Xəbər lenti

irann.jpgİslam Respublikası bu addımı ilə türk dilini İranda xarici dil kimi gördüyünü gizlətmir

Urmiya Universitetində türk dili (Azərbaycan dili) və ədəbiyyatı fənninin tədrisinə icazə verilməsi ilə bağlı məlumatlar yayılıb. Daha doğrusu, bu barədə jurnalistlərə açıqlamasında Urmiya Universitetinin rektoru Rəhim Hubnəqi bildirib. Hubnəqi deyib ki, gələn semestrdən universitetdə türk dili və ədəbiyyat fənni üzrə iki dərs tədris olunacaq.

Onun sözlərinə görə, dil dərsində iştirak könüllü olacaq. Xatırladaq ki, İran Konstitusiyasının 15 və 19-cu maddələrində ana dilində tədris məsələsi nəzərdə tutulur. Lakin bu iki maddə uzun illər icra olunmayıb. 

Məsələ ilə bağlı "Şərq”ə danışan politoloq Sədrəddin Soltan bildirib ki, Azərbaycan mediasının İran hakimiyyətinin bu sayaq təbliğatına tez uyması qəribədir: 

"Elə hesab edilir ki, bu rejim Azərbaycan türklərinin milli-mədəni haqlarını verir. Ancaq reallıqda bunun heç işartısı belə yoxdur. Türklərin milli-mədəni haqlarının təmin edilməsini istəyənləri həbs edən bir rejim sizcə, belə asanlıqla onların dil haqqını tanıyarmı?! Təbii ki, yox. Bir də ki, bu, yeni məsələ deyil. Əvvəllər də bu kimi xəbərlər yayılıb. Başqa universitetlərdə eyni statusla, fakültətiv fənn kimi türk dilinin tədrisi məsələsi gündəlikdə olub. Ötən illərdə prezidentliyə keçmiş namizədlər Mahmud Əhmədinejad və Mirhüseyn Musəvi də hökumət başçıları seçiləcəkləri halda türk dilinin universitetlərdə tərdisini təşkil edəcəklərinə söz vermişdilər. 

Həmin siyasi kampaniyada Əhmədinejad qalib gəlsə də, verdiyi vədin heç bir hərfini də sonradan dilinə gətirmədi. Oxşar məsələ kürd dilinin tədrisi ilə bağlı da gündəliyə çıxarılıb. Bütün bunlar hakimiyyətin türk dili ilə bağlı yeni oyunudur. İslam Respublikası bu addımı ilə türk dilini İranda xarici dil kimi gördüyünü gizlətmir. Əvvəla, türk dili xarici dil olaraq, fakültətiv məşğələ kimi tədris ediləcək”. Ekspertin fikrincə, bu məsələnin Güney Azərbaycandakı soydaşlarımıza heç bir xeyri yoxdur. Əksinə, bir az dərin düşünülərsə, ziyanı var. Çünki Azərbaycan türklərinin milli haqqının təminini istəyənlər arasında Azərbaycan türkcəsinin İranın dövlət dili olmasını tələb edənlər də var. İranın irəli sürdüyü bu sayaq cəfəng ideyalar Güney Azərbaycanda çoxdan çıxdaş olub. Bu baxımdan Tehran hakimiyyəti Azərbaycan türklərinin haqlı istəklərindən yayınmaq üçün zaman-zaman bu üsuldan yararlanır”.

© 2016 www.sozcu.az - Bütün hüquqlar qorunur.

Ünvan: Ağsu şəh., Melaratorlar qəs., ev 7. m.6
Tel: 0202264228
Təsisçi Elşən Əlisoy - Mob: 055 972 53 53
email:Sozcu.az@gmail.com

Saytda yerləşdirilmiş hər bir materiala olan hüquqlar Azərbaycan Respublikasının qanunvericiliyinə, həmçinin müəlliflik hüququ qanunlarına əsasən qorunur.
Müəlliflərin mövqeyi redaksiyanın mövqeyi ilə uyğun gəlməyə bilər. Saytdakı materiallardan istifadə zamanı istinad zəruridir.