“Bu savaş ölkənin gələcəyi və ya islahatı ilə bağlı deyil” – RUSLAN İZZƏTLİ

D18 Hərəkatının başqanı Ruslan İzzətli dövlət başçısının kadr dəyişiklikləri siyasətinə münasibət bildirib.

Sozcu.az Ruslan İzzətlinin münasibətini təqdim edir:

Bu gün baş verən kadr yerdəyişməsi haqda:

1. Ramiz Mehdiyevin PA-nın rəhbərliyindən azad edilməsi hakimiyyətin Rusiyadan uzaqlaşıb qərbə inteqrasiyası deyil. Hakimiyyətin Rusiya ilə münasibətini hansı məmur həll etmir ki?! ”Rusiyanın dostu” ordenini daşıyan kifayət qədər məmurlar var ki, yüksək vəzifədədirlər.

2. Baş nazirin müavinlərinin çıxarılması və keçmiş İqtisadiyyat Naziri Şahin Mustafayevin təyinatı yanlışdır. Prezidentlik idarəetməsində baş nazir postu olmamalıdır. Çünki prezident hökümətin baçısıdır. Amma yenə təyinat edilirdisə, heç bir səlahiyyəti olmayan şəxsləri təyin etməkdənsə hazırkı nazirlər- məsələn Maliyyə və ya İqtisadiyyat Nazirləri həm də Baş Naziri müavini ola bilərdi.

3. Vergilər Nazirliyi və Əmlak Komitəsinin ləğv edilib İqtisadiyyat Nazirliyinə birləşdirilməsi doğru qərardır. Amma Gömrük Komitəsinin hələ də müstəqil qurum kimi qalması anormallıqdır. Gömrük Komitəsi də ləğv edilib Maliyyə və ya İqtisadiyyat Nazirliyinə biləşməlidir. Hakimiyyət struktur islahatı etməlidir. Kiçik və effektiv hökümət modelinə keçməlidir. Bununla həm də büdcədən lazımsız xərcləmələr azalacaq.

4. Elmlər Akademiyası kimi qurum sovetlərdən qalan mənasız qurumdur. Elmlər Akademiyası ləğv edilməli Akademiyanın tərkibindəki institutlar Universitetlərə veriməlidir. 85 yaşlı Akif Əlizadənən yerinə 81 yaşlı Ramiz Mehdiyevin təyinatı nəyi dəyişəcək ?!

5. Çox təəssüf ki, Diplomatiya və Təhsil hakimiyyətin ”cərimə meydançasını” xatırladır. Hansı nazir vurulursa ya səfir göndərilir, ya da Elmlər Akademiyasına institut rəhbəri. Bu da ölkənin xarici siyasəti və təhsilə verdiyi qiyməti əyani göstərir.

Son olaraq hakimiyyət içi qrup savaşı nağıllarına inanmayın. Hakimiyyət monolitdir. İlham Əliyev istədiyi kadrı çıxarıb yenisini təyin edə bilir. Sosial mediada və mətbuatda adı çəkilən qrupların isə ölkənin gələcəyi və strategiyası haqda baxışları eynidir. Sadəcə hansısa məmurun hansısa məmuru vurması iqtisadi maraqlardandır. Kimin daha çox pul qazanmaq istəyi məmur arasında savaşı gücləndirir. Bu savaş ölkənin gələcəyi və ya islahatı ilə bağlı deyil.

Sistem və yanaşma dəyişməyəcəksə şəxslərin dəyişməsi müsbət addım deyil.

Facebook Comments