Müsavat Partiyası Məclisinin sədri Arif Hacılı Zaqatala və ətraf rayonlarda mövcud sosial-iqtisadi vəziyyətlə bağlı fikirlərini bölüşüb. O, bildirib ki, ölkədə təmir olunmamış yeganə magistral yol hələ ötən əsrin 60-cı illərində salınmış Şəki–Zaqatala yoludur.  “Maqistral olmaqdan əlavə, bu yolun üzərində irili-xırdalı çoxsaylı kəndlər, həmçinin Əliabad qəsəbəsi yerləşir. Xüsusilə 2012-ci il zəlzələsindən sonra yol çox bərbad vəziyyətə düşüb”, – deyə Arif Hacılı qeyd edib. Müsavat Məclisinin sədrinin sözlərinə görə, Alazan (Qanıxçay) vadisi boyunca yerləşən kəndlərin çoxuna hələ də qaz xətti çəkilməyib, minlərlə insan qışın gəlişini narahatlıqla gözləyir.  “Zaqatala şəhərində yol infrastrukturu düzgün qurulmadığından, mərkəzi küçələrdə avtomobil sıxlığı və tıxaclar yaranır. Yolsuzluq, işsizlik, rüşvət və korrupsiya da bölgə əhalisini ciddi narahat edir”, – Hacılı əlavə edib. O vurğulayıb ki, son 15 ildə Zaqatalada hər hansı inkişaf müşahidə olunmur. Rayonun abadlıq işləri park və meydanlarda ot örtüyünün daşla əvəz olunması ilə məhdudlaşır:  “Rayonda yeni istehsal müəssisələri tikilmir, gənclər üçün iş yerləri açılmır. Əhalinin əsas məşğuliyyəti çayxana və kafe fəaliyyəti ilə məhdudlaşıb.” Siyasətçi qeyd edib ki, icra başçıları həbs edilən Qax və Balakən rayonlarının problemləri ilə müqayisədə, Zaqatala rayonunun problemləri daha ciddi və daha dərindir. Sozcu.az 

Ukrayna və müttəfiqləri birgə sülh planı hazırlayırlar. Bu, vahid sənəd olacaq və ayrı-ayrı ölkələrdən alternativ "planlar" yoxdur. Sozcu.az xəbər verir ki, bu barədə Ukrayna prezident administrasiyasının rəhbəri Andrey Yermak RBC-Ukrayna müxbirinin sualına cavab olaraq bildirib. "Media hazırda ABŞ-ın, Aİ-nin və ayrı-ayrı ölkələrin birinin olduğunu deyən alternativ "planlar" haqqında məlumatlarla doludur. Aydınlaşdırmaq istəyirəm ki, bu, belə deyil. Seçdiyimiz fərqli planlar yoxdur. Formalaşdırma üzərində işçi müzakirələr aparılır, bütün tərəfdaşlar daim əlaqə saxlayırlar", - Yermak deyib. Rəsmi şəxsin vurğuladığı kimi, nəticədə Ukrayna və tərəfdaşları tərəfindən birgə hazırlanacaq və Ukraynanın maraqlarını nəzərə alacaq vahid sənəd olacaq. "Biz rəqabətli təşəbbüslərdən danışmırıq. Söhbət Ukrayna, Aİ, ABŞ və digər tərəfdaşlarla sinerji tapmaqdan gedir. Əlbəttə ki, ABŞ-ın iştirakı vacibdir", - Yermak qeyd edib. “Prezidentlər Zelenski və Tramp Avropa liderləri ilə birlikdə istənilən danışıqların atəşkəs və təmas xətti boyunca nizamlanma ilə başlamalı olduğuna razıdırlar. Bütün tərəfdaşlar diplomatiyanın uğur qazanması üçün atəşin dayandırılmalı olduğuna inanırlar. Biz Prezident Trampın sülhməramlı liderliyini yüksək qiymətləndiririk və inanırıq ki, Ukraynaya etibarlı təhlükəsizlik zəmanətləri ilə təmin edilən ədalətli, davamlı bir sülhə nail olmağa kömək edə biləcək şəxs məhz odur”, - deyə prezident aparatının rəhbəri əlavə edib.

“Qarabağ” UEFA Çempionlar Liqasının 4-cü turunda İngiltərə “Çelsi”sinə qarşı Bakıda keçiriləcək oyunu üçün bilet satışı davam edir. Sozcu.az xəbər verir ki, Ağdam klubunun mətbuat xidməti 27 250 bilet satıldığını deyib. Klubdan qeyd edilib ki, hazırda məhdud sayda biletlər qalıb. Bunları da yalnız iTicket.az-ın mobil tətbiqi və saytı üzərindən əldə etmək olar. Biletlərin qiyməti 10, 15, 25, 35, 40, 50, 75, VIP sektorlar üçün 200, 250, 300 və 400, VVIP sektorlara 1000 AZN təşkil edir. Xatırladaq ki, “Qarabağ” – “Çelsi” oyunu noyabrın 5-də Tofiq Bəhramov adına Respublika Stadionunda keçiriləcək və saat 21:45-də start götürəcək.

Salyanda məktəblərin birində pulu itən müəllimin şagirdin çantasını yoxlaması barədə məlumat yayılıb. Məsələ ilə bağlı Şirvan-Salyan Regional Təhsil İdarəsi açıqlama yayıb. Bildirilib ki, xoşagəlməz hadisə Salyan şəhər Əliağa Kürçaylı adına 7 nömrəli Texniki və təbiət fənləri təmayüllü liseydə kimya müəllimi ilə 10-cu sinif şagirdi arasında baş verib. Qeyd edilib ki, müəllim çantasında olan pul vəsaitinin şagird tərəfindən götürüldüyünü ehtimal edərək onun pulqabısını yoxlayıb. Bundan xəbər tutan valideyn məktəbə gələrək etirazını bildirib. Bundan sonra təhsil müəssisəsinin rəhbərliyi tərəflərlə söhbət aparıb, bu cür halların birgə müzakirələrlə aradan qaldırılmasının vacibliyini diqqətə çatdırıb. “Təhsilverənlərin etik davranış qaydaları”nı pozduğuna, dərs prosesində buraxdığı nöqsana görə məktəbin Pedaqoji Şurasının 28.10.2025-ci il tarixində keçirilən iclasının qərarı əsasında müəllim barəsində intizam tənbeh tədbiri görülüb.

Akademik Mirməmməd Cavadzadə adına Respublika Kliniki Uroloji Xəstəxanasına direktor və direktor müavini təyin edilib. Sozcu.az xəbər verir ki, bununla bağlı TƏBİB-in İcraçı direktoru Vüqar Qurbanov müvafiq əmr imzalayıb. Əmrə əsasən, Respublika Klinik Uroloji Xəstəxanasına Pərviz Hacıyev rəhbərlik edəcək. Xəstəxananın direktor müavini - baş həkim vəzifəsinə isə Elçin Mustafayev təyin olunub. V.Qurbanov bu gün yeni direktor və baş həkimi kollektivə təqdim edib, müvafiq tapşırıq və tövsiyələrini verib. Qeyd edək ki, bundan öncə həmin xəstəxananın direktoru Fariz Babayev idi. O öz ərizəsi ilə işdən azad edilib.

Kolumbiya Prezidenti Qustavo Petronun Səudiyyə Ərəbistanına səfəri zamanı onun təyyarəsinə Kape Verde adalarında yanacaq doldurmağa icazə verilməyib. Sozcu.az xəbər verir ki, bu barədə Petro özünün X səhifəsində məlumat yayıb. Məlumata görə, səbəb ABŞ-ın Petroya qarşı tətbiq etdiyi sanksiyalardır. Onun “Boinq 737-700” təyyarəsi İspaniyanın hərbi bazasında - Madriddə yanacaq doldura bilib. Bu, İspaniya hökumətinin müdaxiləsindən sonra mümkün olub.

Ötən gün Dövlət Təhlükəsizlik Xidməti (DTX) tərəfindən keçirilən əməliyyat zamanı Balakən Rayon İcra Hakimiyyətinin başçısı İslam Rzayev saxlanılıb. Mətbuatda onunla yanaşı bir neçə şəxsin də saxlanıldığı bildirilir. Saxlanılan şəxslər arasında icra başçısının müavinləri, rayonun baş memarının da olduğu qeyd olunub. Sozcu.az xəbər verir ki, Modern.az hadisə ilə əlaqədar Balakən Rayonu İcra Hakimiyyəti ilə əlaqə saxlayıb. İcra başçısının köməkçisi Aydın Xoçbərov sualları cavablanıdırıb. O qeyd edib ki, başçının müavinləri, köməkçiləri və baş memar işlərinin başındadır. "Hər kəs öz işinin başındadır, Dövlət Təhlükəsizlik Xidmətinin (DTX) apardığı əməliyyatlar zamanı yalnız icra başçısı İslam Rzayev saxlanılıb”, açıqlamada qeyd olunub. Qeyd edək ki, icra başçısının birinci müavini Turan Dibirov, müavinləri Nəzakət Rüstəmova və Mehparə Nuriyevadır. Rayonun baş memarı isə Tahir Rəcəbovdur.

Ermənistan parlamentinin spikeri Alen Simonyan Rusiya və Belarusun “ittifaq dövləti”nə qoşulmaq ideyasını istehza ilə qarşılayıb. Sozcu.az xəbər verir ki, Simonyan jurnalistlərə açıqlamasında bildirib ki, ölkədə hakimiyyətin real siyasi rəqibləri yoxdur. “Elə insanlar var ki, yalnız təhqir yağdırırlar, amma heç nə təklif etmirlər. Onlar son vaxtlar sülh və ya ölkənin gələcəyi ilə bağlı nə təklif ediblər? Rusiya-Belarus ittifaq dövlətinə üzv olmaqdan başqa? (Gümrü meri Vardan Qukasyana eyham vurur - red.). Onların hansı siyasəti var?”, - Simonyan bildirib. Spiker, həmçinin vurğulayıb ki, qanun qarşısında məsuliyyət daşıyan şəxslər cəzasız qalmamalıdır: “Həbsdə olanlara gəlincə, biz əslində gecikmişik. Xalq “dəmir mandat” tələb edəndə, bu o demək idi ki, cinayət törədən, amma sonra namizədliyini irəli sürən şəxslər cəzasız qalmamalıdır”. Xatırladaq ki, oktyabrın 20-də hüquq-mühafizə orqanları Gümrü meriyasında axtarış aparıblar. Daha sonra məlum olub ki, şəhər meri Vardan Qukasyan və daha yeddi nəfər rüşvət almaqda ittiham edilərək saxlanılıb. Məhkəmə Qukasyanın barəsində iki aylıq həbs-qətimkan tədbiri seçib.

Eçmiədzində hərbi hissəsində keçirilən əməliyyat tədbirləri Ermənistan Antikorrupsiya Komitəsində açılmış cinayət işi çərçivəsində aparılır. Sozcu.az xəbər verir ki, bu barədə komitənin mətbuat xidməti məlumat yayıb. "Hərbi polisdə ehtimal edilən cinayətlə əlaqədar məlumat Antikorrupsiya Komitəsinə göndərilib və burada qanunla müəyyən edilmiş qaydada araşdırma başlanılıb", - deyə qurumdan bildirilib. Qeyd edək ki, bu hərbi hissə ilə bağlı cinayət işi daha əvvəl geniş ictimai əks-səda doğurub. Bu iş üzrə Ermənistan Silahlı Qüvvələri Baş Qərargah rəisinin sabiq müavini, general-leytenant Andranik Makaryana və bir sıra digər hərbçilərə qarşı ittihamlar irəli sürülüb. *** 11:51 Ermənistan Milli Təhlükəsizlik Xidmətinin əməkdaşları gecə saatlarında Eçmiədzində hərbi hissəyə basqın ediblər. Sozcu.az xəbər verir ki, bu barədə “Hraparak” məlumat yayıb. Məlumata görə, saxlanılanlar arasında yüksək rütbəli hərbçilər də var. Əməliyyatın səbəbi barədə heç bir məlumat verilməyib.

Bakı Hərbi Məhkəməsində Ermənistan Respublikası vətəndaşlarının ittiham olunduğu cinayət işi üzrə məhkəmə prosesi sənədlərin elan olunması ilə davam etdirilir. Sozcu.az xəbər verir ki, təqsirləndirilən şəxs Levon Mnatsakanyanın vəkili Oqtay Mədətov məhkəməyə müraciət edərək, fasilə zamanı müvəkkili ilə görüşmək istədiyini deyib. Hakim fasilədə bunun üçün şərait yaradılacağını bildirib. Təqsirləndirilən şəxs David Manukyan vəsatətlə çıxış edərək, ona qarşı irəli sürülmüş ittiham aktında təşkilatlanmış cinayətkar qrupun yaradılması ilə bağlı ittihamın cinayət işindən çıxarılmasını və ayrıca baxılmasını xahiş edib. D.Manukyanın vəkili Valeh Qurbanov vəsatəti müdafiə etdiyini deyib. İttiham tərəfi vəsatətə münasibət bildirib. Dövlət ittihamçısı Fuad Musayev qeyd edib ki, belə bir vəsatətin qaldırılması məhkəmə prosesinin hazırkı mərhələsinin predmeti deyil. Məhkəmə tərəflərin fikirlərini dinlədikdən sonra, yerində müşavirə keçirərək, vəsatətin əsassız olduğu üçün təmin edilmədiyini bildirib. Sonra Madat Babayanın vəkili Leyla Namazzadə vəsatətlə çıxış edərək, bəzi epizodların müvəkkilinə qarşı irəli sürülən cinayət işindən çıxarılmasını xahiş edib. Təqsirləndirilən şəxs M.Babayan vəsatətlə razı olduğunu bildirib. Dövlət ittihamçısı Təranə Məmmədova vəsatətin hazırkı prosesdə təmin olunmamasını xahiş edib. Məhkəmə vəsatətə müşavirə otağında baxılaraq cavab veriləcəyini diqqətə çatdırıb. Qeyd edək ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.

İran və Azərbaycan arasında sərhədin yenidən açılması iki ölkə münasibətlərində əsas mövzulardan biridir. Sozcu.az xəbər verir ki, bunu İranın xarici işlər naziri Abbas Arakçı deyib. Nazirin sözlərinə görə, son bir il ərzində İran və Azərbaycan prezidentləri arasında keçirilən bütün görüşlərdə, eləcə də onun Azərbaycan xarici işlər naziri ilə danışıqlarında sərhədin bağlı qalması məsələsi mütəmadi şəkildə gündəmə gətirilib: “Azərbaycan tərəfi bütün sərhədlərinin bağlı olduğunu və bunun yalnız İrana aid olmadığını əsas gətirib. Lakin mövzunun yenidən araşdırılacağına və qərarın nəzərdən keçiriləcəyinə dair söz verib. İran tərəfi hazırda sərhədin açılması ilə bağlı Bakının cavabını gözləyir. Sərhədin açılması Azərbaycan Respublikası ilə münasibətlərimizdə əsas məsələlərdən biridir”.

Xaçmaz rayonunda ağır qətl hadisəsi baş verib. Sozcu.az Bizim.Media-ya istinadən xəbər verir ki, rayon sakini, 42 yaşlı Həqiqət Tərlan qızı Məmmədova kəsici alətlə qətlə yetirilib. Hadisə ilə bağlı Xaçmaz polisi tərəfindən aparılan əməliyyat tədbirləri nəticəsində qətli törətməkdə şübhəli bilinən mərhumun 17 yaşlı oğlu saxlanılıb. Faktla bağlı Xaçmaz Rayon Prokurorluğunda cinayət işi başlanılıb.

Hesablama Palatası Elm və Təhsil Nazirliyində audit keçirir. Sozcu.az xəbər verir ki, bu barədə APA-ya qurumdan bildirilib. Qeyd edilib ki, Hesablama Palatası 2025-ci ilin İş Planına əsasən Elm və Təhsil Nazirliyində audit həyata keçirir. Audit Nazirliyin fəaliyyətində təhsil sisteminin informasiyalaşdırılması proseslərinin səmərəliliyi və nəticəliliyinin qiymətləndirilməsini əhatə edir. Bununla yanaşı, qurum Nazirliyin tabeliyində fəaliyyət göstərən “Təhsil Respublika İdman Mərkəzi” publik hüquqi şəxsdə də nəzarət tədbiri həyata keçirir. Palatadan əlavə edilib ki, hər iki istiqamət üzrə audit prosesi hazırda davam edir.

Səhiyyə Nazirliyinin “Respublika Narkoloji Mərkəzi” publik hüquqi şəxsinin sabiq baş direktoru Elşən Mustafayev və qurumun keçmiş direktor müavini Zamin Əliyevin cinayət işi üzrə məhkəmə prosesi keçirilib. Sozcu.az Teleqraf-a istinadən xəbər verir ki, bu gün Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə hökm oxunub. Hökmə əsasasən, Elşən Mustafayev 8 il, Zamin Əliyev 8 il azadlıqdan məhrum edilib. Qeyd edək ki, Azərbaycan Respublikası Səhiyyə Nazirliyinin “Respublika Narkoloji Mərkəzi” Publik Hüquqi Şəxsinin baş direktoru işləmiş Mustafayev Elşən Hümbət oğlu və həmin qurumun direktor müavini işləmiş Əliyev Zamin Sabir oğlunun qanunsuz əməlləri barədə keçirilmiş əməliyyat-axtarış tədbirləri nəticəsində Baş prokuror yanında Korrupsiyaya qarşı Mübarizə Baş İdarəsində başlanmış cinayət işinin istintaqı yekunlaşıb. İbtidai istintaqla Elşən Mustafayevin vəzifəyə təyin olunduğu 2023-cü ilin aprel ayından etibarən müavini Zamin Əliyev ilə əlbir olub həmin Mərkəzdə işləyən həkimlərin gələcəkdə fəaliyyətinə maneələrin yaradılmaması, pasiyentlərin stasionar müalicə müddətlərinin uzadılması, onların daha keyfiyyətli müalicə almaları üçün xəstə sayı daha az olan şöbələrə və ya tək nəfərlik palatalara qəbul edilməsi, narkomaniya xəstəliyindən əziyyət çəkən şəxslərin xüsusi terapiya proqramına qəbul olunması və digər məqsədlərlə ayrı-ayrı vətəndaşlardan müxtəlif məbləğlərdə pul vəsaitini rüşvət qismində almalarına əsaslı şübhələr müəyyən edilib. Toplanmış sübutlar əsasında Elşən Mustafayev və Zamin Əliyevə Cinayət Məcəlləsinin 308.2 (vəzifə səlahiyyətlərindən sui-istifadə ağır nəticələrə səbəb olduqda), 311.3.1 və 311.3.2-ci (rüşvət alma qabaqcadan əlbir olan bir qrup şəxs tərəfindən və təkrar törədildikdə) maddələri ilə yekun ittiham elan edilərək barələrində müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs qətimkan tədbiri seçilib.

Monteneqronun paytaxtı Podqoritsada türk vətəndaşlarının da iştirak etdiyi iddia edilən bıçaqlı insident nəticəsində saxlanılan Azərbaycan vətəndaşı sərbəst buraxılıb. Sozcu.az APA-ya istinadən xəbər verir ki, Azərbaycan vətəndaşı dünən axşam saatlarında azad olunub. Polisin müşahidə kameralarına baxdığı və nəticədə, Azərbaycan vətəndaşının hadisə baş verərkən evdə olduğu məlum olub.

Bakının Suraxanı rayonunda iki nəfər dələduzluqla üzləşdikləri barədə polisə müraciət ediblər. Bu barədə Sozcu.az-a Daxili İşlər Nazirliyinin Mətbuat xidmətindən məlumat verilib.  Suraxanı RPİ 30-cu Polis Şöbəsi əməkdaşlarının keçirdikləri tədbirlərlə dələduzluq etməkdə şübhəli bilinən əvvəllər də eyni əmələ görə məhkum olunmuş 27 yaşlı S.Hüseynov saxlanılıb.  Araşdırmalarla o, iki nəfəri maşın satacağı vədi ilə aldadaraq ümumilikdə 12300 manatlarını dələduzluq yolu ilə ələ keçirib.  Faktlarla bağlı Cinayət Məcəlləsinin müvafiq maddəsi ilə cinayət işi başlanılıb. Araşdırma aparılır.

16:37 Ermənistanın Baş naziri Nikol Paşinyan Yelisey Sarayında Fransa Prezidenti Emmanuel Makronla görüşüb. Sozcu.az xəbər verir ki, görüş N.Paşinyan 29–30 oktyabr tarixlərində Fransaya işgüzar səfəri çərçivəsində baş tutub. Qeyd edək ki, Paşinyan səfər çərçivəsində 8-ci Paris Sülh Konfransında iştirak edib. *** Makron Paşinyanı Azərbaycanla sülhün qurulması münasibətilə təbrik edib. Bu barədə Ermənistan mediası məlumat yayıb. E.Makron və N.Paşinyan TRIPP layihəsinin (Zəngəzur dəhlizinin Ermənistan ərazisindən keçəcək 42 kilometrlik hissəsi - red.) həyata keçirilməsinin təfərrüatlarını və Cənubi Qafqazda kommunikasiyaların açılması üçün görülən addımları müzakirə ediblər. Onlar həmçinin iqtisadiyyat, infrastruktur və humanitar layihələr sahəsində Ermənistan və Fransa arasında ikitərəfli münasibətləri, regional əhəmiyyət kəsb edən məsələləri, eləcə də Ermənistan-Avropa İttifaqı əməkdaşlığının gələcək inkişafını müzakirə ediblər.

DTX-nin Balakəndə keçirdiyi əməliyyat zamanı icra başçısı ilə yanaşı onun 3 müavini və şəhərin baş memarı da həbs olunub. Bu barədə “Yeni Sabah”a Balakən rayonunun sabiq icra başçısı və Milli Məclisin deputatı Nəsib Məhəməliyev məlumat verib “Məlumata görə, icra başçısı ilə bərabər onun 3 müavini və rayonun baş memarı da həbs olunub”.  Qeyd edək ki, icra başçısının üç müavini var: Dibirov Turan Eldar oğlu, Rüstəmova Nəzakət Carullah qızı və Nuriyeva Mehparə Zahid qızı. Şəhərin baş memarı Rəcəbov Tahir Əlipaşa oğludur.

Nazirlər Kabineti “Zabit heyətinə mənsub şəxslərə, gizirlərə, miçmanlara, müddətdən artıq həqiqi hərbi xidmət hərbi qulluqçularına, daxili işlər, ədliyyə, gömrük, miqrasiya, fövqəladə hallar və vergi orqanlarının rəis və sıravi heyətinə mənsub şəxslərə və onların ailələrinə pensiya təyin edilib verilməsi üçün uzun müddət xidmət vaxtının hesablanması qaydası haqqında” qərarda dəyişiklik edib. Sozcu.az-ın xəbərinə görə, qaydanın adı dəyişdirilib, “Hərbi qulluqçulara və ədliyyə orqanlarının rəis və sıravi heyətinə ödənilən işdənçıxarma müavinətinin miqdarı və ödənilməsi şərtləri haqqında” olacaq. Hazırda məhkəmənin qərarı ilə xidmətdən buraxılanlar istisna olmaqla, hərbi xidmətdən başqa əsaslara görə buraxılmış zabitlərə daxili işlər və ədliyyə orqanlarının orta, böyük və yüksək rəis heyətinə mənsub şəxslərə iki aylıq maaş həcmində işdən çıxarma pulu verilir. Dəyişikliyə əsasən, gələn il yanvarın 1-dən bu halda hərbi qulluqçulara və ədliyyə orqanlarının rəis və sıravi heyətinə mənsub şəxslərə iki aylıq vəzifə və rütbə maaşı həcmində işdən çıxarma pulu veriləcək. İndi pensiya almaq hüququ olmadan tərxis edilən, uzun müddət xidməti dörd ildən az olan gizirlərə, miçmanlara, müddətdən artıq həqiqi hərbi xidmət hərbi qulluqçularına daxili işlər və ədliyyə orqanlarının rəis və sıravi heyətinə mənsub şəxslərə — maaşın yarısı, uzun müddət xidməti dörd il və daha çox olanlara aylıq maaş və dörd ildən əlavə hər il üçün maaşın beşdə biri həcmində işdən çıxarma pulu verilir. Gələn ildən “pensiya hüququ olmadan xidmətdən buraxılan, təqvimi xidmət müddəti dörd ildən az olan gizirlərə, miçmanlara, müddətdən artıq həqiqi hərbi xidmət hərbi qulluqçularına və ədliyyə orqanlarının kiçik rəis və sıravi heyətinə mənsub şəxslərə bir aylıq vəzifə və rütbə maaşının 50 faizi həcmində, təqvimi dörd il və daha artıq xidmət edənlərə dörd il xidmətə görə bir aylıq vəzifə və rütbə maaşı və dörd ildən artıq xidmətin hər tam təqvim ili üçün əlavə olaraq bir aylıq vəzifə və rütbə maaşının 20 faizi həcmində, lakin ümumi məbləği iki aylıq vəzifə və rütbə maaşından çox olmamaqla işdən çıxarma pulu veriləcək.

Gəncədə qəza olub. Sozcu.az-ın məlumatına görə, hadisə şəhərin Şah İsmayıl Xətai prospektində qeydə alınıb. Belə ki, hərəkətdə olan "Mercedes" markalı təcili yardım avtomobili ilə minik maşını toqquşub. Xəsarət alan olmasa da, avtomobillərə ziyan dəyib. Fakt araşdırma aparılır.

Sosial şəbəkələrdə yayılan Tovuz rayonu Qovlar şəhəri 2 nömrəli körpələr evi-uşaq bağçasında uşağa qarşı yolverilməz davranışı əks etdirən video ilə bağlı araşdırma aparılıb. Sozcu.az xəbər verir ki, bu barədə Oxu.Az-a Qazax-Tovuz Regional Təhsil İdarəsindən məlumat verilib. Bildirilib ki, araşdırma nəticəsində görüntülərdəki hadisənin təxminən iki il əvvəl baş verdiyi məlum olub: "Təlim-tərbiyə prosesinə uyğun olmayan bu kimi halların yolverilməzliyi nəzərə alınaraq videoda yer alan sanitar-dayə 30 oktyabr 2025-ci il tarixində müvafiq əmrlə işdən azad edilib. Məktəbəqədər təhsil müəssisələrində təlim-tədrisə cəlb edilən uşaqların fiziki və psixoloji təhlükəsizliyi bizim üçün prioritet istiqamətlərdəndir. Uşaqlara qarşı uyğunsuz davranışlar qəbuledilməzdir və belə hallara qarşı barışmaz mövqedəyik. Məktəbəqədər təhsil müəssisələrində müvafiq məsələlərin tənzimlənməsi zamanı uşaqların psixoloji zərər görməməsi əsas amil kimi diqqət mərkəzində saxlanılır, bu istiqamətdə zəruri maarifləndirmə işləri görülür".

Azərbaycanın əksər rayonlarında həkim çatışmazlığı müşahidə olunur. Sozcu.az xəbər verir ki, bunu Tibbi Ərazi Bölmələrini İdarəetmə Birliyinin (TƏBİB) İcraçı direktoru Vüqar Qurbanov 27-ci Azərbaycan Beynəlxalq Tibb İnnovasiyaları Sərgisi - "Medinex 2025"in açılış mərasimi çərçivəsində jurnalistlərə açıqlamasında deyib. O bildirib ki, bu vəziyyət təkcə Azərbaycanda deyil, demək olar ki, bütün dünyada mövcud olan problemdir. "Həkimlərin yetişdirilməsi uzunmüddətli bir prosesdir və bu səbəbdən ölkədə, xüsusən də regionlarda bu çətinlik hiss olunur. Bu problemi aradan qaldırmaq məqsədilə "Mental Klinika" layihəsi həyata keçirilir. Layihə çərçivəsində ilin sonuna qədər elə bir sahə qalmayacaq ki, orada hər hansı ixtisas üzrə həkim çatışmazlığı mövcud olsun", - V.Qurbanov əlavə edib.

Balakən Rayon İcra Hakimiyyətinin başçısı İslam Rzayevin Dövlət Təhlükəsizliyi Xidməti (DTX) tərəfindən saxlanıldığı barədə xəbər yayılıb. Xəbərdə onun korrupsiya hüquqpozmaları və vəzifə cinayətləri ilə bağlı keçirilən əməliyyat çərçivəsində saxlanıldığı bildirilir. Sozcu.az-ın məlumatına görə, saxlanılan icra başçısının qızı Fəridə Rzayeva 2023-cü ildə Suraxanı Rayon Məhkəməsinin hakimi təyin edilib.  O 2023-cü ilədək vəkil kimi fəaliyyət göstərib.

Regional kommunikasiya o deməkdir ki, həm Ermənistan, həm də Azərbaycan daxili, ikitərəfli və beynəlxalq əlaqələr üçün bir-birinin ərazisindən istifadə etmək imkanı əldə edəcək və bu, ərazimizdən beynəlxalq tranzit üçün yeni bir marşrutun açılmasıdır. Sozcu.az xəbər verir ki, bunu Ermənistanın Baş naziri Nikol Paşinyan “Tramp yolu” layihəsi barədə deyib. “Dünyanın hazırda təchizat zənciri böhranı yaşadığını nəzərə alsaq, bu, həm beynəlxalq ticarət, həm də regionumuz üçün həqiqətən də fərq yarada bilər. Fars körfəzindən, Oman körfəzindən Qara dənizə qədər kommunikasiya kanalları açılacaq, Xəzər dənizi ilə Aralıq dənizi arasında yeni bir əlaqə yaranacaq, Ermənistan üçün yeni imkanlar yaradılacaq”, - o bildirib.