ramiz Mehdiyevin oğludur.

ATƏT Minsk prosesi və onunla əlaqəli strukturların bağlanmasını başa çatdırıb. Sozcu.az xəbər verir ki, bu barədə ATƏT bəyanat yayıb. Qeyd edək ki, 1 sentyabr 2025-ci il tarixində ATƏT Nazirlər Şurası tərəfindən ATƏT-in Minsk Prosesi və əlaqəli strukturlarının bağlanmasına dair qərar qəbul olunub. Qərara əsasən, Azərbaycan Respublikasının Prezidenti və Ermənistan Respublikasının Baş nazirinin ABŞ Prezidentinin dəvəti və iştirakı ilə 8 avqust 2025-ci il tarixində Vaşinqton şəhərində baş tutmuş görüşü çərçivəsində Azərbaycan və Ermənistan xarici işlər nazirlərinin ATƏT-in Fəaliyyətdə olan Sədrinə ünvanlanmış birgə müraciət məktubuna uyğun olaraq, ATƏT-in Minsk Prosesinin, ATƏT-in Fəaliyyətdə olan Sədrinin ATƏT-in Minsk Konfransının məşğul olduğu münaqişə üzrə Şəxsi Nümayəndəsinin və Yüksək Səviyyəli Planlaşdırma Qrupunun fəaliyyətinə 1 sentyabr tarixindən etibarən xitam verilib. Sözügedən strukturların bağlanmasından irəli gələn təşkilati və texniki məsələlərin 1 dekabr 2025-ci il tarixindən gec olmayaraq yekunlaşdırılması ATƏT Katibliyinə tapşırılıb. Qərarda həmçinin keçmiş Ermənistan-Azərbaycan münaqişəsi ilə bağlı ATƏT çərçivəsində vaxtilə qəbul edilmiş bütün qərarlar qüvvədən düşmüş və etibarsız elan edilib.

Hesablama Palatası 2025-ci ilin İş Planına əsasən Mədəniyyət Nazirliyində nəzarət tədbiri həyata keçirir. Sozcu.az xəbər verir ki, bu barədə Report-a Palatadan bildirilib. Məlumata görə, auditin nəticələrinin açıqlanması "Hesablama Palatası haqqında" qanunun 37-ci maddəsinə əsasən tənzimlənəcək.

Kəlbəcər rayonu Qalaboynu, Qaraxançallı, Şəkaram və Çovdar kəndləri ərazisində açıq örüş-otlaq sahələrində yanğının söndürülməsi tədbirləri davam edir. FHN-in Mətbuat xidmətindən Sozcu.az-a verilən məlumata görə, havanaın küləkli olması və relyefin mürəkkəbliyi yanğınla mübarizə tədbirlərini çətinləşdirsə də, hazırda yanğının söndürülməsi əməliyyatı fasiləsiz olaraq davam etdirilir.

Qızıl bazarı bu gün altı həftənin ən yüksək səviyyəsinə yüksəlib. ABŞ dolları 14 günün ən aşağı səviyyəsinə geriləyib ki, bu da qiymətli metalların bahalanmasına səbəb olub. Sozcu.az “Bloomberg”ə istinadən xəbər verir ki, qızıl qiymətləri səhər saatlarında 0,2% artaraq 4.240,54 dollara qalxıb və 21 oktyabrdan bəri ən yüksək göstəricisini əldə edib. ABŞ-da qızılın fyuçersləri isə 0,5% artaraq 4.276,00 dollar olub. Analitiklər bildirirlər ki, bu yüksəlişin əsas səbəbi dolların zəifliyi və bazarda erkən riskdən qaçış tendensiyasıdır. Eyni zamanda, yaxın günlərində ABŞ-da gözlənilən faiz endirimləri diqqətə alınır. Gümüş də 2% bahaıaşaraq 57,48 dollara yüksəlib. Digər qiymətli metallar arasında platin 1,3% artaraq 1.694 olub, paladyum isə 2,1% artaraq 1.482 dollara enib.

Səfərbərlik və Hərbi Xidmətə Çağırış üzrə Dövlət Xidmətinin Aparatında "Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı"nın icrası ilə bağlı dəyirmi masa keçirilib. Sozcu.az xəbər verir ki, tədbirdə vətəndaş cəmiyyəti institutları nümayəndələri iştirak ediblər. Dəyirmi masada Dövlət Xidmətində ictimai iştirakçılığın tətbiqinin genişləndirilməsi, korrupsiyaya qarşı mübarizə sahəsində fəaliyyət göstərən vətəndaş cəmiyyəti institutları ilə əməkdaşlıq, korrupsiyaya qarşı mübarizə ilə bağlı ictimaiyyətin məlumatlılığının artırılması məsələləri müzakirə edilib. İdarənin Təşkilati Nəzarət Baş İdarəsinin rəisi, polkovnik Əziz Hidayev çıxış edərək bildirib ki, 2023-cü ildən Səfərbərlik və Hərbi Xidmətə Çağırış üzrə Dövlət Xidmətində islahatlar aparılır: "Bəzi mənfi hallar mövcud olsa da, onların aradan qaldırılması istiqamətində işlər gedir. Demək olar ki, xidmət üzrə 90 faiz korrupsiyaya qalib gəlinib. Xidmətdə çalışmayan bəzi "işbazlar"a qarşı da mübarizə aparılır". Ə.Hidayev qeyd edib ki, xidmət üzrə qeyri-qanuni hallarla bağlı mübarizə əsas prioritetlərdən biridir: "2023-cü ildə 78, 2024-cü ildə 249, 2025-ci ilin hazırkı vaxtınadək isə 158 əməkdaşın əməlində qeyri-qanuni hərəkətlər müəyyən edilib. Onlar barəsində müxtəlif növ inzibati tənbeh tədbirləri görülüb, 9 əməkdaş isə tutduğu vəzifədən azad edilərək ehtiyata buraxılıb. Bundan başqa, 2023-cü ildə 22 nəfər barəsində 15, 2024-cü ildə 95 nəfər barəsində 51, 2025-ci ilin 11 ayı ərzində 93 nəfər barəsində 44 fakt baxılması üçün prokurorluq orqanlarına göndərilib". Səfərbərlik və Hərbi Xidmətə Çağırış üzrə Dövlət Xidmətinin İctimaiyyətlə əlaqələr və beynəlxalq münasibətlər şöbəsinin rəisi Pərviz Sədrəddinov isə xidmət tərəfindən görülən işlərlə bağlı məlumat verib. Şöbə rəisi qeyd edib ki, hazırda Dövlət Xidmətindən elektronlaşma işləri aparılır: "Bütün sahələrdə olduğu kimi, bizim xidmətdə bu işlər surətlə aparılır. Vətəndaşlar my.gov.az vasitəsilə ona gələn bildirişləri, arayışları əldə edə bilir və hər bir müraciət edən şəxs ətraflı məlumatlandırılır. Bu da şəffaflığa xidmət edir. Həmçinin, xidmət məmnuniyyətinin artırılması, bir çox hallarda məsafədən xidmət göstərilməsinə şərair yaradır". Görüşdə "Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı"nın icrası haqqında ətraflı məlumat verilib, o cümlədən Xidmətdə korrupsiya ilə mübarizə sahəsində görülən işlər diqqətə çatdırılıb. Tədbir qarşılıqlı diskussiya şəklində davam edib və mövzu ilə bağlı vətəndaş cəmiyyəti nümayəndələrinin təklifləri dinlənilib.

Venesuela Prezidenti Nikolas Maduro dərhal istefa verəcəyi təqdirdə ABŞ ölkəni tərk edərkən onun təhlükəsizliyinə zəmanət verməyə hazırdır. Sozcu.az xəbər verir ki, bu barədə “Miyami Herald” mənbələrə istinadən məlumat yayıb. Mənbə bildirib ki, Maduro vəzifəsindən gedəcəyi təqdirdə ABŞ onun özünün, eləcə də həyat yoldaşı və oğlunun təhlükəsiz şəkildə ölkədən çıxmasına zəmanət verməyə hazırdır: “Karakas isə siyasi nəzarəti müxalifət qüvvələrinə təhvil verməyi, lakin silahlı qüvvələrə komandanlığı mövcud rəhbərliyə həvalə etməyi təklif edib. Liderlərin telefon danışığı birbaşa qarşıdurmadan yayınmaq üçün son cəhd idi. Zəng Braziliya, Qətər və Türkiyənin vasitəçiliyi ilə təşkil edilmişdi”. Qeyd edək ki, daha öncə Maduronun 18 ay müddətinə istefa verməyə razılşaması, ABŞ-ın isə istefanın dərhal elan edilməsini tələb etdiyi barədə məlumat yayılmışdı.

AXCP sədri Əli Kərimliyə ittiham elan olunub. Sozcu.az xəbər verir ki, Dövlət Təhlükəsizliyi Xidməti tərəfindən saxlanılan AXCP sədri Əli Kərimliyə AR Cinayət Məcəlləsinin 278.1 (hakimiyyəti zorla ələ keçirməyə, dövlətin konstitusiya quruluşunu zorla dəyişdirməyə yönələn hərəkətlər) maddəsi ilə ittiham irəli sürülüb.

Ukrayna nümayəndə heyəti bu gün ABŞ-yə gedərək “sülh planı”nı müzakirə edəcək. Sozcu.az xəbər verir ki, bu barədə "Politico" məlumat yayıb. Məlumata görə, bu gün Ukraynanın milli təhlükəsizlik və müdafiə şurasının katibi Rustem Umerovun rəhbərlik etdiyi Ukrayna nümayəndə heyəti ABŞ-a yollanacaq və orada Amerika həmkarları ilə Ukraynada müharibənin dayandırılması üçün təklif olunan “sülh planı”nı müzakirə edəcək. Xatırladaq ki, Ukrayna prezidenti Vladimir Zelenski dünən bildirib ki, nümayəndə heyətinə Umerov rəhbərlik edəcək. Bu, onun Ukraynanın Qərb müttəfiqləri ilə əsas əlaqələndirici sayılan baş müşaviri Andrey Yermakı vəzifədən azad etməsindən sonra baş verib. Politiconun yazdığına görə, Zelenski danışıqlar aparan heyət qarşısında aydın bir vəzifə qoyub — müharibənin dayandırılması üçün lazım olan addımları operativ və konkret şəkildə işləyib hazırlamaq. Bu tapşırığın icrası üçün Ukraynalı rəsmilər Floridada ABŞ prezidenti Donald Trampın xüsusi nümayəndəsi Stiv Uitkoff və Trampın kürəkəni Cared Kuşnerlə görüşəcəklər. Ukrayna nümayəndə heyətində Umerovla yanaşı, Ukrayna kəşfiyyatının rəhbəri Kirill Budanov və Ukrayna Silahlı Qüvvələrinin Baş Qərargah rəisi Andrey Qnatov da olacaq. Danışıqlarda həmçinin Cenevrədə keçirilmiş görüşün nəticələri müzakirə ediləcək və razılaşdırılacaq.

Donald Tramp Nikolas Maduro ilə telefon danışığında bildirib ki, könüllü olaraq vəzifəsindən getməsə, ABŞ Venesuelaya qarşı güc tətbiq etməyi nəzərdən keçirəcək. Sozcu.az xəbər verir ki, bu barədə “Voll Strit Jurnal” mənbələrə istinadla məlumat yayıb. Məlumata görə, Trampla Maduro arasında telefon danışığı ötən həftə baş tutub.

Ukrayna ordusu Krasnodar diyarındakı Slavyansk neft email zavoduna PUA zərbələri endirib. Sozcu.az xəbər verir ki, bu barədə Rusiya Teleqram kanalları məlumat yayıb. Məlumata görə, zərbələr nəticəsində neft emalı zavodundakı qaz boru kəmərinə ziyan dəyib.

Türkiyənin Afyonkarahisar şəhərində ağır yol qəzası baş verib. Sozcu.az xəbər verir ki, bu barədə Türkiyə mətbuatı məlumat yayıb. Məlumata görə, Dinar rayonunda sərnişin avtobusunun yolun kənarına aşması nəticəsində iki nəfər ölüb, 21 nəfər yaralanıb. Hadisə yerinə polis və təcili tibbi yardım əməkdaşları cəlb olunub. Xəsarət alanlar xəstəxanaya yerləşdiriliblər.

Dekabrın 1-i gündüzdən 3-ü axşamadək Azərbaycanın əsasən dağlıq və dağətəyi rayonlarında hava şəraitinin fasilələrlə yağıntılı olacağı gözlənilir. Bu barədə Sozcu.az-a Milli Hidrometeorologiya Xidmətindən məlumat verilib. Məlumata görə, ayrı-ayrı yerlərdə yağıntıların qısamüddətə intensivləşəcəyi, dağlıq ərazilərdə qara keçəcəyi ehtimal olunur.

“Ekvita Consulting” şirkəti barəsində Maliyyə Nazirliyi tərəfindən İnzibati Xətalar Məcəlləsinin 464-cü maddəsinə əsasən, protokol tərtib edilib. Sozcu.az Teleqraf-a istinadla xəbər verir ki, buna səbəb şirkətin 2023-cü il üzrə maliyyə hesabatlarının 2024-cü ildə auditini aparmamasıdır. Qanunvericiliklə müəyyən edilmiş müddətdə məcburi auditdən yayınan şirkət Nəsimi Rayon Məhkəməsinin qərarına əsasən, 1500 manat məbləğində cərimə olunub. Qeyd edək ki, “Ekvita Consulting” şirkətinin rəhbəri İlqar Mehdidir. Şirkət hüquq, vergi, maliyyə, audit və idarəetmə üzrə konsaltinq sahələrində xidmət göstərir. İlqar Mehdinin maliyyə nazirinin müavini Anar Kərimovun yaxın qohunu olduğu bildirilir. Şirkət daha öncə Əmək və Əhalinin Sosial Müdafiəsi Nazirliyinin tabeliyindəki bir neçə qurumun tenderlərinin qalibi olub. Bu isə Anar Kərimovun ƏƏSMN-də nazir müavini olduğu müddətə təsadüf edib.

Gəncədə 58 yaşlı kişi elektrik cərəyanı vurması nəticəsində ölüb. Sozcu.az xəbər verir ki, 1967-ci il təvəllüdlü Samux rayon sakini Ceyhun Vəliyev Gəncə şəhərində transformatorların birinin yanında yüksək elektrik cəryanın vurması nəticəsində həyatını itirib. Faktla bağlı Gəncə şəhər Prokurorluğunda araşdırma aparılır.

İşgəncələr Əleyhinə Araşdırma Mərkəzinin sədri, hüquq müdafiəçisi Fikrət Cəfərli azadlığa çıxıb. Sozcu.az Teleqraf-a istinadən xəbər verir ki, onun həbs müddəti başa çatdığı üçün bu gün sərbəst buraxılıb. Qeyd edək ki, F.Cəfərli bu ilin iyulunda böhtan atmaqda təqsirli bilinərək 4 ay müddətinə həbs edilmişdi. Ondan vəkil Elvin Əliyev şikayət vermişdi.

Rusiyanın Krasnodar diyarının Seversk rayonunda yerləşən Afipsk neft emalı zavodunda (NEZ) PUA hücumundan sonra yanğın baş verib. Sozcu.az xəbər verir ki, bu barədə regionun operativ qərargahı Teleqram kanalında məlumat yayıb. "Zavodun ərazisindəki texniki avadanlığın bir hissəsi zədələnib, anbarlar isə zərər görməyib. Yanğının sahəsi təxminən 100 kvadrat metr təşkil edib. İlkin məlumata görə, xəsarət alan yoxdur, zavodun əməkdaşları sığınacaqda yerləşdirilib", - məlumatda bildirilib. Qeyd edək ki, ildə 6,25 milyon ton neft emal edən zavod daha əvvəllər də PUA hücumlarına məruz qalmışdı.

Ukrayna Prezident Administrasiyasının (PA) istefaya göndərilmiş rəhbəri Andrey Yermak qalmaqaldan sonra ilk dəfə Qərb jurnalistləri ilə əlaqə saxlayıb. Sozcu.az xəbər verir ki, bu barədə “Nyu York Post” (NYP) məlumat yayıb. Yermak özünü dürüst və vicdanlı insan adlandıraraq istənilən repressiyaya hazır olduğunu bildirib: “Məni alçaldıblar və ləyaqətim qorunmayıb. Buna görə də mən Zelenskiyə problem yaratmaq istəmirəm, cəbhəyə gedirəm”. Qeyd edək ki, ölkədə korrupsiya qalmaqalı fonunda Zelenski Yermakın Ukrayna Prezident Administrasiyasının rəhbəri vəzifəsindən istefa ərizəsini qəbul edib.

Naxçıvan Müəllimlər İnstitutunun fəaliyyətinin dayandırılması ilə bağlı qərar yoxdur. Sozcu.az xəbər verir ki, bunu Naxçıvan Müəllimlər İnstitutunun fəaliyyətinin dayandırılması ilə bağlı yayılan məlumatlara münasibət bildirən elm və təhsil naziri Emin Əmrullayev deyib. O bildirib ki, hazırda bununla bağlı hər hansı qərar mövcud deyil. Nazirin sözlərinə görə, Azərbaycandakı mövcud qaydalara əsasən, Naxçıvan Dövlət Universiteti və Naxçıvan Müəllimlər İnstitutu ali təhsil müəssisələri kimi fəaliyyətlərini davam etdirirlər.

Türkiyənin Kırıkkale şəhərinin Yahşıhan rayonunda yerləşən fabrikdə kompressorda qaynaq zamanı 2 işçi dəmir təbəqənin altında qalaraq ölüb. Sozcu.az xəbər verir ki, bu barədə Türkiyə mediası məlumat yayıb. Bildirilib ki, onlar 56 yaşlı Mutlu Atay, 58 yaşlı Tekin Omaydır. Hadisənin səbəbi və şəraitlə bağlı araşdırma aparılır.