Ukrayna qüvvələri Pokrovskun mərkəzi rayonlarını təmizləyib və rus hərbçilərini şəhərdən çıxarmağa davam edir. Sozcu.az xəbər verir ki, bu barədə Ukrayna Desant Hücum Qoşunlarının 7-ci korpusundan məlumat verilib. “Şəhərdə döyüşlər gedir, lakin mərkəzdəki mövqelər Ukrayna Silahlı Qüvvələrinin əlindədir. Ruslar dayaq nöqtəsi qazanmağa çalışdılar, lakin dəmir yolu stansiyasının, pedaqoji məktəbin və Katedral Meydanının ərazisindən qovuldular. Hərbçilər Rusiyanın qüvvələrini artırmaq və şəhərin şimalına təzyiqi artırmaq cəhdlərinin qarşısını almağı bacardılar. Dəmir yolunu keçmək üçün edilən hər bir cəhd maksimum itki ilə nəticələndi”, - məlumatda qeyd olunub.

Pessimist olduğumu demək istəmirəm, amma hazırda noyabrın 27-nə qədər Prezident Donald Trampın istədiyi qərarın veriləcəyinə əmin deyiləm. Sozcu.az xəbər verir ki, bunu Almaniya kansleri Fridrix Merz ABŞ-ın sülh planı ilə bağlı açıqlamasında deyib. “Biz hələ də 27 noyabr tarixinə qədər qərara gəlməkdən çox uzaqıq. Danışıqlar aparan tərəflər arasında mövcud fikir ayrılıqları var. Amma bu, onun tamamilə istisna edildiyi anlamına gəlmir", - Merz bildirib.

Azərbaycanın avtomobil yollarında vəziyyət açıqlanıb. Milli Hidrometeorologiya Xidmətindən Sozcu.az-a bildirilib ki, noyabrın 24-də gecə və səhər ölkə ərazisinin bəzi yerlərində dumanlı hava şəraiti ilə əlaqədar olaraq avtomobil magistral yollarında görünüş məsafəsinin 300-800 metrədək məhdudlaşacağı gözlənilir.

Ukraynanın sərhədləri güclə dəyişdirilə bilməz, ordusu azaldıla bilməz və Avropa Birliyi Ukrayna üçün sülh sazişində mərkəzi rol oynamalıdır. Sozcu.az xəbər verir ki, bunu Avropa Komissiyasının Prezidenti Ursula fon der Leyen deyib. "İstənilən etibarlı və davamlı sülh planı ilk növbədə qətlləri dayandırmalı və müharibəyə son qoymalı, eyni zamanda gələcək münaqişə üçün toxum səpməməlidir. Biz ədalətli, davamlı sülh və Ukraynanın suverenliyi üçün zəruri olan əsas elementlər barədə razılığa gəlmişik. Birincisi, sərhədlər güc yolu ilə dəyişdirilə bilməz. İkincisi, suveren bir millət olaraq Ukraynanın silahlı qüvvələrinə ölkəni gələcək hücumlara qarşı həssas edəcək və bununla da Avropa təhlükəsizliyini pozacaq məhdudiyyətlər qoyula bilməz. Üçüncüsü, Ukrayna üçün sülhün təmin edilməsində Avropa Birliyinin mərkəzi rolu tam şəkildə əks olunmalıdır. Ukrayna öz taleyini seçmək azadlığına və suveren hüququna malik olmalıdır. Onlar Avropa taleyini seçiblər", - Leyen bildirib.

Ukrayna Prezidenti Vladimir Zelenski və ABŞ Prezidenti Donald Tramp görüşənə qədər heç bir razılaşma olmayacaq. Sozcu.az xəbər verir ki, bu barədə “Röyters” Ağ Ev rəsmisinə istinadla məlumat yayıb. “Zelenski və Tramp görüş zamanı Ukrayna üçün sülh planını ilə bağlı yekun razılaşma əldə edəcək”, - məlumatda qeyd olunub.

ABŞ Prezidenti Donald Trampın sərvəti iki ayda 1,1 milyard dollar azalıb. Sozcu.az xəbər verir ki, bu barədə "Forbes" məlumat yayıb. “Onun sentyabrda 7,3 milyard dollar olan sərvəti noyabrın sonunda 6,2 milyard dollara düşüb”, - məlumatda qeyd olunub. Buna səbəb ABŞ prezidentinin “Tramp Media” texnologiya şirkətinin səhmlərinin dəyərdən düşməsi olub. Son üç ayda şirkətin NASDAQ birjasında dəyəri 42 faiz ucuzlaşıb.

Avropa Birliyi, Böyük Britaniya, Almaniya və Fransadan olan nümayəndələr ABŞ-ın Ukraynadakı münaqişənin həlli planına dair İsveçrədə keçiriləcək məsləhətləşmələrdə iştirak edəcəklər. Sozcu.az xəbər verir ki, bu barədə “Politiko” məlumat yayıb. "Avropa Birliyi və Böyük Britaniya danışıqlarda iştirak edəcək. Fransa və Almaniyadan yüksək səviyyəli təhlükəsizlik rəsmiləri də İsveçrəyə gedəcək", - nəşr bildirib. Qeyd edək ki, Ukraynanın nümayəndə heyəti ABŞ Prezidenti Donald Trampın təklif etdiyi sülh planını müzakirə etmək məqsədilə İsveçrəyə gedib.

Rusiyanın 26 hərbçisi Kupyanskda mühasirəyə düşərək məhv edilib. Sozcu.az xəbər verir ki, bu barədə Rusiyanın “Kremlyovskaya Tabakerka” Teleqram kanalı Müdafiə Nazirliyindəki mənbələrə istinadla məlumat yayıb. Məlumata görə, hadisə Rusiya Silahlı Qüvvələrinin Baş Qərargah rəisi Valeri Gerasimovun Kupyanskın tamamilə ələ keçirilməsi barədə Prezident Vladimir Putinə məruzəsindən sonra baş verib. “Bir neçə qrup halında hərəkət edən əsgərlər şəhərdə artıq düşmən qalmadığını düşünərək, lazımi təhlükəsizlik tədbirlərini görmədilər və pusquya düşdülər. 26 nəfər öldürüldü”, - məlumatda qeyd olunub.

Dünən Mingəçevirdə şagirdin ölümü ilə nəticələnən hadisə haqda yeni təfərrüat məlum olub. Sozcu.az Teleqraf-a istinadla xəbər verir ki, bıçaqlanaraq qətlə yetirilən 2008-ci il təvəllüdlü Elman Etibar oğlu Sarıyev əvvəllər şəhərin 1 saylı orta məktəbində təhsil alıb. O, 10-cu sinifdən etibarən 17 saylı orta məktəbə köçürülüb. Elman ailədə iki qardaşdan biri olub. Hadisəni törətməkdə şübhəli bilinən Cavidan Əliyev isə 6 saylı orta məktəbin 9-cu sinif şagirdidir. Onun anasının müəllimə olduğu bildirilir. Hadisənin başvermə səbəbi ilə bağlı müxtəlif versiyalar səsləndirilir. İlkin məlumatlara görə, hadisədən bir qədər əvvəl tərəflərin çayxanada bir yerdə olduqları deyilir.

Avropa artıq Trampın sülh planına əks təkliflərini hazırlayıb. Sozcu.az xəbər verir ki, bu barədə “Vaşinqton Post” nəşri məlumat yayıb. Nəşrin məlumatına görə, avropalılar Cenevrəyə 3 əsas maddə ilə yollanıblar: 1. Ukrayna Silahlı Qüvvələrinə məhdudiyyət qoyulmayacaq. 2. Ukrayna Zaporojye AES və Kaxovka bəndi üzərində nəzarəti, eləcə də Dnepr çayı boyunca maneəsiz keçidi və Kinburn burnu üzərində nəzarəti bərpa edəcək. 3. Digər ərazi mübahisələrinə atəşkəsdən sonra baxılacaq. Qeyd edək ki, ABŞ və Ukraynanın İsveçrədə sülh planı ilə bağlı müzakirələrində avropalıların da iştirak edəcəyi bildirilir.

Ordubad rayonunda bədbəxt hadisə baş verib. Sozcu.az xəbər verir ki, Dizə kənd sakini, 1964-cü il təvəllüdlü Ələkbərova Leyla Filman qızı hovuza düşərək dünyasını dəyişib. Faktla bağlı Ordubad Rayon Prokurorluğunda araşdırma aparılır.

Braziliyanın sabiq prezidenti Jair Bolsonaro federal polis tərəfindən evində həbs edilib. Sozcu.az xəbər verir ki, bu barədə xarici mətbuat məlumat yayıb. Bildirilib ki, həbs Ali Federal Məhkəmə tərəfindən sanksiyalaşdırılıb və qabaqlayıcı xarakter daşıyır. Qeyd edək ki, dövlət çevrilişi işi üzrə 27 il müddətinə azadlıqdan məhrum edilmiş keçmiş prezident buna qədər şərti azadlıqda – ev dustaqlığında idi.

Hazırda ev dustaqlığında saxlanılan Prezident Administrasiyasının sabiq rəhbəri Ramiz Mehdiyevin ötən gecə səhhəti pisləşib və təcili tibbi yardım çağırılıb. Sozcu.az Gununsesi.info-ya istinadla xəbər verir ki, dövlətin Təcili Tibbi Yardım Xidmətinə etibar etməyən Ramiz Mehdiyevin ailəsi özəl klinikaların birindən həkim briqadası çağırıb. İlkin tibbi yardım göstəriləndən sonra Mehdiyevin səhhəti qaydasına düşüb. Bildirilib ki, Ramiz Mehdiyev tənəffüs yollarındakı problemlərdən əziyyət çəkir. Qeyd edək ki, R. Mehdiyev Dövlət Təhlükəsizliyi Xidmətinin (DTX) İstintaq Baş İdarəsində cinayət məsuliyyətinə cəlb olunub. Onun barəsində ev dustaqlığı qətimkan tədbiri seçilib. R.Mehdiyev dövlət çevrilişinə cəhddə ittiham olunur.

Bir neçə ay əvvəl bağlanan Azadlıq Partiyasının sədri Əhməd Oruc vəfat edib. Sozcu.az xəbər verir ki, bununla bağlı sosial şəbəkədə məlumat yayılıb. Qeyd edək ki, bir neçə gün öncə Əhməd Oruc insult keçirərək xəstəxanaya yerləşdirilmişdi.

Xəbər verdiyimiz kimi, noyabrın 21-də paytaxtın Binəqədi rayonu, Xırdalan–Binəqədi şossesində yerləşən “Lake Hotel”in işçiləri — 1997-ci il təvəllüdlü Cavidan Muradlı, 2005-ci il təvəllüdlü Emil Quliyev, 2006-cı il təvəllüdlü Eltac Əliyev və 2007-ci il təvəllüdlü Əkbər Zeynalovun iş görən zaman elektrik cərəyanı vurması nəticəsində ölmələri faktına görə Binəqədi rayon prokurorluğunda Cinayət Məcəlləsinin 162.3-cü (əmək mühafizəsi qaydalarının pozulması ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb. Sozcu.az xəbər verir ki, bu barədə Baş Prokurorluq məlumat yayıb. Bildirilib ki, cinayət işi üzrə prokuror-kriminalist və müvafiq ekspertin iştirakı ilə hadisə yerinin ətraflı müayinəsi aparılaraq maddi sübutlar toplanıb, çoxsaylı istintaq hərəkətləri yerinə yetirilib, habelə ekspertizalar təyin olunub. Toplanmış sübutlarla “Lake Hotel”in icarədarı Ağasif Verdiyev tərəfindən elektrik şəbəkəsinin mühafizə zonası ərazisində planlaşdırılan və həyata keçirilən işlər zamanı Azərbaycan Respublikası Nazirlər Kabinetinin 16 may 2024-cü il tarixli Qərarı ilə təsdiq olunmuş “Elektrik şəbəkələrinin mühafizə zonalarının ölçüləri və həmin ərazilərdə təsərrüfat işlərinin aparılmasına dair Tələblər”ə və digər normativ aktlara zidd olaraq texniki təhlükəsizlik və əmək mühafizəsi qaydalarını pozmasına əsaslı şübhələr müəyyən edilib. Ağasif Verdiyev noyabrın 21-də cinayət işi üzrə rayon prokurorluğu tərəfindən şübhəli şəxs qismində tutulub. Noyabrın 22-də A.Verdiyev Cinayət Məcəlləsinin 162.3-cü maddəsi ilə təqsirləndirilən şəxs qismində cəlb olunaraq, ona həmin maddədə nəzərdə tutulan ittiham elan olunub. İstintaq orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında A.Verdiyevin barəsində Bakı şəhəri Binəqədi Rayon Məhkəməsinin qərarı ilə həbs qətimkan tədbiri seçilib. Hazırda cinayət işi üzrə ibtidai istintaq davam edir və baş vermiş hadisədə təqsiri olan bütün şəxslərin müəyyən edilərək məsuliyyətə cəlb olunmaları istiqamətində zəruri istintaq və əməliyyat-axtarış tədbirləri həyata keçirilir.

Ukrayna və onun sülh danışıqları aparan tərəfdaşları arasında məsləhətləşmələr yaxın günlərdə keçiriləcək. Sozcu.az xəbər verir ki, bunu Ukrayna Prezidenti Vladimir Zelenski deyib. "Mən Ukrayna nümayəndə heyətinin tərkibi haqqında fərman imzaladım və bütün müvafiq direktivləri təsdiqlədim. Nümayəndələrimiz Ukraynanın milli maraqlarını necə müdafiə etməli olduğunu və Rusiyanın keçmişdə xalqımıza və digər xalqlara qarşı cinayətlər törətdiyi kimi, Ukraynaya üçüncü işğalın, növbəti hücumunun qarşısını almaq üçün dəqiq nəyə ehtiyac olduğunu bilirlər", - deyə Zelenski bildirib. Qeyd edək ki, bu gün Kiyev ABŞ-ın təklif etdiyi plana dair danışıqlarda iştirak edəcək nümayəndə heyətinin tərkibini təsdiqləyib.

“Bir daha qeyd etmək istəyirəm ki, müzakirə mədəniyyəti hər bir işin təkmilləşməsində mühüm rol oynayır. İstənilən iş müzakirə edilərsə, daha təkmil olar. Çünki atalarımızın dediyi kimi, ağıl ağıldan üstündür. Xüsusilə ictimai maraq və əhəmiyyət kəsb edən məsələlərin ictimai müzakirəsi Elm və Təhsil Nazirliyi olaraq hər zaman dəstəklədiyimiz bir yanaşmadır. Amma təəssüf ki, hələ də bu sahədəki xoş niyyətimiz arzuedilən nəticələr vermir”. Sozcu.az xəbər verir ki, bu fikirləri Elm və Təhsil Nazirliyi Emin Əmrullayev bildirib. O qeyd edib ki, son günlər geniş müzakirələrə səbəb olan təklif edilmiş islahatın əsas mahiyyəti ondan ibarətdir ki, 2027-ci ildən başlayaraq 2030-cu ilədək mərhələli şəkildə müəllimlərin maaşı saathesabı əsasda hesablanmaqla yanaşı, yüksək nəticə göstərmiş müəllimlərə könüllü əsasda ölkə üzrə orta əməkhaqqından 2 dəfə çox əməkhaqqı təklif edilməklə həftədə 30-36 saatlıq tamştat əsasında da əməkhaqqı hesablansın. E.Əmrullayev müzakirələr zamanı əsas problem hesab etdiyi 3 məqamı xüsusi vurğulayıb: “Əvvəla, ən təəccüb doğuran və məntiqsiz görünən məqam odur ki, təklif olunan fikirlər bir kənarda qalır, cəmiyyət isə məsələyə heç bir aidiyyəti olmayan (və ya mövzudan xəbərsiz) şəxslərin uydurduğu və ya təhrif etdiyi fikirləri müzakirə etməyə başlayır. Məsələn, “müəllimlərin əməkhaqqı sistemi saathesabı sistemdən tamştatlı sistemə keçməlidir” fikri “müəllimlər axşam saat 6-ya qədər işdə qalacaqlar” fikri kimi təhrif olunur və bütün müzakirələr bu təhrif edilmiş (və bayağı) fikir əsasında aparılır. Buna görə də xahiş edirik ki, təklif nədirsə, onu müzakirə edək, təhrif edilmiş fikirlər Elm və Təhsil Nazirliyinə aid olmadığı üçün müzakirə etməyək. İkinci məsələ isə müzakirələr zamanı əsas fikri detallardan ayıra bilməməkdir. Əsas fikir yuxarıda qeyd edilib. Əgər bu yaxşı fikirdirsə və məqbul hesab edilirsə, detalları sonra da müzakirə etmək olar. Məsələn, “bu islahatı etmək üçün infrastruktur yoxdur” və ya “uzaq məsafədən müəllim necə işə gəlib gedəcək” kimi məqamlar əsas fikir yox, detaldır. Əgər əsas fikir bəyənilirsə, bu halda detalları da müzakirə etmək olar. Yox, əgər əsas fikir səhvdirsə, onda detalları müzakirə etmək mənasızdır. Digər məqam isə hörmətli media nümayəndələrimizin təqdim edilən məlumatların içərisindən detalları ayırıb neqativ xəbər kimi verməsi həvəsidir. Dünən İctimai Televiziyada bu islahat haqqında ətraflı məlumat verdik. 1 saata yaxın təqdimat yerli media orqanlarının birində “210 manat maaş alan müəllimlərin sayı AÇIQLANDI” başlığı ilə təqdim edildi. Halbuki bu verilişdə həm də 1589 manat alan müəllimlərin sayı açıqlanmışdı və bu say 210 manat maaş alan müəllimlərin sayından ən azı 4 dəfə çoxdur. Hörmətli media mənsublarımız hər hansı səbəbdən bu fərqi ya görmədilər, ya da görsələr də paylaşmaq istəmədilər. Bu, sadəcə bir misaldır, bu cür neqativə köklənmiş davranışın arxasında hansı sosial-psixoloji səbəblərin dayandığını isə yəqin ki, sahə mütəxəssisləri araşdırmalıdırlar. Bu məqamlara toxunmağı vacib bildim, təbii ki, ictimai müzakirə aparmaq özü bir bacarıq tələb edir. Zamanla inanıram ki, bu istiqamətdə də müsbət irəliləyiş olacaq. Əsas odur ki, nikbin olmaq lazımdır – bu gün təhsil sistemində mənfidən daha çox müsbət proseslər baş verir. Hər birinizə uğurlar arzulayıram!”

Şair, qəzəlxan Arif Buzovnalı vəfat edib. Sozcu.az xəbər verir ki, bununla bağlı Apa-ya mərhumun yaxınları məlumat verib. Bildirilib ki, o bu gün yaşadığı evdə dünyasını dəyişib. Qeyd edək ki, A.Buzovnalının 53 yaşı var idi.

Noyabrın 21-də Yasamal rayonu, M.Seyidov küçəsi ərazisində yerləşən yaşayış binasında baş verən yanğın hadisəsi səbəbilə Kliniki Tibbi Mərkəzin Təcili tibbi yardım şöbəsinə tüstüdən zəhərlənmə diaqnozu ilə hospitalizasiya olunan 27 nəfərdən 20-nə (13-ü kişi, 7-si qadın) zəruri tibbi xidmətlər göstərilib. Bu barədə Sozcu.az-a Kliniki Tibbi Mərkəzdən məlumat verilib. Qeyd edilib ki, vəziyyəti qənaətbəxş qiymətləndirilən şəxslər ambulator müalicə üçün evə buraxılıblar. Bildirilir ki, hazırda 7 nəfərin (5-i qadın, 2-si kişi) müalicəsi Toksikologiya şöbəsində davam etdirilir. Onlardan 6 nəfərin vəziyyəti orta ağır, 1 nəfər azyaşlının vəziyyəti isə ağır olaraq qiymətləndirilir.

ABŞ Prezidenti Donald Tramp Nyu-Yorkun seçilmiş meri Zöhran Mamdani ilə görüşüb. Sozcu.az-ın məlumatına görə, Tramp bildirib ki, Ağ Evdə baş tutan görüş onun üçün “xoş sürpriz” olub. Tramp buna qədər Mamdanini sərt tənqid etsə də, iki tərəfin bir çox əsas məsələlərdə mövqelərinin üst-üstə düşdüyünü deyib. “Kriminalın olmamasını, mənzillərin tikilməsini və kirayələrin azalmasını istəyir. Bunların hamısı ilə razıyam”, - ABŞ Prezidenti qeyd edib. Tramp, həmçinin Mamdani ilə “birlikdə işləyəcəyini” vurğulayıb.  Donald Tramp daha əvvəl Mamdani mer seçilərsə Nyu-Yorkun maliyyələşdirilməsini məhdudlaşdırmaqla hədələsə də, indi bu fikrindən daşındığını deyib: “Mən ona kömək edəcəyəm, zərər vurmayacağam. Nyu-Yorkun böyük olmasını istəyirəm”. 34 yaşlı Zöhran Mamdani Nyu-York tarixində ilk müsəlman mer və son yüz ildə şəhərə rəhbərlik etmiş ən gənc siyasətçi olub. Onun seçki qələbəsini Tramp “kiçik suverenlik itkisi” kimi qiymətləndirmiş, həmçinin Mamdanini “yüz faiz kommunist dəlisi” adlandırmışdı.

Azərbaycanda dövlət aparatının böyüməsi və idarəetmə mexanizminin səmərəliliyi son illərdə ən çox müzakirə edilən məsələlərdəndir. Dövlət idarəçiliyinin yenilənməsi və müasirləşdirilməsi artıq dövrün obyektiv tələbidir. Ötən illərdə bu istiqamətdə xeyli işlər həyata keçirilib və optimallaşdırma nəticəsində həm dövlətin yükü azalıb, həm də lazımsız xərclərdən qənaət edilib. Ancaq sürətlə dəyişən iqtisadi-regional mühit, rəqəmsal transformasiya və dövlət xidmətlərinə artan gözləntilər idarəetmə mexanizmlərinin daha yeni mərhələyə keçməsini zəruri edir. Müasir dövlət modeli çevik qərarvermə, səmərəli resurs bölüşdürməsi və vətəndaş məmnunluğunu prioritetə alan struktur tələb edir. Hazırkı idarəetmə sistemində müxtəlif nazirliklər, komitələr, agentliklər və publik hüquqi şəxslər geniş spektrdə fəaliyyət göstərir. Bu qurumlar uzun illər ərzində formalaşmış inzibati mexanizmin tərkib hissəsinə çevrilib. Lakin qlobal təcrübə göstərir ki, dövlət aparatının yığcamlaşdırılması, paralel funksiyaların optimallaşdırılması və strukturun sadələşdirilməsi idarəçiliyin daha çevik olmasına, qərarların daha operativ şəkildə icrasına şərait yaradır. Qeyd edək ki, hazırda ölkədə 17 nazirlik fəaliyyət göstərir. Bundan başqa 7 komitə, bir neçə dövlət xidməti, agentlik, xidmətlər və onlarla publik hüquqi şəxs var. Dövlət qurumlarının fəaliyyət istiqamətlərinə yenidən baxılması, funksional yanaşmanın gücləndirilməsi və strukturun dövrün çağırışlarına uyğunlaşdırılması islahat gündəminin əsas mövzularından biridir. Təsadüfi deyil ki, ötən aylarda mətbuatda da islahatların başlayacağı, bir sıra qurumların ləğv ediləcəyi və birləşdiriləcəyi barədə xəbərlər yayılıb. Təklif olunan islahatlardan biri Dövlət Gömrük Komitəsinin və Dövlət Vergi Xidmətinin Maliyyə Nazirliyinin tərkibində birləşdirilməsidir. Bu praktika dünyanın bir çox ölkəsində tətbiq olunan müasir fiskal modeldir. Bu yanaşma gəlirlərin vahid mərkəzdən idarə edilməsinə, vergi və gömrük məlumat bazalarının inteqrasiyasına və büdcə planlamasının daha dəqiq aparılmasına imkan verir. Eyni zamanda, sahibkarların dövlətlə işləməsini sadələşdirir, paralel inzibati prosedurları aradan qaldırır və fiskal nəzarətin şəffaflığını artırır. Bu birləşmə, ümumilikdə, dövlətin gəlir siyasətini daha çevik və səmərəli edə bilər. Fövqəladə Hallar Nazirliyinin strukturunun optimallaşdırılaraq icra yönümlü dövlət xidmətinə çevrilməsi ilə bağlı təkliflər də son illər müzakirələrdə tez-tez səslənir. Ekspertlər bildirirlər ki, qurumun əsas funksiyaları, yəni yanğınsöndürmə, axtarış-xilasetmə, fövqəladə halların idarə olunması daha çox operativ icra xarakteri daşıdığından, nazirlik statusunun saxlanması əlavə inzibati yük yaradır. Bu model xidmətin çevikliyini artıra, qərarların qəbulunu sürətləndirə və resursların daha məqsədyönlü istifadəsinə şərait yarada bilər. Səhiyyə Nazirliyinin, səhiyyə ilə bağlı digər dövlət qurumlarının sosial blok üzrə vahid idarəetmə mexanizminin formalaşdırılması məqsədilə Əmək və Əhalinin Sosial Müdafiə Nazirliyinə birləşdirilməsi və yeni ad altında fəaliyyət göstərməsi ilə bağlı fikirlər də son dövrlər müzakirələrdə geniş yer tutur. Sosial müdafiə, səhiyyə xidmətləri və həssas qruplarla bağlı siyasətin eyni mərkəzdən idarə olunması daha sistemli yanaşma yarada, paralel icra mexanizmlərini azaltmaqla vətəndaş müraciətlərini sadələşdirə bilər. Bu birləşmə “vahid sosial siyasət” modelinin qurulmasına və resursların daha effektiv bölüşdürülməsinə imkan verə bilər. Eyni yanaşma mədəniyyət və idman sahələrində də keçərlidir. Mədəniyyət, Gənclər və İdman Nazirliklərinin bir çətir altında birləşdirilməsi həm büdcə xərclərini azalda, həm də idarəçilik funksiyalarını asanlaşdıra bilər. Energetika və İqtisadiyyat nazirliklərinin birləşdirilməsi iqtisadi siyasətin vahid strateji mərkəzdən idarə olunmasını təmin edə, Kənd Təsərrüfatı və Ekologiya və Təbii Sərvətlər nazirliklərinin birləşdirilməsi isə torpaq, su ehtiyatları, meşə fondu, təbiətdən istifadə kimi sahələrdə daha balanslı idarəetmə yarada bilər. Hazırda Azərbaycan Avtomobil Yolları Dövlət Agentliyinin AZCON-nun tərkibində olmaması ciddi maraq və heyrət doğuran məsələdir. Bu qurumun niyə Rəqəmsal İnkişaf və Nəqliyyat Nazirliyinin tabeliyində deyil, sualına cavab vermək asan deyil. Dövlət komitələri, agentliklərin perspektivdə gözlənilən islahatların hədəfində olması isə qaçılmaz görünür. Müzakirə olunan struktur dəyişiklikləri dövlət aparatının daha müasir, çevik və funksional modelə uyğunlaşdırılması istiqamətində atıla biləcək addımlar hesab edilir. Bu təkliflər əsasən Azərbaycanda nazirliklərin sayı 13-ə enə bilər. Qurumların birləşdirilməsi, paralel funksiyaların azaldılması və idarəetmənin sadələşdirilməsi həm resursların daha səmərəli istifadəsinə, həm də xidmətlərin və qərarvermənin sürətlənməsinə imkan yarada bilər. Bu cür yanaşma gələcəkdə dövlət idarəçiliyinin modern standartlara uyğun inkişafı üçün yeni imkanlar açır və idarəetmədə daha sistemli yanaşmanın formalaşmasına şərait yaradır. İstəsək də, istəməsək də dünya boyunca yaranan maliyyə böhranı, yeni yanaşmalar bu islahatları qaçılmaz edəcək.MODERN)

Azərbaycanda təhsil sisteminin mahiyyəti və onun gələcək real məqsədləri ilə bağlı geniş müzakirələr aparılmaqda davam edir. Elm və təhsil naziri Emin Əmrullayevin ötən gün “Diqqət mərkəzi” verilişində səsləndirdiyi fikirlər bu mövzunu yenidən gündəmə gətirib. Nazir bildirib ki, təhsilin əsas məqsədi uşaqları yalnız ali məktəbə qəbul imtahanına hazırlamaqdan ibarət olmamalıdır. Onun sözlərinə görə, hazırkı təhsil modelimiz çox vaxt “yarış” üzərində qurulur və bu da repetitorluğun geniş yayılmasına gətirib çıxarır. “Yeni yanaşmanın hədəfi isə məktəbin özündə elə müəllimlərin dərsdən sonra şagirdlərlə çalışmasını təmin etməklə öyrənməni mərkəzə çəkmək, əlavə hazırlıq asılılığını azaltmaqdır. Bu islahatların əsas ideyası odur ki, dövlət müəlliminə etibar etdiyi şagirdin öyrənməsi birbaşa məktəbdə təmin olunsun və təhsilin dəyəri yalnız qəbul nəticələri ilə ölçülməsin”,- deyə nazir qeyd edib. Modern.az-a açıqlamasında təhsil eksperti Elçin Əfəndi bildirib ki, artıq demək olar, bu istiqamətdə pilot layihə olaraq bəzi təhsil müəssisələrində prosesə başlanılıb: “Burada başlıca məqsəd yuxarı sinif şagirdlərinin, yəni 10-11-ci siniflərin vahid bir məktəbdə cəmləşdirilərək onların hazırlıq prosesinin formalaşdırılması və həyata keçirilməsidir. Sözügedən modelə əsasən, şagirdlər həm ümumi təhsil proqramı üzrə dərslərini keçirlər, eləcə də ali təhsil istiqamətində qəbul imtahanlarına sistemli şəkildə hazırlaşa bilməsinə imkan verəcək”. Ekspertin sözlərinə görə, məsələn, bir qəsəbə və ya rayonda 4-5 məktəb varsa, onlardan biri məhz bu məqsədlə seçilir: “Həmin məktəbdə yalnız 10-11-ci sinif şagirdləri tədrisə cəlb olunur və digər məktəblərin yuxarı sinif şagirdləri də ora mərkəzləşdirilir. Qalan 3-4 məktəbdə isə ümumitəhsil pilləsi üzrə, o cümlədən ibtidai təhsil tədris olunur. Xüsusi ayrılmış məktəbdə isə müəllimlər tərəfindən 10-11-ci siniflərin tədris proqramına daxil olan fənlərlə yanaşı, abituriyentlərin ali məktəblərə hazırlığı da həyata keçirilir. Bütün bunlar dövlət büdcəsi hesabına qarşılanır”. E.Əfəndi onu da əlavə edib ki, nazirin qeyd etdiyi kimi, növbəti illərdə bu formatda müəyyən dəyişikliklərin olması da mümkündür: “Əsas məqsəd repetitorluğun azalmasıdır. Çünki əgər hər hansı müəllim təhsil müəssisəsinə yalnız şagird toplamaq niyyəti ilə, 5-6 saat dərs demək üçün gəlirsə, bu, peşəkarlıqla uzlaşmır. Belə müəllimlər prosessdən kənarlaşdırılmalı, onlar repetitor fəaliyyəti ilə məşğul olmaq istəyirlərsə, bunu məktəbdən kənarda həyata keçirməlidirlər. Təhsil müəssisələrində isə məhz peşəsini sevən, müəllimliyə hörmətlə yanaşan, auditoriyada şagirdlərin öyrənməsinə həqiqi maraq göstərən şəxslər çalışmalıdırlar. Qarşıdakı illərdə atılacaq addımlar da bu məqsədə xidmət edəcək”. O, həmçinin vurğulayıb ki, effektiv nəticələrə gəldikdə, əlbəttə ki, müsbət nəticələr olacaq: “Əvvəla, valideynlər əlavə maliyyə yükündən azad olacaqlar, çünki hazırda repetitorlara ayda minimum 400-500 manat, maksimum isə 1500-2000 manatadək ödəniş olunur. Bu hazırlıq prosesinin dövlət tərəfindən məktəbdə həyata keçirilməsi həm ailələr üçün böyük dəstək olacaq, həm də abituriyentlər seçdikləri istiqamətlər üzrə daha sistemli şəkildə hazırlaşacaqlar. Bu da məktəb mühitinə və tədrisin keyfiyyətinə müsbət təsir göstərəcək”,- deyə ekspert qeyd edib.

Vəhdət Partiyasının MNTK-sı Cümşüd Nuriyevin partiyadan xaric edilməsi barədə qərar qəbul edib Vəhdət Partiyasının Mərkəzi Nəzarət-Təftiş Komissiyasına (MNTK) Partiyanın Baş Məclisinin sədri Tahir Kərimlinin rəsmi müraciəti daxil olub. Müraciətdə özünü sədr müşaviri kimi təqdim edən Cümşüd Qurban oğlu Nuriyevin 20 noyabr 2025-ci il tarixində sosial şəbəkələrdə Tahir Kərimlini ağır şəkildə təhqir etməsi ilə bağlı tədbir görülməsi xahiş edilib. Komissiya müraciətə baxaraq müəyyən edib ki, Cümşüd Nuriyev Partiya rəhbərliyinə qarşı etikadan kənar ifadələr işlətməklə və paylaşdığı səs yazısını qəsdən mənfi şəkildə təqdim etməklə Vəhdət Partiyasının Nizamnaməsini ciddi şəkildə pozub. Həmçinin qeyd olunub ki, onun müraciətdən 12 gün sonra bu addımı atması məqsədli xarakter daşıyır. MNTK yekdilliklə qərara gəlib ki, Partiyaya yeni qəbul edilmiş Cümşüd Nuriyevin fəaliyyəti dağıdıcı xarakter daşıdığı üçün o, Vəhdət Partiyasının Nizamnaməsinin müvafiq maddələrinə əsasən Partiya sıralarında qala bilməz. Komissiyanın qərarına əsasən: 1. Cümşüd Qurban oğlu Nuriyev Vəhdət Partiyasının üzvlüyündən xaric edilib.  2. Qərar icra üçün Partiyanın Baş Məclisinə, məlumat üçün Partiya sədrinə göndərilib. 3. Cümşüd Nuriyevin qayda pozuntusunu Partiyadan kənar məkanda törətdiyi nəzərə alınaraq qərarın həmin məkanda dərc olunması qərara alınıb.  Qərar MNTK sədri Ehtibar Səmədov və MNTK katibi Qərinə Balayeva tərəfindən 21 noyabr 2025-ci ildə imzalanıb.

Sanksiyalar çox güclüdür, Rusiya neftinin satışını ciddi şəkildə çətinləşdirəcək. Sozcu.az xəbər verir ki, bunu ABŞ Prezidenti Donald Tramp Rusiyaya sanksiyalar tətbiq edəcəyini açıqlayarkən deyib. O, sanksiyaların çox yaxın vaxtda qüvvəyə minəcəyini qeyd edib.