“Bu cür addımlar hər iki xalqın daha da bütövləşməsində, yaxınlaşmasında rol oynayacaq…”

“İşğal altında olan torpaqlarımızın azadlığı uğrunda mübarizədə canlarından keçən qəhrəmanlarımızın adını əbədiləşdirmək həm mənəvi, həm də insanların öz torpaqlarına sahibliyini sübut etmək cəhətdən çox vacibdir”

Bunu Moderator.az-a açıqlamasında yazıçı Nəriman Əbdülrəhmanlı deyib. Yazıçı şəhidlərimizin adının qardaş Türkiyədə əbədiləşdirilməsinin hər iki ölkənin bir-birinə yaxınlaşmasına, bütövləşməsinə xidmət etdiyini bildirib:

“İşğal altında olan torpaqlarımızın azadlığı uğrunda mübarizədə canlarından keçən qəhrəmanlarımızın adını əbədiləşdirmək həm mənəvi, həm də insanların öz torpaqlarına sahibliyini sübut etmək cəhətdən çox vacibdir. Bu baxımdan da həm Azərbaycanda, həm də qardaş Türkiyədə belə tədbirlərin keçirilməsi, xatirələrinin əbədiləşdirilməsi mənim fikrimcə çox təqdirəlayiq bir təşəbbüsüdür. Hətta bu yaxınlarda belə bir təklif irəli sürülmüşdü ki, işğaldan azad edilən rayonlarımızın bərpasından sonra salınacaq küçərələ, tikiləcək məktəblərə, mədəniyyət ocaqlarına Qarabağ müharibəsində şəhid olan qəhrəmanlarımızın adını vermək yerinə düşərdi. Düşünürəm ki, o qəhrəmanlarımızın adı təkcə respublikamızda deyil, həm də xalqımızın haqq işini müdafiə edən, dostluq münasibətlərimiz olan başqa dövlətlərdə də əbədiləşdirilsin. Yəqin ki, bu istiqamətdə bundan sonra da işlər aparılacaq. Təbii ki, qardaş Türkiyə Azərbaycana həmişə “bir millət iki dövlət” prinsipi ilə baxır. Buna görə də əksər şəhərlərində Azərbaycanın tarixi qəhrəmanlarının, mədəniyyət xadimlərinin adına parklar, küçələr, dərnəklər yaradılıb. Bu addım bundan sonra da davam edəcək və başqa cür də ola bilməz. Çünki Azərbaycanın əksər şəhərlərində də türk dövlət xadimlərinin, yazıçılarının adlarını daşıyan küçələr var, büstləri qoyulub. 1918-ci ildə Azərbaycanı xilas edən Qafqaz İslam Ordusunun xatirəsi əbədiləşdirilib. Bu cür addımlar hər iki xalqın daha da bütövləşməsində, yaxınlaşmasında rol oynayacaq”.

Qeyd edək ki, Türkiyənin Balıkesir şəhərində ikinci Qarabağ müharibəsində şəhid olmuş Məmmədağa Səfərovun adı yeni açılacaq orta məktəblərdən birinə verilərək əbədiləşdiriləcək. Xatırladaq ki, Məmmədağa Səfərov Balıkesir Universitetinin Mühəndislik fakültəsində oxuyarkən təhsilini yarımçıq qoyaraq, cəbhəyə yollanıb. O, ötən il oktyabrın 21-də Xocavənd uğrunda gedən döyüşlərdə şəhid olub.

Facebook Comments