Şadlinski və həyat yoldaşına ağır cəza verildi

Lənkəran Ağır Cinayətlər Məhkəməsində Şirvanda qanunsuz olaraq narkotik vasitələri satmaqda təqsirləndirilən Firuz Şadlinski, onun həyat yoldaşı Qönçəgül Baxışəliyeva və Asif Nəzərovun cinayət işi üzrə məhkəmə istintaqı yekunlaşıb.

Sozcu.az-ın əldə etdiyi məlumata görə, hökmə əsasən, Firuz Şadlinski 9 il 6 ay, onun həyat yoldaşı Qönçəgül Baxışəliyeva 7 il və Asif Nəzərov isə 8 il 6 ay azadlıqdan məhrumetmə cəzasına məhkum olunub.

Daha sonra həmin şəxslər apellyasiya şikayəti veriblər. Şikayət Şirvan Apellyasiya Məhkəməsində araşdırılır.

Qeyd: Daxili İşlər Nazirliyinin ötən ilin yayında yaydığı məlumata görə, Şirvan şəhər sakinləri, əvvəllər narkotiklərə görə məhkum olunmuş 56 yaşlı Firuz Şadlinskinin və onun həyat yoldaşı, 55 yaşlı Qönçəgül Baxışəliyevanın yaşadıqları ünvanda tiryəkxana təşkil etməklə narkotik aludəçilərinə narkotik maddələrin istehlakına şərait yaratdıqları, eləcə də narkotik vasitələrin satışı ilə məşğul olduqları müəyyən edilib.

Polis əməkdaşları tərəfindən evə keçirilən baxış zamanı oradan “patı” və “şüşə” adlanan metamfetamin, heroin, elektron tərəzi və narkotiklərin satışından əldə edilən pullar aşkarlanaraq maddi sübut kimi götürülüb.

Həmçinin əməliyyat tədbiri keçirilən zaman orada narkotik vasitə qəbul edən iki şəxs də saxlanılıb. Araşdırmalarla onların Şirvan şəhər sakini Novruz Məmmədov və Hacıqabul rayon sakini Namiq Abdullayev olduqları müəyyənləşdirilib. Hər iki şəxs dindirilmə zamanı tiryəkxanaya narkotik vasitə qəbul etmək üçün gəldiklərini və pul müqabilində ev sahiblərinin onlara şərait yaratdıqlarını bildiriblər.

F.Şadlinski və Q.Baxışəliyeva isə izahatlarında onlara məxsus fərdi yaşayış evində narkotiklərin satışı həyata keçirdiklərini etiraf ediblər.

Bundan başqa, şöbə əməkdaşlarının keçirdikləri əməliyyat tədbirləri nəticəsində narkotiklərin satışı ilə məşğul olan Asif Nəzərov da saxlanılıb.

A.Nəzərovun üzərinə keçirilən baxış zamanı ondan sellofan bükümlərdə olan 21 qram “patı” adlanan psixotrop maddə – metamfetamin, 25 qrama yaxın tiryək, heroin və bir ədəd elektron tərəzi aşkar edilərək götürülüb.

Faktla bağlı Şirvan ŞPŞ-də Cinayət Məcəlləsinin müvafiq maddələri ilə cinayət işi açılıb.

Xatırlatma: Digər şəxsilərin cinayət işi ayrıca icraata ayrılıb.pravda

Facebook Comments