Goranboyda bacı-qardaşı qətlə yetirən şəxs məhkəmə qarşısında

Goranboy rayonunda bacı-qardaşı qətlə yetirməkdə təqsirləndirilən İlham Haqverdiyevin cinayət işi üzrə ibtidai istintaq başa çatıb.

Sozcu.az-ın əldə etdiyi məlumata görə, iş baxılması üçün Gəncə Ağır Cinayətlər Məhkəməsinə göndərilib.

Cinayət işi hakim Faiq Mahmudovun icraatına verilib.

Məhkəmənin hazırlıq iclası mayın 31-nə təyin edilib.

Qeyd: Hadisə bu il fevralın 6-da rayonun Qarasüleymanlı kəndində qeydə alınıb.

Belə ki, rayon sakinləri – 1970-ci il təvəllüdlü Pərviz Rəcəb oğlu Namazov və 1960-cı il təvəllüdlü Səlmi Rəcəb qızı Namazova rayonun Qarasüleymanlı kəndində, Goran çayının yaxınlığındakı torpaq sahəsində olan zaman rayon sakini, 1965-ci il təvəllüdlü İlham Haqverdiyevlə mübahisələri yaranıb.

Mübahisəyə səbəb elə hadisənin törədildiyi yerdəki torpaq sahəsi olub.

İ.Haqverdiyev torpağın məhkəmə qərarı ilə ona məxsus olduğunu iddia edərək avtomobilindəki bıçağı götürərək bacı-qardaşı boyun və digər nahiyələrdən bıçaqlayıb. Hər iki şəxs aldığı ağır xəsarətlərdən hadisə yerindəcə dünyasını dəyişiblər.

Qətli törətməkdə şübhəli bilinən İ.Haqverdiyev polis əməkdaşları tərəfindən saxlanılıb.

Onun barəsində Cinayət Məcəlləsinin 120.2.9-cu (Qəsdən adam öldürmə, təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddəsi ilə ittiham irəli sürülüb.

Facebook Comments