Güneyli məhbus barədə yeni cinayət işi açılıb

Qəzvindən olan və bir illik məhkumluq dövrünü keçirən azərbaycanlı fəal Məhəmmədrza Muradbehruzi barəsində yeni cinayət işi açılaraq onun həbs müddətinin uzadılmasına çalışılır.

İyulun 15-i axşam saatlarında Qəzvinin Məhəmmədiyyə şəhərində özünün şəxsi evində həbs edilən ictimai fəala qarşı yenidən “sosial mediada qanunlara zidd paylaşımlar və hökumət əleyhinə təbliat” ittihamı irəli sürülüb.

Məhəmmədrza Muradbehruzi həbs edildikdən bu günə kimi ailəsi ilə görüş və vəkillə təmin olunmaq hüququndan istifadə edə bilmir.

Qeyd edək ki, bundan öncə iyulun 13-ü axşam saatlarında Məhəmmədrza Muradbehruzinin həyat yoldaşı, mədəni fəal Suru Babayi Çigəni də təhlükəsizlik məmurları tərəfindən həbs edilib.

Suru Babayinin həbsinin onun “məcburi hicaba yox” kampaniyasına qatılması və həyat yoldaşı Məhəmmədrza Muradbehruzi ilə birlikdə sosial mediada video paylaşması olub.

22 avqust 2021-ci ildə sosial mediada Məhəmmədrza Muradbehruzinin mülki geyimli təhlükəsizlik məmurları tərəfindən saxlanılaraq naməlum yerə aparıldığını əks etdirən video yayılmışdı.

Sonradan ictimai fəalın Əli Xameneyinin xaricdən koronavirusa qarşı peyvəndin alınmasını qadağan etdiyinə görə tənqidi videolar paylaşdığı üçün saxlanıldığı məlum oldu.

Muradbehruzi paylaşdığı videolarda bilgisi olmadığı halda pandemiyanı əhəmiyyətsiz adlandırdığı və vaxtında ölkəyə peyvəndin gətirilməsinə icazə vermədiyinə görə Əli Xameneyini tənqid edir.

Facebook Comments