“Bu qrup islahatlara təhlükədir” – Fərhad Əhmədov ittihamlara cavab verdi

Rusiyada yaşayan azərbaycanlı milyarder Fərhad Əhmədov onu tənqid edənlərə cavab verib.

“Yeni Sabah” xatırladır ki, milyarder 9 fevral 2020-ci ildə Azərbaycanda keçiriləcək növbədənkənar parlament seçkiləri geniş həcmli yazı yazaraq “yol xəritəsi” təklif etmişdi. Fərhad Əhmədov həmin yazıda müxalifətin faydalarından, seçki islahatlarından, nomenklatur idarəçiliyin zərərlərindən xüsusi olaraq bəhs etmişdi.

Fərhad Əhmədovun bu yazısı birmənalı qarşılanmamışdı. Azərbaycan üçün həssas dövrdə Rusiyada yaşayan bir milyarderin belə bir yazı ilə çıxış etməsinə səmimi şəkildə tənqid edənlərlə yanaşı, buna konspirativ yanaşanlar da oldu.

Fərhad Əhmədov dünən növbəti dəfə sosial şəbəkə hesabında geniş status paylaşıb. Milyarderin statusu onu tənqid edənlərə həsr edilib. Fərhad Əhmədov əvvəlcə qeyd edib ki, fikirlərinin ictimai rezonansa səbəb olması sevindirci haldır. Digər tərəfdən milyarder onu səmimi şəkildə tənqid edənlərə təşəkkürünü bildirib.

O, həmçinin qərəzli tənqiddən də danışıb. Fərhad Əhmədovun fikrincə, Azərbaycan hakimiyyətinin daxilindəki bəzi qruplar media sahəsindəki əlaltıları vasitəsilə onu qərəzli şəkildə tənqid edib, fikirlərini təhrif edərək müzakirələrin məcrasını dəyişməyə çalışıb. Fərhad Əhmədov onu sifarişlə tənqid edən media qurumlarını “kütləvi dezinformasiya və təbliğat vasitəsi” adlandırıb.

“Sui-qəsdlər barədə səsləndirilən nəzəriyyələrdə mənə kukla oynadan rolu ayrılıb (bu oyuncaqlar özləri kimlərdir?). Bütün bunlar heç gülməli də deyil və artıq darıxdırıcıdır” – deyə milyarder əlavə edib.

O daha sonra ölkə rəhbrəliyi tərəfindən islahatlara təhlükə yaradan qruplardan danışıb. “Özlərini dövlətin və bütövlükdə hakimiyyətin siyasətini dəstəkləyən kimi göstərən və göstərilən “hökumətyönlü” qaynaqlar, əslində, hakimiyyət daxilindəki ayrı-ayrı elita qruplarının maraqlarını – hansı ki, ambisiyaları və maraqları həmişə dövlətin və cəmiyyətin maraqları ilə üst-üstə düşməyən, bəzən hətta zidd olan – ifadə edir. Məhz bu qrup – maliyyə və inzibatı gücü olan – ölkə rəhbərliyinin həyata keçirdiyi islahatlara təhlükədir”, – deyə Fərhad Əhmədov vurğulayıb.

Sozcu.az

Facebook Comments