Ərdəbildə Əlirza Fərşiyə dəstək: Şəhər divarlarına siyasi məhbusun şəkilləri vuruldu-FOTOLAR

Ərdəbilli milli-mədəni fəallar siyasi məhbus Əlirza Fərşiyə dəstək aksiyası keçirib.

Aprelin 10-da Ərdəbil şəhərinin bir qrup milli-mədəni fəallı türk dilində tədris uğrunda apardığı mübarizəyə görə həbs edilən və “Böyük Tehran” həbsxanasında saxlanılan Əlirza Fərşiyə dəstək məqsədilə şəhər divarlarında, özəlliklə “Azadi” küçəsində onun qrafit və divar rəsmlərini çəkiblər.

Milli-mədəni fəallar Azadi” küçəsinin adını Əlirza Fərşi küçəsi qoyublar. Bu aksiyalar İran məhkəmə sisteminin ədalətsiz qərarlarına və basqılarına qarşı əhalinin diqqətini cəlb etmək məqsədi güdür.

Məlumdur ki, İranda “Azadi” sözü yalnız küçə və meydanların adında özünü göstərir. Mədəni fəallar bu simvolik hərəkətləri ilə həm də ölkədə azadlığın olmadığına işarə edirlər.

Qeyd edək ki, Əlirza Fərşi “Şərif Texnologiya Universiteti”ndə kompüter mühəndisliyi üzrə magistr dərəcəsi alıb və İran-İraq müharibəsi şəhidinin oğludur.

Milli-mədəni fəaliyyətinə, o cümlədən Azərbaycan kəndlərində türk dilində nəşrlərdən ibarət kitabxanaların yaradılmasına və ana dilində tədris kampaniyası başlatdığına görə bir neçə dəfə tutulub və həbs edilib.

Onun təhlükəsizlik orqanlarının təzyiqi və tapışırığı nəticəsində Universitetdə müəllim kimi fəaliyyətinə də Universitet rəhbərliyi tərəfindən qadağa qoyulub.

O, hal-hazırda cəzasını Tehran həbsxanasında çəkir. Bir neçə gün öncə barəsində daha bir cinayət işi açılaraq həbs müddəti daha 50 ay uzaldılıb.

Facebook Comments