Suriyanın Tartus, Latakiya və Hüms şəhərlərində etiraz aksiyaları keçirilib. Sozcu.az xəbər verir ki, bu barədə İSNA agentliyi məlumat yayıb. Məlumata görə, etirazçılar mülki əhalinin qorunması və vətəndaş hüquqlarının pozulmasına son qoyulması tələbi ilə şüarlar səsləndiriblər. Qarşıdurmalar nəticəsində bir neçə ölən və xəsarət alanların olduğu bildirilir.

Xəbər verdiyimiz kimi, dünən Biləsuvar rayonunda dəhşətli qəza baş verib. Sozcu.az bildirir ki, hadisə nəticəsində 2 bacı, 1993-cü il təvəllüdlü Aytac Rüstəmli və 2003-cü il təvəllüdlü Aynur Rüstəmlinin həkiməqədər ölüm faktı qeydə alınıb. Onların fotolarını təqdim edirik:  (Sfera.az)

Dekabrın 28-də saat 03.00-dan başlayaraq Kəlbəcər rayonuna qar yağmağa başlayıb. Sozcu.az xəbər verir ki, Kəlbəcər şəhərinə qarın hündürlüyü 15, yüksək dağlıq ərazilərdə isə 35 santimetri keçib. Havanın temperaturu - 2°-dir.

Tərtərdə yol-nəqliyyat hadisəsi baş verib. Sozcu.az APA-ya istinadla xəbər verir ki, hadisə Borsunlu-Hindarx yolunun Tərtər rayon Azad Qaraqoyunlu kəndi ərazisindən keçən hissəsində qeydə alınıb. Məlumata görə, hərəkətdə olan "Mersedes" və "Mitsubişi" markalı minik maşınlarının toqquşması nəticəsində 3 nəfər xəsarət alıb. Yaralılar Bərdə və Tərtər rayon xəstəxanalarına yerləşdirilib. Faktla bağlı araşdırma aparılır.

Ukraynanın qələbəsini təmin etmək üçün biz Rusiya təcavüzkarının iqtisadiyyatını sarsıtmağa diqqət yetirməliyik. Sozcu.az xəbər verir ki, bunu ABŞ-ın Avropadakı ordusunun keçmiş komandanı, general Ben Hoces deyib. "Düşünürəm ki, Ukraynanın qələbə nəzəriyyəsi Rusiyanın neft və qaz infrastrukturunun məhv edilməsində, neft və qaz ixrac etmək imkanlarının pozulmasındadır. Ukrayna Rusiyanı belə məğlub edə bilər", - deyə o bildirib. O vurğulayıb ki, Rusiya Çin, Hindistan, Türkiyə və digər müştərilərə neft və qaz ixracından əldə etdiyi gəliri itirərsə, hücumlarını maliyyələşdirə bilməyəcək. Bundan əlavə, neft və qaz sektoruna hücumlar Rusiyanın daxili bazarında, xüsusən də hərbi sektorda müəyyən yanacaq çatışmazlığı yaradacaq.

Goranboyda ər-arvad dəm qazından zəhərlənib. Sozcu.az Teleqraf-a istinadla xəbər verir ki, 1975-ci il təvəllüdlü Aqşin Qəribov və 1982-ci il təvəllüdlü Aynurə Qəribova dəm qazından zəhərlənmə diaqnozu ilə ağır vəziyyətdə Goranboy Rayon Mərkəzi Xəstəxanasına yerləşdiriliblər. Hər iki şəxsə dərhal tibbi yardım göstərilib. Hazırda onların vəziyyətinin ağır olduğu bildirilir. İlkin məlumata görə, ər-arvad yaşadıqları evin hamam otağında dəm qazından zəhərlənib. Faktla bağlı araşdırma aparılır.

Ukrayna müharibənin 1404-cü günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 204 510 hərbçi, 11 469 ədəd tank, 23 831 ədəd zirehli döyüş maşını, 35 557 ədəd artilleriya sistemi, 1 581 ədəd RYAS (reaktiv yaylım atəş sistemi), 1 264 hava hücumundan müdafiə sistemi, 434 ədəd hərbi təyyarə, 347 ədəd helikopter, 71 778 ədəd avtomobil texnikası, 96 227 ədəd PUA, 4 136 qanadlı raket, 28 gəmi/kater, 2 sualtı qayıq, 4 029 xüsusi avadanlıq itirib.

Ukrayna Prezidcenti Vladimir Zelenski ABŞ Prezidenti Trampla görüşdən əvvəl Avropa liderləri ilə danışıb. Sozcu.az xəbər verir ki, bu barədə Zelenski özünün Teleqram kanalında məlumat verib. “Hazırkı diplomatik irəliləyişimizi müzakirə etdik. Ukrayna bütün dəstəyə görə minnətdardır. Prezident Trampla görüşümüzdən sonra sabah söhbətimizi davam etdirəcəyik”, - Zelenski bildirib. Qeyd edək ki, bu gün Floridada ABŞ Prezidenti Donald Trampla Ukrayna Prezidenti Vladimir Zelenski arasında görüş keçiriləcək.

Azərbaycan Səudiyyə Ərəbistanı Krallığı və Birləşmiş Ərəb Əmirliklərinin Yəmən Respublikasında gərginliyin azaldılması, təhlükəsizlik və sabitliyin təşviqi istiqamətində göstərdiyi səyləri alqışlayır. Sozcu.az xəbər verir ki, bu barədə Azərbaycan Xarici İşlər Nazirliyinin X hesabındakı paylaşımında bildirilib. Bildirilib ki, Yəməndə mövcud vəziyyət təmkinli davranmağın, kollektiv fəaliyyətə, dialoqa və sülh yolu ilə həllərə üstünlük verməyin zəruriliyini önə çıxarır: "Azərbaycan Yəmən Respublikasının birliyi, suverenliyi və ərazi bütövlüyünə dəstəyini bir daha təsdiqləyir və ölkədə davamlı sülh, rifah və inkişafın əldə olunması məqsədilə yəmən xalqının maraqlarının qorunmasına yönəlmiş bütün təşəbbüsləri yüksək qiymətləndirir".

Bakıda 53 yaşlı kişi sobanın üzərinə yıxılıb. Sozcu.az Oxu.Az-a istinadən xəbər verir ki, hadisə paytaxtın Xəzər rayonu, Binə qəsəbəsi ərazisində fərdi yaşayış evində baş verib. Qəsəbə sakini 1972-ci il təvəllüdlü əqli pozuntuları olan Elşad Sadıqov yaşadığı evdə elektrik sobasının üzərinə yıxılıb. Hadisə nəticəsində o, yanıq xəsarətləri ilə xəstəxanaya yerləşdirilib. Faktla bağlı araşdırma aparılır.

Ukrayna Prezidenti Volodimir Zelenski ABŞ Prezidenti Donald Tramp ilə görüşdə Rusiya ilə müharibənin dayandırılması üzrə beş məsələni müzakirə edəcək. Sozcu.az xəbər verir ki, bu barədə o, ABŞ-yə səfərindən əvvəl jurnalistlərə deyib. Dövlət başçısı bildirib ki, dekabrın 28-də amerikalı həmkarı ilə keçiriləcək danışıqlarda bu məsələlər müzakirə olunacaq: ABŞ-dən Ukraynaya təhlükəsizlik zəmanəti, Avropadan təhlükəsizlik zəmanəti, hərbi komponent, Ukraynanın rifahı və bərpası planı, planın mərhələli icrası - hər planın necə işləyəcəyinə dair təkliflər. Kiyev və Vaşinqton ardıcıl fəaliyyət planını da nəzərdən keçirəcək. Zelenskinin sözlərinə görə, bütün maddələr müzakirə edildikdən sonra ABŞ əldə olunan razılaşmaların nəticələrini Rusiya tərəfinə təqdim edəcək.

2010-cu illə müqayisədə 2024-cü ildə ölkə üzrə ana ölümü səviyyəsi 12.6 bənd artaraq hər 100 min diri doğulana görə 28.3 nəfərə yüksəlib. Göstərilən dövrdə hamiləlik, doğuş və zahılıq dövründə ölən anaların sayı 26 nəfərdən 29 nəfərə çatıb. Sozcu.az Oxu.az-a istinadən xəbər verir ki, 2010-cu illə müqayisədə 2024-cü ildə ana ölümü səviyyəsi kənd yerlərində 9.5-dən 43.4-ə yüksəlib, şəhər yerlərində isə 22-dən 12.2-yə enib. 2024-cü ildə ana ölümü hallarının 6-sı şəhər, 23-ü isə kənd yerlərinin payına düşüb. 2024-cü ildə ana ölümü hallarının sayı Lənkəran-Astara və Mil-Muğan iqtisadi rayonlarında hərəsində 5, Qarabağ iqtisadi rayonunda 4, Şərqi Zəngəzur və Mərkəzi Aran iqtisadi rayonlarında 3, Dağlıq Şirvan, Qazax-Tovuz və Quba-Xaçmaz iqtisadi rayonlarında isə hərəsində 2 hal olaraq qeydə alınıb. Naxçıvan Muxtar Respublikasında, Abşeron-Xızı və Gəncə-Daşkəsən iqtisadi rayonlarında isə hərəsində 1 ana ölümü faktı qeydə alınıb. Bakı şəhəri, Şəki-Zaqatala və Şirvan-Salyan iqtisadi rayonlarında ana ölümü halları müşahidə edilməyib. Ana ölümü anlayışı hamiləliyin müddətindən və harada baş verməsindən asılı olmayaraq, hamiləliyin ağırlaşması və ya düzgün aparılmaması nəticəsində (bədbəxt hadisə və ya təsadüfi səbəblər istisna olmaqla) hamiləlik dövründə, doğuş zamanı və ya hamiləliyin başa çatmasından sonra ilk 42 gün ərzində qadının vəfat etməsi halını ifadə edir.

Biləsuvar rayonunun Nəsimikənd ərazisində avtomobil kanala düşüb. Sozcu.az Bakupost.az-a istinadən xəbər verir ki, qəza "Leksus" markalı, 90 EU 111 nömrə nişanlı avtomobilin sürücüsünün idarəetməni itirməsi nəticəsində baş verib. Məlumata görə, qəzanı Biləsuvar rayon Telekomnukasiya Qovşağının keçmiş rəisi Xalid Rüstəmovun həyat yoldaşı, Milli Qəhrəman M.İbrahimov adına Biləsuvar Təhsil Kompleksinin müəlliməsi Fidan Rüstəmova törədib. Avtomobildə sürücüdən əlavə bir neçə qadın sərnişinin olduğu, onlardan birinin öldüyü bildirilir. Qeyd edək ki, bir neçə gün əvvəl də Biləsuvarda avtomobilin kanala düşməsi nəticəsində 5 nəfər ölmüşdü.

Dekabrın 26-da ölkə ərazisində qeydə alınan 28, əvvəlki dövrlərdən bağlı qalan 2 cinayətin açılması polis əməkdaşları tərəfindən təmin olunub.    DİN-in Mətbuat Xidmətindən Sozcu.az-a verilən məlumata görə, axtarışda olduğuna görə ümumilikdə 285, o cümlədən borclu şəxs qismində axtarışda olan 255 nəfər saxlanılaraq aidiyyəti üzrə təhvil verilib.       Narkotiklərlə əlaqəli 3, qanunsuz saxlanılan silah-sursatın götürülməsi və aşkarlanması ilə bağlı 6 fakt müəyyən edilib. Cinayət törətməkdə şübhəli bilinən 25 nəfər saxlanılıb.

Güclü qar çovğunu ilə əlaqədar Rusiyanın paytaxtı Moskvada sarı xəbərdarlıq elan edilib. Sozcu.az xarici KIV-ə istinadən xəbər verir, bu barədə Rusiyanın Hidrometeorologiya Mərkəzi məlumat yayıb. Məlumata görə, sarı xəbərdarlıq paytaxtda 27 dekabr saat 20:00-dan bazar günü, 28 dekabr saat 10:00-dək (Bakı vaxtı ilə 11:00-dək) qüvvədə olacaq. Sinoptiklərin məlumatına görə, bazar günü axşam, gecə və səhər saatlarında Moskvada qar, bəzi yerlərdə güclü qar yağacağı, həmçinin yolların buz bağlayacağı gözlənilir. Qeyd edilir ki, bu gün küləyin sürəti 5–10 m/s olacaq, temperaturun dekabrın 28-ə kimi -4C dərəcə qədər enəcəyi proqnozlaşdırılır.

"Söküntü prosesində ilk növbədə qəzalı binalar sökülür. Çünki qəzalı binalarda vətəndaşlarımızın yaşaması təhlükəlidir. Ona görə bu il müvafiq icra strukturları 200-ə yaxın qəzalı binanı aktlaşdıraraq onların söküntüsünə qərar verib. Növbəti ildə də eyni proses gedəcək". Sozcu.az bildirir ki, bu sözləri baku.ws-ə açıqlamasında Azərbaycan Qiymətləndiricilər Cəmiyyətinin (AQC) sədri Vüqar Oruc deyib. Onun sözlərinə görə, gələn il təkcə Bakı və Abşeron yarımadasında deyil, bütün Azərbaycanı əhatə edən bir söküntü prosesi olacaq: "Bu, istismar müddətini bitirmiş binaları əhatə edəcək. Onların yerində yeni binalar inşa ediləcək və bu proses böyük bir dövrü əhatə edəcək. İlk növbədə qəzalı binaların söküntüsü olacaq. İkinci növbədə istismar müddətini başa vurmuş binalara üstünlük veriləcək. Üçüncü mərhələ isə layihənin tam yekunlaşmasını əhatə edəcək və bütün köhnə binalara şamil ediləcək. Mərhələli plan üzrə ölkədəki köhnə binaların yeni binalarla əvəz olunması prosesi davam edəcək. Söküntü zamanı kompensasiya məbləği Bakı Şəhər İcra Hakimiyyəti və Nazirlər Kabinetinin müəyyən etdiyinə görə əvvəllər 1500 manat ödənilirdi. Son rəqəm 2700 manata çatıb. Müvafiq razılıq əsasında qiymətləndirmə şirkətləri tərəfindən hər hansı bir bina söküləndə satınalma elan olunur. Qiymətləndirmə şirkətləri həmin satınalmada iştirak edərək bu sifarişi götürür və sökülən binanın ərazi və infrastruktura görə qiymətini müəyyənləşdirir. Fikrimcə, söküntü aparılan ərazidə həmin binanın bazar dəyəri yox, ətrafındakı yeni tikililərin bir kvadrat metrinin dəyəri qədər kompensasiya verilməlidir. Bu halda vətəndaş kompensasiyaya uyğun yeni mənzil almaqda çətinliklə üzləşməz".

Bakıda yük avtomobili yeniyetməni vuraraq öldürüb. Sozcu.az xəbər verir ki, hadisə Qaradağ rayonunda, Səngəçal-Umbakı avtomobil yolunda qeydə alınıb. Belə ki, Rəsul Rəşad oğlu Xəlilovun idarə etdiyi "Kamaz" markalı yük avtomobili yolu keçən, 2009-cu il təvəllüdlü Xəlil Ceyhun oğlu Fətəliyevi vuraraq öldürüb. Faktla bağlı cinayət işi başlanılıb.

10:16 Naxçıvan Muxtar Respublikası (MR) Ordubad rayonunun yüksək dağlıq ərazilərində qarın hündürlüyü 25 sm-ə çatıb. Sozcu.az Report-a istinadən xəbər verir ki, muxtar respublika ərazisində yağıntılı hava şəraiti davam edir. Hazırda bəzi dağlıq ərazilərdə sulu qar və qar yağır, duman müşahidə olunur. Ordubad rayonun yüksək dağlıq ərazilərində (3000 m) qarın hündürlüyü 25, Parağaçaq Qar Uçqunu Stansiyasında 4, Şahbuz rayonunun Kükü və Biçənək kəndlərində isə 3 sm qeydə alınıb. *** Dağlıq rayonlarda 9 dərəcəyədək şaxta qeydə alınıb. Bu barədə Milli Hidrometeorologiya Xidmətindən məlumat verilib. Bildirilib ki, dekabrın 27-si saat 10:00-a olan məlumata əsasən, ölkə ərazisinin bəzi yerlərində yağıntılı hava şəraiti müşahidə olunub: "Yağan qarın hündürlüyü Zaqatalada (Əlibəy) 9, Daşkəsəndə 6, Şahbuzda 4, Xaltanda 2, Şəkidə (Kişçay) 1 sm-dir. Düşən yağıntının miqdarı Gədəbəydə 2, Bakıda və Abşeron yarımadasında, həmçinin Lənkəran, Biləsuvar, Neftçala, Sabirabad, Göyçay, Yevlax, Mingəçevir, Tərtər, Göygöl, Gəncə, Naftalan, Şəmkir, Şamaxı, Qobustan, Qubada 1 mm-dir". Vurğulanıb ki, Daşkəsən, Göygöl, Gəncə, Balakən, Qəbələ, Şəmkir, Şəki, Şamaxı, Qobustan, Göyçay, Lerikdə duman müşahidə olunub. Görünüş məsafəsi 500 metrədək məhdudlaşıb: "Havanın minimal temperaturu Bakıda və Abşeron yarımadasında 4 dərəcəyədək isti, Aran rayonlarında 2, Naxçıvan MR-da 6, dağlıq rayonlarda 9 dərəcəyədək şaxta qeydə alınıb".

Avropa İnsan Haqları Məhkəməsi (AİHM) İstanbul Böyükşəhər Bələdiyyəsinin sabiq sədri Əkrəm İmamoğlunun həbsi ilə bağlı ərizəni “vacib yoxlama” siyahısına əlavə etdiyini açıqlayıb. Bu o deməkdir ki, AİHM Ə.İmamoğlu ilə bağlı gözləniləndən də tez qərar verəcək. Sozcu.az xəbər verir ki, bu barədə İmamoğlunun vəkili Mehmet Pəhləvan X hesabında məlumat yayıb. “AİHM-in bu qərarı Türkiyədən bu günə qədər edilən müraciətlərdə nadir rast gəlinən bir qərardır”, - vəkil əlavə edib.

Ağdərə rayonunun Vəngli kəndinə 44 nəfərdən ibarət daha 10 ailə yola salınıb. Sozcu.az xəbər verir ki, Vəngli kəndinə köç edənlər ölkənin müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdir. Bununla Vəngli kəndinə qayıdan ailələrin ümumi sayı 137-yə (532 nəfər) çatacaq.

Cümhuriyyət Siyasi Düşüncə Mərkəzinin sədri Ceyhun Nabi bildirib ki, 1988-ci ildə başlayan Meydan Hərəkatından əvvəl Sovet Azərbaycanında fəaliyyət göstərmiş bir sıra Güney Azərbaycanlı fəallar müstəsna xidmətlər göstərmişdir. Onların gizli təşkilatlanma işində tövsiyə və məsləhətləri nəzərə alınmış, bir çoxu isə Seyid Cəfər Pişəvəri hökuməti ilə bağlı fəaliyyət göstərmişdir. “Bu səbəbdən, həmin şəxslər siyasi təşkilatlanma işinə az-çox bələd idilər. Təəssüf ki, onları biz hələ lazımınca tanımırıq və fəaliyyəti barədə kifayət qədər araşdırma aparılmayıb. Adları yalnız müəyyən müsahibələrdə və çıxışlarda çəkilmişdir. Xüsusilə İsmayıl Təriqpeyma, Məhəmməd Hatəmi Tantəkin, İsfəndiyar Bərxu (Coşğun) və başqaları diqqət çəkir,” – deyə Ceyhun Nabi vurğulayıb. O əlavə edib ki, bir gün Azərbaycan Meydan Hərəkatı və Azərbaycanın müstəqilliyinin bərpasına gedən yol ciddi şəkildə tədqiqatlara cəlb olunmalı, bu proseslərin təməllərini müəyyən edən məqamlar öyrənilməlidir. “Hazırda yaxın tariximizlə bağlı əlimiz boşdur və bu, bizim üçün böyük bir faciədir. Azərbaycanda bu məsələni tam mənzərəsi ilə ortaya qoyacaq fundamental mənbə və ya tədqiqat işi hələ ortada yoxdur,” – Ceyhun Nabi bildirib.

Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin barəsində olan cinayət işləri üzrə açıq məhkəmə prosesinin baxış iclası dekabrın 26-da davam etdirilib. Sozcu.az xəbər verir ki, Bakı Hərbi Məhkəməsində hakimlər Zeynal Ağayevin sədrliyi ilə, Camal Ramazanovdan və Anar Rzayevdən ibarət tərkibdə (ehtiyat hakim Günel Səmədova) keçirilən məhkəmə iclasında təqsirləndirilən şəxslərin hər biri bildikləri dildə tərcüməçi, həmçinin müdafiələri üçün vəkillərlə təmin olunub. İclasda təqsirləndirilən şəxslər, onların müdafiəçiləri, zərərçəkmiş şəxslərin bir qismi, onların hüquqi varisləri və nümayəndələri, həmçinin dövlət ittihamını müdafiə edən prokurorlar iştirak ediblər. Sədrlik edən Z.Ağayev bildirib ki, məhkəmə iclası təqsirləndirilən şəxslərin son söz çıxışları ilə davam etdirilir. Məhkəmə iclasında təqsirləndirilən şəxs Davit İşxanyan son söz deyib. O, çıxışında irəli sürülmüş ittihamlarla razılaşmadığını bildirib və ittiham tərəfinin mövqeyinə əks arqumentlərini səsləndirib. D.İşxanyan insanların yaşadıqları ərazilərdən məcburi şəkildə çıxarılmasında, qanunsuz məskunlaşmada, minaların yerləşdirilməsində, təcavüzkar müharibənin planlaşdırılmasında, yeni hücum planlarının hazırlanmasında, soyqırımında, mülki əhalinin məhv edilməsində, müharibə qanunlarının pozulmasında, mülki əhalinin təqibində, insanların girov götürülməsində, beynəlxalq hüquq normalarına zidd azadlıqdan məhrum etmədə, işgəncə verilməsində, mülki şəxslərin qətlində, əmlakların talan edilməsində, cinayətkar birliyin tərkibində olmaqda, silah-sursatın qanunsuz daşınmasında və s. cinayətlərdə iştirak etmədiyini iddia edib. Təqsirləndirilən şəxs 1991-ci il noyabrın 20-də baş vermiş Qarakənd faciəsi barədə də danışıb. O, Azərbaycana məxsus, içərisində yüksəkvəzifəli şəxslərin olduğu vertolyotun partlaması hadisəsinin qəza olduğunu iddia edib. D.İşxanyan çıxışında əsir və girovlarla bağlı ittiham aktında yer almış məqamlara da toxunub. O qeyd edib ki, azərbaycanlı əsir və girovlarla təması olmayıb. "Özümü təqsirkar hesab etmirəm, mən hansısa cinayət törətməmişəm", - deyə D.İşxanyan çıxışının sonunda bildirib. Sədrlik edən Z.Ağayev bununla da son söz çıxışlarının yekunlaşdığını deyib. O, tərəflərə (ittiham tərəfi, zərərçəkmiş tərəf və müdafiə tərəfi) müraciət edərək hökm layihəsi təqdim edib-etməyəcəklərini soruşub. Tərəflər hökm layihəsi təqdim etməyəcəklərini bildiriblər. Bundan sonra sədrlik edən məhkəmə baxışının başa çatdığını elan edib. Məhkəmə heyəti müşavirəyə gedib. Müşavirədən qayıtdıqdan sonra məhkəmə hökmü elan olunacaq. Qeyd edək ki, Ermənistan dövlətinin, onun dövlət qurumlarının vəzifəli şəxslərinin, hərbi qüvvələrinin və qanunsuz silahlı birləşmələrin bilavasitə rəhbərliyi və iştirakı, şifahi-yazılı qaydada verdiyi tapşırıq, göstəriş və təlimatları, maddi, texniki, şəxsi heyətlə verdiyi dəstəyi, mərkəzi qaydada idarəçiliyi əsasında, eləcə də ciddi nəzarəti altında Azərbaycan ərazisində daxili və beynəlxalq hüquq normalarına zidd şəkildə, Azərbaycana hərbi təcavüz etmək məqsədilə yaradılmış, həmçinin Köçəryan Robert Sedraki, Sarkisyan Serj Azati, Manukyan Vazgen Mikaeli, Sarkisyan Vazgen Zaveni, Babayan Samvel Andraniki, Balasanyan Vitali Mikaeli, Balayan Zori Hayki, Ohanyan Seyran Muşeqi, Qaramyan Arşavir Surenoviç, Melkonyan Monte Çarlz və digərlərinin rəhbərliyi, bilavasitə və dolayı iştirakları ilə Ermənistan dövləti, o cümlədən sözügedən cinayətkar birlik tərəfindən aparılan təcavüzkar müharibənin gedişində törədilmiş çoxsaylı cinayət faktlarına dair cinayət işi üzrə 15 təqsirləndirilən şəxs ittiham edilir. Həmin şəxslər, yəni, Harutyunyan Arayik Vladimiri, Qukasyan Arkadi Arşaviri, Sahakyan Bako Sahaki, İşxanyan Davit Rubeni, Manukyan David Azatini, Babayan David Klimi, Mnatsakanyan Levon Henrikoviç, Beqlaryan Vasili İvani, Qazaryan Erik Roberti, Allahverdiyan Davit Nelsoni, Stepanyan Qurgen Homeri, Balayan Levon Romiki, Babayan Madat Arakeloviç, Martirosyan Qarik Qriqori, Paşayan Melikset Vladimiri Azərbaycan Respublikası Cinayət Məcəlləsinin 100 (təcavüzkar müharibəni planlaşdırma, hazırlama, başlama və aparma), 102 (beynəlxalq müdafiədən istifadə edən şəxslərə və ya təşkilatlara hücum etmə), 103 (soyqırımı), 105 (əhalini məhvetmə), 106 (köləlik), 107 (əhalini deportasiya etmə və ya məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrumetmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 118 (hərbi soyğunçuluq), 120 (qəsdən adam öldürmə), 192 (qanunsuz sahibkarlıq), 214 (terrorçuluq), 214-1 (terrorçuluğu maliyyələşdirmə), 218 (cinayətkar birlik (təşkilat) yaratma), 228 (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1 (aviasiya təhlükəsizliyinə təhdid yaradan əməllər), 277 (dövlət xadiminin və ya ictimai xadimin həyatına sui-qəsd etmə), 278 (hakimiyyəti zorla ələ keçirmə və onu zorla saxlama, dövlətin konstitusiya quruluşunu zorla dəyişdirmə), 279-cu (qanunvericiliklə nəzərdə tutulmayan silahlı birləşmələri və qrupları yaratma) və digər maddələri ilə ittiham olunurlar.

3 dekabr 2025-ci il tarixində Mənzil İnşaatı Dövlət Agentliyinin (MİDA) növbəti layihələri üzrə ümumilikdə 627 mənzilin “Elektron hökumət” portalı (http://www.e-gov.az)) üzərindən “Güzəştli mənzil” sistemi vasitəsilə satışı zamanı informasiya təhlükəsizliyi yüksək səviyyədə təmin edilib. Sozcu.az DTX-nin mətbuat xidmətinə istinadən xəbər verir ki, mənzil seçimi prosesinə Dövlət Təhlükəsizliyi Xidməti (DTX), Xüsusi Rabitə və İnformasiya Təhlükəsizliyi Dövlət Xidməti və MİDA tərəfindən nəzarət olunub. Tədbirlər zamanı müxtəlif kiberhücum cəhdləri qeydə alınıb, onlar operativ şəkildə aşkarlanaraq neytrallaşdırılıb. Aparılmış araşdırmalar nəticəsində müəyyən edilib ki, Azərbaycan Respublikasının vətəndaşları C.Süleymanlı və T.Abdulov əvvəlcədən əldə etdikləri və informasiya texnologiyaları sahəsində xüsusi texniki imkanlardan istifadə etməklə uyğunlaşdırdıqları proqram təminatı vasitəsilə bəzi vətəndaşlara güzəştli mənzil əldə etmə prosesində qanunsuz üstünlük qazandırmağa cəhd ediblər. Onlar 3 dekabr 2025-ci il tarixində saat 11:00 radələrində MİDA-nın “Güzəştli mənzil” informasiya sisteminə qanunsuz müdaxilə edərək kompüter infrastrukturunun normal fəaliyyətinə qəsdən ciddi maneə yaratmağa yönələn hərəkətlər ediblər. Faktla bağlı DTX-də cinayət işi başlanılıb. Qeyd olunan şəxslər Azərbaycan Respublikası Cinayət Məcəlləsinin 273.3.1 və 273.3.2-ci maddələri (kompüter sisteminə qanunsuz müdaxilə və kompüter sisteminin işləməsinə qəsdən maneə törətmə) ilə cinayət məsuliyyətinə cəlb olunublar. Hazırda iş üzrə istintaq-əməliyyat tədbirləri davam etdirilir.

SOCAR Neft Emalı Zavodunun 14 saylı laboratoriyasının 50 yaşı keçə xanım işçiləri təzyiqlərlə üzləşdiklərini iddia edirlər. Sozcu.az xəbər verir ki, onlar bununla bağlı Neftçilərin Hüquqlarını Müdafiə Təşkilatının sədri Mirvari Qəhrəmanlı bildirib. Hüquq müdafiəçisinin sözlərinə görə, laboratoriya rəhbəri Leyla Allahverdiyeva xanım işçilərə təzyiq edir: “O, işçilərə təkidlə bildirib ki, ya əmək haqqınızın 10 mislini götürüb gedin, ya da imtahan verməlisiniz. İmtahan verə bilməyənlər isə əmək haqqının iki mislini almaqla işdən azad olunacaqlar”. M.Qəhrəmanlının sözlərinə görə, bəzi işçilər məcbur olub işdənçıxma ərizəsi yazıb, bəziləri isə imtahan verməyi qərarlaşdırıb. İmtahan zamanı yüksək bal toplayan işçilərin işdə saxlanılması üçün isə laboratoriya rəhbərinin rəyi əsas götürürüləcək: “Yəni imtahan vermiş işçilərin də işdə qalması Leyla xanımın rəyindən asılıdır. Xanımın ədalətinə, onun ayrı-seçkilik xarakterinə bələd olan insanlar kimi bəziləri ərizə yazmağa məcbur olub. Laboratoriyada çalışmış 170 işçidən təqribən 54-55 nəfər işdənçıxma ərizəsi yazıb. Qalan 120 nəfər isə imtahanlara cəlb olunub. Şikayət ərizəsini yazanlar yuxarıda qeyd edilənləri nəzər alıb, laboratoriya rəhbərinin imtahan nəticələrinə təsir edə bilməsini, işçi haqqında rəy verərkən ədalət prinsiplərini pozma ehtimalını nəzərə alaraq sahə üzrə müvafiq məsul şəxslərin (qurumun) prosesləri, imtahan nəticələrini ciddi nəzarət altına almasını, edilən şikayətlərə həssas yanaşmağı xahiş edir”.