Məğlubiyyət ordunun adına yazılmamalıdır

Ceyhun Nəbi

Sabiq Daxili İşlər naziri İsgəndər Həmidov deyirdi ki, məğlubiyyət ordunun adına yazılmamalıdır. Bəli, əsgərə təlim keç, yaxşı hazırla, psixoloji əhval-ruhiyyəsini gücləndir, silah-sursat, ərzaq təminatını dəqiq və ciddi şəkildə təmin et o səni dişi ilə, qanı ilə heç şübhəsiz ki, uğura aparacaq. 90-cı illərin əvvəllərində ağır keçirdiyimiz dönəmdə əlbəttə biz yuxarıda qeyd etdiklərimin bir çoxunu edə bilmədik. Bununla bərabər Azərbaycanın pərakəndə ordusu bir çox uğurlu əməliyyatlara imza atmış, Rusiya dəstəkli işğalçı ordunun qarşısında öz əzəmətli duruşunu qoruya bilmişdi. Ordu bunu etdi. Amma bu pərakəndə ordunun qazandığı uğurlar zamanla uğursuzluqlarla əvəzləndi. Çünki, siyasi iradə sistemli şəkildə fəaliyyət müəyyən edə bilmədi. Uğur üçün lazım olan harmoniyanı təmin etmək üçün mütləqdir ki, döyüş cəbhəsində qazanılan uğuru siyasi masada qüvvətləndirmək lazım idi. Dövrü siyasi başların düşüncə bazası, iradəsi, bacarıqları qeyd etdiklərimi gerçəkləşdirməyə yetmədi. Adamlar siyasi baxımdan yetkin deyildilər, bəziləri sözün həqiqi mənasında savadsız idilər, iradə məsələsinə gəldikdə isə bu iradələr meydanlarda söz deməyə yetirdi, amma masaya yumruq formasında vurulacaq iradə deyildi. Qısa dönəmdə göstərilən iradəsizlik bizi tamamilə bərbad bir hala gətirdi. Bu bizim ilk dönəmdə uğursuzluğumuzun əsas ciddi səbəblərindən idi. Gəldik Qarabağ savaşının ikinci mərhələsinə:

Əsgər döyüşür, psixoloji əhval-ruhiyə yerində, sədləri aşa-aşa məqsədimizə doğru gedirik, amma döyüşün isti məqamında ani olaraq savaş dayanır və gecə ilə mahiyyəti bizləri məyyus edən müqavilə imzalanır. Ordu qazana-qazana gedir, siyasi iradə isə bunu durdurur və tam 3-cu tərəfin məqsədlərinə uyğun istək həyata keçirilir. Bu ordunun qazandığı uğuru siyasi və diplomatik masada uduzmaq idi. Əsgərin topu, silahı ilə qazandığı uğuru qələmlə uduzmaqdır bunun adı.

Rusları Qarabağa gətirmək, “sülhməramlı” masqası geyindirmək, onlara meydan vermək masada uduzmağın tam özüdür. Bəli, bu məğlubiyyət ORDU’NUN ADINA YAZILMAMALIDIR !

Facebook Comments