“Qızının doğum günündə şəhid oldu, 85 gün itkin düşdü…” – Şəhid zabitin qardaşı…

44 günlük Vətən müharibəsində qəhrəmancasına şəhid olan hərbçilərimizdən biri də “N” saylı hərbi hissənin qərargah rəisi Niyət İmran oğlu Şirəliyevdir.

Moderator.az-a açıqlamasında şəhid zabitimizin qardaşı Eldar Şirəliyev Niyətin evin böyük oğlu olduğunu bildirib:

“Bir bacı və dörd qardaşıq. Niyət isə evin böyük oğlu idi. Biz iki qardaşın hərbçi olmasına səbəb Niyət olub, ondan nümunə götürmüşük. Amma Niyət isə kiməsə baxıb hərbçi olmaq qərarına gəlməyib. O, çox vətənpərvər bir insan idi və ona görə də bu yolu da özü seçdi.

Niyət 2016-cı ilin aprel döyüşlərində, həm də Tovuz döyüşlərində iştirak edib. Vətən müharibəsi zamanı Niyət Şəmkirdə “N” saylı hərbi hissənin qərargah rəisi idi və ordan da Murov istiqamətində döyüşlərə başlamışdı. Mən və digər qardaşım isə arxa cəbhədə xidmət edirdik və əsas da təminat işini yerinə yetirirdik.

Elə oldu ki, sentyabrın 28-də qızı Zeynəbin ad günündə Niyətin şəhid xəbərini aldıq. Biz evə gəldik, daha sonra Gəncəyə getdik, amma tapılmadı. Əsgərlər Niyətin dostu, kurs və iş yoldaşı kapitan Pənahov Əkbərə onun şəhid olduğunu deyəndə silahını götürüb döyüşə yollanıb. Əkbər də həmin istiqamətdə şəhid oldu və itkin düşdü. Niyət 85 gün itkin oldu, yalnız dekabrın 21-də tapıldı və Şamaxı Şəhidlər Xiyabında dəfn olundu. Döyüş yoldaşlarının dediyinə görə Niyət boğazından snayperlə vurulub və nəşi neytral da qalıb. Əkbərin nəşini isə iyul ayında tapdılar”.

Qeyd edək ki, Niyət Şirəliyev 1990-cı il fevralın 9-da Şamaxı rayonunun Ovçulu kəndində anadan olub. 1996-2007-ci illərdə B.Alıyev adına Ovçulu kənd tam orta məktəbində, 2007-2011-ci illərdə Heydər Əliyev adına Azərbaycan Ali Hərbi Məktəbində (AAHM) təhsil alıb. Şəhid zabitimizin bir oğlu və bir qızı yadigar qalıb.

Şəhid Niyət Şirəliyev ölümündən sonra ölkə başçısı tərəfindən “Vətən uğrunda” medalı ilə təltif edilib.

Facebook Comments