Daha bir təşkilat aksiya qərarı verdi

Piketdə 2020 -ci ildən uşaq pulunun bərpası, təqaüd yaşının aşağı salınması, pensiyaların, müavinətlərin artırılması tələb olunacaq.

Sozcu.az xəbər verir ki, noyabrın 11-də Azərbaycan Demokratiya və Rifah (ADR) Hərəkatı İdarə Heyətinin növbəti toplantısı keçirilib. Yığıncaqda ilk olaraq görülmüş işlər və qərarların icra vəziyyəti haqqında məlumat dinlənilərək qəbul edilib.

Respublikada ictimai siyasi vəziyyət və ADR Hərəkatının vəzifələri geniş müzakirə olunaraq hakimiyyətin ölkədə müxalifət fəallarına qarşı tətbiq etdiyi repressiv təzyiq üsulları, onların üzərinə qoyulmuş polis nəzarəti kəskin pislənilib və hakimiyyətdən belə təqib metodlarına son qoyması tələb edilib. Müzakirələr zamanı hüquq müdafiəçisi Oktay Gülalıyevin hazırkı durumunun ciddi narahatlıq yaratdığına diqqət çəkilib, hakimiyyət orqanlarından bu qəzanın ciddi araşdırılması, baş vermiş hadisənin qəza, ya qəsd olmasına aydınlıq gətirilməsinin vacibliyi vurğulanıb, istintaqın nəticələrinin ictimaiyyətdən gizlədilməsinin yolverilməz olduğu bildirilib və bu qəzada maraqlı tərəflərin olduğuna ciddi şübhələrin yol açdığı ifadə edilib.

Respublikada yaranmış ağır ictimai, siyasi və sosial durumu dəyərləndirən müzakirə iştirakçıları mövcud vəziyyətə dair bəyanat qəbul edib.

ADR Hərəkatı İdarə Heyəti dözülməz sosial durumun, acınacaqlı yaşam şərtlərinin əhalinin az təminatlı hissəsinin, xüsusilə də yaşlı nəslin və uşaqların güzəranının daha da pisləşməsinə səbəb olduğunu əsas gətirərək, 2020 -ci ilin dövlət büdcəsində uşaq pulunun verilməsinin nəzərə alınması, təqaüd yaşının aşağı salınması, pensiyaların, müavinətlərin artırılması tələbləri ilə noyabrın 19-da saat 15-dən 16-dək Sosial Müdafiə Nazirliyinin qarşısında piket keçirməyə qərar veriblər.

Yığıncağın sonunda cari məsələlərə baxılıb.

Sozcu.az

Facebook Comments