Baş bankirdən mühüm kredit qərarı – Ekspert

Mərkəzi Bankın sədri Elman Rüstəmovun bu qərarı rəsmi statistikada problemli kreditlərin kəskin artmasının qarşısını almağa yönəlib.

Sozcu.az xəbər verir ki, Bu sözləri Axar.az-a açıqlamasında iqtisadçı Natiq Cəfərli Mərkəzi Bankın sədri Elman Rüstəmovun “Koronavirus (COVİD-19) pandemiyası ilə əlaqədar kredit təşkilatlarının müvəqqəti tənzimləmə Qaydası”nı təsdiqləməsi ilə bağlı danışarkən deyib.

O bildirib ki, verilən qərar statistik xarakter daşıyır:

“Mərkəzi Bank banklarda problemli kreditlərin artacağını proqnozlaşdıraraq, bunun qarşısını almaq üçün fərqli formulları işə salır. Verilən bu qərar bankların hesablama qaydalarını dəyişərək, statistik artımın qarşısını almağa yönəlib. Yəni təsnifat dəyişdiyinə görə problemli kreditlərin statistik sayı azalacaq. Bu o deməkdir ki, banka borcu olan vətəndaş ödəməli olduğu borcun aylıq ödəməsini büdcəsinə görə ödəsə belə, bu, problemli kredit sayılmayacaq. Əslində bu, faktiki olaraq problemli kredit sayılmalıdır. Çünki bank müqavilə əsasında vətəndaşa aylıq ödəyəcəyi məbləği açıqlayır. Vətəndaş isə təyin olunmuş məbləğdən az ödəyir. Bu, mahiyyət etibarilə problemli kredit olsa da, statistik olaraq problemli kredit sayılmayacaq. Yəni hesablama qaydaları dəyişərək, statistik göstəricilərin birdən-birə pisləşməsinin qarşısını alacaq”.

N.Cəfərli verilən qərarın banklara təsirindən danışıb:

“Bu qərarın banklara müəyyən dərəcədə xeyri olacaq. Çünki problemli kreditlərin sayının artması bankların xarici valyuta mənbələrinə çıxış imkanlarını məhdudlaşdırır. Beynəlxalq maliyyə institutları bankların reytinqlərini vaxtaşırı müəyyənləşdirir. Bu reytinqə təsir edən amillərdən biri də problemli kreditlərdir. Bankların mövcud vəziyyətinin pis olması onların xarici valyuta yardımları və ya dəstək fondları ilə birgə işləməsinə problem yaradır. Yəni statistik olaraq banklarda olan problemli kreditlərin azalması bankların beynəlxalq əlaqələri baxımdan müsbətdir”.

Facebook Comments